| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༣༥. པརིཀྑཱརནིདྡེསཝཎྞནཱ
35. Parikkhāraniddesavaṇṇanā
༢༥༩-༦༠. ཚཏྟེ ཨནྟོ བཧི ཙ པཉྩཝཎྞེཧི སུཏྟེཧི སིབྦིཏུཉྩ པཎྞེ གིརིཀཱུཊཨཌྜྷཙནྡཱདིཾ ཚིནྡིཏུཉྩ ན ཝཊྚཏཱིཏི སམྦནྡྷོ། ཚཏྟེཏི ཏཱལཔཎྞེ ཚཏྟེ། གིརིཀཱུཊཾ ནཱམ མཀརདནྟཀཾ, ཨཱདི-སདྡེན ཏཱདིསཾ ཨཉྙཾ ཝིཀཱརརཱུཔཾ སངྒཧིཏཾ། གྷཊཀནྟི གེཧཏྠམྦྷེསུ ཝིཡ ཀཡིརམཱནཾ གྷཊཀཾ། དཎྜེཏི ཚཏྟདཎྜེ། ལེཁཱཏི ཏཧིཾ ཏཧིཾ དིནྣཱ ལེཁཱ། སཱདིསནྟི དཱིགྷེན ནིདྡིཊྛཾ། བུནྡམྷི མཱུལེ།
259-60. Chatte anto bahi ca pañcavaṇṇehi suttehi sibbituñca paṇṇe girikūṭaaḍḍhacandādiṃ chindituñca na vaṭṭatīti sambandho. Chatteti tālapaṇṇe chatte. Girikūṭaṃ nāma makaradantakaṃ, ādi-saddena tādisaṃ aññaṃ vikārarūpaṃ saṅgahitaṃ. Ghaṭakanti gehatthambhesu viya kayiramānaṃ ghaṭakaṃ. Daṇḍeti chattadaṇḍe. Lekhāti tahiṃ tahiṃ dinnā lekhā. Sādisanti dīghena niddiṭṭhaṃ. Bundamhi mūle.
༢༦༡. ཐིརཏྠཾ ཚཏྟེ ཨེཀཝཎྞེན སིབྦིཏུཾ ཝཱ པཉྫརཾ ཝིནནྡྷིཏུཾ ཝཱ ཝཊྚཏཱིཏི སམྦནྡྷོ། སིབྦིཏུནྟི ཨནྟོ བཧི ཙ སིབྦིཏུཾ། ཨེཀཝཎྞེནཱཏི ནཱིལཱདིནཱ ཨེཀཝཎྞེན། པཉྫརནྟི ཚཏྟདཎྜགཱཧཀསལཱཀཔཉྫརཾ། ཐིརཏྠནྟི ཨིམིནཱ ན ཝཎྞམཊྛཏྠཱཡཱཏི དསྶེཏི། བནྡྷིཏུཾ དཎྜེ ལེཁཱ ཝཊྚཏཱིཏི སམྦནྡྷོ། བནྡྷིཏུནྟི ཝཱཏཔྤཧཱརེན ཨཙལནཏྠཾ ཚཏྟམཎྜལིཀཾ རཛྫུཀེཧི གཧེཏྭཱ བནྡྷནཏྠཱཡ། ལེཁཱཝཱཏི ཝལཡམིཝ ཨུཀྐིརིཏྭཱ ཀཏཱ ལེཁཱ ཨེཝ། ཝཊྚཏཱིཏི ཡདིཔི ན བནྡྷཏི, རཛྫུཀེཧི བནྡྷིཏུཾ ཡུཏྟཊྛཱནཏྟཱ ཝཊྚཏི།
261. Thiratthaṃ chatte ekavaṇṇena sibbituṃ vā pañjaraṃ vinandhituṃ vā vaṭṭatīti sambandho. Sibbitunti anto bahi ca sibbituṃ. Ekavaṇṇenāti nīlādinā ekavaṇṇena. Pañjaranti chattadaṇḍagāhakasalākapañjaraṃ. Thiratthanti iminā na vaṇṇamaṭṭhatthāyāti dasseti. Bandhituṃ daṇḍe lekhā vaṭṭatīti sambandho. Bandhitunti vātappahārena acalanatthaṃ chattamaṇḍalikaṃ rajjukehi gahetvā bandhanatthāya. Lekhāvāti valayamiva ukkiritvā katā lekhā eva. Vaṭṭatīti yadipi na bandhati, rajjukehi bandhituṃ yuttaṭṭhānattā vaṭṭati.
