| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
15. பரிக்கா²ரஹாரவிப⁴ங்கோ³
15. Parikkhārahāravibhaṅgo
49. தத்த² கதமோ பரிக்கா²ரோ ஹாரோ? ‘‘யே த⁴ம்மா யங் த⁴ம்மங் ஜனயந்தீ’’தி.
49. Tattha katamo parikkhāro hāro? ‘‘Ye dhammā yaṃ dhammaṃ janayantī’’ti.
யோ த⁴ம்மோ யங் த⁴ம்மங் ஜனயதி, தஸ்ஸ ஸோ பரிக்கா²ரோ. கிங்லக்க²ணோ பரிக்கா²ரோ? ஜனகலக்க²ணோ பரிக்கா²ரோ. த்³வே த⁴ம்மா ஜனயந்தி ஹேது ச பச்சயோ ச. தத்த² கிங்லக்க²ணோ ஹேது, கிங்லக்க²ணோ பச்சயோ? அஸாதா⁴ரணலக்க²ணோ ஹேது, ஸாதா⁴ரணலக்க²ணோ பச்சயோ. யதா² கிங் ப⁴வே? யதா² அங்குரஸ்ஸ நிப்³ப³த்தியா பீ³ஜங் அஸாதா⁴ரணங், பத²வீ ஆபோ ச ஸாதா⁴ரணா. அங்குரஸ்ஸ ஹி பத²வீ ஆபோ ச பச்சயோ ஸபா⁴வோ ஹேது. யதா² வா பன க⁴டே து³த்³த⁴ங் பக்கி²த்தங் த³தி⁴ ப⁴வதி, ந சத்தி² ஏககாலஸமவதா⁴னங் து³த்³த⁴ஸ்ஸ ச த³தி⁴ஸ்ஸ ச. ஏவமேவங் நத்தி² ஏககாலஸமவதா⁴னங் ஹேதுஸ்ஸ ச பச்சயஸ்ஸ ச.
Yo dhammo yaṃ dhammaṃ janayati, tassa so parikkhāro. Kiṃlakkhaṇo parikkhāro? Janakalakkhaṇo parikkhāro. Dve dhammā janayanti hetu ca paccayo ca. Tattha kiṃlakkhaṇo hetu, kiṃlakkhaṇo paccayo? Asādhāraṇalakkhaṇo hetu, sādhāraṇalakkhaṇo paccayo. Yathā kiṃ bhave? Yathā aṅkurassa nibbattiyā bījaṃ asādhāraṇaṃ, pathavī āpo ca sādhāraṇā. Aṅkurassa hi pathavī āpo ca paccayo sabhāvo hetu. Yathā vā pana ghaṭe duddhaṃ pakkhittaṃ dadhi bhavati, na catthi ekakālasamavadhānaṃ duddhassa ca dadhissa ca. Evamevaṃ natthi ekakālasamavadhānaṃ hetussa ca paccayassa ca.
அயஞ்ஹி ஸங்ஸாரோ ஸஹேது ஸப்பச்சயோ நிப்³ப³த்தோ. வுத்தங் ஹி அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங், ஏவங் ஸப்³போ³ படிச்சஸமுப்பாதோ³. இதி அவிஜ்ஜா அவிஜ்ஜாய ஹேது அயோனிஸோ மனஸிகாரோ பச்சயோ. புரிமிகா அவிஜ்ஜா பச்சி²மிகாய அவிஜ்ஜாய ஹேது. தத்த² புரிமிகா அவிஜ்ஜா அவிஜ்ஜானுஸயோ பச்சி²மிகா அவிஜ்ஜா அவிஜ்ஜாபரியுட்டா²னங், புரிமிகோ அவிஜ்ஜானுஸயோ பச்சி²மிகஸ்ஸ அவிஜ்ஜாபரியுட்டா²னஸ்ஸ ஹேதுபூ⁴தோ பரிப்³ரூஹனாய, பீ³ஜங்குரோ விய ஸமனந்தரஹேதுதாய. யங் பன யத்த² ப²லங் நிப்³ப³த்ததி, இத³மஸ்ஸ பரம்பரஹேதுதாய ஹேதுபூ⁴தங். து³விதோ⁴ ஹி ஹேது ஸமனந்தரஹேது பரம்பரஹேது ச, ஏவங் அவிஜ்ஜாயபி து³விதோ⁴ ஹேது ஸமனந்தரஹேது பரம்பரஹேது ச.
