| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
2. பரிஹானிகதா²
2. Parihānikathā
1. வாத³யுத்திபரிஹானிகதா²வண்ணனா
1. Vādayuttiparihānikathāvaṇṇanā
239. இத³ங் ஸுத்தந்தி இத³ங் லக்க²ணமத்தங் த³ட்ட²ப்³ப³ங். ‘‘பஞ்சிமே, பி⁴க்க²வே, த⁴ம்மா ஸமயவிமுத்தஸ்ஸ பி⁴க்கு²னோ பரிஹானாய ஸங்வத்தந்தீ’’தி (அ॰ நி॰ 5.149-150) இத³ம்பி ஹி ஸுத்தங் அனாகா³மிஆதீ³னங்யேவ பரிஹானினிஸ்ஸயோ, ந அரஹதோ. ஸமயவிமுத்தோதி அட்ட²ஸமாபத்திலாபி⁴னோ ஸெக்க²ஸ்ஸேதங் நாமங். யதா²ஹ –
239. Idaṃsuttanti idaṃ lakkhaṇamattaṃ daṭṭhabbaṃ. ‘‘Pañcime, bhikkhave, dhammā samayavimuttassa bhikkhuno parihānāya saṃvattantī’’ti (a. ni. 5.149-150) idampi hi suttaṃ anāgāmiādīnaṃyeva parihāninissayo, na arahato. Samayavimuttoti aṭṭhasamāpattilābhino sekkhassetaṃ nāmaṃ. Yathāha –
‘‘கதமோ ச புக்³க³லோ ஸமயவிமுத்தோ? இதே⁴கச்சோ புக்³க³லோ காலேன காலங் ஸமயேன ஸமயங் அட்ட² விமொக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹொந்தி. அயங் வுச்சதி புக்³க³லோ ஸமயவிமுத்தோ’’தி (பு॰ ப॰ 1).
‘‘Katamo ca puggalo samayavimutto? Idhekacco puggalo kālena kālaṃ samayena samayaṃ aṭṭha vimokkhe kāyena phusitvā viharati, paññāya cassa disvā ekacce āsavā parikkhīṇā honti. Ayaṃ vuccati puggalo samayavimutto’’ti (pu. pa. 1).
‘‘பரிஹானித⁴ம்மோ’’தி ச புது²ஜ்ஜனோ ச ஏகச்சோ ச ஸெக்கோ² அதி⁴ப்பேதோ, ந அரஹாதி. தஸ்மாதி யஸ்மா யதா²த³ஸ்ஸிதானி ஸுத்தானி அனாகா³மிஆதீ³னங் பரிஹானிலத்³தி⁴யா நிஸ்ஸயோ, ந அரஹதோ, தஸ்மா. தங் நிஸ்ஸாய தங் அபெக்கி²த்வா யஸ்மா ‘‘அரஹதோபீ’’தி எத்த² அரஹதோபி பரிஹானி, கோ பன வாதோ³ அனாகா³மிஆதீ³னந்தி அயமத்தோ² லப்³ப⁴தி, தஸ்மா பி-ஸத்³த³ஸம்பிண்டி³தமத்த²ங் த³ஸ்ஸெந்தோ ‘‘அரஹதோபி…பே॰… யோஜேதப்³ப³’’ந்தி ஆஹ. யஸ்மா வா காமஞ்செத்த² து³தியஸுத்தங் ஸெக்க²வஸேன ஆக³தங், பட²மததியஸுத்தானி பன அஸெக்க²வஸேனபி ஆக³தானீதி தேஸங் லத்³தி⁴, தஸ்மா ‘‘அரஹதோபீ’’தி அட்ட²கதா²யங் வுத்தங். தேனாஹ ‘‘இத³ங் ஸுத்தங் அரஹதோ’’திஆதி³.
‘‘Parihānidhammo’’ti ca puthujjano ca ekacco ca sekkho adhippeto, na arahāti. Tasmāti yasmā yathādassitāni suttāni anāgāmiādīnaṃ parihāniladdhiyā nissayo, na arahato, tasmā. Taṃ nissāya taṃ apekkhitvā yasmā ‘‘arahatopī’’ti ettha arahatopi parihāni, ko pana vādo anāgāmiādīnanti ayamattho labbhati, tasmā pi-saddasampiṇḍitamatthaṃ dassento ‘‘arahatopi…pe… yojetabba’’nti āha. Yasmā vā kāmañcettha dutiyasuttaṃ sekkhavasena āgataṃ, paṭhamatatiyasuttāni pana asekkhavasenapi āgatānīti tesaṃ laddhi, tasmā ‘‘arahatopī’’ti aṭṭhakathāyaṃ vuttaṃ. Tenāha ‘‘idaṃ suttaṃ arahato’’tiādi.
ததியஸ்மிந்தி ‘‘ஸப்³பே³ஸஞ்ஞேவ அரஹந்தானங் பரிஹானீ’’தி ஏதஸ்மிங் பஞ்ஹே. ஸோ ஹி ‘‘ஸப்³பே³வ அரஹந்தோ’’திஆதி³னா ஆக³தேஸு ததியோ பஞ்ஹோ. தேஸந்தி முதி³ந்த்³ரியானங். ததியஸ்மிம்பீதி பி-ஸத்³தோ³ வுத்தத்த²ஸமுச்சயோ. தேன பட²மபஞ்ஹங் ஸமுச்சினோதி ‘‘தத்த²பி திக்கி²ந்த்³ரியா அதி⁴ப்பேதா’’தி.
Tatiyasminti ‘‘sabbesaññeva arahantānaṃ parihānī’’ti etasmiṃ pañhe. So hi ‘‘sabbeva arahanto’’tiādinā āgatesu tatiyo pañho. Tesanti mudindriyānaṃ. Tatiyasmimpīti pi-saddo vuttatthasamuccayo. Tena paṭhamapañhaṃ samuccinoti ‘‘tatthapi tikkhindriyā adhippetā’’ti.
ஸோயேவ ந பரிஹாயதீதி ஸோதாபன்னோயேவ ஸோதாபன்னபா⁴வதோ ந பரிஹாயதீதி அத்தோ². ந செத்த² ஸகதா³கா³மிபா⁴வாபத்தியா ஸோதாபன்னபா⁴வாபக³மோ பரிஹானி ஹோதி விஸேஸாதி⁴க³மபா⁴வதோ. பத்தவிஸேஸதோ ஹி பரிஹானீதி. இதரேதி ஸகதா³கா³மிஆதி³கா. உபரிமக்³க³த்தா²யாதி உபரிமக்³க³த்தயபடிலாப⁴த்தா²ய ‘‘நியதோ’’தி வுத்தமத்த²ங் அக்³க³ஹெத்வா.
Soyeva na parihāyatīti sotāpannoyeva sotāpannabhāvato na parihāyatīti attho. Na cettha sakadāgāmibhāvāpattiyā sotāpannabhāvāpagamo parihāni hoti visesādhigamabhāvato. Pattavisesato hi parihānīti. Itareti sakadāgāmiādikā. Uparimaggatthāyāti uparimaggattayapaṭilābhatthāya ‘‘niyato’’ti vuttamatthaṃ aggahetvā.
வாத³யுத்திபரிஹானிகதா²வண்ணனா நிட்டி²தா.
Vādayuttiparihānikathāvaṇṇanā niṭṭhitā.
2. அரியபுக்³க³லஸங்ஸந்த³னபரிஹானிகதா²வண்ணனா
2. Ariyapuggalasaṃsandanaparihānikathāvaṇṇanā
241. ததோதி அரஹத்ததோ. தத்தா²தி த³ஸ்ஸனமக்³க³ப²லே. வாயாமேனாதி விபஸ்ஸனுஸ்ஸாஹனேன. தத³னந்தரந்தி ஸோதாபத்திப²லானந்தரங். பட²மங் த³ஸ்ஸனமக்³க³ப²லானந்தரங் அரஹத்தங் பாபுணாதி, ததோ பரிஹீனோ புன வாயமந்தோ தத³னந்தரங் ந அரஹத்தங் பாபுணாதீதி கா எத்த² யுத்தீதி அதி⁴ப்பாயோ. பரவாதீ³ நாம யுத்தம்பி வத³தி அயுத்தம்பீதி கிங் தஸ்ஸ வாதே³ யுத்திக³வேஸனாயாதி பன த³ட்ட²ப்³ப³ங். அபரிஹானஸபா⁴வோ பா⁴வனாமக்³கோ³ அரியமக்³க³த்தா த³ஸ்ஸனாத³ஸ்ஸனமக்³கோ³ விய. ந செத்த² அஸித்³த⁴தாஸங்கா லோகுத்தரமக்³க³ஸ்ஸ பரஸ்ஸபி அரியமக்³க³பா⁴வஸ்ஸ ஸித்³த⁴த்தா, நாபி லோகியமக்³கே³ன அனேகந்திகதா அரியஸத்³தே³ன விஸேஸிதத்தா. ததா² ந விருத்³த⁴தா து³தியமக்³கா³தீ³னங் பா⁴வனாமக்³க³பா⁴வஸ்ஸ ஓளாரிககிலேஸப்பஹானாதீ³னஞ்ச பரஸ்ஸபி ஆக³மதோ ஸித்³த⁴த்தா.
241. Tatoti arahattato. Tatthāti dassanamaggaphale. Vāyāmenāti vipassanussāhanena. Tadanantaranti sotāpattiphalānantaraṃ. Paṭhamaṃ dassanamaggaphalānantaraṃ arahattaṃ pāpuṇāti, tato parihīno puna vāyamanto tadanantaraṃ na arahattaṃ pāpuṇātīti kā ettha yuttīti adhippāyo. Paravādī nāma yuttampi vadati ayuttampīti kiṃ tassa vāde yuttigavesanāyāti pana daṭṭhabbaṃ. Aparihānasabhāvo bhāvanāmaggo ariyamaggattā dassanādassanamaggo viya. Na cettha asiddhatāsaṅkā lokuttaramaggassa parassapi ariyamaggabhāvassa siddhattā, nāpi lokiyamaggena anekantikatā ariyasaddena visesitattā. Tathā na viruddhatā dutiyamaggādīnaṃ bhāvanāmaggabhāvassa oḷārikakilesappahānādīnañca parassapi āgamato siddhattā.
அரியபுக்³க³லஸங்ஸந்த³னபரிஹானிகதா²வண்ணனா நிட்டி²தா.
Ariyapuggalasaṃsandanaparihānikathāvaṇṇanā niṭṭhitā.
3. ஸுத்தஸாத⁴னபரிஹானிகதா²வண்ணனா
3. Suttasādhanaparihānikathāvaṇṇanā
265. புக்³க³லபஞ்ஞத்திஅட்ட²கதா²யங் ‘‘பத்தி, பு²ஸனா’’தி ச பச்சக்க²தோ அதி⁴க³மோ அதி⁴ப்பேதோதி வுத்தங் ‘‘பத்தப்³ப³ங் வத³தீதி ஆஹ பு²ஸனாரஹ’’ந்தி.
265. Puggalapaññattiaṭṭhakathāyaṃ ‘‘patti, phusanā’’ti ca paccakkhato adhigamo adhippetoti vuttaṃ ‘‘pattabbaṃ vadatīti āha phusanāraha’’nti.
267. கதஸன்னிட்டா²னஸ்ஸாதி இமஸ்மிங் ஸத்தாஹே மாஸே உதும்ஹி அந்தோவஸ்ஸே வா அஞ்ஞங் ஆராதெ⁴ஸ்ஸாமீதி கதனிச்ச²யஸ்ஸ.
267. Katasanniṭṭhānassāti imasmiṃ sattāhe māse utumhi antovasse vā aññaṃ ārādhessāmīti katanicchayassa.
ஸுத்தஸாத⁴னபரிஹானிகதா²வண்ணனா நிட்டி²தா.
Suttasādhanaparihānikathāvaṇṇanā niṭṭhitā.
பரிஹானிகதா²வண்ணனா நிட்டி²தா.
Parihānikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 2. பரிஹானிகதா² • 2. Parihānikathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 2. பரிஹானிகதா² • 2. Parihānikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. பரிஹானிகதா² • 2. Parihānikathā
