| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
35. பரிக்கா²ரனித்³தே³ஸவண்ணனா
35. Parikkhāraniddesavaṇṇanā
259-260. கி³ரிகூடந்தி மகரத³ந்தகங். ஸிப்³பி³துஞ்ச சி²ந்தி³துஞ்ச ந வட்டதீதி ஸப்³ப³த்த² யோஜனா. த³ண்டே³தி ச²த்தத³ண்டே³.
259-260.Girikūṭanti makaradantakaṃ. Sibbituñca chindituñca na vaṭṭatīti sabbattha yojanā. Daṇḍeti chattadaṇḍe.
261. ஸிப்³பி³துங் வா பஞ்ஜரங் வினந்தி⁴துங் வா தி²ரத்த²ங் ச²த்தே ப³ந்தி⁴துங் த³ண்டே³ லேகா² வட்டதீதி ஸம்ப³ந்தோ⁴. ஸசே வுத்தப்பகாரங் அகப்பியச²த்தங் லப⁴தி, க⁴டகம்பி வாளரூபம்பி சி²ந்தி³த்வா தா⁴ரேதப்³ப³ங், லேகா²பி க⁴ங்ஸெத்வா அபனேதப்³பா³, ஸுத்தகேன வா த³ண்டோ³ வேடே²தப்³போ³.
261. Sibbituṃ vā pañjaraṃ vinandhituṃ vā thiratthaṃ chatte bandhituṃ daṇḍe lekhā vaṭṭatīti sambandho. Sace vuttappakāraṃ akappiyachattaṃ labhati, ghaṭakampi vāḷarūpampi chinditvā dhāretabbaṃ, lekhāpi ghaṃsetvā apanetabbā, suttakena vā daṇḍo veṭhetabbo.
262. அனுவாதங் ஸந்தா⁴ய ‘‘அந்தே வா’’தி வுத்தங். த்³வின்னங் பட்டானங் ஸங்க⁴டிதட்டா²னங் ஸந்தா⁴ய ‘‘பட்டமுகே² வாபீ’’தி வுத்தங். வரகஸீஸாகாரேன ஸிப்³ப³னங் ஸந்தா⁴ய ‘‘வேணிகா’’தி ச ஸதபதா³காரேன ஸிப்³ப³னங் ஸந்தா⁴ய ‘‘ஸங்க²லிகாபி வா’’தி ச வுத்தங். ஸதபதி³ஸதி³ஸங் அஞ்ஞங் வா ஸூசிவிகாரங் ந கப்பதி, பகதிஸூசிகம்மமேவ வட்டதீதி அத்தோ². பாளிகண்ணிகஆதி³கங் சீவரே ந ச கப்பதீதி ஸம்ப³ந்தோ⁴.
262. Anuvātaṃ sandhāya ‘‘ante vā’’ti vuttaṃ. Dvinnaṃ paṭṭānaṃ saṅghaṭitaṭṭhānaṃ sandhāya ‘‘paṭṭamukhe vāpī’’ti vuttaṃ. Varakasīsākārena sibbanaṃ sandhāya ‘‘veṇikā’’ti ca satapadākārena sibbanaṃ sandhāya ‘‘saṅkhalikāpi vā’’ti ca vuttaṃ. Satapadisadisaṃ aññaṃ vā sūcivikāraṃ na kappati, pakatisūcikammameva vaṭṭatīti attho. Pāḷikaṇṇikaādikaṃ cīvare na ca kappatīti sambandho.
263-4. சதுகோணாவ (பாரா॰ அட்ட²॰ 1.85) கப்பரேதி ஸம்ப³ந்தோ⁴. அக்³கி⁴கந்தி அக்³கி⁴யங் சேதியஸதி³ஸங். எத்தா²தி க³ண்டி²பாஸகபட்டே. கோணஸுத்தா ச பீளகாதி ந கேவலங் சதுகோணா க³ண்டி²கபாஸகபட்டாவ கப்பந்தி, அத² கோ² து³விஞ்ஞெய்யா கோணஸுத்தபீளகா ச கப்பரேதி அத்தோ². க³ந்த⁴ங் தேலங் வாதி க³ந்த⁴ங் வா தேலங் வா.
263-4. Catukoṇāva (pārā. aṭṭha. 1.85) kappareti sambandho. Agghikanti agghiyaṃ cetiyasadisaṃ. Etthāti gaṇṭhipāsakapaṭṭe. Koṇasuttā ca pīḷakāti na kevalaṃ catukoṇā gaṇṭhikapāsakapaṭṭāva kappanti, atha kho duviññeyyā koṇasuttapīḷakā ca kappareti attho. Gandhaṃ telaṃ vāti gandhaṃ vā telaṃ vā.
