| Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī |
১৫. পরিক্খারহারৰিভঙ্গৰিভাৰনা
15. Parikkhārahāravibhaṅgavibhāvanā
৪৯. যেন যেন সংৰণ্ণনাৰিসেসভূতেন ৰিভঙ্গেন দুক্খসচ্চাদীনং একত্ততাদযো ৰিভত্তা, সো সংৰণ্ণনাৰিসেসভূতো পরিপুণ্ণো, ‘‘কতমো পরিক্খারহারৰিভঙ্গো নামা’’তি পুচ্ছিতব্বত্তা ‘‘তত্থ কতমো পরিক্খারো হারো’’তিআদি ৰুত্তং। তত্থ তত্থাতি তেসু নিদ্দিট্ঠেসু সোল়সসু দেসনাহারাদীসু কতমো সংৰণ্ণনাৰিসেসো পরিক্খারো হারো পরিক্খারহারৰিভঙ্গো নামাতি পুচ্ছতি। ‘‘যে ধম্মা যং ধম্মং জনযন্তী’’তিআদিনিদ্দেসস্স ইদানি মযা ৰুচ্চমানো ‘‘যো ধম্মো যং ধম্মং জনযতি, তস্স সো পরিক্খারো’’তিআদিকো পরিক্খারভূতস্স হেতুনো চেৰ পচ্চযস্স চ ৰিত্থারসংৰণ্ণনাৰিসেসো পরিক্খারৰিভঙ্গো নাম।
49. Yena yena saṃvaṇṇanāvisesabhūtena vibhaṅgena dukkhasaccādīnaṃ ekattatādayo vibhattā, so saṃvaṇṇanāvisesabhūto paripuṇṇo, ‘‘katamo parikkhārahāravibhaṅgo nāmā’’ti pucchitabbattā ‘‘tattha katamo parikkhāro hāro’’tiādi vuttaṃ. Tattha tatthāti tesu niddiṭṭhesu soḷasasu desanāhārādīsu katamo saṃvaṇṇanāviseso parikkhāro hāro parikkhārahāravibhaṅgo nāmāti pucchati. ‘‘Ye dhammā yaṃ dhammaṃ janayantī’’tiādiniddesassa idāni mayā vuccamāno ‘‘yo dhammo yaṃ dhammaṃ janayati, tassa so parikkhāro’’tiādiko parikkhārabhūtassa hetuno ceva paccayassa ca vitthārasaṃvaṇṇanāviseso parikkhāravibhaṅgo nāma.
‘‘কতমো সংৰণ্ণেতব্বো পরিক্খারো’’তি পুচ্ছিতব্বত্তা ‘‘যো ধম্মো’’তিআদি ৰুত্তং। তত্থ যো হেতুপচ্চযপ্পকারো ধম্মো যং ফলভূতং ধম্মং জনযতি জনেতি, তস্স ফলধম্মস্স সো হেতুপচ্চযপ্পকারো ধম্মো পরিক্খারো নাম। ‘‘কিংলক্খণো পরিক্খারো’’তি পুচ্ছিতব্বত্তা তথা পুচ্ছিত্ৰা লক্খণৰিসেসং দস্সেতুং ‘‘কিংলক্খণো’’তিআদি ৰুত্তং। অট্ঠকথাযং পন – ‘‘তত্থ ‘যো ধম্মো যং ধম্মং জনযতি, তস্স সো পরিক্খারো’তি সঙ্খেপতো পরিক্খারলক্খণং ৰত্ৰা তং ৰিভাগেন দস্সেতুং ‘কিংলক্খণো’তিআদি ৰুত্ত’’ন্তি (নেত্তি॰ অট্ঠ॰ ৪৯) ৰুত্তং। ‘‘কিত্তকা ধম্মা জনযন্তী’’তি পুচ্ছিতব্বত্তা ‘‘দ্ৰে ধম্মা জনযন্তি হেতু চ পচ্চযো চা’’তি ৰুত্তং। ‘‘হেতুপি কারণং, পচ্চযোপি কারণং , তস্মা কারণাযেৰ কেন লক্খণেন দ্ৰিধা ৰুত্তা’’তি ৰত্তব্বত্তা ‘‘তত্থ কিংলক্খণো’’তিআদি ৰুত্তং। জনিতব্বফলতো অঞ্ঞেহি ফলেহি অসাধারণলক্খণো হেতু, সব্বফলেহি সাধারণলক্খণো পচ্চযো, ইমিনা ৰিসেসলক্খণেন দ্ৰিধা ৰত্তব্বাতি অত্থো। ‘‘সাধারণাসাধারণৰিসেসো কীদিসো ভৰে’’তি পুচ্ছিতব্বত্তা ‘‘যথা কিং ভৰে’’তি পুচ্ছিত্ৰা ‘‘যথা অঙ্কুরস্সা’’তিআদি ৰুত্তং। যথা যো সাধারণাসাধারণৰিসেসো অত্থি, তথা সো সাধারণাসাধারণৰিসেসো কিং ৰিয ভৰেতি অত্থো। অঙ্কুরস্স নিব্বত্তিযা বীজং অসাধারণং যথা, তথা হেতু ফলস্স নিব্বত্তিযা অসাধারণো ভৰে। পথৰী চ আপো চ অঙ্কুরস্স নিব্বত্তিযা সাধারণা ভৰন্তি যথা, তথা পচ্চযো ফলস্স নিব্বত্তিযা সাধারণো ভৰে। সব্বফলস্স পচ্চযত্তা অঙ্কুরস্স বীজং অসাধারণং জনকং হেতু। ‘‘কথং পথৰী, আপো চ সাধারণা জনকাতি সদ্দহিতব্বা’’তি পুচ্ছিতব্বত্তা ‘‘অঙ্কুরস্স হী’’তিআদি ৰুত্তং। সমং সমানং ফলং ভৰাপেতীতি সভাৰো, কো সো? বীজং হেতুযেৰ। ‘‘কিং হেতুপচ্চযানং ৰিসেসো বীজঙ্কুরোপমাযেৰ দস্সেতব্বো, উদাহু অঞ্ঞূপমাযপি দস্সেতব্বো’’তি ৰত্তব্বত্তা অঞ্ঞায উপমাযপি ৰিসেসং দস্সেতুং ‘‘যথা ৰা পনা’’তিআদি ৰুত্তং। ইমায উপমাযপি হেতুপচ্চযানং ৰিসেসো ৰিজানিতব্বোতি অধিপ্পাযো।
‘‘Katamo saṃvaṇṇetabbo parikkhāro’’ti pucchitabbattā ‘‘yo dhammo’’tiādi vuttaṃ. Tattha yo hetupaccayappakāro dhammo yaṃ phalabhūtaṃ dhammaṃ janayati janeti, tassa phaladhammassa so hetupaccayappakāro dhammo parikkhāro nāma. ‘‘Kiṃlakkhaṇo parikkhāro’’ti pucchitabbattā tathā pucchitvā lakkhaṇavisesaṃ dassetuṃ ‘‘kiṃlakkhaṇo’’tiādi vuttaṃ. Aṭṭhakathāyaṃ pana – ‘‘tattha ‘yo dhammo yaṃ dhammaṃ janayati, tassa so parikkhāro’ti saṅkhepato parikkhāralakkhaṇaṃ vatvā taṃ vibhāgena dassetuṃ ‘kiṃlakkhaṇo’tiādi vutta’’nti (netti. aṭṭha. 49) vuttaṃ. ‘‘Kittakā dhammā janayantī’’ti pucchitabbattā ‘‘dve dhammā janayanti hetu ca paccayo cā’’ti vuttaṃ. ‘‘Hetupi kāraṇaṃ, paccayopi kāraṇaṃ , tasmā kāraṇāyeva kena lakkhaṇena dvidhā vuttā’’ti vattabbattā ‘‘tattha kiṃlakkhaṇo’’tiādi vuttaṃ. Janitabbaphalato aññehi phalehi asādhāraṇalakkhaṇo hetu, sabbaphalehi sādhāraṇalakkhaṇo paccayo, iminā visesalakkhaṇena dvidhā vattabbāti attho. ‘‘Sādhāraṇāsādhāraṇaviseso kīdiso bhave’’ti pucchitabbattā ‘‘yathā kiṃ bhave’’ti pucchitvā ‘‘yathā aṅkurassā’’tiādi vuttaṃ. Yathā yo sādhāraṇāsādhāraṇaviseso atthi, tathā so sādhāraṇāsādhāraṇaviseso kiṃ viya bhaveti attho. Aṅkurassa nibbattiyā bījaṃ asādhāraṇaṃ yathā, tathā hetu phalassa nibbattiyā asādhāraṇo bhave. Pathavī ca āpo ca aṅkurassa nibbattiyā sādhāraṇā bhavanti yathā, tathā paccayo phalassa nibbattiyā sādhāraṇo bhave. Sabbaphalassa paccayattā aṅkurassa bījaṃ asādhāraṇaṃ janakaṃ hetu. ‘‘Kathaṃ pathavī, āpo ca sādhāraṇā janakāti saddahitabbā’’ti pucchitabbattā ‘‘aṅkurassa hī’’tiādi vuttaṃ. Samaṃ samānaṃ phalaṃ bhavāpetīti sabhāvo, ko so? Bījaṃ hetuyeva. ‘‘Kiṃ hetupaccayānaṃ viseso bījaṅkuropamāyeva dassetabbo, udāhu aññūpamāyapi dassetabbo’’ti vattabbattā aññāya upamāyapi visesaṃ dassetuṃ ‘‘yathā vā panā’’tiādi vuttaṃ. Imāya upamāyapi hetupaccayānaṃ viseso vijānitabboti adhippāyo.