Ayañhi saṃsāro sahetu sappaccayo nibbatto. Vuttaṃ hi avijjāpaccayā saṅkhārā, saṅkhārapaccayā viññāṇaṃ, evaṃ sabbo paṭiccasamuppādo. Iti avijjā avijjāya hetu ayoniso manasikāro paccayo. Purimikā avijjā pacchimikāya avijjāya hetu. Tattha purimikā avijjā avijjānusayo pacchimikā avijjā avijjāpariyuṭṭhānaṃ, purimiko avijjānusayo pacchimikassa avijjāpariyuṭṭhānassa hetubhūto paribrūhanāya, bījaṅkuro viya samanantarahetutāya. Yaṃ pana yattha phalaṃ nibbattati, idamassa paramparahetutāya hetubhūtaṃ. Duvidho hi hetu samanantarahetu paramparahetu ca, evaṃ avijjāyapi duvidho hetu samanantarahetu paramparahetu ca.
யதா² வா பன தா²லகஞ்ச வட்டி ச தேலஞ்ச பதீ³பஸ்ஸ பச்சயபூ⁴தங் ந ஸபா⁴வஹேது, ந ஹி ஸக்கா தா²லகஞ்ச வட்டிஞ்ச தேலஞ்ச அனக்³கி³கங் தீ³பேதுங் பதீ³பஸ்ஸ பச்சயபூ⁴தங். பதீ³போ விய ஸபா⁴வோ ஹேது ஹோதி. இதி ஸபா⁴வோ ஹேது, பரபா⁴வோ பச்சயோ. அஜ்ஜ²த்திகோ ஹேது, பா³ஹிரோ பச்சயோ. ஜனகோ ஹேது, பரிக்³கா³ஹகோ பச்சயோ. அஸாதா⁴ரணோ ஹேது, ஸாதா⁴ரணோ பச்சயோ.
Yathā vā pana thālakañca vaṭṭi ca telañca padīpassa paccayabhūtaṃ na sabhāvahetu, na hi sakkā thālakañca vaṭṭiñca telañca anaggikaṃ dīpetuṃ padīpassa paccayabhūtaṃ. Padīpo viya sabhāvo hetu hoti. Iti sabhāvo hetu, parabhāvo paccayo. Ajjhattiko hetu, bāhiro paccayo. Janako hetu, pariggāhako paccayo. Asādhāraṇo hetu, sādhāraṇo paccayo.
அவுபச்சே²த³த்தோ² ஸந்ததி அத்தோ², நிப்³ப³த்தி அத்தோ² ப²லத்தோ², படிஸந்தி⁴ அத்தோ² புனப்³ப⁴வத்தோ², பலிபோ³த⁴த்தோ² பரியுட்டா²னத்தோ², அஸமுக்³கா⁴தத்தோ² அனுஸயத்தோ², அஸம்படிவேத⁴த்தோ² அவிஜ்ஜத்தோ², அபரிஞ்ஞாதத்தோ² விஞ்ஞாணஸ்ஸ பீ³ஜத்தோ². யத்த² அவுபச்சே²தோ³ தத்த² ஸந்ததி, யத்த² ஸந்ததி தத்த² நிப்³ப³த்தி , யத்த² நிப்³ப³த்தி தத்த² ப²லங், யத்த² ப²லங் தத்த² படிஸந்தி⁴, யத்த² படிஸந்தி⁴ தத்த² புனப்³ப⁴வோ, யத்த² புனப்³ப⁴வோ தத்த² பலிபோ³தோ⁴, யத்த² பலிபோ³தோ⁴ தத்த² பரியுட்டா²னங், யத்த² பரியுட்டா²னங் தத்த² அஸமுக்³கா⁴தோ. யத்த² அஸமுக்³கா⁴தோ தத்த² அனுஸயோ, யத்த² அனுஸயோ தத்த² அஸம்படிவேதோ⁴, யத்த² அஸம்படிவேதோ⁴ தத்த² அவிஜ்ஜா, யத்த² அவிஜ்ஜா தத்த² ஸாஸவங் விஞ்ஞாணங் அபரிஞ்ஞாதங், யத்த² ஸாஸவங் விஞ்ஞாணங் அபரிஞ்ஞாதங் தத்த² பீ³ஜத்தோ².
