| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
35. பரிக்கா²ரனித்³தே³ஸவண்ணனா
35. Parikkhāraniddesavaṇṇanā
259-60. ச²த்தே அந்தோ ப³ஹி ச பஞ்சவண்ணேஹி ஸுத்தேஹி ஸிப்³பி³துஞ்ச பண்ணே கி³ரிகூடஅட்³ட⁴சந்தா³தி³ங் சி²ந்தி³துஞ்ச ந வட்டதீதி ஸம்ப³ந்தோ⁴. ச²த்தேதி தாலபண்ணே ச²த்தே. கி³ரிகூடங் நாம மகரத³ந்தகங், ஆதி³-ஸத்³தே³ன தாதி³ஸங் அஞ்ஞங் விகாரரூபங் ஸங்க³ஹிதங். க⁴டகந்தி கே³ஹத்த²ம்பே⁴ஸு விய கயிரமானங் க⁴டகங். த³ண்டே³தி ச²த்தத³ண்டே³. லேகா²தி தஹிங் தஹிங் தி³ன்னா லேகா². ஸாதி³ஸந்தி தீ³கே⁴ன நித்³தி³ட்ட²ங். பு³ந்த³ம்ஹி மூலே.
259-60. Chatte anto bahi ca pañcavaṇṇehi suttehi sibbituñca paṇṇe girikūṭaaḍḍhacandādiṃ chindituñca na vaṭṭatīti sambandho. Chatteti tālapaṇṇe chatte. Girikūṭaṃ nāma makaradantakaṃ, ādi-saddena tādisaṃ aññaṃ vikārarūpaṃ saṅgahitaṃ. Ghaṭakanti gehatthambhesu viya kayiramānaṃ ghaṭakaṃ. Daṇḍeti chattadaṇḍe. Lekhāti tahiṃ tahiṃ dinnā lekhā. Sādisanti dīghena niddiṭṭhaṃ. Bundamhi mūle.
261. தி²ரத்த²ங் ச²த்தே ஏகவண்ணேன ஸிப்³பி³துங் வா பஞ்ஜரங் வினந்தி⁴துங் வா வட்டதீதி ஸம்ப³ந்தோ⁴. ஸிப்³பி³துந்தி அந்தோ ப³ஹி ச ஸிப்³பி³துங். ஏகவண்ணேனாதி நீலாதி³னா ஏகவண்ணேன. பஞ்ஜரந்தி ச²த்தத³ண்ட³கா³ஹகஸலாகபஞ்ஜரங். தி²ரத்த²ந்தி இமினா ந வண்ணமட்ட²த்தா²யாதி த³ஸ்ஸேதி. ப³ந்தி⁴துங் த³ண்டே³ லேகா² வட்டதீதி ஸம்ப³ந்தோ⁴. ப³ந்தி⁴துந்தி வாதப்பஹாரேன அசலனத்த²ங் ச²த்தமண்ட³லிகங் ரஜ்ஜுகேஹி க³ஹெத்வா ப³ந்த⁴னத்தா²ய. லேகா²வாதி வலயமிவ உக்கிரித்வா கதா லேகா² ஏவ. வட்டதீதி யதி³பி ந ப³ந்த⁴தி, ரஜ்ஜுகேஹி ப³ந்தி⁴துங் யுத்தட்டா²னத்தா வட்டதி.
261. Thiratthaṃ chatte ekavaṇṇena sibbituṃ vā pañjaraṃ vinandhituṃ vā vaṭṭatīti sambandho. Sibbitunti anto bahi ca sibbituṃ. Ekavaṇṇenāti nīlādinā ekavaṇṇena. Pañjaranti chattadaṇḍagāhakasalākapañjaraṃ. Thiratthanti iminā na vaṇṇamaṭṭhatthāyāti dasseti. Bandhituṃ daṇḍe lekhā vaṭṭatīti sambandho. Bandhitunti vātappahārena acalanatthaṃ chattamaṇḍalikaṃ rajjukehi gahetvā bandhanatthāya. Lekhāvāti valayamiva ukkiritvā katā lekhā eva. Vaṭṭatīti yadipi na bandhati, rajjukehi bandhituṃ yuttaṭṭhānattā vaṭṭati.