༢༦༢. ཙཱིཝརེ ཨནྟེ ཝཱཔི པཊྚམུཁེ ཝཱཔི ཝེཎིཔི ཝཱ སངྑལིཀཱཔི ཝཱ ཨཉྙཾ སཱུཙིཝིཀཱརཾ ཝཱ པཱལི༹ཀཎྞིཀཨཱདིཀཾ ཀཔྤབིནྡུཝིཀཱརམྤི ཝཱ ན ཙ ཀཔྤཏཱིཏི སམྦནྡྷོ། ཨནྟེཏི ཙཱིཝརཔརིཡནྟེ, ཨནུཝཱཏེཏི ཝུཏྟཾ ཧོཏི། པཊྚམུཁེཏི པཊྚཀོཊིཡཾ, དྭིནྣཾ པཊྚཱནཾ སངྒྷཊིཏཊྛཱནཾ སནྡྷཱཡེཏཾ ཝུཏྟཾ། ཝེཎཱིཏི ཝརཀསཱིསཱཀཱརེན སིབྦནཾ། སངྑལིཀཱཏི བིལཱ༹ལབནྡྷནཱཀཱརེན སིབྦནཾ། ཨཉྙཾ སཱུཙིཝིཀཱརཾ ཝཱཏི ཙཱིཝརམཎྜནཏྠཱཡ ཀཡིརམཱནཾ ཨཉྙཾ ཡཾ ཀིཉྩི སཱུཙིཀམྨཝིཀཱརཾ ཝཱ། ཊཱིཀཱཡཾ པན ‘‘སཏཔདིསདིསཾ ཨཉྙཾ ཝཱ སཱུཙིཝིཀཱརཾ ན ཀཔྤཏཱི’’ཏི སཱམཉྙེན ཝུཏྟཾ། ‘‘ཙཱིཝརམཎྜནཏྠཱཡ ནཱནཱསུཏྟཀེཧི སཏཔདིསདིསཾ སིབྦནྟཱ ཨཱགནྟུཀཔཊྚཾ ཋཔེནྟི, ཨཉྙམྤི ཡཾ ཀིཉྩི སཱུཙིཀམྨཝིཀཱརཾ ཀརོནྟི, སབྦཾ ན ཝཊྚཏཱི’’ཏི ཨཊྛཀཐཱཡཾ ཝུཏྟཏྟཱ པན ནཱནཱཝཎྞེཧི ཝཱ ཧོཏུ, ཨེཀཝཎྞེན ཝཱ ཧོཏུ, ཙཱིཝརམཎྜནཏྠཱཡ སཾསིབྦནྟཱནཾ སཱུཙིཀམྨཝིཀཱརཾ སནྡྷཱཡ ཝུཏྟནྟི ཙཱིཝརེསུ ཕཱལིཏཊྛཱནསྶ ཐིརབྷཱཝཏྠཾ སཏཔདིསདིསམྤི སིབྦིཏུཾ ཝཊྚཏཱིཏི ཨམྷཱཀཾ ཁནྟི། པཱལི༹-སདྡེན, ཀཎྞིཀ-སདྡེན ཙ ཀཔྤ-སདྡལོཔེན ཝཱ ཨུཔཙཱརེན ཝཱ པཱལི༹ཀཔྤཱདཡོཝ གཧིཏཱ། པཱལི༹ ཙ ཀཎྞིཀཱ ཙ པཱལི༹ཀཎྞིཀཱཡོ, ཏཱ ཨཱདི ཡསྶ ཨཉྙསྶ ཏཱདིསསྶཱཏི ཝིགྒཧོ། ཏཏྠ ནཱིལཱཝལི༹ཨཱདིསཎྛཱནཱཡ བིནྡུཔནྟིཡཱ ཡཐཱ སོབྷཏི, ཏཐཱ ཀཡིརམཱནོ པཱལི༹ཀཔྤོ། ཏཐེཝ བིནྡུསམཱུཧེ ཀཏྠཙི དསྶེཏྭཱ ཀཡིརམཱནོ ཀཎྞིཀཀཔྤོ།
262. Cīvare ante vāpi paṭṭamukhe vāpi veṇipi vā saṅkhalikāpi vā aññaṃ sūcivikāraṃ vā pāḷikaṇṇikaādikaṃ kappabinduvikārampi vā na ca kappatīti sambandho. Anteti cīvarapariyante, anuvāteti vuttaṃ hoti. Paṭṭamukheti paṭṭakoṭiyaṃ, dvinnaṃ paṭṭānaṃ saṅghaṭitaṭṭhānaṃ sandhāyetaṃ vuttaṃ. Veṇīti varakasīsākārena sibbanaṃ. Saṅkhalikāti biḷālabandhanākārena sibbanaṃ. Aññaṃ sūcivikāraṃ vāti cīvaramaṇḍanatthāya kayiramānaṃ aññaṃ yaṃ kiñci