| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
2. பரிக்கா²ரவினிச்ச²யகதா²
2. Parikkhāravinicchayakathā
6. பரிக்கா²ரோதி ஸமணபரிக்கா²ரோ. தத்ராயங் கப்பியாகப்பியபரிக்கா²ரவினிச்ச²யோ (பாரா॰ அட்ட²॰ 1.85) – கேசி தாலபண்ணச்ச²த்தங் அந்தோ வா ப³ஹி வா பஞ்சவண்ணேன ஸுத்தேன ஸிப்³பி³த்வா வண்ணமட்ட²ங் கரொந்தி, தங் ந வட்டதி. ஏகவண்ணேன பன நீலேன வா பீதகேன வா யேன கேனசி ஸுத்தேன அந்தோ வா ப³ஹி வா ஸிப்³பி³துங் , ச²த்தத³ண்ட³க்³கா³ஹகங் ஸலாகபஞ்ஜரங் வா வினந்தி⁴துங் வட்டதி, தஞ்ச கோ² தி²ரகரணத்த²ங் வட்டதி, ந வண்ணமட்ட²த்தா²ய. ச²த்தபண்ணேஸு மகரத³ந்தகங் வா அட்³ட⁴சந்த³கங் வா சி²ந்தி³துங் ந வட்டதி. ச²த்தத³ண்டே³ கே³ஹத்த²ம்பே⁴ஸு விய க⁴டகோ வா வாளரூபகங் வா ந வட்டதி. ஸசேபி ஸப்³ப³த்த² ஆரக்³கே³ன லேகா² தி³ன்னா ஹோதி, ஸாபி ந வட்டதி. க⁴டகங் வா வாளரூபகங் வா பி⁴ந்தி³த்வா தா⁴ரேதப்³ப³ங், லேகா²பி க⁴ங்ஸித்வா வா அபனேதப்³பா³, ஸுத்தகேன வா த³ண்டோ³ வேடே²தப்³போ³. த³ண்ட³பு³ந்தே³ பன அஹிச்ச²த்தகஸண்டா²னங் வட்டதி. வாதப்பஹாரேன அசலனத்த²ங் ச²த்தமண்ட³லிகங் ரஜ்ஜுகேஹி கா³ஹெத்வா த³ண்டே³ ப³ந்த⁴ந்தி, தஸ்மிங் ப³ந்த⁴னட்டா²னே வலயமிவ உக்கிரித்வா லேக²ங் ட²பெந்தி, ஸா வட்டதி.
6.Parikkhāroti samaṇaparikkhāro. Tatrāyaṃ kappiyākappiyaparikkhāravinicchayo (pārā. aṭṭha. 1.85) – keci tālapaṇṇacchattaṃ anto vā bahi vā pañcavaṇṇena suttena sibbitvā vaṇṇamaṭṭhaṃ karonti, taṃ na vaṭṭati. Ekavaṇṇena pana nīlena vā pītakena vā yena kenaci suttena anto vā bahi vā sibbituṃ , chattadaṇḍaggāhakaṃ salākapañjaraṃ vā vinandhituṃ vaṭṭati, tañca kho thirakaraṇatthaṃ vaṭṭati, na vaṇṇamaṭṭhatthāya. Chattapaṇṇesu makaradantakaṃ vā aḍḍhacandakaṃ vā chindituṃ na vaṭṭati. Chattadaṇḍe gehatthambhesu viya ghaṭako vā vāḷarūpakaṃ vā na vaṭṭati. Sacepi sabbattha āraggena lekhā dinnā hoti, sāpi na vaṭṭati. Ghaṭakaṃ vā vāḷarūpakaṃ vā bhinditvā dhāretabbaṃ, lekhāpi ghaṃsitvā vā apanetabbā, suttakena vā daṇḍo veṭhetabbo. Daṇḍabunde pana ahicchattakasaṇṭhānaṃ vaṭṭati. Vātappahārena acalanatthaṃ chattamaṇḍalikaṃ rajjukehi gāhetvā daṇḍe bandhanti, tasmiṃ bandhanaṭṭhāne valayamiva ukkiritvā lekhaṃ ṭhapenti, sā vaṭṭati.
7. சீவரமண்ட³னத்தா²ய நானாஸுத்தகேஹி ஸதபதி³ஸதி³ஸங் ஸிப்³ப³ந்தா ஆக³ந்துகபட்டங் ட²பெந்தி, அஞ்ஞம்பி யங் கிஞ்சி ஸூசிகம்மவிகாரங் கரொந்தி, பட்டமுகே² வா பரியந்தே வா வேணிங் வா ஸங்க²லிகங் வா முக்³க³ரங் வா ஏவமாதி³ ஸப்³ப³ங் ந வட்டதி, பகதிஸூசிகம்மமேவ வட்டதி. க³ண்டி²கபட்டகஞ்ச பாஸகபட்டகஞ்ச அட்ட²கோணம்பி ஸோளஸகோணம்பி கரொந்தி, தத்த² அக்³கி⁴யக³யமுக்³க³ராதீ³னி த³ஸ்ஸெந்தி, கக்கடக்கீ²னி உக்கிரந்தி, ஸப்³ப³ங் ந வட்டதி, சதுகோணமேவ வட்டதி, கோணஸுத்தபீளகா ச சீவரே ரத்தே து³விஞ்ஞெய்யரூபா வட்டந்தி. கஞ்ஜிகபிட்ட²க²லிஅஅலகாதீ³ஸு சீவரங் பக்கி²பிதுங் ந வட்டதி, சீவரகம்மகாலே பன ஹத்த²மலஸூசிமலாதீ³னங் தோ⁴வனத்த²ங் கிலிட்ட²காலே ச தோ⁴வனத்த²ங் வட்டதி, க³ந்த⁴ங் வா லாக²ங் வா தேலங் வா ரஜனே பக்கி²பிதுங் ந வட்டதி.
