| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. པརིཧཱནིསུཏྟཾ
8. Parihānisuttaṃ
༡༥༨. ཏཏྲ ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི – ‘‘ཨཱཝུསོ བྷིཀྑཝེ’’ཏི ། ‘‘ཨཱཝུསོ’’ཏི ཁོ ཏེ བྷིཀྑཱུ ཨཱཡསྨཏོ སཱརིཔུཏྟསྶ པཙྩསྶོསུཾ། ཨཱཡསྨཱ སཱརིཔུཏྟོ ཨེཏདཝོཙ –
158. Tatra kho āyasmā sāriputto bhikkhū āmantesi – ‘‘āvuso bhikkhave’’ti . ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘ཡོ ཧི ཀོཙི, ཨཱཝུསོ, བྷིཀྑུ ཝཱ བྷིཀྑུནཱི ཝཱ ཙཏྟཱརོ དྷམྨེ ཨཏྟནི སམནུཔསྶཏི, ནིཊྛམེཏྠ གནྟབྦཾ – ‘པརིཧཱཡཱམི ཀུསལེཧི དྷམྨེཧི’། པརིཧཱནམེཏཾ ཝུཏྟཾ བྷགཝཏཱ། ཀཏམེ ཙཏྟཱརོ? རཱགཝེཔུལླཏྟཾ 1, དོསཝེཔུལླཏྟཾ, མོཧཝེཔུལླཏྟཾ, གམྦྷཱིརེསུ ཁོ པནསྶ ཋཱནཱཋཱནེསུ པཉྙཱཙཀྑུ ན ཀམཏི། ཡོ ཧི ཀོཙི, ཨཱཝུསོ, བྷིཀྑུ ཝཱ བྷིཀྑུནཱི ཝཱ ཨིམེ ཙཏྟཱརོ དྷམྨེ ཨཏྟནི སམནུཔསྶཏི, ནིཊྛམེཏྠ གནྟབྦཾ – ‘པརིཧཱཡཱམི ཀུསལེཧི དྷམྨེཧི’། པརིཧཱནམེཏཾ ཝུཏྟཾ བྷགཝཏཱ།
‘‘Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṃ – ‘parihāyāmi kusalehi dhammehi’. Parihānametaṃ vuttaṃ bhagavatā. Katame cattāro? Rāgavepullattaṃ 2, dosavepullattaṃ, mohavepullattaṃ, gambhīresu kho panassa ṭhānāṭhānesu paññācakkhu na kamati. Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṃ – ‘parihāyāmi kusalehi dhammehi’. Parihānametaṃ vuttaṃ bhagavatā.
‘‘ཡོ ཧི ཀོཙི, ཨཱཝུསོ, བྷིཀྑུ ཝཱ བྷིཀྑུནཱི ཝཱ ཙཏྟཱརོ དྷམྨེ ཨཏྟནི སམནུཔསྶཏི, ནིཊྛམེཏྠ གནྟབྦཾ – ‘ན པརིཧཱཡཱམི ཀུསལེཧི དྷམྨེཧི’། ཨཔརིཧཱནམེཏཾ ཝུཏྟཾ བྷགཝཏཱ། ཀཏམེ ཙཏྟཱརོ? རཱགཏནུཏྟཾ 3, དོསཏནུཏྟཾ, མོཧཏནུཏྟཾ, གམྦྷཱིརེསུ ཁོ པནསྶ ཋཱནཱཋཱནེསུ པཉྙཱཙཀྑུ ཀམཏི། ཡོ ཧི ཀོཙི, ཨཱཝུསོ, བྷིཀྑུ ཝཱ བྷིཀྑུནཱི ཝཱ ཨིམེ ཙཏྟཱརོ དྷམྨེ ཨཏྟནི སམནུཔསྶཏི, ནིཊྛམེཏྠ གནྟབྦཾ – ‘ན པརིཧཱཡཱམི ཀུསལེཧི དྷམྨེཧི’། ཨཔརིཧཱནམེཏཾ ཝུཏྟཾ བྷགཝཏཱ’’ཏི། ཨཊྛམཾ།
‘‘Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṃ – ‘na parihāyāmi kusalehi dhammehi’. Aparihānametaṃ vuttaṃ bhagavatā. Katame cattāro? Rāgatanuttaṃ 4, dosatanuttaṃ, mohatanuttaṃ, gambhīresu kho panassa ṭhānāṭhānesu paññācakkhu kamati. Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṃ – ‘na parihāyāmi kusalehi dhammehi’. Aparihānametaṃ vuttaṃ bhagavatā’’ti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. པརིཧཱནིསུཏྟཝཎྞནཱ • 8. Parihānisuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦-༨. ཀཔྤསུཏྟཱདིཝཎྞནཱ • 6-8. Kappasuttādivaṇṇanā