বীজঙ্কুরাদীসু বাহিরেসু পরিক্খারভূতানং হেতুপচ্চযানং ৰিসেসো আচরিযেন ৰিভত্তো, অম্হেহি চ ঞাতো, ‘‘কথং অজ্ঝত্তিকেসু ৰিভত্তো’’তি পুচ্ছিতব্বত্তা ‘‘অযঞ্হি সংসারো’’তিআদি ৰুত্তং। অথ ৰা ‘‘বাহিরেসু পরিক্খারভূতো হেতুপচ্চযো যুত্তো হোতু, কথং অজ্ঝত্তিকেসু যুত্তো’’তি ৰত্তব্বত্তা ‘‘অযঞ্হি সংসারো’’তিআদি ৰুত্তং। অট্ঠকথাযং পন – ‘‘এৰং বাহিরং হেতুপচ্চযৰিভাগং দস্সেত্ৰা ইদানি অজ্ঝত্তিকং দস্সেতুং ‘অযঞ্হি সংসারো’তিআদি ৰুত্ত’’ন্তি (নেত্তি॰ অট্ঠ॰ ৪৯) ৰুত্তং। হেতুপচ্চযেহি সহ সংসারো ভৰতীতি সহেতুপচ্চযো। অযং সংসারো হি যস্মা সহেতুপচ্চযো হুত্ৰা নিব্বত্তো, তস্মা অজ্ঝত্তিকেপি পরিক্খারভূতো হেতুপচ্চযো যুত্তোযেৰাতি দট্ঠব্বোতি অধিপ্পাযো।
Bījaṅkurādīsu bāhiresu parikkhārabhūtānaṃ hetupaccayānaṃ viseso ācariyena vibhatto, amhehi ca ñāto, ‘‘kathaṃ ajjhattikesu vibhatto’’ti pucchitabbattā ‘‘ayañhi saṃsāro’’tiādi vuttaṃ. Atha vā ‘‘bāhiresu parikkhārabhūto hetupaccayo yutto hotu, kathaṃ ajjhattikesu yutto’’ti vattabbattā ‘‘ayañhi saṃsāro’’tiādi vuttaṃ. Aṭṭhakathāyaṃ pana – ‘‘evaṃ bāhiraṃ hetupaccayavibhāgaṃ dassetvā idāni ajjhattikaṃ dassetuṃ ‘ayañhi saṃsāro’tiādi vutta’’nti (netti. aṭṭha. 49) vuttaṃ. Hetupaccayehi saha saṃsāro bhavatīti sahetupaccayo. Ayaṃ saṃsāro hi yasmā sahetupaccayo hutvā nibbatto, tasmā ajjhattikepi parikkhārabhūto hetupaccayo yuttoyevāti daṭṭhabboti adhippāyo.
সো ইমস্স সংসারস্স সহেতুপচ্চযত্তং যদি ভগৰতা ৰুত্তং, এৰং সতি অম্হেহি সদ্দহিতব্বং, ‘‘কথং সদ্দহিতব্ব’’ন্তি ৰত্তব্বত্তা ‘‘এৰঞ্হী’’তিআদি ৰুত্তং। এৰন্তি ইমিনা অৰিজ্জাদিনা হেতুপচ্চযেন সব্বো পটিচ্চসমুপ্পাদো সংসারোতি নিব্বত্তোতি ভগৰতা সংসারস্স সহেতুপচ্চযত্তং ৰুত্তং, তস্মা সদ্দহিতব্বং। অৰিজ্জাদযো সঙ্খারাদীনং পচ্চযো হোতু, ‘‘কতমো অৰিজ্জায হেতূ’’তি পুচ্ছিতব্বত্তা ‘‘ইতি অৰিজ্জা অৰিজ্জায হেতূ’’তি ৰুত্তং। ‘‘কতমো অৰিজ্জায পচ্চযো’’তি পুচ্ছিতব্বত্তা ‘‘অযোনিসো মনসিকারো পচ্চযো’’তি ৰুত্তং। ‘‘কতমা অৰিজ্জা কতমায অৰিজ্জায হেতূ’’তি পুচ্ছিতব্বত্তা ‘‘পুরিমিকা অৰিজ্জা পচ্ছিমিকায অৰিজ্জায হেতূ’’তি ৰুত্তং। ‘‘কতমা পুরিমিকা অৰিজ্জা কতমা পচ্ছিমিকা অৰিজ্জা’’তি পুচ্ছিতব্বত্তা ‘‘তত্থা’’তিআদি ৰুত্তং। ‘‘অৰিজ্জাপরিযুট্ঠানস্স হেতুভূতো পুরিমো অৰিজ্জানুসযো সমনন্তরোৰ কিং, উদাহু পরম্পরহেতুপি হোতী’’তি পুচ্ছিতব্বত্তা ‘‘বীজঙ্কুরো ৰিযা’’তিআদি ৰুত্তং। বীজঙ্কুরোতি বীজানং অঙ্কুরোতি বীজঙ্কুরো, বীজানং সমনন্তরহেতুতায অঙ্কুরো নিব্বত্ততি ৰিয। যত্থ রুক্খাদিকে যং ফলং নিব্বত্ততি, তস্মিং রুক্খাদিকে নিব্বত্তস্স অস্স ফলস্স ইদং বীজং পন পরম্পরহেতুতায হেতুভূতং ভৰতি।