7. Cīvaramaṇḍanatthāya nānāsuttakehi satapadisadisaṃ sibbantā āgantukapaṭṭaṃ ṭhapenti, aññampi yaṃ kiñci sūcikammavikāraṃ karonti, paṭṭamukhe vā pariyante vā veṇiṃ vā saṅkhalikaṃ vā muggaraṃ vā evamādi sabbaṃ na vaṭṭati, pakatisūcikammameva vaṭṭati. Gaṇṭhikapaṭṭakañca pāsakapaṭṭakañca aṭṭhakoṇampi soḷasakoṇampi karonti, tattha agghiyagayamuggarādīni dassenti, kakkaṭakkhīni ukkiranti, sabbaṃ na vaṭṭati, catukoṇameva vaṭṭati, koṇasuttapīḷakā ca cīvare ratte duviññeyyarūpā vaṭṭanti. Kañjikapiṭṭhakhaliaalakādīsu cīvaraṃ pakkhipituṃ na vaṭṭati, cīvarakammakāle pana hatthamalasūcimalādīnaṃ dhovanatthaṃ kiliṭṭhakāle ca dhovanatthaṃ vaṭṭati, gandhaṃ vā lākhaṃ vā telaṃ vā rajane pakkhipituṃ na vaṭṭati.
ரஜனேஸு ச ஹலித்³தி³ங் ட²பெத்வா ஸப்³ப³ங் மூலரஜனங் வட்டதி, மஞ்ஜிட்டி²ஞ்ச துங்க³ஹாரஞ்ச ட²பெத்வா ஸப்³ப³ங் க²ந்த⁴ரஜனங் வட்டதி. துங்க³ஹாரோ நாம ஏகோ ஸகண்டகருக்கோ², தஸ்ஸ ஹரிதாலவண்ணங் க²ந்த⁴ரஜனங் ஹோதி. லொத்³த³ஞ்ச கண்டு³லஞ்ச ட²பெத்வா ஸப்³ப³ங் தசரஜனங் வட்டதி. அல்லிபத்தஞ்ச நீலிபத்தஞ்ச ட²பெத்வா ஸப்³ப³ங் பத்தரஜனங் வட்டதி. கி³ஹிபரிபு⁴த்தகங் பன அல்லிபத்தேன ஏகவாரங் ரஜிதுங் வட்டதி. கிங்ஸுகபுப்ப²ஞ்ச குஸும்ப⁴புப்ப²ஞ்ச ட²பெத்வா ஸப்³ப³ங் புப்ப²ரஜனங் வட்டதி. ப²லரஜனே பன ந கிஞ்சி ந வட்டதி (மஹாவ॰ அட்ட²॰ 344).
Rajanesu ca haliddiṃ ṭhapetvā sabbaṃ mūlarajanaṃ vaṭṭati, mañjiṭṭhiñca tuṅgahārañca ṭhapetvā sabbaṃ khandharajanaṃ vaṭṭati. Tuṅgahāro nāma eko sakaṇṭakarukkho, tassa haritālavaṇṇaṃ khandharajanaṃ hoti. Loddañca kaṇḍulañca ṭhapetvā sabbaṃ tacarajanaṃ vaṭṭati. Allipattañca nīlipattañca ṭhapetvā sabbaṃ pattarajanaṃ vaṭṭati. Gihiparibhuttakaṃ pana allipattena ekavāraṃ rajituṃ vaṭṭati. Kiṃsukapupphañca kusumbhapupphañca ṭhapetvā sabbaṃ puppharajanaṃ vaṭṭati. Phalarajane pana na kiñci na vaṭṭati (mahāva. aṭṭha. 344).
