| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. පරිහානසුත්‌තං
9. Parihānasuttaṃ
79. ‘‘අට්‌ඨිමෙ, භික්‌ඛවෙ, ධම්‌මා සෙඛස්‌ස භික්‌ඛුනො පරිහානාය සංවත්‌තන්‌ති. කතමෙ අට්‌ඨ? කම්‌මාරාමතා, භස්‌සාරාමතා, නිද්‌දාරාමතා, සඞ්‌ගණිකාරාමතා, ඉන්‌ද්‍රියෙසු අගුත්‌තද්‌වාරතා, භොජනෙ අමත්‌තඤ්‌ඤුතා, සංසග්‌ගාරාමතා, පපඤ්‌චාරාමතා – ඉමෙ ඛො, භික්‌ඛවෙ, අට්‌ඨ ධම්‌මා සෙඛස්‌ස භික්‌ඛුනො පරිහානාය සංවත්‌තන්‌ති.
79. ‘‘Aṭṭhime, bhikkhave, dhammā sekhassa bhikkhuno parihānāya saṃvattanti. Katame aṭṭha? Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, saṃsaggārāmatā, papañcārāmatā – ime kho, bhikkhave, aṭṭha dhammā sekhassa bhikkhuno parihānāya saṃvattanti.
‘‘අට්‌ඨිමෙ, භික්‌ඛවෙ, ධම්‌මා සෙඛස්‌ස භික්‌ඛුනො අපරිහානාය සංවත්‌තන්‌ති. කතමෙ අට්‌ඨ? න කම්‌මාරාමතා, න භස්‌සාරාමතා, න නිද්‌දාරාමතා, න සඞ්‌ගණිකාරාමතා, ඉන්‌ද්‍රියෙසු ගුත්‌තද්‌වාරතා, භොජනෙ මත්‌තඤ්‌ඤුතා, අසංසග්‌ගාරාමතා, නිප්‌පපඤ්‌චාරාමතා – ඉමෙ ඛො, භික්‌ඛවෙ, අට්‌ඨ ධම්‌මා සෙඛස්‌ස භික්‌ඛුනො අපරිහානාය සංවත්‌තන්‌තී’’ති. නවමං.
‘‘Aṭṭhime, bhikkhave, dhammā sekhassa bhikkhuno aparihānāya saṃvattanti. Katame aṭṭha? Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, asaṃsaggārāmatā, nippapañcārāmatā – ime kho, bhikkhave, aṭṭha dhammā sekhassa bhikkhuno aparihānāya saṃvattantī’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3-9. මරණස්‌සතිසුත්‌තද්‌වයාදිවණ්‌ණනා • 3-9. Maraṇassatisuttadvayādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සද්‌ධාසුත්‌තාදිවණ්‌ණනා • 1-10. Saddhāsuttādivaṇṇanā