sūcikammavikāraṃ vā. Ṭīkāyaṃ pana ‘‘satapadisadisaṃ aññaṃ vā sūcivikāraṃ na kappatī’’ti sāmaññena vuttaṃ. ‘‘Cīvaramaṇḍanatthāya nānāsuttakehi satapadisadisaṃ sibbantā āgantukapaṭṭaṃ ṭhapenti, aññampi yaṃ kiñci sūcikammavikāraṃ karonti, sabbaṃ na vaṭṭatī’’ti aṭṭhakathāyaṃ vuttattā pana nānāvaṇṇehi vā hotu, ekavaṇṇena vā hotu, cīvaramaṇḍanatthāya saṃsibbantānaṃ sūcikammavikāraṃ sandhāya vuttanti cīvaresu phālitaṭṭhānassa thirabhāvatthaṃ satapadisadisampi sibbituṃ vaṭṭatīti amhākaṃ khanti. Pāḷi-saddena, kaṇṇika-saddena ca kappa-saddalopena vā upacārena vā pāḷikappādayova gahitā. Pāḷi ca kaṇṇikā ca pāḷikaṇṇikāyo, tā ādi yassa aññassa tādisassāti viggaho. Tattha nīlāvaḷiādisaṇṭhānāya bindupantiyā yathā sobhati, tathā kayiramāno pāḷikappo. Tatheva bindusamūhe katthaci dassetvā kayiramāno kaṇṇikakappo.
༢༦༣. གཎྛིཔཱསཀཔཊྚཱཏི གཎྛིནོ ཙ པཱསཀསྶ ཙ པཏིཊྛཱནཊྛཱནེ ཋཔེཏབྦཱ པཊྚཱ། ཝཊྚཏཱིཏི ཨེཏྠ ‘‘གཎྛིཔཱསཀཱ’’ཏི ཀཏྭཱ ‘‘ཙཏུཀོཎཱཝ ཝཊྚནྟཱི’’ཏི ཨཏྠཏོ ཝཙནཾ ཝིཔལླཱསེཏྭཱ ཡོཛེཏབྦཾ། ཨགྒྷིཡནྟི ཙེཏིཡསཎྛཱནེན སིབྦནཾ། མཱུལེ ཙ ཨགྒེ ཙ ཨེཀསདིསཾ ཀཏྭཱ མུགྒརཱཀཱརེན སིབྦནཾ མུགྒརོ། ཝིཀཱརནྟི ཝིཀཱརོ, ལིངྒཝིཔལླཱསེན ཝུཏྟཾ། ཨེཏྠཱཏི གཎྛིཔཱསཀཔཊྚེསུ།
263.Gaṇṭhipāsakapaṭṭāti gaṇṭhino ca pāsakassa ca patiṭṭhānaṭṭhāne ṭhapetabbā paṭṭā. Vaṭṭatīti ettha ‘‘gaṇṭhipāsakā’’ti katvā ‘‘catukoṇāva vaṭṭantī’’ti atthato vacanaṃ vipallāsetvā yojetabbaṃ. Agghiyanti cetiyasaṇṭhānena sibbanaṃ. Mūle ca agge ca ekasadisaṃ katvā muggarākārena sibbanaṃ muggaro. Vikāranti vikāro, liṅgavipallāsena vuttaṃ. Etthāti gaṇṭhipāsakapaṭṭesu.