So imassa saṃsārassa sahetupaccayattaṃ yadi bhagavatā vuttaṃ, evaṃ sati amhehi saddahitabbaṃ, ‘‘kathaṃ saddahitabba’’nti vattabbattā ‘‘evañhī’’tiādi vuttaṃ. Evanti iminā avijjādinā hetupaccayena sabbo paṭiccasamuppādo saṃsāroti nibbattoti bhagavatā saṃsārassa sahetupaccayattaṃ vuttaṃ, tasmā saddahitabbaṃ. Avijjādayo saṅkhārādīnaṃ paccayo hotu, ‘‘katamo avijjāya hetū’’ti pucchitabbattā ‘‘iti avijjā avijjāya hetū’’ti vuttaṃ. ‘‘Katamo avijjāya paccayo’’ti pucchitabbattā ‘‘ayoniso manasikāro paccayo’’ti vuttaṃ. ‘‘Katamā avijjā katamāya avijjāya hetū’’ti pucchitabbattā ‘‘purimikā avijjā pacchimikāya avijjāya hetū’’ti vuttaṃ. ‘‘Katamā purimikā avijjā katamā pacchimikā avijjā’’ti pucchitabbattā ‘‘tatthā’’tiādi vuttaṃ. ‘‘Avijjāpariyuṭṭhānassa hetubhūto purimo avijjānusayo samanantarova kiṃ, udāhu paramparahetupi hotī’’ti pucchitabbattā ‘‘bījaṅkuro viyā’’tiādi vuttaṃ. Bījaṅkuroti bījānaṃ aṅkuroti bījaṅkuro, bījānaṃ samanantarahetutāya aṅkuro nibbattati viya. Yattha rukkhādike yaṃ phalaṃ nibbattati, tasmiṃ rukkhādike nibbattassa assa phalassa idaṃ bījaṃ pana paramparahetutāya hetubhūtaṃ bhavati.
‘‘বীজং পন একংযেৰ হোতি, কথং দ্ৰিধা ৰত্তব্ব’’ন্তি ৰত্তব্বত্তা ‘‘দুৰিধো হী’’তিআদি ৰুত্তং, সমনন্তরকালপরম্পরকালভেদেন হেতুপি দুৰিধো হোতিযেৰাতি অত্থো। বীজভূতো হেতু দুৰিধো যথা, এৰং অৰিজ্জায হেতুভূতো অৰিজ্জানুসযোপি সমনন্তরহেতু চ পরম্পরহেতু চাতি কালভেদেন দুৰিধো ভৰতি, সমনন্তরো অৰিজ্জানুসযো সমনন্তরস্স অৰিজ্জাপরিযুট্ঠানস্স সমনন্তরহেতু হোতি। পুরিমতরো অৰিজ্জানুসযো পচ্ছিমতরস্স অৰিজ্জাপরিযুট্ঠানস্স পরম্পরহেতু হোতি। ইতি বীজভূতো অসাধারণো হেতু, পথৰীআপাদিকো সাধারণো পচ্চযোতি ৰিসেসো পাকটো যথা, এৰং অৰিজ্জানুসযো অসাধারণো হেতু, অযোনিসোমনসিকারো সাধারণো পচ্চযোতি ৰিসেসো দট্ঠব্বো।
‘‘Bījaṃ pana ekaṃyeva hoti, kathaṃ dvidhā vattabba’’nti vattabbattā ‘‘duvidho hī’’tiādi vuttaṃ, samanantarakālaparamparakālabhedena hetupi duvidho hotiyevāti attho. Bījabhūto hetu duvidho yathā, evaṃ avijjāya hetubhūto avijjānusayopi samanantarahetu ca paramparahetu cāti kālabhedena duvidho bhavati, samanantaro avijjānusayo samanantarassa avijjāpariyuṭṭhānassa samanantarahetu hoti. Purimataro avijjānusayo pacchimatarassa avijjāpariyuṭṭhānassa paramparahetu hoti. Iti bījabhūto asādhāraṇo hetu, pathavīāpādiko sādhāraṇo paccayoti viseso pākaṭo yathā, evaṃ avijjānusayo asādhāraṇo hetu, ayonisomanasikāro sādhāraṇo paccayoti viseso daṭṭhabbo.
