| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
১০. পরিহানসুত্তৰণ্ণনা
10. Parihānasuttavaṇṇanā
৭৯. দসমে পরিহানায সংৰত্তন্তীতি অৰুদ্ধিযা ভৰন্তি, মগ্গাধিগমস্স পরিপন্থায হোন্তি। অধিগতস্স পন মগ্গস্স পরিহানি নাম নত্থি। ‘‘তযো ধম্মা’’তি ধম্মাধিট্ঠানৰসেন উদ্দিট্ঠধম্মে পুগ্গলাধিট্ঠানায দেসনায ৰিভজন্তো ‘‘ইধ, ভিক্খৰে, সেখো ভিক্খূ’’তিআদিমাহ।
79. Dasame parihānāya saṃvattantīti avuddhiyā bhavanti, maggādhigamassa paripanthāya honti. Adhigatassa pana maggassa parihāni nāma natthi. ‘‘Tayo dhammā’’ti dhammādhiṭṭhānavasena uddiṭṭhadhamme puggalādhiṭṭhānāya desanāya vibhajanto ‘‘idha, bhikkhave, sekho bhikkhū’’tiādimāha.
তত্থ কম্মং আরমিতব্বতো আরামো এতস্সাতি কম্মারামো। কম্মে রতোতি কম্মরতো। কম্মারামতং কম্মাভিরতিং অনুযুত্তো পযুত্তোতি কম্মারামতমনুযুত্তো। তত্থ কম্মং নাম ইতিকত্তব্বং কম্মং, সেয্যথিদং – চীৰরৰিচারণং, চীৰরকরণং, উপত্থম্ভনং, পত্তত্থৰিকং, অংসবন্ধনং, কাযবন্ধনং, ধমকরণং, আধারকং, পাদকথলিকং, সম্মজ্জনীতি এৰমাদীনং উপকরণানং করণং, যঞ্চ ৰিহারে খণ্ডফুল্লাদিপটিসঙ্খরণং । একচ্চো হি এতানি করোন্তো সকলদিৰসং এতানেৰ করোতি। তং সন্ধাযেতং ৰুত্তং। যো পন এতেসং করণৰেলাযমেৰ এতানি করোতি, উদ্দেসৰেলাযং উদ্দেসং গণ্হাতি, সজ্ঝাযৰেলাযং সজ্ঝাযতি, চেতিযঙ্গণৰত্তাদিকরণৰেলাযং চেতিযঙ্গণৰত্তাদীনি করোতি, মনসিকারৰেলাযং মনসিকারং করোতি সব্বত্থককম্মট্ঠানে ৰা পারিহারিযকম্মট্ঠানে ৰা, ন সো কম্মারামো নাম। তস্স তং –
Tattha kammaṃ āramitabbato ārāmo etassāti kammārāmo. Kamme ratoti kammarato. Kammārāmataṃ kammābhiratiṃ anuyutto payuttoti kammārāmatamanuyutto. Tattha kammaṃ nāma itikattabbaṃ kammaṃ, seyyathidaṃ – cīvaravicāraṇaṃ, cīvarakaraṇaṃ, upatthambhanaṃ, pattatthavikaṃ, aṃsabandhanaṃ, kāyabandhanaṃ, dhamakaraṇaṃ, ādhārakaṃ, pādakathalikaṃ, sammajjanīti evamādīnaṃ upakaraṇānaṃ karaṇaṃ, yañca vihāre khaṇḍaphullādipaṭisaṅkharaṇaṃ . Ekacco hi etāni karonto sakaladivasaṃ etāneva karoti. Taṃ sandhāyetaṃ vuttaṃ. Yo pana etesaṃ karaṇavelāyameva etāni karoti, uddesavelāyaṃ uddesaṃ gaṇhāti, sajjhāyavelāyaṃ sajjhāyati, cetiyaṅgaṇavattādikaraṇavelāyaṃ cetiyaṅgaṇavattādīni karoti, manasikāravelāyaṃ manasikāraṃ karoti sabbatthakakammaṭṭhāne vā pārihāriyakammaṭṭhāne vā, na so kammārāmo nāma. Tassa taṃ –
‘‘যানি খো পন তানি সব্রহ্মচারীনং উচ্চাৰচানি কিংকরণীযানি, তত্থ দক্খো হোতি অনলসো, তত্রুপাযায ৰীমংসায সমন্নাগতো, অলং কাতুং অলং সংৰিধাতু’’ন্তি (দী॰ নি॰ ৩.৩৪৫; অ॰ নি॰ ১০.১৮) –
‘‘Yāni kho pana tāni sabrahmacārīnaṃ uccāvacāni kiṃkaraṇīyāni, tattha dakkho hoti analaso, tatrupāyāya vīmaṃsāya samannāgato, alaṃ kātuṃ alaṃ saṃvidhātu’’nti (dī. ni. 3.345; a. ni. 10.18) –
আদিনা সত্থারা অনুঞ্ঞাতকরণমেৰ হোতি।
Ādinā satthārā anuññātakaraṇameva hoti.
