| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. পরিহানিসুত্তং
8. Parihānisuttaṃ
১৫৮. তত্র খো আযস্মা সারিপুত্তো ভিক্খূ আমন্তেসি – ‘‘আৰুসো ভিক্খৰে’’তি । ‘‘আৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং। আযস্মা সারিপুত্তো এতদৰোচ –
158. Tatra kho āyasmā sāriputto bhikkhū āmantesi – ‘‘āvuso bhikkhave’’ti . ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘যো হি কোচি, আৰুসো, ভিক্খু ৰা ভিক্খুনী ৰা চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘পরিহাযামি কুসলেহি ধম্মেহি’। পরিহানমেতং ৰুত্তং ভগৰতা। কতমে চত্তারো? রাগৰেপুল্লত্তং 1, দোসৰেপুল্লত্তং, মোহৰেপুল্লত্তং, গম্ভীরেসু খো পনস্স ঠানাঠানেসু পঞ্ঞাচক্খু ন কমতি। যো হি কোচি, আৰুসো, ভিক্খু ৰা ভিক্খুনী ৰা ইমে চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘পরিহাযামি কুসলেহি ধম্মেহি’। পরিহানমেতং ৰুত্তং ভগৰতা।
‘‘Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṃ – ‘parihāyāmi kusalehi dhammehi’. Parihānametaṃ vuttaṃ bhagavatā. Katame cattāro? Rāgavepullattaṃ 2, dosavepullattaṃ, mohavepullattaṃ, gambhīresu kho panassa ṭhānāṭhānesu paññācakkhu na kamati. Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṃ – ‘parihāyāmi kusalehi dhammehi’. Parihānametaṃ vuttaṃ bhagavatā.
‘‘যো হি কোচি, আৰুসো, ভিক্খু ৰা ভিক্খুনী ৰা চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘ন পরিহাযামি কুসলেহি ধম্মেহি’। অপরিহানমেতং ৰুত্তং ভগৰতা। কতমে চত্তারো? রাগতনুত্তং 3, দোসতনুত্তং, মোহতনুত্তং, গম্ভীরেসু খো পনস্স ঠানাঠানেসু পঞ্ঞাচক্খু কমতি। যো হি কোচি, আৰুসো, ভিক্খু ৰা ভিক্খুনী ৰা ইমে চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘ন পরিহাযামি কুসলেহি ধম্মেহি’। অপরিহানমেতং ৰুত্তং ভগৰতা’’তি। অট্ঠমং।
‘‘Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṃ – ‘na parihāyāmi kusalehi dhammehi’. Aparihānametaṃ vuttaṃ bhagavatā. Katame cattāro? Rāgatanuttaṃ 4, dosatanuttaṃ, mohatanuttaṃ, gambhīresu kho panassa ṭhānāṭhānesu paññācakkhu kamati. Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṃ – ‘na parihāyāmi kusalehi dhammehi’. Aparihānametaṃ vuttaṃ bhagavatā’’ti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. পরিহানিসুত্তৰণ্ণনা • 8. Parihānisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬-৮. কপ্পসুত্তাদিৰণ্ণনা • 6-8. Kappasuttādivaṇṇanā
