| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. පරිහානධම්‌මසුත්‌තං
3. Parihānadhammasuttaṃ
96. ‘‘පරිහානධම්‌මඤ්‌ච වො, භික්‌ඛවෙ, දෙසෙස්‌සාමි අපරිහානධම්‌මඤ්‌ච ඡ ච අභිභායතනානි. තං සුණාථ. කථඤ්‌ච, භික්‌ඛවෙ, පරිහානධම්‌මො හොති? ඉධ, භික්‌ඛවෙ, භික්‌ඛුනො චක්‌ඛුනා රූපං දිස්‌වා උප්‌පජ්‌ජන්‌ති පාපකා අකුසලා සරසඞ්‌කප්‌පා 1 සංයොජනියා. තඤ්‌චෙ භික්‌ඛු අධිවාසෙති නප්‌පජහති න විනොදෙති න බ්‍යන්‌තීකරොති 2 න අනභාවං ගමෙති, වෙදිතබ්‌බමෙතං, භික්‌ඛවෙ, භික්‌ඛුනා – ‘පරිහායාමි කුසලෙහි ධම්‌මෙහි’. පරිහානඤ්‌හෙතං වුත්‌තං භගවතාති…පෙ.….
96. ‘‘Parihānadhammañca vo, bhikkhave, desessāmi aparihānadhammañca cha ca abhibhāyatanāni. Taṃ suṇātha. Kathañca, bhikkhave, parihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā 3 saṃyojaniyā. Tañce bhikkhu adhivāseti nappajahati na vinodeti na byantīkaroti 4 na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti…pe….
‘‘පුන චපරං, භික්‌ඛවෙ, භික්‌ඛුනො ජිව්‌හාය රසං සායිත්‌වා උප්‌පජ්‌ජන්‌ති…පෙ.… පුන චපරං, භික්‌ඛවෙ, භික්‌ඛුනො මනසා ධම්‌මං විඤ්‌ඤාය උප්‌පජ්‌ජන්‌ති පාපකා අකුසලා සරසඞ්‌කප්‌පා සංයොජනියා. තඤ්‌චෙ භික්‌ඛු අධිවාසෙති නප්‌පජහති න විනොදෙති න බ්‍යන්‌තීකරොති න අනභාවං ගමෙති, වෙදිතබ්‌බමෙතං, භික්‌ඛවෙ, භික්‌ඛුනා – ‘පරිහායාමි කුසලෙහි ධම්‌මෙහි’. පරිහානඤ්‌හෙතං වුත්‌තං භගවතාති. එවං ඛො, භික්‌ඛවෙ, පරිහානධම්‌මො හොති.
‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu adhivāseti nappajahati na vinodeti na byantīkaroti na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti. Evaṃ kho, bhikkhave, parihānadhammo hoti.
‘‘කථඤ්‌ච, භික්‌ඛවෙ, අපරිහානධම්‌මො හොති? ඉධ, භික්‌ඛවෙ, භික්‌ඛුනො චක්‌ඛුනා රූපං දිස්‌වා උප්‌පජ්‌ජන්‌ති පාපකා අකුසලා සරසඞ්‌කප්‌පා සංයොජනියා. තඤ්‌චෙ භික්‌ඛු නාධිවාසෙති පජහති විනොදෙති බ්‍යන්‌තීකරොති අනභාවං ගමෙති, වෙදිතබ්‌බමෙතං, භික්‌ඛවෙ, භික්‌ඛුනා – ‘න පරිහායාමි කුසලෙහි ධම්‌මෙහි’. අපරිහානඤ්‌හෙතං වුත්‌තං භගවතාති…පෙ.….
‘‘Kathañca, bhikkhave, aparihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ, bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti…pe….
‘‘පුන චපරං, භික්‌ඛවෙ, භික්‌ඛුනො ජිව්‌හාය රසං සායිත්‌වා උප්‌පජ්‌ජන්‌ති…පෙ.… පුන චපරං, භික්‌ඛවෙ, භික්‌ඛුනො මනසා ධම්‌මං විඤ්‌ඤාය උප්‌පජ්‌ජන්‌ති පාපකා අකුසලා සරසඞ්‌කප්‌පා සංයොජනියා. තඤ්‌චෙ භික්‌ඛු නාධිවාසෙති පජහති විනොදෙති බ්‍යන්‌තීකරොති අනභාවං ගමෙති, වෙදිතබ්‌බමෙතං , භික්‌ඛවෙ, භික්‌ඛුනා – ‘න පරිහායාමි කුසලෙහි ධම්‌මෙහි’. අපරිහානඤ්‌හෙතං වුත්‌තං භගවතාති. එවං ඛො, භික්‌ඛවෙ, අපරිහානධම්‌මො හොති.
‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ , bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti. Evaṃ kho, bhikkhave, aparihānadhammo hoti.
‘‘කතමානි ච, භික්‌ඛවෙ, ඡ අභිභායතනානි? ඉධ, භික්‌ඛවෙ, භික්‌ඛුනො චක්‌ඛුනා රූපං දිස්‌වා නුප්‌පජ්‌ජන්‌ති පාපකා අකුසලා සරසඞ්‌කප්‌පා සංයොජනියා. වෙදිතබ්‌බමෙතං, භික්‌ඛවෙ, භික්‌ඛුනා – ‘අභිභූතමෙතං ආයතනං’. අභිභායතනඤ්‌හෙතං වුත්‌තං භගවතාති…පෙ.… පුන චපරං, භික්‌ඛවෙ, භික්‌ඛුනො මනසා ධම්‌මං විඤ්‌ඤාය නුප්‌පජ්‌ජන්‌ති පාපකා අකුසලා ධම්‌මා සරසඞ්‌කප්‌පා සංයොජනියා. වෙදිතබ්‌බමෙතං, භික්‌ඛවෙ, භික්‌ඛුනා – ‘අභිභූතමෙතං ආයතනං’. අභිභායතනඤ්‌හෙතං වුත්‌තං භගවතාති. ඉමානි වුච්‌චන්‌ති, භික්‌ඛවෙ, ඡ අභිභායතනානී’’ති. තතියං.
‘‘Katamāni ca, bhikkhave, cha abhibhāyatanāni? Idha, bhikkhave, bhikkhuno cakkhunā rūpaṃ disvā nuppajjanti pāpakā akusalā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti…pe… puna caparaṃ, bhikkhave, bhikkhuno manasā dhammaṃ viññāya nuppajjanti pāpakā akusalā dhammā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti. Imāni vuccanti, bhikkhave, cha abhibhāyatanānī’’ti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. පරිහානධම්‌මසුත්‌තවණ්‌ණනා • 3. Parihānadhammasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. පරිහානසුත්‌තවණ්‌ණනා • 3. Parihānasuttavaṇṇanā