ভস্সারামোতি যো ভগৰতা পটিক্খিত্তরাজকথাদিৰসেন রত্তিন্দিৰং ৰীতিনামেতি, অযং ভস্সে পরিযন্তকারী ন হোতীতি ভস্সারামো নাম। যো পন রত্তিম্পি দিৰাপি ধম্মং কথেতি, পঞ্হং ৰিস্সজ্জেতি, অযং অপ্পভস্সো ভস্সে পরিযন্তকারীযেৰ। কস্মা? ‘‘সন্নিপতিতানং ৰো, ভিক্খৰে, দ্ৰযং করণীযং – ধম্মী ৰা কথা, অরিযো ৰা তুণ্হীভাৰো’’তি (ম॰ নি॰ ১.২৭৩) ৰুত্তৰিধিংযেৰ পটিপন্নোতি।
Bhassārāmoti yo bhagavatā paṭikkhittarājakathādivasena rattindivaṃ vītināmeti, ayaṃ bhasse pariyantakārī na hotīti bhassārāmo nāma. Yo pana rattimpi divāpi dhammaṃ katheti, pañhaṃ vissajjeti, ayaṃ appabhasso bhasse pariyantakārīyeva. Kasmā? ‘‘Sannipatitānaṃ vo, bhikkhave, dvayaṃ karaṇīyaṃ – dhammī vā kathā, ariyo vā tuṇhībhāvo’’ti (ma. ni. 1.273) vuttavidhiṃyeva paṭipannoti.
নিদ্দারামোতি যো যাৰদত্থং উদরাৰদেহকং ভুঞ্জিত্ৰা সেয্যসুখং, পস্সসুখং, মিদ্ধসুখং অনুযুঞ্জতি, যো চ গচ্ছন্তোপি নিসিন্নোপি ঠিতোপি থিনমিদ্ধাভিভূতো নিদ্দাযতি, অযং নিদ্দারামো নাম। যস্স পন করজকাযগেলঞ্ঞেন চিত্তং ভৰঙ্গং ওতরতি, নাযং নিদ্দারামো, তেনেৰাহ –
Niddārāmoti yo yāvadatthaṃ udarāvadehakaṃ bhuñjitvā seyyasukhaṃ, passasukhaṃ, middhasukhaṃ anuyuñjati, yo ca gacchantopi nisinnopi ṭhitopi thinamiddhābhibhūto niddāyati, ayaṃ niddārāmo nāma. Yassa pana karajakāyagelaññena cittaṃ bhavaṅgaṃ otarati, nāyaṃ niddārāmo, tenevāha –
‘‘অভিজানামি খো পনাহং, অগ্গিৰেস্সন, গিম্হানং পচ্ছিমে মাসে পচ্ছাভত্তং পিণ্ডপাতপ্পটিক্কন্তো চতুগ্গুণং সঙ্ঘাটিং পঞ্ঞাপেত্ৰা দক্খিণেন পস্সেন সতো সম্পজানো নিদ্দং ওক্কমিতা’’তি (ম॰ নি॰ ১.৩৮৭)।
‘‘Abhijānāmi kho panāhaṃ, aggivessana, gimhānaṃ pacchime māse pacchābhattaṃ piṇḍapātappaṭikkanto catugguṇaṃ saṅghāṭiṃ paññāpetvā dakkhiṇena passena sato sampajāno niddaṃ okkamitā’’ti (ma. ni. 1.387).
