| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༣༥. པརིཀྑཱརནིདྡེསཝཎྞནཱ
35. Parikkhāraniddesavaṇṇanā
༢༥༩-༢༦༠. གིརིཀཱུཊནྟི མཀརདནྟཀཾ། སིབྦིཏུཉྩ ཚིནྡིཏུཉྩ ན ཝཊྚཏཱིཏི སབྦཏྠ ཡོཛནཱ། དཎྜེཏི ཚཏྟདཎྜེ།
259-260.Girikūṭanti makaradantakaṃ. Sibbituñca chindituñca na vaṭṭatīti sabbattha yojanā. Daṇḍeti chattadaṇḍe.
༢༦༡. སིབྦིཏུཾ ཝཱ པཉྫརཾ ཝིནནྡྷིཏུཾ ཝཱ ཐིརཏྠཾ ཚཏྟེ བནྡྷིཏུཾ དཎྜེ ལེཁཱ ཝཊྚཏཱིཏི སམྦནྡྷོ། སཙེ ཝུཏྟཔྤཀཱརཾ ཨཀཔྤིཡཚཏྟཾ ལབྷཏི, གྷཊཀམྤི ཝཱལ༹རཱུཔམྤི ཚིནྡིཏྭཱ དྷཱརེཏབྦཾ, ལེཁཱཔི གྷཾསེཏྭཱ ཨཔནེཏབྦཱ, སུཏྟཀེན ཝཱ དཎྜོ ཝེཋེཏབྦོ།
261. Sibbituṃ vā pañjaraṃ vinandhituṃ vā thiratthaṃ chatte bandhituṃ daṇḍe lekhā vaṭṭatīti sambandho. Sace vuttappakāraṃ akappiyachattaṃ labhati, ghaṭakampi vāḷarūpampi chinditvā dhāretabbaṃ, lekhāpi ghaṃsetvā apanetabbā, suttakena vā daṇḍo veṭhetabbo.
༢༦༢. ཨནུཝཱཏཾ སནྡྷཱཡ ‘‘ཨནྟེ ཝཱ’’ཏི ཝུཏྟཾ། དྭིནྣཾ པཊྚཱནཾ སངྒྷཊིཏཊྛཱནཾ སནྡྷཱཡ ‘‘པཊྚམུཁེ ཝཱཔཱི’’ཏི ཝུཏྟཾ། ཝརཀསཱིསཱཀཱརེན སིབྦནཾ སནྡྷཱཡ ‘‘ཝེཎིཀཱ’’ཏི ཙ སཏཔདཱཀཱརེན སིབྦནཾ སནྡྷཱཡ ‘‘སངྑལིཀཱཔི ཝཱ’’ཏི ཙ ཝུཏྟཾ། སཏཔདིསདིསཾ ཨཉྙཾ ཝཱ སཱུཙིཝིཀཱརཾ ན ཀཔྤཏི, པཀཏིསཱུཙིཀམྨམེཝ ཝཊྚཏཱིཏི ཨཏྠོ། པཱལི༹ཀཎྞིཀཨཱདིཀཾ ཙཱིཝརེ ན ཙ ཀཔྤཏཱིཏི སམྦནྡྷོ།
262. Anuvātaṃ sandhāya ‘‘ante vā’’ti vuttaṃ. Dvinnaṃ paṭṭānaṃ saṅghaṭitaṭṭhānaṃ sandhāya ‘‘paṭṭamukhe vāpī’’ti vuttaṃ. Varakasīsākārena sibbanaṃ sandhāya ‘‘veṇikā’’ti ca satapadākārena sibbanaṃ sandhāya ‘‘saṅkhalikāpi vā’’ti ca vuttaṃ. Satapadisadisaṃ aññaṃ vā sūcivikāraṃ na kappati, pakatisūcikammameva vaṭṭatīti attho. Pāḷikaṇṇikaādikaṃ cīvare na ca kappatīti sambandho.
༢༦༣-༤. ཙཏུཀོཎཱཝ (པཱརཱ॰ ཨཊྛ॰ ༡.༨༥) ཀཔྤརེཏི སམྦནྡྷོ། ཨགྒྷིཀནྟི ཨགྒྷིཡཾ ཙེཏིཡསདིསཾ། ཨེཏྠཱཏི གཎྛིཔཱསཀཔཊྚེ། ཀོཎསུཏྟཱ ཙ པཱིལ༹ཀཱཏི ན ཀེཝལཾ ཙཏུཀོཎཱ གཎྛིཀཔཱསཀཔཊྚཱཝ ཀཔྤནྟི, ཨཐ ཁོ དུཝིཉྙེཡྻཱ ཀོཎསུཏྟཔཱིལ༹ཀཱ ཙ ཀཔྤརེཏི ཨཏྠོ། གནྡྷཾ ཏེལཾ ཝཱཏི གནྡྷཾ ཝཱ ཏེལཾ ཝཱ།
263-4. Catukoṇāva (pārā. aṭṭha. 1.85) kappareti sambandho. Agghikanti agghiyaṃ cetiyasadisaṃ. Etthāti gaṇṭhipāsakapaṭṭe. Koṇasuttā ca pīḷakāti na kevalaṃ catukoṇā gaṇṭhikapāsakapaṭṭāva kappanti, atha kho duviññeyyā koṇasuttapīḷakā ca kappareti attho. Gandhaṃ telaṃ vāti gandhaṃ vā telaṃ vā.