‘‘এত্তকেনেৰ হেতুপচ্চযানং ৰিসেসো ৰত্তব্বো’’তি ৰত্তব্বত্তা ‘‘যথা ৰা পন থালকঞ্চা’’তিআদি ৰুত্তং। অট্ঠকথাযং পন – ‘‘যথা ৰা পনাতিআদিনাপি হেতুপচ্চযৰিভাগমেৰ দস্সেতী’’তি ৰুত্তং। তত্থ পদীপস্স পচ্চযভূতং থালকঞ্চ ৰট্টি চ তেলঞ্চ পদীপস্স সভাৰহেতু সমানহেতু ন হোতীতি যোজনা। ‘‘পদীপস্স পচ্চযভূতম্পি থালকাদিকং সভাৰহেতু ন হোতীতি কস্মা সদ্দহিতব্ব’’ন্তি ৰত্তব্বত্তা ‘‘ন হি সক্কা’’তিআদি ৰুত্তং। পদীপস্স পচ্চযভূতং অনগ্গিকং অগ্গিরহিতং থালকঞ্চ ৰট্টিঞ্চ তেলঞ্চ দীপেতুং জালেতুং হি যস্মা ন সক্কা, তস্মা পুরিমো পদীপো পচ্ছিমস্স পদীপস্স সভাৰহেতু হোতি ৰিয, এৰং থালকাদিকং সভাৰহেতু ন হোতি। ইতি এৰংপকারো সভাৰো সমানো পদীপো হেতু হোতি যথা, পরভাৰো অসমানো থালকাদিকো পচ্চযো হোতি যথা চ, তথা অজ্ঝত্তিকো সভাৰো হেতু হোতি, বাহিরো অসমানো পচ্চযো হোতি। জনকো অৰিজ্জানুসযো অৰিজ্জাপরিযুট্ঠানস্স হেতু হোতি, পরিগ্গাহকো উপত্থম্ভকো পচ্চযো হোতি। অঞ্ঞেহি ফলেহি অসাধারণো হেতু হোতি, সব্বেহি ফলেহি সাধারণো পচ্চযো হোতীতি যোজেত্ৰা পদীপোপমাযপি হেতুপচ্চযানং পাকটো ৰিসেসো দট্ঠব্বোতি অধিপ্পাযো।
‘‘Ettakeneva hetupaccayānaṃ viseso vattabbo’’ti vattabbattā ‘‘yathā vā pana thālakañcā’’tiādi vuttaṃ. Aṭṭhakathāyaṃ pana – ‘‘yathā vā panātiādināpi hetupaccayavibhāgameva dassetī’’ti vuttaṃ. Tattha padīpassa paccayabhūtaṃ thālakañca vaṭṭi ca telañca padīpassa sabhāvahetu samānahetu na hotīti yojanā. ‘‘Padīpassa paccayabhūtampi thālakādikaṃ sabhāvahetu na hotīti kasmā saddahitabba’’nti vattabbattā ‘‘na hi sakkā’’tiādi vuttaṃ. Padīpassa paccayabhūtaṃ anaggikaṃ aggirahitaṃ thālakañca vaṭṭiñca telañca dīpetuṃ jāletuṃ hi yasmā na sakkā, tasmā purimo padīpo pacchimassa padīpassa sabhāvahetu hoti viya, evaṃ thālakādikaṃ sabhāvahetu na hoti. Iti evaṃpakāro sabhāvo samāno padīpo hetu hoti yathā, parabhāvo asamāno thālakādiko paccayo hoti yathā ca, tathā ajjhattiko sabhāvo hetu hoti, bāhiro asamāno paccayo hoti. Janako avijjānusayo avijjāpariyuṭṭhānassa hetu hoti, pariggāhako upatthambhako paccayo hoti. Aññehi phalehi asādhāraṇo hetu hoti, sabbehi phalehi sādhāraṇo paccayo hotīti yojetvā padīpopamāyapi hetupaccayānaṃ pākaṭo viseso daṭṭhabboti adhippāyo.
হেতুপচ্চযপ্পভেদং কারণং পরিক্খারোতি আচরিযেন ৰুত্তং, তস্স কারণস্স কারণভাৰো চ ফলাপেক্খো হোতি, তস্মা ‘‘যো কারণভাৰো যেনাকারেন হোতি, কতমো সো কারণভাৰো, কতমো সো আকারো’’তি পুচ্ছিতব্বত্তা চ ‘‘যং ফলং যেন ৰিসেসেন হোতি, কতমং তং ফলং, কতমো সো ৰিসেসো’’তি পুচ্ছিতব্বত্তা চ ‘‘কারণফলানং যো সম্বন্ধো হোতি, কতমো সো সম্বন্ধো’’তি পুচ্ছিতব্বত্তা চ তং সব্বং ৰিভাৰেতুং ‘‘অৰুপচ্ছেদত্থো’’তিআদি ৰুত্তং। অযমনুসন্ধ্যত্থো চ অট্ঠকথাযং ‘‘ইদানি যস্মা কারণং ‘পরিক্খারো’তি ৰুত্তং, কারণভাৰো চ ফলাপেক্খায, তস্মা কারণস্স যো কারণভাৰো যথা চ সো হোতি, যঞ্চ ফলং, যো চ তস্স ৰিসেসো, যো চ কারণফলানং সম্বন্ধো, তং সব্বং ৰিভাৰেতুং ‘অৰুপচ্ছেদত্থো’তিআদি ৰুত্ত’’ন্তি (নেত্তি॰ অট্ঠ॰ ৪৯) ইমিনা ৰুত্তোতি দট্ঠব্বো।
Hetupaccayappabhedaṃ kāraṇaṃ parikkhāroti ācariyena vuttaṃ, tassa kāraṇassa kāraṇabhāvo ca phalāpekkho hoti, tasmā ‘‘yo kāraṇabhāvo yenākārena hoti, katamo so kāraṇabhāvo, katamo so ākāro’’ti pucchitabbattā ca ‘‘yaṃ phalaṃ yena visesena hoti, katamaṃ taṃ phalaṃ, katamo so viseso’’ti pucchitabbattā ca ‘‘kāraṇaphalānaṃ yo sambandho hoti, katamo so sambandho’’ti pucchitabbattā ca taṃ sabbaṃ vibhāvetuṃ ‘‘avupacchedattho’’tiādi vuttaṃ. Ayamanusandhyattho ca aṭṭhakathāyaṃ ‘‘idāni yasmā kāraṇaṃ ‘parikkhāro’ti vuttaṃ, kāraṇabhāvo ca phalāpekkhāya, tasmā kāraṇassa yo kāraṇabhāvo yathā ca so hoti, yañca phalaṃ, yo ca tassa viseso, yo ca kāraṇaphalānaṃ sambandho, taṃ sabbaṃ vibhāvetuṃ ‘avupacchedattho’tiādi vutta’’nti (netti. aṭṭha. 49) iminā vuttoti daṭṭhabbo.
