| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༩. པརིཀྐམནསུཏྟཾ
9. Parikkamanasuttaṃ
༡༧༥. ‘‘སཔརིཀྐམནོ ཨཡཾ, བྷིཀྑཝེ, དྷམྨོ, ནཱཡཾ དྷམྨོ ཨཔརིཀྐམནོ། ཀཐཉྩ, བྷིཀྑཝེ, སཔརིཀྐམནོ ཨཡཾ དྷམྨོ, ནཱཡཾ དྷམྨོ ཨཔརིཀྐམནོ? པཱཎཱཏིཔཱཏིསྶ, བྷིཀྑཝེ, པཱཎཱཏིཔཱཏཱ ཝེརམཎཱི པརིཀྐམནཾ ཧོཏི། ཨདིནྣཱདཱཡིསྶ, བྷིཀྑཝེ, ཨདིནྣཱདཱནཱ ཝེརམཎཱི པརིཀྐམནཾ ཧོཏི། ཀཱམེསུམིཙྪཱཙཱརིསྶ, བྷིཀྑཝེ, ཀཱམེསུམིཙྪཱཙཱརཱ ཝེརམཎཱི པརིཀྐམནཾ ཧོཏི། མུསཱཝཱདིསྶ, བྷིཀྑཝེ, མུསཱཝཱདཱ ཝེརམཎཱི པརིཀྐམནཾ ཧོཏི། པིསུཎཝཱཙསྶ , བྷིཀྑཝེ, པིསུཎཱཡ ཝཱཙཱཡ ཝེརམཎཱི པརིཀྐམནཾ ཧོཏི། ཕརུསཝཱཙསྶ, བྷིཀྑཝེ, ཕརུསཱཡ ཝཱཙཱཡ ཝེརམཎཱི པརིཀྐམནཾ ཧོཏི། སམྥཔྤལཱཔིསྶ, བྷིཀྑཝེ, སམྥཔྤལཱཔཱ ཝེརམཎཱི པརིཀྐམནཾ ཧོཏི། ཨབྷིཛ྄ཛྷཱལུསྶ, བྷིཀྑཝེ, ཨནབྷིཛ྄ཛྷཱ པརིཀྐམནཾ ཧོཏི། བྱཱཔནྣཙིཏྟསྶ 1, བྷིཀྑཝེ, ཨབྱཱཔཱདོ པརིཀྐམནཾ ཧོཏི། མིཙྪཱདིཊྛིསྶ, བྷིཀྑཝེ, སམྨཱདིཊྛི པརིཀྐམནཾ ཧོཏི། ཨེཝཾ ཁོ, བྷིཀྑཝེ, སཔརིཀྐམནོ ཨཡཾ དྷམྨོ, ནཱཡཾ དྷམྨོ ཨཔརིཀྐམནོ’’ཏི། ནཝམཾ།
175. ‘‘Saparikkamano ayaṃ, bhikkhave, dhammo, nāyaṃ dhammo aparikkamano. Kathañca, bhikkhave, saparikkamano ayaṃ dhammo, nāyaṃ dhammo aparikkamano? Pāṇātipātissa, bhikkhave, pāṇātipātā veramaṇī parikkamanaṃ hoti. Adinnādāyissa, bhikkhave, adinnādānā veramaṇī parikkamanaṃ hoti. Kāmesumicchācārissa, bhikkhave, kāmesumicchācārā veramaṇī parikkamanaṃ hoti. Musāvādissa, bhikkhave, musāvādā veramaṇī parikkamanaṃ hoti. Pisuṇavācassa , bhikkhave, pisuṇāya vācāya veramaṇī parikkamanaṃ hoti. Pharusavācassa, bhikkhave, pharusāya vācāya veramaṇī parikkamanaṃ hoti. Samphappalāpissa, bhikkhave, samphappalāpā veramaṇī parikkamanaṃ hoti. Abhijjhālussa, bhikkhave, anabhijjhā parikkamanaṃ hoti. Byāpannacittassa 2, bhikkhave, abyāpādo parikkamanaṃ hoti. Micchādiṭṭhissa, bhikkhave, sammādiṭṭhi parikkamanaṃ hoti. Evaṃ kho, bhikkhave, saparikkamano ayaṃ dhammo, nāyaṃ dhammo aparikkamano’’ti. Navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. པརིཀྐམནསུཏྟཝཎྞནཱ • 9. Parikkamanasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༤༤. བྲཱཧྨཎཔཙྩོརོཧཎཱིསུཏྟཱདིཝཎྞནཱ • 1-44. Brāhmaṇapaccorohaṇīsuttādivaṇṇanā