༢༦༤. ཀོཎསུཏྟཱཏི ནཔུཾསཀནིདྡེསོ, གཎྛིཔཱསཀཔཊྚཱནཾ ཀོཎེཧི ནཱིཧཊསུཏྟཀོཊིཡོ། པཱིལ༹ཀཱཏི ཏཱནིཡེཝ ནིཝཏྟེཏྭཱ པཱིལ༹ཀཱཀཱརེན ཀཏཱནི། དུཝིཉྙེཡྻཱཝཱཏི ཏེསཾ ཨནྟེསུ ཨེཀཝཱརཾ གཎྛིཀརཎེན ཝཱ པུན ནིཝཏྟེཏྭཱ སིབྦནེན ཝཱ དུཝིཉྙེཡྻཱ ཨེཝ། གནྡྷཾ ཏེལཾ ཝཱཏི གནྡྷཾ ཝཱ ཏེལཾ ཝཱ། ཀཉྩིཀཔིཊྛཁལིཀཨཱདཱིནིཔི ཝཊྚནྟི།
264.Koṇasuttāti napuṃsakaniddeso, gaṇṭhipāsakapaṭṭānaṃ koṇehi nīhaṭasuttakoṭiyo. Pīḷakāti tāniyeva nivattetvā pīḷakākārena katāni. Duviññeyyāvāti tesaṃ antesu ekavāraṃ gaṇṭhikaraṇena vā puna nivattetvā sibbanena vā duviññeyyā eva. Gandhaṃ telaṃ vāti gandhaṃ vā telaṃ vā. Kañcikapiṭṭhakhalikaādīnipi vaṭṭanti.
༢༦༥. མཎིནཱཏི མསཱརགལླཱདིཔཱསཱཎེན། ན ཙ གྷཊྚེཡྻཱཏི ནེཝ གྷཊྚེཡྻ། ཨཉྙེན ཝཱཏི མུགྒརམུསལཱདིནཱ། ཨཾསབདྡྷཀཀཱཡབནྡྷནཱནི པན ཏཐཱ ཀཱཏུཾ ཝཊྚཏི། དོཎིཡཾ ཀཏྭཱ ན ཙ གྷཾསེཡྻཱཏི པཀྐརཛནཱཀིརཎདོཎིཡཾ ཋཔེཏྭཱ བྷཱུམིཡཾ ཛཎྞུཀཱནི ནིཧནྟྭཱ ཨིཏོ ཙིཏོ ཙ ཨཱཝིཛ྄ཛྷིཏྭཱ ནེཝ གྷཾསེཡྻཱཏི ཨཏྠོ།
265.Maṇināti masāragallādipāsāṇena. Na ca ghaṭṭeyyāti neva ghaṭṭeyya. Aññena vāti muggaramusalādinā. Aṃsabaddhakakāyabandhanāni pana tathā kātuṃ vaṭṭati. Doṇiyaṃ katvā na ca ghaṃseyyāti pakkarajanākiraṇadoṇiyaṃ ṭhapetvā bhūmiyaṃ jaṇṇukāni nihantvā ito cito ca āvijjhitvā neva ghaṃseyyāti attho.