262. சீவரே அந்தே வாபி பட்டமுகே² வாபி வேணிபி வா ஸங்க²லிகாபி வா அஞ்ஞங் ஸூசிவிகாரங் வா பாளிகண்ணிகஆதி³கங் கப்பபி³ந்து³விகாரம்பி வா ந ச கப்பதீதி ஸம்ப³ந்தோ⁴. அந்தேதி சீவரபரியந்தே, அனுவாதேதி வுத்தங் ஹோதி. பட்டமுகே²தி பட்டகோடியங், த்³வின்னங் பட்டானங் ஸங்க⁴டிதட்டா²னங் ஸந்தா⁴யேதங் வுத்தங். வேணீதி வரகஸீஸாகாரேன ஸிப்³ப³னங். ஸங்க²லிகாதி பி³ளாலப³ந்த⁴னாகாரேன ஸிப்³ப³னங். அஞ்ஞங் ஸூசிவிகாரங் வாதி சீவரமண்ட³னத்தா²ய கயிரமானங் அஞ்ஞங் யங் கிஞ்சி ஸூசிகம்மவிகாரங் வா. டீகாயங் பன ‘‘ஸதபதி³ஸதி³ஸங் அஞ்ஞங் வா ஸூசிவிகாரங் ந கப்பதீ’’தி ஸாமஞ்ஞேன வுத்தங். ‘‘சீவரமண்ட³னத்தா²ய நானாஸுத்தகேஹி ஸதபதி³ஸதி³ஸங் ஸிப்³ப³ந்தா ஆக³ந்துகபட்டங் ட²பெந்தி, அஞ்ஞம்பி யங் கிஞ்சி ஸூசிகம்மவிகாரங் கரொந்தி, ஸப்³ப³ங் ந வட்டதீ’’தி அட்ட²கதா²யங் வுத்தத்தா பன நானாவண்ணேஹி வா ஹோது, ஏகவண்ணேன வா ஹோது, சீவரமண்ட³னத்தா²ய ஸங்ஸிப்³ப³ந்தானங் ஸூசிகம்மவிகாரங் ஸந்தா⁴ய வுத்தந்தி சீவரேஸு பா²லிதட்டா²னஸ்ஸ தி²ரபா⁴வத்த²ங் ஸதபதி³ஸதி³ஸம்பி ஸிப்³பி³துங் வட்டதீதி அம்ஹாகங் க²ந்தி. பாளி-ஸத்³தே³ன, கண்ணிக-ஸத்³தே³ன ச கப்ப-ஸத்³த³லோபேன வா உபசாரேன வா பாளிகப்பாத³யோவ க³ஹிதா. பாளி ச கண்ணிகா ச பாளிகண்ணிகாயோ, தா ஆதி³ யஸ்ஸ அஞ்ஞஸ்ஸ தாதி³ஸஸ்ஸாதி விக்³க³ஹோ. தத்த² நீலாவளிஆதி³ஸண்டா²னாய பி³ந்து³பந்தியா யதா² ஸோப⁴தி, ததா² கயிரமானோ பாளிகப்போ. ததே²வ பி³ந்து³ஸமூஹே கத்த²சி த³ஸ்ஸெத்வா கயிரமானோ கண்ணிககப்போ.
