| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൩. പരിഹാനധമ്മസുത്തം
3. Parihānadhammasuttaṃ
൯൬. ‘‘പരിഹാനധമ്മഞ്ച വോ, ഭിക്ഖവേ, ദേസേസ്സാമി അപരിഹാനധമ്മഞ്ച ഛ ച അഭിഭായതനാനി. തം സുണാഥ. കഥഞ്ച, ഭിക്ഖവേ, പരിഹാനധമ്മോ ഹോതി? ഇധ, ഭിക്ഖവേ, ഭിക്ഖുനോ ചക്ഖുനാ രൂപം ദിസ്വാ ഉപ്പജ്ജന്തി പാപകാ അകുസലാ സരസങ്കപ്പാ 1 സംയോജനിയാ. തഞ്ചേ ഭിക്ഖു അധിവാസേതി നപ്പജഹതി ന വിനോദേതി ന ബ്യന്തീകരോതി 2 ന അനഭാവം ഗമേതി, വേദിതബ്ബമേതം, ഭിക്ഖവേ, ഭിക്ഖുനാ – ‘പരിഹായാമി കുസലേഹി ധമ്മേഹി’. പരിഹാനഞ്ഹേതം വുത്തം ഭഗവതാതി…പേ॰….
96. ‘‘Parihānadhammañca vo, bhikkhave, desessāmi aparihānadhammañca cha ca abhibhāyatanāni. Taṃ suṇātha. Kathañca, bhikkhave, parihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā 3 saṃyojaniyā. Tañce bhikkhu adhivāseti nappajahati na vinodeti na byantīkaroti 4 na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti…pe….
‘‘പുന ചപരം, ഭിക്ഖവേ, ഭിക്ഖുനോ ജിവ്ഹായ രസം സായിത്വാ ഉപ്പജ്ജന്തി…പേ॰… പുന ചപരം, ഭിക്ഖവേ, ഭിക്ഖുനോ മനസാ ധമ്മം വിഞ്ഞായ ഉപ്പജ്ജന്തി പാപകാ അകുസലാ സരസങ്കപ്പാ സംയോജനിയാ. തഞ്ചേ ഭിക്ഖു അധിവാസേതി നപ്പജഹതി ന വിനോദേതി ന ബ്യന്തീകരോതി ന അനഭാവം ഗമേതി, വേദിതബ്ബമേതം, ഭിക്ഖവേ, ഭിക്ഖുനാ – ‘പരിഹായാമി കുസലേഹി ധമ്മേഹി’. പരിഹാനഞ്ഹേതം വുത്തം ഭഗവതാതി. ഏവം ഖോ, ഭിക്ഖവേ, പരിഹാനധമ്മോ ഹോതി.
‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu adhivāseti nappajahati na vinodeti na byantīkaroti na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti. Evaṃ kho, bhikkhave, parihānadhammo hoti.
‘‘കഥഞ്ച, ഭിക്ഖവേ, അപരിഹാനധമ്മോ ഹോതി? ഇധ, ഭിക്ഖവേ, ഭിക്ഖുനോ ചക്ഖുനാ രൂപം ദിസ്വാ ഉപ്പജ്ജന്തി പാപകാ അകുസലാ സരസങ്കപ്പാ സംയോജനിയാ. തഞ്ചേ ഭിക്ഖു നാധിവാസേതി പജഹതി വിനോദേതി ബ്യന്തീകരോതി അനഭാവം ഗമേതി, വേദിതബ്ബമേതം, ഭിക്ഖവേ, ഭിക്ഖുനാ – ‘ന പരിഹായാമി കുസലേഹി ധമ്മേഹി’. അപരിഹാനഞ്ഹേതം വുത്തം ഭഗവതാതി…പേ॰….
‘‘Kathañca, bhikkhave, aparihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ, bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti…pe….
‘‘പുന ചപരം, ഭിക്ഖവേ, ഭിക്ഖുനോ ജിവ്ഹായ രസം സായിത്വാ ഉപ്പജ്ജന്തി…പേ॰… പുന ചപരം, ഭിക്ഖവേ, ഭിക്ഖുനോ മനസാ ധമ്മം വിഞ്ഞായ ഉപ്പജ്ജന്തി പാപകാ അകുസലാ സരസങ്കപ്പാ സംയോജനിയാ. തഞ്ചേ ഭിക്ഖു നാധിവാസേതി പജഹതി വിനോദേതി ബ്യന്തീകരോതി അനഭാവം ഗമേതി, വേദിതബ്ബമേതം , ഭിക്ഖവേ, ഭിക്ഖുനാ – ‘ന പരിഹായാമി കുസലേഹി ധമ്മേഹി’. അപരിഹാനഞ്ഹേതം വുത്തം ഭഗവതാതി. ഏവം ഖോ, ഭിക്ഖവേ, അപരിഹാനധമ്മോ ഹോതി.
‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ , bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti. Evaṃ kho, bhikkhave, aparihānadhammo hoti.
‘‘കതമാനി ച, ഭിക്ഖവേ, ഛ അഭിഭായതനാനി? ഇധ, ഭിക്ഖവേ, ഭിക്ഖുനോ ചക്ഖുനാ രൂപം ദിസ്വാ നുപ്പജ്ജന്തി പാപകാ അകുസലാ സരസങ്കപ്പാ സംയോജനിയാ. വേദിതബ്ബമേതം, ഭിക്ഖവേ, ഭിക്ഖുനാ – ‘അഭിഭൂതമേതം ആയതനം’. അഭിഭായതനഞ്ഹേതം വുത്തം ഭഗവതാതി…പേ॰… പുന ചപരം, ഭിക്ഖവേ, ഭിക്ഖുനോ മനസാ ധമ്മം വിഞ്ഞായ നുപ്പജ്ജന്തി പാപകാ അകുസലാ ധമ്മാ സരസങ്കപ്പാ സംയോജനിയാ. വേദിതബ്ബമേതം, ഭിക്ഖവേ, ഭിക്ഖുനാ – ‘അഭിഭൂതമേതം ആയതനം’. അഭിഭായതനഞ്ഹേതം വുത്തം ഭഗവതാതി. ഇമാനി വുച്ചന്തി, ഭിക്ഖവേ, ഛ അഭിഭായതനാനീ’’തി. തതിയം.
‘‘Katamāni ca, bhikkhave, cha abhibhāyatanāni? Idha, bhikkhave, bhikkhuno cakkhunā rūpaṃ disvā nuppajjanti pāpakā akusalā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti…pe… puna caparaṃ, bhikkhave, bhikkhuno manasā dhammaṃ viññāya nuppajjanti pāpakā akusalā dhammā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti. Imāni vuccanti, bhikkhave, cha abhibhāyatanānī’’ti. Tatiyaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൩. പരിഹാനധമ്മസുത്തവണ്ണനാ • 3. Parihānadhammasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൩. പരിഹാനസുത്തവണ്ണനാ • 3. Parihānasuttavaṇṇanā