Avupacchedattho santati attho, nibbatti attho phalattho, paṭisandhi attho punabbhavattho, palibodhattho pariyuṭṭhānattho, asamugghātattho anusayattho, asampaṭivedhattho avijjattho, apariññātattho viññāṇassa bījattho. Yattha avupacchedo tattha santati, yattha santati tattha nibbatti , yattha nibbatti tattha phalaṃ, yattha phalaṃ tattha paṭisandhi, yattha paṭisandhi tattha punabbhavo, yattha punabbhavo tattha palibodho, yattha palibodho tattha pariyuṭṭhānaṃ, yattha pariyuṭṭhānaṃ tattha asamugghāto. Yattha asamugghāto tattha anusayo, yattha anusayo tattha asampaṭivedho, yattha asampaṭivedho tattha avijjā, yattha avijjā tattha sāsavaṃ viññāṇaṃ apariññātaṃ, yattha sāsavaṃ viññāṇaṃ apariññātaṃ tattha bījattho.
ஸீலக்க²ந்தோ⁴ ஸமாதி⁴க்க²ந்த⁴ஸ்ஸ பச்சயோ, ஸமாதி⁴க்க²ந்தோ⁴ பஞ்ஞாக்க²ந்த⁴ஸ்ஸ பச்சயோ, பஞ்ஞாக்க²ந்தோ⁴ விமுத்திக்க²ந்த⁴ஸ்ஸ பச்சயோ, விமுத்திக்க²ந்தோ⁴ விமுத்திஞாணத³ஸ்ஸனக்க²ந்த⁴ஸ்ஸ பச்சயோ. தித்த²ஞ்ஞுதா பீதஞ்ஞுதாய பச்சயோ, பீதஞ்ஞுதா பத்தஞ்ஞுதாய பச்சயோ, பத்தஞ்ஞுதா அத்தஞ்ஞுதாய பச்சயோ.
Sīlakkhandho samādhikkhandhassa paccayo, samādhikkhandho paññākkhandhassa paccayo, paññākkhandho vimuttikkhandhassa paccayo, vimuttikkhandho vimuttiñāṇadassanakkhandhassa paccayo. Titthaññutā pītaññutāya paccayo, pītaññutā pattaññutāya paccayo, pattaññutā attaññutāya paccayo.
