| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
২. পরিহানিকথা
2. Parihānikathā
১. ৰাদযুত্তিপরিহানিকথাৰণ্ণনা
1. Vādayuttiparihānikathāvaṇṇanā
২৩৯. ইদং সুত্তন্তি ইদং লক্খণমত্তং দট্ঠব্বং। ‘‘পঞ্চিমে, ভিক্খৰে, ধম্মা সমযৰিমুত্তস্স ভিক্খুনো পরিহানায সংৰত্তন্তী’’তি (অ॰ নি॰ ৫.১৪৯-১৫০) ইদম্পি হি সুত্তং অনাগামিআদীনংযেৰ পরিহানিনিস্সযো, ন অরহতো। সমযৰিমুত্তোতি অট্ঠসমাপত্তিলাভিনো সেক্খস্সেতং নামং। যথাহ –
239. Idaṃsuttanti idaṃ lakkhaṇamattaṃ daṭṭhabbaṃ. ‘‘Pañcime, bhikkhave, dhammā samayavimuttassa bhikkhuno parihānāya saṃvattantī’’ti (a. ni. 5.149-150) idampi hi suttaṃ anāgāmiādīnaṃyeva parihāninissayo, na arahato. Samayavimuttoti aṭṭhasamāpattilābhino sekkhassetaṃ nāmaṃ. Yathāha –
‘‘কতমো চ পুগ্গলো সমযৰিমুত্তো? ইধেকচ্চো পুগ্গলো কালেন কালং সমযেন সমযং অট্ঠ ৰিমোক্খে কাযেন ফুসিত্ৰা ৰিহরতি, পঞ্ঞায চস্স দিস্ৰা একচ্চে আসৰা পরিক্খীণা হোন্তি। অযং ৰুচ্চতি পুগ্গলো সমযৰিমুত্তো’’তি (পু॰ প॰ ১)।
‘‘Katamo ca puggalo samayavimutto? Idhekacco puggalo kālena kālaṃ samayena samayaṃ aṭṭha vimokkhe kāyena phusitvā viharati, paññāya cassa disvā ekacce āsavā parikkhīṇā honti. Ayaṃ vuccati puggalo samayavimutto’’ti (pu. pa. 1).
‘‘পরিহানিধম্মো’’তি চ পুথুজ্জনো চ একচ্চো চ সেক্খো অধিপ্পেতো, ন অরহাতি। তস্মাতি যস্মা যথাদস্সিতানি সুত্তানি অনাগামিআদীনং পরিহানিলদ্ধিযা নিস্সযো, ন অরহতো, তস্মা। তং নিস্সায তং অপেক্খিত্ৰা যস্মা ‘‘অরহতোপী’’তি এত্থ অরহতোপি পরিহানি, কো পন ৰাদো অনাগামিআদীনন্তি অযমত্থো লব্ভতি, তস্মা পি-সদ্দসম্পিণ্ডিতমত্থং দস্সেন্তো ‘‘অরহতোপি…পে॰… যোজেতব্ব’’ন্তি আহ। যস্মা ৰা কামঞ্চেত্থ দুতিযসুত্তং সেক্খৰসেন আগতং, পঠমততিযসুত্তানি পন অসেক্খৰসেনপি আগতানীতি তেসং লদ্ধি, তস্মা ‘‘অরহতোপী’’তি অট্ঠকথাযং ৰুত্তং। তেনাহ ‘‘ইদং সুত্তং অরহতো’’তিআদি।
‘‘Parihānidhammo’’ti ca puthujjano ca ekacco ca sekkho adhippeto, na arahāti. Tasmāti yasmā yathādassitāni suttāni anāgāmiādīnaṃ parihāniladdhiyā nissayo, na arahato, tasmā. Taṃ nissāya taṃ apekkhitvā yasmā ‘‘arahatopī’’ti ettha arahatopi parihāni, ko pana vādo anāgāmiādīnanti ayamattho labbhati, tasmā pi-saddasampiṇḍitamatthaṃ dassento ‘‘arahatopi…pe… yojetabba’’nti āha. Yasmā vā kāmañcettha dutiyasuttaṃ sekkhavasena āgataṃ, paṭhamatatiyasuttāni pana asekkhavasenapi āgatānīti tesaṃ laddhi, tasmā ‘‘arahatopī’’ti aṭṭhakathāyaṃ vuttaṃ. Tenāha ‘‘idaṃ suttaṃ arahato’’tiādi.
ততিযস্মিন্তি ‘‘সব্বেসঞ্ঞেৰ অরহন্তানং পরিহানী’’তি এতস্মিং পঞ্হে। সো হি ‘‘সব্বেৰ অরহন্তো’’তিআদিনা আগতেসু ততিযো পঞ্হো। তেসন্তি মুদিন্দ্রিযানং। ততিযস্মিম্পীতি পি-সদ্দো ৰুত্তত্থসমুচ্চযো। তেন পঠমপঞ্হং সমুচ্চিনোতি ‘‘তত্থপি তিক্খিন্দ্রিযা অধিপ্পেতা’’তি।
Tatiyasminti ‘‘sabbesaññeva arahantānaṃ parihānī’’ti etasmiṃ pañhe. So hi ‘‘sabbeva arahanto’’tiādinā āgatesu tatiyo pañho. Tesanti mudindriyānaṃ. Tatiyasmimpīti pi-saddo vuttatthasamuccayo. Tena paṭhamapañhaṃ samuccinoti ‘‘tatthapi tikkhindriyā adhippetā’’ti.