এত্থ চ পুথুজ্জনকল্যাণকোপি সেখোত্ৰেৰ ৰেদিতব্বো। তস্মা তস্স সব্বস্সপি ৰিসেসাধিগমস্স ইতরেসং উপরি ৰিসেসাধিগমস্স চ পরিহানায ৰত্তন্তীতি ৰেদিতব্বং। সুক্কপক্খস্স ৰুত্তৰিপরিযাযেন অত্থৰিভাৰনা ৰেদিতব্বা।
Ettha ca puthujjanakalyāṇakopi sekhotveva veditabbo. Tasmā tassa sabbassapi visesādhigamassa itaresaṃ upari visesādhigamassa ca parihānāya vattantīti veditabbaṃ. Sukkapakkhassa vuttavipariyāyena atthavibhāvanā veditabbā.
গাথাসু উদ্ধতোতি চিত্তৰিক্খেপকরেন উদ্ধচ্চেন উদ্ধতো অৰূপসন্তো। অপ্পকিচ্চস্সাতি অনুঞ্ঞাতস্সপি ৰুত্তপ্পকারস্স কিচ্চস্স যুত্তপ্পযুত্তকালেযেৰ করণতো অপ্পকিচ্চো অস্স ভৰেয্য। অপ্পমিদ্ধোতি ‘‘দিৰসং চঙ্কমেন নিসজ্জাযা’’তিআদিনা ৰুত্তজাগরিযানুযোগেন নিদ্দারহিতো অস্স। অনুদ্ধতোতি ভস্সারামতায উপ্পজ্জনকচিত্তৰিক্খেপস্স অভস্সারামো হুত্ৰা পরিৰজ্জনেন ন উদ্ধতো ৰূপসন্তচিত্তো, সমাহিতোতি অত্থো। সেসং পুব্বে ৰুত্তনযত্তা সুৰিঞ্ঞেয্যমেৰ। ইতি ইমস্মিং ৰগ্গে পঠমদুতিযপঞ্চমছট্ঠসত্তমঅট্ঠমনৰমেসু সুত্তেসু ৰট্টং কথিতং, ইতরেসু ৰট্টৰিৰট্টং।
Gāthāsu uddhatoti cittavikkhepakarena uddhaccena uddhato avūpasanto. Appakiccassāti anuññātassapi vuttappakārassa kiccassa yuttappayuttakāleyeva karaṇato appakicco assa bhaveyya. Appamiddhoti ‘‘divasaṃ caṅkamena nisajjāyā’’tiādinā vuttajāgariyānuyogena niddārahito assa. Anuddhatoti bhassārāmatāya uppajjanakacittavikkhepassa abhassārāmo hutvā parivajjanena na uddhato vūpasantacitto, samāhitoti attho. Sesaṃ pubbe vuttanayattā suviññeyyameva. Iti imasmiṃ vagge paṭhamadutiyapañcamachaṭṭhasattamaaṭṭhamanavamesu suttesu vaṭṭaṃ kathitaṃ, itaresu vaṭṭavivaṭṭaṃ.
দসমসুত্তৰণ্ণনা নিট্ঠিতা।
Dasamasuttavaṇṇanā niṭṭhitā.
ততিযৰগ্গৰণ্ণনা নিট্ঠিতা।
Tatiyavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ১০. পরিহানসুত্তং • 10. Parihānasuttaṃ
