| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. පරික්‌කමනසුත්‌තං
9. Parikkamanasuttaṃ
175. ‘‘සපරික්‌කමනො අයං, භික්‌ඛවෙ, ධම්‌මො, නායං ධම්‌මො අපරික්‌කමනො. කථඤ්‌ච, භික්‌ඛවෙ, සපරික්‌කමනො අයං ධම්‌මො, නායං ධම්‌මො අපරික්‌කමනො? පාණාතිපාතිස්‌ස, භික්‌ඛවෙ, පාණාතිපාතා වෙරමණී පරික්‌කමනං හොති. අදින්‌නාදායිස්‌ස, භික්‌ඛවෙ, අදින්‌නාදානා වෙරමණී පරික්‌කමනං හොති. කාමෙසුමිච්‌ඡාචාරිස්‌ස, භික්‌ඛවෙ, කාමෙසුමිච්‌ඡාචාරා වෙරමණී පරික්‌කමනං හොති. මුසාවාදිස්‌ස, භික්‌ඛවෙ, මුසාවාදා වෙරමණී පරික්‌කමනං හොති. පිසුණවාචස්‌ස , භික්‌ඛවෙ, පිසුණාය වාචාය වෙරමණී පරික්‌කමනං හොති. ඵරුසවාචස්‌ස, භික්‌ඛවෙ, ඵරුසාය වාචාය වෙරමණී පරික්‌කමනං හොති. සම්‌ඵප්‌පලාපිස්‌ස, භික්‌ඛවෙ, සම්‌ඵප්‌පලාපා වෙරමණී පරික්‌කමනං හොති. අභිජ්‌ඣාලුස්‌ස, භික්‌ඛවෙ, අනභිජ්‌ඣා පරික්‌කමනං හොති. බ්‍යාපන්‌නචිත්‌තස්‌ස 1, භික්‌ඛවෙ, අබ්‍යාපාදො පරික්‌කමනං හොති. මිච්‌ඡාදිට්‌ඨිස්‌ස, භික්‌ඛවෙ, සම්‌මාදිට්‌ඨි පරික්‌කමනං හොති. එවං ඛො, භික්‌ඛවෙ, සපරික්‌කමනො අයං ධම්‌මො, නායං ධම්‌මො අපරික්‌කමනො’’ති. නවමං.
175. ‘‘Saparikkamano ayaṃ, bhikkhave, dhammo, nāyaṃ dhammo aparikkamano. Kathañca, bhikkhave, saparikkamano ayaṃ dhammo, nāyaṃ dhammo aparikkamano? Pāṇātipātissa, bhikkhave, pāṇātipātā veramaṇī parikkamanaṃ hoti. Adinnādāyissa, bhikkhave, adinnādānā veramaṇī parikkamanaṃ hoti. Kāmesumicchācārissa, bhikkhave, kāmesumicchācārā veramaṇī parikkamanaṃ hoti. Musāvādissa, bhikkhave, musāvādā veramaṇī parikkamanaṃ hoti. Pisuṇavācassa , bhikkhave, pisuṇāya vācāya veramaṇī parikkamanaṃ hoti. Pharusavācassa, bhikkhave, pharusāya vācāya veramaṇī parikkamanaṃ hoti. Samphappalāpissa, bhikkhave, samphappalāpā veramaṇī parikkamanaṃ hoti. Abhijjhālussa, bhikkhave, anabhijjhā parikkamanaṃ hoti. Byāpannacittassa 2, bhikkhave, abyāpādo parikkamanaṃ hoti. Micchādiṭṭhissa, bhikkhave, sammādiṭṭhi parikkamanaṃ hoti. Evaṃ kho, bhikkhave, saparikkamano ayaṃ dhammo, nāyaṃ dhammo aparikkamano’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. පරික්‌කමනසුත්‌තවණ්‌ණනා • 9. Parikkamanasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-44. බ්‍රාහ්‌මණපච්‌චොරොහණීසුත්‌තාදිවණ්‌ණනා • 1-44. Brāhmaṇapaccorohaṇīsuttādivaṇṇanā