༢༦༥. རཏྟནྟི (པཱརཱ॰ ཨཊྛ॰ ༡.༨༥) རཛིཏཾ། ཨཉྙེན ཝཱཏི མུགྒརཱདིནཱ ཝཱ། ཀཏྭཱཏི ཋཔེཏྭཱ། པཧཱརེ ན ཙ མུཊྛིནཱཏི མུཊྛིནཱ ན པཧཱརེཡྻཱཏི ཨཏྠོ།
265.Rattanti (pārā. aṭṭha. 1.85) rajitaṃ. Aññena vāti muggarādinā vā. Katvāti ṭhapetvā. Pahāre na ca muṭṭhināti muṭṭhinā na pahāreyyāti attho.
༢༦༦-༧. ཚཏྟཝཊྚིཡཾ (པཱརཱ॰ ཨཊྛ॰ ༡.༨༥) ལེཁཾ ཋཔེཏྭཱ དྷམྨཀརཎེ ལེཁཱ ན ཝཊྚཏཱིཏི སམྦནྡྷོ། ཀུཉྩིཀཱཡ ཙ པིཔྥལེ ཙ མཎིཀཱ ཙ པཱིལ༹ཀཱ ཙ ན ཝཊྚཏཱིཏི སམྦནྡྷོ། ཏཏྠ མཎིཀཱཏི ཨེཀཱ ཨེཝ ཝཊྚམཎིཀཱ། པཱིལ༹ཀཱ མུཏྟརཱཛིསདིསཱ བཧཱུ།
266-7. Chattavaṭṭiyaṃ (pārā. aṭṭha. 1.85) lekhaṃ ṭhapetvā dhammakaraṇe lekhā na vaṭṭatīti sambandho. Kuñcikāya ca pipphale ca maṇikā ca pīḷakā ca na vaṭṭatīti sambandho. Tattha maṇikāti ekā eva vaṭṭamaṇikā. Pīḷakā muttarājisadisā bahū.
༢༦༨-༩. མཱལཱདྱརཎིཡནྟི (པཱརཱ॰ ཨཊྛ॰ ༡.༨༥) ཨརཎིཡཾ མཱལཱདི ཝཎྞམཊྛཾ ན ཝཊྚཏཱིཏི སམྦནྡྷོ། ཨེཝཾ སབྦཏྠ། ཏིཔུསཱིསམཡེ པཏྟམཎྜལེ བྷིཏྟིཀམྨཉྩ ན ཝཊྚཏཱིཏི ཨཏྠོ། ཧིཏྭཱཏི ཋཔེཏྭཱ། སཱུཙིསཎྜཱསཀོ (པཱརཱ॰ ཨཊྛ॰ ༡.༨༥) ནཱམ སཱུཙིཾ ཌཾསཱཔེཏྭཱ གྷཾསིཏུཾ ཀཏོ དཱརུམཡོ། ‘‘ཨནུཛཱནཱམི, བྷིཀྑཝེ, མཀརདནྟཀཾ ཚིནྡིཏུ’’ནྟི (ཙཱུལ༹ཝ॰ ༢༥༣) ཝུཏྟཏྟཱ པཏྟམཎྜལེ མཀརདནྟཀཾ ཝཊྚཏི, ཨཉྙཾ བྷིཏྟིཀམྨཱདིཝིཀཱརམེཝ ན ཝཊྚཏི, ཏསྨཱ གིརིཀཱུཊཾ པཏྟམཎྜལེ ཋཔེཏྭཱ ཨཝསེསེ ན ཝཊྚཏཱིཏི ཝེདིཏབྦཾ།
268-9.Mālādyaraṇiyanti (pārā. aṭṭha. 1.85) araṇiyaṃ mālādi vaṇṇamaṭṭhaṃ na vaṭṭatīti sambandho. Evaṃ sabbattha. Tipusīsamaye pattamaṇḍale bhittikammañca na vaṭṭatīti attho. Hitvāti ṭhapetvā. Sūcisaṇḍāsako (pārā. aṭṭha. 1.85) nāma sūciṃ ḍaṃsāpetvā ghaṃsituṃ kato dārumayo. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā pattamaṇḍale makaradantakaṃ vaṭṭati, aññaṃ bhittikammādivikārameva na vaṭṭati, tasmā girikūṭaṃ pattamaṇḍale ṭhapetvā avasese na vaṭṭatīti veditabbaṃ.
༢༧༢. སེནཱསནེཏི (པཱརཱ॰ ཨཊྛ॰ ༡.༨༥) པཱསཱདཱདིསེནཱསནེཏི ཨཏྠོ།
272.Senāsaneti (pārā. aṭṭha. 1.85) pāsādādisenāsaneti attho.
༢༧༣. པུམིཏྠིརཱུཔརཧིཏནྟི པུརིསརཱུཔཨིཏྠིརཱུཔརཧིཏནྟི ཨཏྠོ། པརིཀྑཱརཝིནིཙྪཡོ།
273.Pumitthirūparahitanti purisarūpaitthirūparahitanti attho. Parikkhāravinicchayo.
པརིཀྑཱརནིདྡེསཝཎྞནཱ ནིཊྛིཏཱ།
Parikkhāraniddesavaṇṇanā niṭṭhitā.