265. ரத்தந்தி (பாரா॰ அட்ட²॰ 1.85) ரஜிதங். அஞ்ஞேன வாதி முக்³க³ராதி³னா வா. கத்வாதி ட²பெத்வா. பஹாரே ந ச முட்டி²னாதி முட்டி²னா ந பஹாரெய்யாதி அத்தோ².
265.Rattanti (pārā. aṭṭha. 1.85) rajitaṃ. Aññena vāti muggarādinā vā. Katvāti ṭhapetvā. Pahāre na ca muṭṭhināti muṭṭhinā na pahāreyyāti attho.
266-7. ச²த்தவட்டியங் (பாரா॰ அட்ட²॰ 1.85) லேக²ங் ட²பெத்வா த⁴ம்மகரணே லேகா² ந வட்டதீதி ஸம்ப³ந்தோ⁴. குஞ்சிகாய ச பிப்ப²லே ச மணிகா ச பீளகா ச ந வட்டதீதி ஸம்ப³ந்தோ⁴. தத்த² மணிகாதி ஏகா ஏவ வட்டமணிகா. பீளகா முத்தராஜிஸதி³ஸா ப³ஹூ.
266-7. Chattavaṭṭiyaṃ (pārā. aṭṭha. 1.85) lekhaṃ ṭhapetvā dhammakaraṇe lekhā na vaṭṭatīti sambandho. Kuñcikāya ca pipphale ca maṇikā ca pīḷakā ca na vaṭṭatīti sambandho. Tattha maṇikāti ekā eva vaṭṭamaṇikā. Pīḷakā muttarājisadisā bahū.
268-9. மாலாத்³யரணியந்தி (பாரா॰ அட்ட²॰ 1.85) அரணியங் மாலாதி³ வண்ணமட்ட²ங் ந வட்டதீதி ஸம்ப³ந்தோ⁴. ஏவங் ஸப்³ப³த்த². திபுஸீஸமயே பத்தமண்ட³லே பி⁴த்திகம்மஞ்ச ந வட்டதீதி அத்தோ². ஹித்வாதி ட²பெத்வா. ஸூசிஸண்டா³ஸகோ (பாரா॰ அட்ட²॰ 1.85) நாம ஸூசிங் ட³ங்ஸாபெத்வா க⁴ங்ஸிதுங் கதோ தா³ருமயோ. ‘‘அனுஜானாமி, பி⁴க்க²வே, மகரத³ந்தகங் சி²ந்தி³து’’ந்தி (சூளவ॰ 253) வுத்தத்தா பத்தமண்ட³லே மகரத³ந்தகங் வட்டதி, அஞ்ஞங் பி⁴த்திகம்மாதி³விகாரமேவ ந வட்டதி, தஸ்மா கி³ரிகூடங் பத்தமண்ட³லே ட²பெத்வா அவஸேஸே ந வட்டதீதி வேதி³தப்³ப³ங்.
268-9.Mālādyaraṇiyanti (pārā. aṭṭha. 1.85) araṇiyaṃ mālādi vaṇṇamaṭṭhaṃ na vaṭṭatīti sambandho. Evaṃ sabbattha. Tipusīsamaye pattamaṇḍale bhittikammañca na vaṭṭatīti attho. Hitvāti ṭhapetvā. Sūcisaṇḍāsako (pārā. aṭṭha. 1.85) nāma sūciṃ ḍaṃsāpetvā ghaṃsituṃ kato dārumayo. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā pattamaṇḍale makaradantakaṃ vaṭṭati, aññaṃ bhittikammādivikārameva na vaṭṭati, tasmā girikūṭaṃ pattamaṇḍale ṭhapetvā avasese na vaṭṭatīti veditabbaṃ.
272. ஸேனாஸனேதி (பாரா॰ அட்ட²॰ 1.85) பாஸாதா³தி³ஸேனாஸனேதி அத்தோ².
272.Senāsaneti (pārā. aṭṭha. 1.85) pāsādādisenāsaneti attho.
273. புமித்தி²ரூபரஹிதந்தி புரிஸரூபஇத்தி²ரூபரஹிதந்தி அத்தோ². பரிக்கா²ரவினிச்ச²யோ.
273.Pumitthirūparahitanti purisarūpaitthirūparahitanti attho. Parikkhāravinicchayo.
பரிக்கா²ரனித்³தே³ஸவண்ணனா நிட்டி²தா.
Parikkhāraniddesavaṇṇanā niṭṭhitā.