তত্থ অৰুপচ্ছিন্নস্স হেতুপচ্চযসঙ্খাতস্স কারণস্স যো অনুপচ্ছেদত্থো অত্থি, সো অনুপচ্ছেদত্থো সন্ততিঅত্থো হোতি ফলেন সম্বন্ধত্তা , যঞ্চ কারণং অত্তনো ফলস্স জনকং উপত্থম্ভকং হুত্ৰা নিরুজ্ঝতি, সো অনুপচ্ছিন্নো এৰ নাম হোতীতি। যঞ্চ ফলং অঞ্ঞস্স কারণং হুত্ৰা নিরুজ্ঝতি, তস্মিং অনুপচ্ছিন্নে তস্স চ সন্ততিঅত্থো হোতি। যং পন ফলং অঞ্ঞস্স ফলস্স কারণং অহুত্ৰা নিরুজ্ঝতি, তং উপচ্ছিন্নং হোতি, যথা তং অরহতো চুতিচিত্তন্তি। কারণতো নিব্বত্তস্স ফলস্স যো নিব্বত্তিঅত্থো অত্থি, সো নিব্বত্তিঅত্থো ফলত্থো হোতি। পটিসন্ধিক্খন্ধানং যো পটিসন্ধিঅত্থো পটিসন্দহনত্থো অত্থি, সো পটিসন্ধিঅত্থো পুনব্ভৰত্থো পুনব্ভৰনত্থো হোতি। কিলেসানং যো পলিবোধত্থো সন্তানে উপ্পজ্জনত্থো অত্থি, সো পলিবোধত্থো পরিযুট্ঠানত্থো হোতি। কিলেসানং মগ্গেন যো অসমুগ্ঘাতত্থো অত্থি, সো অসমুগ্ঘাতত্থো অনুসযত্থো হোতি। অৰিজ্জায চতুন্নং সচ্চানং যো অসম্পটিৰেধত্থো অত্থি, সো অসম্পটিৰেধত্থো অৰিজ্জত্থো হোতি। অরহত্তমগ্গেন যো অপরিঞ্ঞাতত্থো অত্থি, সো অপরিঞ্ঞাতত্থো ৰিঞ্ঞাণস্স পটিসন্ধিৰিঞ্ঞাণস্স বীজত্থো হোতি।
Tattha avupacchinnassa hetupaccayasaṅkhātassa kāraṇassa yo anupacchedattho atthi, so anupacchedattho santatiattho hoti phalena sambandhattā , yañca kāraṇaṃ attano phalassa janakaṃ upatthambhakaṃ hutvā nirujjhati, so anupacchinno eva nāma hotīti. Yañca phalaṃ aññassa kāraṇaṃ hutvā nirujjhati, tasmiṃ anupacchinne tassa ca santatiattho hoti. Yaṃ pana phalaṃ aññassa phalassa kāraṇaṃ ahutvā nirujjhati, taṃ upacchinnaṃ hoti, yathā taṃ arahato cuticittanti. Kāraṇato nibbattassa phalassa yo nibbattiattho atthi, so nibbattiattho phalattho hoti. Paṭisandhikkhandhānaṃ yo paṭisandhiattho paṭisandahanattho atthi, so paṭisandhiattho punabbhavattho punabbhavanattho hoti. Kilesānaṃ yo palibodhattho santāne uppajjanattho atthi, so palibodhattho pariyuṭṭhānattho hoti. Kilesānaṃ maggena yo asamugghātattho atthi, so asamugghātattho anusayattho hoti. Avijjāya catunnaṃ saccānaṃ yo asampaṭivedhattho atthi, so asampaṭivedhattho avijjattho hoti. Arahattamaggena yo apariññātattho atthi, so apariññātattho viññāṇassa paṭisandhiviññāṇassa bījattho hoti.