༢༦༦-༧. ཀཎྞཀོཎཀསུཏྟཱནཱིཏི ཙཱིཝརརཛནཀཱལེ ལགྒནཏྠཱཡ ཨནུཝཱཏེ ཙཏཱུསུ ཀོཎེསུ ཙ པཱསཀཾ ཀཏྭཱ བནྡྷིཏཱནི སུཏྟཱནི, ཡཱནི ‘‘ཨནུཛཱནཱམི, བྷིཀྑཝེ, ཀཎྞསུཏྟཀ’’ནྟི (མཧཱཝ॰ ༣༤༤) ཨེཝཾ ཨནུཉྙཱཏཱནི། ཀཎྞསངྑཱཏཱ ཀོཎཱ ཀཎྞཀོཎཀཱ, ཏེསུ སུཏྟཱནི། གཎྛིཀཔཱསཀཔཊྚེསུ པན ཀཎྞཀོཎཀསུཏྟཱནཾ དུཝིཉྙེཡྻཱནམེཝ ཀཔྤིཡཏཱ ཧེཊྛཱ ཝུཏྟཱཏི ཙཱིཝརེ རཏྟེཡེཝ ཏེསཾ ཚིནྡིཏབྦཏཱ ནཏྠི, ཀཎྞཀོཎཀསུཏྟཱནཾ ཚིནྡིཏབྦཏཱཡ ཝུཏྟཏྟཱ ཨནུཝཱཏེཧི ནིཀྑམིཏསུཏྟཱནིཔི ཚིནྡིཏབྦཱནཱིཏི ཝེདིཏབྦཾ། དྷམྨཀརཎེ ཚཏྟཝཊྚིཡཾ ལེཁཾ ཋཔེཏྭཱ ལེཁཱ ན ཝཊྚཏཱིཏི ཡོཛནཱ། ཚཏྟཝཊྚིཡནྟི ཚཏྟསྶ མུཁཝཊྚིཡཾ། ལེཁཱཏི ཨུཔརི ཝཱ ཧེཊྛཱ ཝཱ ཀུཙྪིཡཾ ཝཱ ཨཉྙཱ ལེཁཱ། ཀུཉྩིཀཱཡ ཙ པིཔྥལེ ཙ མཎིཀཱ ཙ པཱིལ༹ཀཱ ཙ ན ཝཊྚནྟཱིཏི སམྦནྡྷོ། མཎིཀཱཏི ཨེཀཱ ཝཊྚམཎི། པཱིལ༹ཀཱཏི སཱསཔམཏྟིཀཱ མུཏྟརཱཛིསདིསཱ བཧུཝཊྚལེཁཱ། དཎྜམྷཱིཏི པིཔྥལདཎྜཀེ།
266-7.Kaṇṇakoṇakasuttānīti cīvararajanakāle lagganatthāya anuvāte catūsu koṇesu ca pāsakaṃ katvā bandhitāni suttāni, yāni ‘‘anujānāmi, bhikkhave, kaṇṇasuttaka’’nti (mahāva. 344) evaṃ anuññātāni. Kaṇṇasaṅkhātā koṇā kaṇṇakoṇakā, tesu suttāni. Gaṇṭhikapāsakapaṭṭesu pana kaṇṇakoṇakasuttānaṃ duviññeyyānameva kappiyatā heṭṭhā vuttāti cīvare ratteyeva tesaṃ chinditabbatā natthi, kaṇṇakoṇakasuttānaṃ chinditabbatāya vuttattā anuvātehi nikkhamitasuttānipi chinditabbānīti veditabbaṃ. Dhammakaraṇe chattavaṭṭiyaṃ lekhaṃ ṭhapetvā lekhā na vaṭṭatīti yojanā. Chattavaṭṭiyanti chattassa mukhavaṭṭiyaṃ. Lekhāti upari vā heṭṭhā vā kucchiyaṃ vā aññā lekhā. Kuñcikāya ca pipphale ca maṇikā ca pīḷakā ca na vaṭṭantīti sambandho. Maṇikāti ekā vaṭṭamaṇi. Pīḷakāti sāsapamattikā muttarājisadisā bahuvaṭṭalekhā. Daṇḍamhīti pipphaladaṇḍake.