யதா² வா பன சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணங். தத்த² சக்கு² ஆதி⁴பதெய்யபச்சயதாய பச்சயோ, ரூபா ஆரம்மணபச்சயதாய பச்சயோ. ஆலோகோ ஸன்னிஸ்ஸயதாய பச்சயோ, மனஸிகாரோ ஸபா⁴வோ ஹேது . ஸங்கா²ரா விஞ்ஞாணஸ்ஸ பச்சயோ, ஸபா⁴வோ ஹேது. விஞ்ஞாணங் நாமரூபஸ்ஸ பச்சயோ, ஸபா⁴வோ ஹேது. நாமரூபங் ஸளாயதனஸ்ஸ பச்சயோ, ஸபா⁴வோ ஹேது. ஸளாயதனங் ப²ஸ்ஸஸ்ஸ பச்சயோ, ஸபா⁴வோ ஹேது. ப²ஸ்ஸோ வேத³னாய பச்சயோ, ஸபா⁴வோ ஹேது. வேத³னா தண்ஹாய பச்சயோ, ஸபா⁴வோ ஹேது. தண்ஹா உபாதா³னஸ்ஸ பச்சயோ, ஸபா⁴வோ ஹேது. உபாதா³னங் ப⁴வஸ்ஸ பச்சயோ, ஸபா⁴வோ ஹேது. ப⁴வோ ஜாதியா பச்சயோ, ஸபா⁴வோ ஹேது. ஜாதி ஜராமரணஸ்ஸ பச்சயோ, ஸபா⁴வோ ஹேது. ஜராமரணங் ஸோகஸ்ஸ பச்சயோ, ஸபா⁴வோ ஹேது. ஸோகோ பரிதே³வஸ்ஸ பச்சயோ, ஸபா⁴வோ ஹேது. பரிதே³வோ து³க்க²ஸ்ஸ பச்சயோ, ஸபா⁴வோ ஹேது. து³க்க²ங் தோ³மனஸ்ஸஸ்ஸ பச்சயோ, ஸபா⁴வோ ஹேது. தோ³மனஸ்ஸங் உபாயாஸஸ்ஸ பச்சயோ, ஸபா⁴வோ ஹேது. ஏவங் யோ கோசி உபனிஸ்ஸயோ ஸப்³போ³ ஸோ பரிக்கா²ரோ. தேனாஹ ஆயஸ்மா மஹாகச்சாயனோ ‘‘யே த⁴ம்மா யங் த⁴ம்மங் ஜனயந்தீ’’தி.
Yathā vā pana cakkhuñca paṭicca rūpe ca uppajjati cakkhuviññāṇaṃ. Tattha cakkhu ādhipateyyapaccayatāya paccayo, rūpā ārammaṇapaccayatāya paccayo. Āloko sannissayatāya paccayo, manasikāro sabhāvo hetu . Saṅkhārā viññāṇassa paccayo, sabhāvo hetu. Viññāṇaṃ nāmarūpassa paccayo, sabhāvo hetu. Nāmarūpaṃ saḷāyatanassa paccayo, sabhāvo hetu. Saḷāyatanaṃ phassassa paccayo, sabhāvo hetu. Phasso vedanāya paccayo, sabhāvo hetu. Vedanā taṇhāya paccayo, sabhāvo hetu. Taṇhā upādānassa paccayo, sabhāvo hetu. Upādānaṃ bhavassa paccayo, sabhāvo hetu. Bhavo jātiyā paccayo, sabhāvo hetu. Jāti jarāmaraṇassa paccayo, sabhāvo hetu. Jarāmaraṇaṃ sokassa paccayo, sabhāvo hetu. Soko paridevassa paccayo, sabhāvo hetu. Paridevo dukkhassa paccayo, sabhāvo hetu. Dukkhaṃ domanassassa paccayo, sabhāvo hetu. Domanassaṃ upāyāsassa paccayo, sabhāvo hetu. Evaṃ yo koci upanissayo sabbo so parikkhāro. Tenāha āyasmā mahākaccāyano ‘‘ye dhammā yaṃ dhammaṃ janayantī’’ti.
நியுத்தோ பரிக்கா²ரோ ஹாரோ.
Niyutto parikkhāro hāro.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 15. பரிக்கா²ரஹாரவிப⁴ங்க³வண்ணனா • 15. Parikkhārahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 15. பரிக்கா²ரஹாரவிப⁴ங்க³வண்ணனா • 15. Parikkhārahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 15. பரிக்கா²ரஹாரவிப⁴ங்க³விபா⁴வனா • 15. Parikkhārahāravibhaṅgavibhāvanā