এত্তাৰতা কারণভাৰো চ কারণাকারো চ ফলঞ্চ ফলৰিসেসো চ আচরিযেন ৰিভত্তো, অম্হেহি চ ঞাতো, ‘‘কতমো পরম্পরহেতুপচ্চযত্থো, কতমো চ সম্বন্ধত্থো’’তি পুচ্ছিতব্বত্তা ‘‘যত্থ অৰুপচ্ছেদো’’তিআদি ৰুত্তং। যত্থ যস্সং রূপারূপপৰত্তিযং অৰুপচ্ছিন্নস্স হেতুপচ্চযপ্পভেদস্স কারণস্স যো অৰুপচ্ছেদো অত্থি, সো অৰুপচ্ছেদো তত্থ তিস্সং রূপারূপপৰত্তিযং সন্ততি হোতি। যত্থ যস্সং রূপারূপপৰত্তিযং যা সন্ততি অত্থি, সা সন্ততিতত্থ রূপারূপপৰত্তিযং নিব্বত্তি হোতীতিআদিনা যোজেত্ৰা পরম্পরহেতুআদিকো ৰিঞ্ঞাতব্বো।
Ettāvatā kāraṇabhāvo ca kāraṇākāro ca phalañca phalaviseso ca ācariyena vibhatto, amhehi ca ñāto, ‘‘katamo paramparahetupaccayattho, katamo ca sambandhattho’’ti pucchitabbattā ‘‘yattha avupacchedo’’tiādi vuttaṃ. Yattha yassaṃ rūpārūpapavattiyaṃ avupacchinnassa hetupaccayappabhedassa kāraṇassa yo avupacchedo atthi, so avupacchedo tattha tissaṃ rūpārūpapavattiyaṃ santati hoti. Yattha yassaṃ rūpārūpapavattiyaṃ yā santati atthi, sā santatitattha rūpārūpapavattiyaṃ nibbatti hotītiādinā yojetvā paramparahetuādiko viññātabbo.
সীলক্খন্ধোতি পরিসুদ্ধসীলক্খন্ধো। সমাধিক্খন্ধস্সাতি মহগ্গতক্খন্ধস্স, সমাধিপট্ঠানো হি মহগ্গতধম্মো। পঞ্ঞাক্খন্ধোতি মগ্গফলপঞ্ঞাপধানক্খন্ধো। সো হি ৰিমুত্তিঞাণদস্সনসঙ্খাতস্স পচ্চৰেক্খণঞাণক্খন্ধস্স পচ্চযো হোতি। তিত্থঞ্ঞুতাদীনং অত্থো পদট্ঠানহারৰিভঙ্গৰণ্ণনাযং ৰুত্তোৰ।
Sīlakkhandhoti parisuddhasīlakkhandho. Samādhikkhandhassāti mahaggatakkhandhassa, samādhipaṭṭhāno hi mahaggatadhammo. Paññākkhandhoti maggaphalapaññāpadhānakkhandho. So hi vimuttiñāṇadassanasaṅkhātassa paccavekkhaṇañāṇakkhandhassa paccayo hoti. Titthaññutādīnaṃ attho padaṭṭhānahāravibhaṅgavaṇṇanāyaṃ vuttova.
সভাৰো হেতূতি আচরিযেন ৰুত্তো, ‘‘কীদিসো সো সভাৰো হেতূ’’তি পুচ্ছিতব্বত্তা ‘‘যথা ৰা পন চক্খুঞ্চ পটিচ্চা’’তিআদি ৰুত্তং । চক্খুৰিঞ্ঞাণং চক্খুঞ্চ চক্খুন্দ্রিযঞ্চ পটিচ্চ নিস্সযং কত্ৰা রূপে পটিচ্চ আরম্মণং কত্ৰা উপ্পজ্জতি। তত্থ চক্খাদীসু চক্খুন্দ্রিযং আধিপতেয্যপচ্চযতায ইন্দ্রিযপচ্চযতায চক্খুৰিঞ্ঞাণস্স পচ্চযো, রূপারম্মণং পুরেজাতারম্মণপচ্চযতায পচ্চযো, আলোকো সন্নিস্সযতায উপনিস্সযতায পচ্চযো হোতি। সো পচ্চযো হোন্তো ফলেন চক্খুৰিঞ্ঞাণেন অসমানত্তা সভাৰো হেতু ন হোতি, পচ্চযো চ হোতি মনসিকারো। কিরিযমনোধাতু পন ফলেন চক্খুৰিঞ্ঞাণেন ৰিঞ্ঞাণভাৰেন সমানত্তা সভাৰো হেতু হোতি যথা, এৰং সঙ্খারা নামক্খন্ধভাৰেন সমানত্তা ৰিঞ্ঞাণস্স পচ্চযা হোন্তা সভাৰো হেতু হোন্তি। ৰিঞ্ঞাণং নামরূপেন একসন্ততিৰসেন সমানত্তা নামরূপস্স পচ্চযো হোন্তং সভাৰো হেতু হোতি। ইমিনা নযেন ‘‘নামরূপং সল়াযতনস্সা’’তিআদীসুপি অত্থো ৰেদিতব্বো। এৰং ৰুত্তপ্পকারো হেতু, পচ্চযো জনকো, উপত্থম্ভকো চ যো কোচি উপনিস্সযো বলৰপচ্চযো হোতি, সব্বো সো হেতুপচ্চযো জনকউপত্থম্ভকো জনিতব্বুপত্থম্ভিযস্স ফলস্স পরিক্খরণতো অভিসঙ্খরণতো নিপ্পরিযাযতো পরিক্খারো নাম।