262. Cīvare ante vāpi paṭṭamukhe vāpi veṇipi vā saṅkhalikāpi vā aññaṃ sūcivikāraṃ vā pāḷikaṇṇikaādikaṃ kappabinduvikārampi vā na ca kappatīti sambandho. Anteti cīvarapariyante, anuvāteti vuttaṃ hoti. Paṭṭamukheti paṭṭakoṭiyaṃ, dvinnaṃ paṭṭānaṃ saṅghaṭitaṭṭhānaṃ sandhāyetaṃ vuttaṃ. Veṇīti varakasīsākārena sibbanaṃ. Saṅkhalikāti biḷālabandhanākārena sibbanaṃ. Aññaṃ sūcivikāraṃ vāti cīvaramaṇḍanatthāya kayiramānaṃ aññaṃ yaṃ kiñci sūcikammavikāraṃ vā. Ṭīkāyaṃ pana ‘‘satapadisadisaṃ aññaṃ vā sūcivikāraṃ na kappatī’’ti sāmaññena vuttaṃ. ‘‘Cīvaramaṇḍanatthāya nānāsuttakehi satapadisadisaṃ sibbantā āgantukapaṭṭaṃ ṭhapenti, aññampi yaṃ kiñci sūcikammavikāraṃ karonti, sabbaṃ na vaṭṭatī’’ti aṭṭhakathāyaṃ vuttattā pana nānāvaṇṇehi vā hotu, ekavaṇṇena vā hotu, cīvaramaṇḍanatthāya saṃsibbantānaṃ sūcikammavikāraṃ sandhāya vuttanti cīvaresu phālitaṭṭhānassa thirabhāvatthaṃ satapadisadisampi sibbituṃ vaṭṭatīti amhākaṃ khanti. Pāḷi-saddena, kaṇṇika-saddena ca kappa-saddalopena vā upacārena vā pāḷikappādayova gahitā. Pāḷi ca kaṇṇikā ca pāḷikaṇṇikāyo, tā ādi yassa aññassa tādisassāti viggaho. Tattha nīlāvaḷiādisaṇṭhānāya bindupantiyā yathā sobhati, tathā kayiramāno pāḷikappo. Tatheva bindusamūhe katthaci dassetvā kayiramāno kaṇṇikakappo.
263. க³ண்டி²பாஸகபட்டாதி க³ண்டி²னோ ச பாஸகஸ்ஸ ச பதிட்டா²னட்டா²னே ட²பேதப்³பா³ பட்டா. வட்டதீதி எத்த² ‘‘க³ண்டி²பாஸகா’’தி கத்வா ‘‘சதுகோணாவ வட்டந்தீ’’தி அத்த²தோ வசனங் விபல்லாஸெத்வா யோஜேதப்³ப³ங். அக்³கி⁴யந்தி சேதியஸண்டா²னேன ஸிப்³ப³னங். மூலே ச அக்³கே³ ச ஏகஸதி³ஸங் கத்வா முக்³க³ராகாரேன ஸிப்³ப³னங் முக்³க³ரோ. விகாரந்தி விகாரோ, லிங்க³விபல்லாஸேன வுத்தங். எத்தா²தி க³ண்டி²பாஸகபட்டேஸு.
263.Gaṇṭhipāsakapaṭṭāti gaṇṭhino ca pāsakassa ca patiṭṭhānaṭṭhāne ṭhapetabbā paṭṭā. Vaṭṭatīti ettha ‘‘gaṇṭhipāsakā’’ti katvā ‘‘catukoṇāva vaṭṭantī’’ti atthato vacanaṃ vipallāsetvā yojetabbaṃ. Agghiyanti cetiyasaṇṭhānena sibbanaṃ. Mūle ca agge ca ekasadisaṃ katvā muggarākārena sibbanaṃ muggaro. Vikāranti vikāro, liṅgavipallāsena vuttaṃ. Etthāti gaṇṭhipāsakapaṭṭesu.
264. கோணஸுத்தாதி நபுங்ஸகனித்³தே³ஸோ, க³ண்டி²பாஸகபட்டானங் கோணேஹி நீஹடஸுத்தகோடியோ. பீளகாதி தானியேவ நிவத்தெத்வா பீளகாகாரேன கதானி. து³விஞ்ஞெய்யாவாதி தேஸங் அந்தேஸு ஏகவாரங் க³ண்டி²கரணேன வா புன நிவத்தெத்வா ஸிப்³ப³னேன வா து³விஞ்ஞெய்யா ஏவ. க³ந்த⁴ங் தேலங் வாதி க³ந்த⁴ங் வா தேலங் வா. கஞ்சிகபிட்ட²க²லிகஆதீ³னிபி வட்டந்தி.
