| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. பரிஹானஸுத்தங்
3. Parihānasuttaṃ
389. ஏகங் ஸமயங் ஆயஸ்மா ச ஆனந்தோ³ ஆயஸ்மா ச ப⁴த்³தோ³ பாடலிபுத்தே விஹரந்தி குக்குடாராமே. அத² கோ² ஆயஸ்மா ப⁴த்³தோ³ ஸாயன்ஹஸமயங் படிஸல்லானா வுட்டி²தோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ப⁴த்³தோ³ ஆயஸ்மந்தங் ஆனந்த³ங் ஏதத³வோச – ‘‘கோ நு கோ², ஆவுஸோ ஆனந்த³, ஹேது, கோ பச்சயோ யேன ஸத்³த⁴ம்மபரிஹானங் ஹோதி? கோ நு கோ², ஆவுஸோ ஆனந்த³, ஹேது, கோ பச்சயோ யேன ஸத்³த⁴ம்மஅபரிஹானங் ஹோதீ’’தி?
389. Ekaṃ samayaṃ āyasmā ca ānando āyasmā ca bhaddo pāṭaliputte viharanti kukkuṭārāme. Atha kho āyasmā bhaddo sāyanhasamayaṃ paṭisallānā vuṭṭhito yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā bhaddo āyasmantaṃ ānandaṃ etadavoca – ‘‘ko nu kho, āvuso ānanda, hetu, ko paccayo yena saddhammaparihānaṃ hoti? Ko nu kho, āvuso ānanda, hetu, ko paccayo yena saddhammaaparihānaṃ hotī’’ti?
‘‘ஸாது⁴ ஸாது⁴, ஆவுஸோ ப⁴த்³த³! ப⁴த்³த³கோ கோ² தே, ஆவுஸோ ப⁴த்³த³, உம்மங்கோ³, ப⁴த்³த³கங் படிபா⁴னங், கல்யாணீ பரிபுச்சா². ஏவஞ்ஹி த்வங், ஆவுஸோ ப⁴த்³த³, புச்ச²ஸி – ‘கோ நு கோ², ஆவுஸோ ஆனந்த³, ஹேது, கோ பச்சயோ யேன ஸத்³த⁴ம்மபரிஹானங் ஹோதி? கோ பனாவுஸோ ஆனந்த³, ஹேது, கோ பச்சயோ யேன ஸத்³த⁴ம்மஅபரிஹானங் ஹோதீ’’’தி? ‘‘ஏவமாவுஸோ’’தி. ‘‘சதுன்னங் கோ², ஆவுஸோ , ஸதிபட்டா²னானங் அபா⁴விதத்தா அப³ஹுலீகதத்தா ஸத்³த⁴ம்மபரிஹானங் ஹோதி. சதுன்னஞ்ச கோ², ஆவுஸோ, ஸதிபட்டா²னானங் பா⁴விதத்தா ப³ஹுலீகதத்தா ஸத்³த⁴ம்மஅபரிஹானங் ஹோதி’’.
‘‘Sādhu sādhu, āvuso bhadda! Bhaddako kho te, āvuso bhadda, ummaṅgo, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘ko nu kho, āvuso ānanda, hetu, ko paccayo yena saddhammaparihānaṃ hoti? Ko panāvuso ānanda, hetu, ko paccayo yena saddhammaaparihānaṃ hotī’’’ti? ‘‘Evamāvuso’’ti. ‘‘Catunnaṃ kho, āvuso , satipaṭṭhānānaṃ abhāvitattā abahulīkatattā saddhammaparihānaṃ hoti. Catunnañca kho, āvuso, satipaṭṭhānānaṃ bhāvitattā bahulīkatattā saddhammaaparihānaṃ hoti’’.
‘‘கதமேஸங் சதுன்னங்? இதா⁴வுஸோ, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். இமேஸங் கோ², ஆவுஸோ, சதுன்னங் ஸதிபட்டா²னானங் அபா⁴விதத்தா அப³ஹுலீகதத்தா ஸத்³த⁴ம்மபரிஹானங் ஹோதி. இமேஸஞ்ச கோ², ஆவுஸோ, சதுன்னங் ஸதிபட்டா²னானங் பா⁴விதத்தா ப³ஹுலீகதத்தா ஸத்³த⁴ம்மஅபரிஹானங் ஹோதீ’’தி. ததியங்.
‘‘Katamesaṃ catunnaṃ? Idhāvuso, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Imesaṃ kho, āvuso, catunnaṃ satipaṭṭhānānaṃ abhāvitattā abahulīkatattā saddhammaparihānaṃ hoti. Imesañca kho, āvuso, catunnaṃ satipaṭṭhānānaṃ bhāvitattā bahulīkatattā saddhammaaparihānaṃ hotī’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-5. பரிஹானஸுத்தாதி³வண்ணனா • 3-5. Parihānasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-5. பரிஹானஸுத்தாதி³வண்ணனா • 3-5. Parihānasuttādivaṇṇanā