Sabhāvo hetūti ācariyena vutto, ‘‘kīdiso so sabhāvo hetū’’ti pucchitabbattā ‘‘yathā vā pana cakkhuñca paṭiccā’’tiādi vuttaṃ . Cakkhuviññāṇaṃ cakkhuñca cakkhundriyañca paṭicca nissayaṃ katvā rūpe paṭicca ārammaṇaṃ katvā uppajjati. Tattha cakkhādīsu cakkhundriyaṃ ādhipateyyapaccayatāya indriyapaccayatāya cakkhuviññāṇassa paccayo, rūpārammaṇaṃ purejātārammaṇapaccayatāya paccayo, āloko sannissayatāya upanissayatāya paccayo hoti. So paccayo honto phalena cakkhuviññāṇena asamānattā sabhāvo hetu na hoti, paccayo ca hoti manasikāro. Kiriyamanodhātu pana phalena cakkhuviññāṇena viññāṇabhāvena samānattā sabhāvo hetu hoti yathā, evaṃ saṅkhārā nāmakkhandhabhāvena samānattā viññāṇassa paccayā hontā sabhāvo hetu honti. Viññāṇaṃ nāmarūpena ekasantativasena samānattā nāmarūpassa paccayo hontaṃ sabhāvo hetu hoti. Iminā nayena ‘‘nāmarūpaṃ saḷāyatanassā’’tiādīsupi attho veditabbo. Evaṃ vuttappakāro hetu, paccayo janako, upatthambhako ca yo koci upanissayo balavapaccayo hoti, sabbo so hetupaccayo janakaupatthambhako janitabbupatthambhiyassa phalassa parikkharaṇato abhisaṅkharaṇato nippariyāyato parikkhāro nāma.
‘‘ৰুত্তপ্পকারো হেতুপচ্চযো পরিক্খারো নামাতি কেন অম্হেহি সদ্দহিতব্বো’’তি ৰত্তব্বত্তা ‘‘তেনাহা’’তিআদি ৰুত্তং। তেন কারণভূতেন সব্বস্স হেতুপচ্চযস্স পরিক্খারভাৰেন আযস্মা মহাকচ্চানো ‘‘যে ধম্মা যং ধম্মং জনযন্তী’’তি যং ৰচনং আহ, তেন ৰচনেন সদ্দহিতব্বো, ‘‘যে ধম্মা যং ধম্মং জনযন্তী’’তি ৰচনং নিস্সায তুম্হেহি সল্লক্খেতব্বোতি অধিপ্পাযো।
‘‘Vuttappakāro hetupaccayo parikkhāro nāmāti kena amhehi saddahitabbo’’ti vattabbattā ‘‘tenāhā’’tiādi vuttaṃ. Tena kāraṇabhūtena sabbassa hetupaccayassa parikkhārabhāvena āyasmā mahākaccāno ‘‘ye dhammā yaṃ dhammaṃ janayantī’’ti yaṃ vacanaṃ āha, tena vacanena saddahitabbo, ‘‘ye dhammā yaṃ dhammaṃ janayantī’’ti vacanaṃ nissāya tumhehi sallakkhetabboti adhippāyo.
‘‘এত্তকোৰ পরিক্খারো হারো যুঞ্জিতব্বো’’তি ৰত্তব্বত্তা ‘‘নিযুত্তো পরিক্খারো হারো’’তি ৰুত্তং, যো যো পরিক্খারো হারো যুঞ্জিতব্বো, সো সো পরিক্খারো হারো নীহরিত্ৰা যুত্তো যুঞ্জিতব্বোতি।
‘‘Ettakova parikkhāro hāro yuñjitabbo’’ti vattabbattā ‘‘niyutto parikkhāro hāro’’ti vuttaṃ, yo yo parikkhāro hāro yuñjitabbo, so so parikkhāro hāro nīharitvā yutto yuñjitabboti.
ইতি পরিক্খারহারৰিভঙ্গে সত্তিবলানুরূপা রচিতা
Iti parikkhārahāravibhaṅge sattibalānurūpā racitā
ৰিভাৰনা নিট্ঠিতা।
Vibhāvanā niṭṭhitā.
পণ্ডিতেহি পন অট্ঠকথাটীকানুসারেন গম্ভীরত্থো ৰিত্থারতো ৰিভজিত্ৰা গহেতব্বোতি।
Paṇḍitehi pana aṭṭhakathāṭīkānusārena gambhīrattho vitthārato vibhajitvā gahetabboti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ১৫. পরিক্খারহারৰিভঙ্গো • 15. Parikkhārahāravibhaṅgo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১৫. পরিক্খারহারৰিভঙ্গৰণ্ণনা • 15. Parikkhārahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ১৫. পরিক্খারহারৰিভঙ্গৰণ্ণনা • 15. Parikkhārahāravibhaṅgavaṇṇanā