264.Koṇasuttāti napuṃsakaniddeso, gaṇṭhipāsakapaṭṭānaṃ koṇehi nīhaṭasuttakoṭiyo. Pīḷakāti tāniyeva nivattetvā pīḷakākārena katāni. Duviññeyyāvāti tesaṃ antesu ekavāraṃ gaṇṭhikaraṇena vā puna nivattetvā sibbanena vā duviññeyyā eva. Gandhaṃ telaṃ vāti gandhaṃ vā telaṃ vā. Kañcikapiṭṭhakhalikaādīnipi vaṭṭanti.
265. மணினாதி மஸாரக³ல்லாதி³பாஸாணேன. ந ச க⁴ட்டெய்யாதி நேவ க⁴ட்டெய்ய. அஞ்ஞேன வாதி முக்³க³ரமுஸலாதி³னா. அங்ஸப³த்³த⁴ககாயப³ந்த⁴னானி பன ததா² காதுங் வட்டதி. தோ³ணியங் கத்வா ந ச க⁴ங்ஸெய்யாதி பக்கரஜனாகிரணதோ³ணியங் ட²பெத்வா பூ⁴மியங் ஜண்ணுகானி நிஹந்த்வா இதோ சிதோ ச ஆவிஜ்ஜி²த்வா நேவ க⁴ங்ஸெய்யாதி அத்தோ².
265.Maṇināti masāragallādipāsāṇena. Na ca ghaṭṭeyyāti neva ghaṭṭeyya. Aññena vāti muggaramusalādinā. Aṃsabaddhakakāyabandhanāni pana tathā kātuṃ vaṭṭati. Doṇiyaṃ katvā na ca ghaṃseyyāti pakkarajanākiraṇadoṇiyaṃ ṭhapetvā bhūmiyaṃ jaṇṇukāni nihantvā ito cito ca āvijjhitvā neva ghaṃseyyāti attho.
266-7. கண்ணகோணகஸுத்தானீதி சீவரரஜனகாலே லக்³க³னத்தா²ய அனுவாதே சதூஸு கோணேஸு ச பாஸகங் கத்வா ப³ந்தி⁴தானி ஸுத்தானி, யானி ‘‘அனுஜானாமி, பி⁴க்க²வே, கண்ணஸுத்தக’’ந்தி (மஹாவ॰ 344) ஏவங் அனுஞ்ஞாதானி. கண்ணஸங்கா²தா கோணா கண்ணகோணகா, தேஸு ஸுத்தானி. க³ண்டி²கபாஸகபட்டேஸு பன கண்ணகோணகஸுத்தானங் து³விஞ்ஞெய்யானமேவ கப்பியதா ஹெட்டா² வுத்தாதி சீவரே ரத்தேயேவ தேஸங் சி²ந்தி³தப்³ப³தா நத்தி², கண்ணகோணகஸுத்தானங் சி²ந்தி³தப்³ப³தாய வுத்தத்தா அனுவாதேஹி நிக்க²மிதஸுத்தானிபி சி²ந்தி³தப்³பா³னீதி வேதி³தப்³ப³ங். த⁴ம்மகரணே ச²த்தவட்டியங் லேக²ங் ட²பெத்வா லேகா² ந வட்டதீதி யோஜனா. ச²த்தவட்டியந்தி ச²த்தஸ்ஸ முக²வட்டியங். லேகா²தி உபரி வா ஹெட்டா² வா குச்சி²யங் வா அஞ்ஞா லேகா². குஞ்சிகாய ச பிப்ப²லே ச மணிகா ச பீளகா ச ந வட்டந்தீதி ஸம்ப³ந்தோ⁴. மணிகாதி ஏகா வட்டமணி. பீளகாதி ஸாஸபமத்திகா முத்தராஜிஸதி³ஸா ப³ஹுவட்டலேகா². த³ண்ட³ம்ஹீதி பிப்ப²லத³ண்ட³கே.