༢༦༨-༩. ཨརཎིཡཾ མཱལཱདི ཙ པཏྟམཎྜལེ བྷིཏྟིཀམྨཉྩ ན ཝཊྚཏཱིཏི སམྦནྡྷིཏབྦཾ། ཨརཎིཡནྟི ཨུཏྟརཱརཎི ཨདྷརཱརཎི ཨརཎིདྷནུཀཉྩ སཱམཉྙེན གཧིཏཾ། པཏྟམཎྜལེཏི ཏིཔུསཱིསཱདིམཡེ པཏྟམཎྜལེ། ཨེཏྠ པན མཀརདཎྜཀཾ ཝཊྚཏི། ཧེཊྛཱཏི ཀཏྟརཡཊྛིཡཱ ཧེཊྛཱ། ཨུདྡྷནྟི ཏསྶཱཡེཝ ཨུཔརི།
268-9. Araṇiyaṃ mālādi ca pattamaṇḍale bhittikammañca na vaṭṭatīti sambandhitabbaṃ. Araṇiyanti uttarāraṇi adharāraṇi araṇidhanukañca sāmaññena gahitaṃ. Pattamaṇḍaleti tipusīsādimaye pattamaṇḍale. Ettha pana makaradaṇḍakaṃ vaṭṭati. Heṭṭhāti kattarayaṭṭhiyā heṭṭhā. Uddhanti tassāyeva upari.
༢༧༠-༣. སམྨུཉྫནིམྷཱིཏི སམྨུཉྫནིཡཱ ལིངྒཝིཔལླཱསོ། ཨཝཱརིཏནྟི ཨིཏྠིརཱུཔཾ པན ཝཱརིཏཾ། སོཝཎྞམཡམྤཱིཏི སུཝཎྞམཡམྤི། ཝིསཱཎནཱལི༹ ནཱམ ཝིསཱཎམཡཱ ནཱལི༹། ཨེཏྠ པན ཨཝུཏྟཱནིཔི ཡཱནི ཀཱནིཙི ཨཱརཀཎྜཀདནྟཀཊྛཚེདནཔཱནཱིཡགྷཊཔཱནཱིཡཨུལུ༹ངྐཙུཎྞབྷཱཛནཱདཱིནི ཝུཏྟཱནཾ ཨནུལོམཱནཱིཏི ཝེདིཏབྦཱནི། ཡོ པནེཏྠ ཝིནཡཉྙཱུ ཏཱདིསཾ པརིཀྑཱརཾ དིསྭཱ ཚིནྡེཡྻ ཝཱ ཚིནྡཱཔེཡྻ ཝཱ, ཨནུཔཝཛྫོ སོཏི ཝེདིཏབྦནྟི།
270-3.Sammuñjanimhīti sammuñjaniyā liṅgavipallāso. Avāritanti itthirūpaṃ pana vāritaṃ. Sovaṇṇamayampīti suvaṇṇamayampi. Visāṇanāḷi nāma visāṇamayā nāḷi. Ettha pana avuttānipi yāni kānici ārakaṇḍakadantakaṭṭhachedanapānīyaghaṭapānīyauḷuṅkacuṇṇabhājanādīni vuttānaṃ anulomānīti veditabbāni. Yo panettha vinayaññū tādisaṃ parikkhāraṃ disvā chindeyya vā chindāpeyya vā, anupavajjo soti veditabbanti.
པརིཀྑཱརནིདྡེསཝཎྞནཱ ནིཊྛིཏཱ།
Parikkhāraniddesavaṇṇanā niṭṭhitā.
