Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༣. པརིཧཱནདྷམྨསུཏྟཾ

    3. Parihānadhammasuttaṃ

    ༩༦. ‘‘པརིཧཱནདྷམྨཉྩ ཝོ, བྷིཀྑཝེ, དེསེསྶཱམི ཨཔརིཧཱནདྷམྨཉྩ ཚ ཙ ཨབྷིབྷཱཡཏནཱནི། ཏཾ སུཎཱཐ། ཀཐཉྩ, བྷིཀྑཝེ, པརིཧཱནདྷམྨོ ཧོཏི? ཨིདྷ, བྷིཀྑཝེ, བྷིཀྑུནོ ཙཀྑུནཱ རཱུཔཾ དིསྭཱ ཨུཔྤཛྫནྟི པཱཔཀཱ ཨཀུསལཱ སརསངྐཔྤཱ 1 སཾཡོཛནིཡཱ། ཏཉྩེ བྷིཀྑུ ཨདྷིཝཱསེཏི ནཔྤཛཧཏི ན ཝིནོདེཏི ན བྱནྟཱིཀརོཏི 2 ན ཨནབྷཱཝཾ གམེཏི, ཝེདིཏབྦམེཏཾ, བྷིཀྑཝེ, བྷིཀྑུནཱ – ‘པརིཧཱཡཱམི ཀུསལེཧི དྷམྨེཧི’། པརིཧཱནཉྷེཏཾ ཝུཏྟཾ བྷགཝཏཱཏི…པེ॰…།

    96. ‘‘Parihānadhammañca vo, bhikkhave, desessāmi aparihānadhammañca cha ca abhibhāyatanāni. Taṃ suṇātha. Kathañca, bhikkhave, parihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā 3 saṃyojaniyā. Tañce bhikkhu adhivāseti nappajahati na vinodeti na byantīkaroti 4 na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti…pe….

    ‘‘པུན ཙཔརཾ, བྷིཀྑཝེ, བྷིཀྑུནོ ཛིཝ྄ཧཱཡ རསཾ སཱཡིཏྭཱ ཨུཔྤཛྫནྟི…པེ॰… པུན ཙཔརཾ, བྷིཀྑཝེ, བྷིཀྑུནོ མནསཱ དྷམྨཾ ཝིཉྙཱཡ ཨུཔྤཛྫནྟི པཱཔཀཱ ཨཀུསལཱ སརསངྐཔྤཱ སཾཡོཛནིཡཱ། ཏཉྩེ བྷིཀྑུ ཨདྷིཝཱསེཏི ནཔྤཛཧཏི ན ཝིནོདེཏི ན བྱནྟཱིཀརོཏི ན ཨནབྷཱཝཾ གམེཏི, ཝེདིཏབྦམེཏཾ, བྷིཀྑཝེ, བྷིཀྑུནཱ – ‘པརིཧཱཡཱམི ཀུསལེཧི དྷམྨེཧི’། པརིཧཱནཉྷེཏཾ ཝུཏྟཾ བྷགཝཏཱཏི། ཨེཝཾ ཁོ, བྷིཀྑཝེ, པརིཧཱནདྷམྨོ ཧོཏི།

    ‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu adhivāseti nappajahati na vinodeti na byantīkaroti na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti. Evaṃ kho, bhikkhave, parihānadhammo hoti.

    ‘‘ཀཐཉྩ, བྷིཀྑཝེ, ཨཔརིཧཱནདྷམྨོ ཧོཏི? ཨིདྷ, བྷིཀྑཝེ, བྷིཀྑུནོ ཙཀྑུནཱ རཱུཔཾ དིསྭཱ ཨུཔྤཛྫནྟི པཱཔཀཱ ཨཀུསལཱ སརསངྐཔྤཱ སཾཡོཛནིཡཱ། ཏཉྩེ བྷིཀྑུ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏི, ཝེདིཏབྦམེཏཾ, བྷིཀྑཝེ, བྷིཀྑུནཱ – ‘ན པརིཧཱཡཱམི ཀུསལེཧི དྷམྨེཧི’། ཨཔརིཧཱནཉྷེཏཾ ཝུཏྟཾ བྷགཝཏཱཏི…པེ॰…།

    ‘‘Kathañca, bhikkhave, aparihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ, bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti…pe….