266-7.Kaṇṇakoṇakasuttānīti cīvararajanakāle lagganatthāya anuvāte catūsu koṇesu ca pāsakaṃ katvā bandhitāni suttāni, yāni ‘‘anujānāmi, bhikkhave, kaṇṇasuttaka’’nti (mahāva. 344) evaṃ anuññātāni. Kaṇṇasaṅkhātā koṇā kaṇṇakoṇakā, tesu suttāni. Gaṇṭhikapāsakapaṭṭesu pana kaṇṇakoṇakasuttānaṃ duviññeyyānameva kappiyatā heṭṭhā vuttāti cīvare ratteyeva tesaṃ chinditabbatā natthi, kaṇṇakoṇakasuttānaṃ chinditabbatāya vuttattā anuvātehi nikkhamitasuttānipi chinditabbānīti veditabbaṃ. Dhammakaraṇe chattavaṭṭiyaṃ lekhaṃ ṭhapetvā lekhā na vaṭṭatīti yojanā. Chattavaṭṭiyanti chattassa mukhavaṭṭiyaṃ. Lekhāti upari vā heṭṭhā vā kucchiyaṃ vā aññā lekhā. Kuñcikāya ca pipphale ca maṇikā ca pīḷakā ca na vaṭṭantīti sambandho. Maṇikāti ekā vaṭṭamaṇi. Pīḷakāti sāsapamattikā muttarājisadisā bahuvaṭṭalekhā. Daṇḍamhīti pipphaladaṇḍake.
268-9. அரணியங் மாலாதி³ ச பத்தமண்ட³லே பி⁴த்திகம்மஞ்ச ந வட்டதீதி ஸம்ப³ந்தி⁴தப்³ப³ங். அரணியந்தி உத்தராரணி அத⁴ராரணி அரணித⁴னுகஞ்ச ஸாமஞ்ஞேன க³ஹிதங். பத்தமண்ட³லேதி திபுஸீஸாதி³மயே பத்தமண்ட³லே. எத்த² பன மகரத³ண்ட³கங் வட்டதி. ஹெட்டா²தி கத்தரயட்டி²யா ஹெட்டா². உத்³த⁴ந்தி தஸ்ஸாயேவ உபரி.
268-9. Araṇiyaṃ mālādi ca pattamaṇḍale bhittikammañca na vaṭṭatīti sambandhitabbaṃ. Araṇiyanti uttarāraṇi adharāraṇi araṇidhanukañca sāmaññena gahitaṃ. Pattamaṇḍaleti tipusīsādimaye pattamaṇḍale. Ettha pana makaradaṇḍakaṃ vaṭṭati. Heṭṭhāti kattarayaṭṭhiyā heṭṭhā. Uddhanti tassāyeva upari.
270-3. ஸம்முஞ்ஜனிம்ஹீதி ஸம்முஞ்ஜனியா லிங்க³விபல்லாஸோ. அவாரிதந்தி இத்தி²ரூபங் பன வாரிதங். ஸோவண்ணமயம்பீதி ஸுவண்ணமயம்பி. விஸாணனாளி நாம விஸாணமயா நாளி. எத்த² பன அவுத்தானிபி யானி கானிசி ஆரகண்ட³கத³ந்தகட்ட²சே²த³னபானீயக⁴டபானீயஉளுங்கசுண்ணபா⁴ஜனாதீ³னி வுத்தானங் அனுலோமானீதி வேதி³தப்³பா³னி. யோ பனெத்த² வினயஞ்ஞூ தாதி³ஸங் பரிக்கா²ரங் தி³ஸ்வா சி²ந்தெ³ய்ய வா சி²ந்தா³பெய்ய வா, அனுபவஜ்ஜோ ஸோதி வேதி³தப்³ப³ந்தி.
270-3.Sammuñjanimhīti sammuñjaniyā liṅgavipallāso. Avāritanti itthirūpaṃ pana vāritaṃ. Sovaṇṇamayampīti suvaṇṇamayampi. Visāṇanāḷi nāma visāṇamayā nāḷi. Ettha pana avuttānipi yāni kānici ārakaṇḍakadantakaṭṭhachedanapānīyaghaṭapānīyauḷuṅkacuṇṇabhājanādīni vuttānaṃ anulomānīti veditabbāni. Yo panettha vinayaññū tādisaṃ parikkhāraṃ disvā chindeyya vā chindāpeyya vā, anupavajjo soti veditabbanti.
பரிக்கா²ரனித்³தே³ஸவண்ணனா நிட்டி²தா.
Parikkhāraniddesavaṇṇanā niṭṭhitā.