সোযেৰ ন পরিহাযতীতি সোতাপন্নোযেৰ সোতাপন্নভাৰতো ন পরিহাযতীতি অত্থো। ন চেত্থ সকদাগামিভাৰাপত্তিযা সোতাপন্নভাৰাপগমো পরিহানি হোতি ৰিসেসাধিগমভাৰতো। পত্তৰিসেসতো হি পরিহানীতি। ইতরেতি সকদাগামিআদিকা। উপরিমগ্গত্থাযাতি উপরিমগ্গত্তযপটিলাভত্থায ‘‘নিযতো’’তি ৰুত্তমত্থং অগ্গহেত্ৰা।
Soyeva na parihāyatīti sotāpannoyeva sotāpannabhāvato na parihāyatīti attho. Na cettha sakadāgāmibhāvāpattiyā sotāpannabhāvāpagamo parihāni hoti visesādhigamabhāvato. Pattavisesato hi parihānīti. Itareti sakadāgāmiādikā. Uparimaggatthāyāti uparimaggattayapaṭilābhatthāya ‘‘niyato’’ti vuttamatthaṃ aggahetvā.
ৰাদযুত্তিপরিহানিকথাৰণ্ণনা নিট্ঠিতা।
Vādayuttiparihānikathāvaṇṇanā niṭṭhitā.
২. অরিযপুগ্গলসংসন্দনপরিহানিকথাৰণ্ণনা
2. Ariyapuggalasaṃsandanaparihānikathāvaṇṇanā
২৪১. ততোতি অরহত্ততো। তত্থাতি দস্সনমগ্গফলে। ৰাযামেনাতি ৰিপস্সনুস্সাহনেন। তদনন্তরন্তি সোতাপত্তিফলানন্তরং। পঠমং দস্সনমগ্গফলানন্তরং অরহত্তং পাপুণাতি, ততো পরিহীনো পুন ৰাযমন্তো তদনন্তরং ন অরহত্তং পাপুণাতীতি কা এত্থ যুত্তীতি অধিপ্পাযো। পরৰাদী নাম যুত্তম্পি ৰদতি অযুত্তম্পীতি কিং তস্স ৰাদে যুত্তিগৰেসনাযাতি পন দট্ঠব্বং। অপরিহানসভাৰো ভাৰনামগ্গো অরিযমগ্গত্তা দস্সনাদস্সনমগ্গো ৰিয। ন চেত্থ অসিদ্ধতাসঙ্কা লোকুত্তরমগ্গস্স পরস্সপি অরিযমগ্গভাৰস্স সিদ্ধত্তা, নাপি লোকিযমগ্গেন অনেকন্তিকতা অরিযসদ্দেন ৰিসেসিতত্তা। তথা ন ৰিরুদ্ধতা দুতিযমগ্গাদীনং ভাৰনামগ্গভাৰস্স ওল়ারিককিলেসপ্পহানাদীনঞ্চ পরস্সপি আগমতো সিদ্ধত্তা।
241. Tatoti arahattato. Tatthāti dassanamaggaphale. Vāyāmenāti vipassanussāhanena. Tadanantaranti sotāpattiphalānantaraṃ. Paṭhamaṃ dassanamaggaphalānantaraṃ arahattaṃ pāpuṇāti, tato parihīno puna vāyamanto tadanantaraṃ na arahattaṃ pāpuṇātīti kā ettha yuttīti adhippāyo. Paravādī nāma yuttampi vadati ayuttampīti kiṃ tassa vāde yuttigavesanāyāti pana daṭṭhabbaṃ. Aparihānasabhāvo bhāvanāmaggo ariyamaggattā dassanādassanamaggo viya. Na cettha asiddhatāsaṅkā lokuttaramaggassa parassapi ariyamaggabhāvassa siddhattā, nāpi lokiyamaggena anekantikatā ariyasaddena visesitattā. Tathā na viruddhatā dutiyamaggādīnaṃ bhāvanāmaggabhāvassa oḷārikakilesappahānādīnañca parassapi āgamato siddhattā.
অরিযপুগ্গলসংসন্দনপরিহানিকথাৰণ্ণনা নিট্ঠিতা।
Ariyapuggalasaṃsandanaparihānikathāvaṇṇanā niṭṭhitā.
৩. সুত্তসাধনপরিহানিকথাৰণ্ণনা
3. Suttasādhanaparihānikathāvaṇṇanā
২৬৫. পুগ্গলপঞ্ঞত্তিঅট্ঠকথাযং ‘‘পত্তি, ফুসনা’’তি চ পচ্চক্খতো অধিগমো অধিপ্পেতোতি ৰুত্তং ‘‘পত্তব্বং ৰদতীতি আহ ফুসনারহ’’ন্তি।
265. Puggalapaññattiaṭṭhakathāyaṃ ‘‘patti, phusanā’’ti ca paccakkhato adhigamo adhippetoti vuttaṃ ‘‘pattabbaṃ vadatīti āha phusanāraha’’nti.
২৬৭. কতসন্নিট্ঠানস্সাতি ইমস্মিং সত্তাহে মাসে উতুম্হি অন্তোৰস্সে ৰা অঞ্ঞং আরাধেস্সামীতি কতনিচ্ছযস্স।
267. Katasanniṭṭhānassāti imasmiṃ sattāhe māse utumhi antovasse vā aññaṃ ārādhessāmīti katanicchayassa.
সুত্তসাধনপরিহানিকথাৰণ্ণনা নিট্ঠিতা।
Suttasādhanaparihānikathāvaṇṇanā niṭṭhitā.
পরিহানিকথাৰণ্ণনা নিট্ঠিতা।
Parihānikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / ২. পরিহানিকথা • 2. Parihānikathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ২. পরিহানিকথা • 2. Parihānikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ২. পরিহানিকথা • 2. Parihānikathā