    ‘‘པུན ཙཔརཾ, བྷིཀྑཝེ, བྷིཀྑུནོ ཛིཝ྄ཧཱཡ རསཾ སཱཡིཏྭཱ ཨུཔྤཛྫནྟི…པེ॰… པུན ཙཔརཾ, བྷིཀྑཝེ, བྷིཀྑུནོ མནསཱ དྷམྨཾ ཝིཉྙཱཡ ཨུཔྤཛྫནྟི པཱཔཀཱ ཨཀུསལཱ སརསངྐཔྤཱ སཾཡོཛནིཡཱ། ཏཉྩེ བྷིཀྑུ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏི, ཝེདིཏབྦམེཏཾ , བྷིཀྑཝེ, བྷིཀྑུནཱ – ‘ན པརིཧཱཡཱམི ཀུསལེཧི དྷམྨེཧི’། ཨཔརིཧཱནཉྷེཏཾ ཝུཏྟཾ བྷགཝཏཱཏི། ཨེཝཾ ཁོ, བྷིཀྑཝེ, ཨཔརིཧཱནདྷམྨོ ཧོཏི།

    ‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ , bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti. Evaṃ kho, bhikkhave, aparihānadhammo hoti.

    ‘‘ཀཏམཱནི ཙ, བྷིཀྑཝེ, ཚ ཨབྷིབྷཱཡཏནཱནི? ཨིདྷ, བྷིཀྑཝེ, བྷིཀྑུནོ ཙཀྑུནཱ རཱུཔཾ དིསྭཱ ནུཔྤཛྫནྟི པཱཔཀཱ ཨཀུསལཱ སརསངྐཔྤཱ སཾཡོཛནིཡཱ། ཝེདིཏབྦམེཏཾ, བྷིཀྑཝེ, བྷིཀྑུནཱ – ‘ཨབྷིབྷཱུཏམེཏཾ ཨཱཡཏནཾ’། ཨབྷིབྷཱཡཏནཉྷེཏཾ ཝུཏྟཾ བྷགཝཏཱཏི…པེ॰… པུན ཙཔརཾ, བྷིཀྑཝེ, བྷིཀྑུནོ མནསཱ དྷམྨཾ ཝིཉྙཱཡ ནུཔྤཛྫནྟི པཱཔཀཱ ཨཀུསལཱ དྷམྨཱ སརསངྐཔྤཱ སཾཡོཛནིཡཱ། ཝེདིཏབྦམེཏཾ, བྷིཀྑཝེ, བྷིཀྑུནཱ – ‘ཨབྷིབྷཱུཏམེཏཾ ཨཱཡཏནཾ’། ཨབྷིབྷཱཡཏནཉྷེཏཾ ཝུཏྟཾ བྷགཝཏཱཏི། ཨིམཱནི ཝུཙྩནྟི, བྷིཀྑཝེ, ཚ ཨབྷིབྷཱཡཏནཱནཱི’’ཏི། ཏཏིཡཾ།

    ‘‘Katamāni ca, bhikkhave, cha abhibhāyatanāni? Idha, bhikkhave, bhikkhuno cakkhunā rūpaṃ disvā nuppajjanti pāpakā akusalā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti…pe… puna caparaṃ, bhikkhave, bhikkhuno manasā dhammaṃ viññāya nuppajjanti pāpakā akusalā dhammā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti. Imāni vuccanti, bhikkhave, cha abhibhāyatanānī’’ti. Tatiyaṃ.




    Next: ༤. པམཱདཝིཧཱརཱིསུཏྟཾ • 4. Pamādavihārīsuttaṃ




    Footnotes:
    1. ཨཀུསལཱ དྷམྨཱ སརསངྐཔྤཱ (སྱཱ॰ ཀཾ॰ པཱི॰ ཀ॰) ཨུཔརི ཨཱསཱིཝིསཝགྒེ སཏྟམསུཏྟེ པན ‘‘ཨཱཀུསལཱ སརསངྐཔྤཱ’’ ཏྭེཝ སབྦཏྠ དིསྶཏི
    2. བྱནྟིཀརོཏི (པཱི॰) བྱནྟིཾ ཀརོཏི (ཀ॰)
    3. akusalā dhammā sarasaṅkappā (syā. kaṃ. pī. ka.) upari āsīvisavagge sattamasutte pana ‘‘ākusalā sarasaṅkappā’’ tveva sabbattha dissati
    4. byantikaroti (pī.) byantiṃ karoti (ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. པརིཧཱནདྷམྨསུཏྟཝཎྞནཱ • 3. Parihānadhammasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༣. པརིཧཱནསུཏྟཝཎྞནཱ • 3. Parihānasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact