| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
২. পরিহানিকথা
2. Parihānikathā
১. ৰাদযুত্তিপরিহানিকথাৰণ্ণনা
1. Vādayuttiparihānikathāvaṇṇanā
২৩৯. ‘‘দ্ৰেমে , ভিক্খৰে, ধম্মা সেক্খস্স ভিক্খুনো পরিহানায সংৰত্তন্তী’’তি (অ॰ নি॰ ২.১৮৫) ইদং সুত্তং অরহতো পরিহানিলদ্ধিযা ন নিস্সযো, অথ খো অনাগামিআদীনং পরিহানিলদ্ধিযা, তস্মা অরহতোপি পরিহানিং ইচ্ছন্তীতি এত্থ পি-সদ্দেন অনাগামিস্সপি সকদাগামিস্সপীতি যোজেতব্বং।
239. ‘‘Dveme , bhikkhave, dhammā sekkhassa bhikkhuno parihānāya saṃvattantī’’ti (a. ni. 2.185) idaṃ suttaṃ arahato parihāniladdhiyā na nissayo, atha kho anāgāmiādīnaṃ parihāniladdhiyā, tasmā arahatopi parihāniṃ icchantīti ettha pi-saddena anāgāmissapi sakadāgāmissapīti yojetabbaṃ.
‘‘ততিযস্মিম্পি মুদিন্দ্রিযাৰ অধিপ্পেতা। তেসঞ্হি সব্বেসম্পি পরিহানি ন হোতীতি তস্স লদ্ধী’’তি পুরিমপাঠো, মুদিন্দ্রিযেস্ৰেৰ পন অধিপ্পেতেসু পরিক্খেপো ন কাতব্বো সিযা, কতো চ, তস্মা ‘‘ততিযস্মিম্পি তিক্খিন্দ্রিযাৰ অধিপ্পেতা। তেসঞ্হি সব্বেসম্পি পরিহানি ন হোতীতি তস্স লদ্ধী’’তি পঠন্তি।
‘‘Tatiyasmimpi mudindriyāva adhippetā. Tesañhi sabbesampi parihāni na hotīti tassa laddhī’’ti purimapāṭho, mudindriyesveva pana adhippetesu parikkhepo na kātabbo siyā, kato ca, tasmā ‘‘tatiyasmimpi tikkhindriyāva adhippetā. Tesañhi sabbesampi parihāni na hotīti tassa laddhī’’ti paṭhanti.
অযোনিসো অত্থং গহেত্ৰাতি সোতাপন্নোযেৰ নিযতোতি ৰুত্তোতি সোযেৰ ন পরিহাযতি, ন ইতরেতি অত্থং গহেত্ৰা। ‘‘উপরিমগ্গত্থাযা’’তি ৰুত্তং অত্থং অগ্গহেত্ৰা নিযতোতি সোতাপত্তিফলা ন পরিহাযতীতি এতমত্থং গণ্হীতি পন ৰদন্তি।
Ayoniso atthaṃ gahetvāti sotāpannoyeva niyatoti vuttoti soyeva na parihāyati, na itareti atthaṃ gahetvā. ‘‘Uparimaggatthāyā’’ti vuttaṃ atthaṃ aggahetvā niyatoti sotāpattiphalā na parihāyatīti etamatthaṃ gaṇhīti pana vadanti.
ৰাদযুত্তিপরিহানিকথাৰণ্ণনা নিট্ঠিতা।
Vādayuttiparihānikathāvaṇṇanā niṭṭhitā.
২. অরিযপুগ্গলসংসন্দনপরিহানিৰণ্ণনা
2. Ariyapuggalasaṃsandanaparihānivaṇṇanā
২৪১. যং পনেত্থাতিআদিম্হি দস্সনমগ্গফলে ঠিতস্স অনন্তরং অরহত্তপ্পত্তিং, ততো পরিহাযিত্ৰা তত্থ চ ঠানং ইচ্ছন্তো পুন ৰাযামেন তদনন্তরং অরহত্তপ্পত্তিং ন ইচ্ছতীতি ৰিচারেতব্বমেতং।
241. Yaṃpanetthātiādimhi dassanamaggaphale ṭhitassa anantaraṃ arahattappattiṃ, tato parihāyitvā tattha ca ṭhānaṃ icchanto puna vāyāmena tadanantaraṃ arahattappattiṃ na icchatīti vicāretabbametaṃ.
২৬২. অৰসিপ্পত্তো ঝানলাভীতি সেক্খো ৰুত্তোতি দট্ঠব্বো। পুথুজ্জনো পন ৰসিপ্পত্তো অৰসিপ্পত্তো চ সমযৰিমুত্তঅসমযৰিমুত্ততন্তিযা অগ্গহিতো, ভজাপিযমানো পন সমাপত্তিৰিক্খম্ভিতানং কিলেসানং ৰসেন সমযৰিমুত্তভাৰং ভজেয্যাতি ৰুত্তোতি।
262. Avasippatto jhānalābhīti sekkho vuttoti daṭṭhabbo. Puthujjano pana vasippatto avasippatto ca samayavimuttaasamayavimuttatantiyā aggahito, bhajāpiyamāno pana samāpattivikkhambhitānaṃ kilesānaṃ vasena samayavimuttabhāvaṃ bhajeyyāti vuttoti.
অরিযপুগ্গলসংসন্দনপরিহানিৰণ্ণনা নিট্ঠিতা।
Ariyapuggalasaṃsandanaparihānivaṇṇanā niṭṭhitā.
৩. সুত্তসাধনপরিহানিৰণ্ণনা
3. Suttasādhanaparihānivaṇṇanā
২৬৫. উত্তমহীনভেদো ‘‘তত্র যাযং পটিপদা সুখা খিপ্পাভিঞ্ঞা, সা উভযেনেৰ পণীতা অক্খাযতী’’তিআদিসুত্তৰসেন (দী॰ নি॰ ৩.১৫২) ৰুত্তো। ‘‘দিট্ঠং সুতং মুত’’ন্তি এত্থ ৰিয মুতসদ্দো পত্তব্বং ৰদতীতি আহ ‘‘ফুসনারহ’’ন্তি।
265. Uttamahīnabhedo ‘‘tatra yāyaṃ paṭipadā sukhā khippābhiññā, sā ubhayeneva paṇītā akkhāyatī’’tiādisuttavasena (dī. ni. 3.152) vutto. ‘‘Diṭṭhaṃ sutaṃ muta’’nti ettha viya mutasaddo pattabbaṃ vadatīti āha ‘‘phusanāraha’’nti.
২৬৭. অপ্পত্তপরিহানায চেৰ সংৰত্তন্তি যথাকতসন্নিট্ঠানস্স সমযৰিমুত্তস্সাতি অধিপ্পাযো।
267. Appattaparihānāya ceva saṃvattanti yathākatasanniṭṭhānassa samayavimuttassāti adhippāyo.
সুত্তসাধনপরিহানিৰণ্ণনা নিট্ঠিতা।
Suttasādhanaparihānivaṇṇanā niṭṭhitā.
পরিহানিকথাৰণ্ণনা নিট্ঠিতা।
Parihānikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / ২. পরিহানিকথা • 2. Parihānikathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ২. পরিহানিকথা • 2. Parihānikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ২. পরিহানিকথা • 2. Parihānikathā