8. சீவரங் ரஜித்வா ஸங்கே²ன வா மணினா வா யேன கேனசி ந க⁴ட்டேதப்³ப³ங், பூ⁴மியங் ஜாணுகானி நிஹந்த்வா ஹத்தே²ஹி க³ஹெத்வா தோ³ணியம்பி ந க⁴ங்ஸிதப்³ப³ங். தோ³ணியங் வா ப²லகே வா ட²பெத்வா அந்தே கா³ஹாபெத்வா ஹத்தே²ன பஹரிதுங் பன வட்டதி, தம்பி முட்டி²னா ந காதப்³ப³ங். போராணகத்தே²ரா பன தோ³ணியம்பி ந ட²பேஸுங். ஏகோ சீவரங் க³ஹெத்வா திட்ட²தி, அபரோ ஹத்தே² கத்வா ஹத்தே²ன பஹரதி. சீவரஸ்ஸ கண்ணஸுத்தகங் ந வட்டதி, ரஜிதகாலே சி²ந்தி³தப்³ப³ங். யங் பன ‘‘அனுஜானாமி, பி⁴க்க²வே, கண்ணஸுத்தக’’ந்தி (மஹாவ॰ 344) ஏவங் அனுஞ்ஞாதங், தங் அனுவாதே பாஸகங் கத்வா ப³ந்தி⁴தப்³ப³ங் ரஜனகாலே லக்³க³னத்தா²ய. க³ண்டி²கேபி ஸோபா⁴கரணத்த²ங் லேகா² வா பீளகா வா ந வட்டதி, நாஸெத்வா பரிபு⁴ஞ்ஜிதப்³ப³ங்.
8. Cīvaraṃ rajitvā saṅkhena vā maṇinā vā yena kenaci na ghaṭṭetabbaṃ, bhūmiyaṃ jāṇukāni nihantvā hatthehi gahetvā doṇiyampi na ghaṃsitabbaṃ. Doṇiyaṃ vā phalake vā ṭhapetvā ante gāhāpetvā hatthena paharituṃ pana vaṭṭati, tampi muṭṭhinā na kātabbaṃ. Porāṇakattherā pana doṇiyampi na ṭhapesuṃ. Eko cīvaraṃ gahetvā tiṭṭhati, aparo hatthe katvā hatthena paharati. Cīvarassa kaṇṇasuttakaṃ na vaṭṭati, rajitakāle chinditabbaṃ. Yaṃ pana ‘‘anujānāmi, bhikkhave, kaṇṇasuttaka’’nti (mahāva. 344) evaṃ anuññātaṃ, taṃ anuvāte pāsakaṃ katvā bandhitabbaṃ rajanakāle lagganatthāya. Gaṇṭhikepi sobhākaraṇatthaṃ lekhā vā pīḷakā vā na vaṭṭati, nāsetvā paribhuñjitabbaṃ.
9. பத்தே வா தா²லகே வா ஆரக்³கே³ன லேக²ங் கரொந்தி அந்தோ வா ப³ஹி வா, ந வட்டதி. பத்தங் ப⁴மங் ஆரோபெத்வா மஜ்ஜித்வா பசந்தி ‘‘மணிவண்ணங் கரிஸ்ஸாமா’’தி, ந வட்டதி, தேலவண்ணோ பன வட்டதி. பத்தமண்ட³லே பி⁴த்திகம்மங் ந வட்டதி, மகரத³ந்தகங் பன வட்டதி.
9. Patte vā thālake vā āraggena lekhaṃ karonti anto vā bahi vā, na vaṭṭati. Pattaṃ bhamaṃ āropetvā majjitvā pacanti ‘‘maṇivaṇṇaṃ karissāmā’’ti, na vaṭṭati, telavaṇṇo pana vaṭṭati. Pattamaṇḍale bhittikammaṃ na vaṭṭati, makaradantakaṃ pana vaṭṭati.
த⁴மகரணச²த்தகஸ்ஸ உபரி வா ஹெட்டா² வா த⁴மகரணகுச்சி²யங் வா லேகா² ந வட்டதி, ச²த்தமுக²வட்டியங் பனஸ்ஸ லேகா² வட்டதி.
Dhamakaraṇachattakassa upari vā heṭṭhā vā dhamakaraṇakucchiyaṃ vā lekhā na vaṭṭati, chattamukhavaṭṭiyaṃ panassa lekhā vaṭṭati.
10. காயப³ந்த⁴னஸ்ஸ ஸோப⁴னத்த²ங் தஹிங் தஹிங் தி³கு³ணங் ஸுத்தங் கொட்டெந்தி, கக்கடக்கீ²னி உட்டா²பெந்தி, ந வட்டதி, உபோ⁴ஸு பன அந்தேஸு த³ஸாமுக²ஸ்ஸ தி²ரபா⁴வாய தி³கு³ணங் கொட்டேதுங் வட்டதி. த³ஸாமுகே² பன க⁴டகங் வா மகரமுக²ங் வா தெ³ட்³டு³ப⁴ஸீஸங் வா யங் கிஞ்சி விகாரரூபங் காதுங் ந வட்டதி, தத்த² தத்த² அச்சீ²னி த³ஸ்ஸெத்வா மாலாகம்மாதீ³னி வா கத்வா கொட்டிதகாயப³ந்த⁴னம்பி ந வட்டதி, உஜுகமேவ பன மச்ச²கண்டகங் வா க²ஜ்ஜூரிபத்தகங் வா மட்ட²கபட்டிகங் வா கத்வா கொட்டேதுங் வட்டதி. காயப³ந்த⁴னஸ்ஸ த³ஸா ஏகா வட்டதி, த்³வே தீணி சத்தாரிபி வட்டந்தி, ததோ பரங் ந வட்டந்தி. ரஜ்ஜுககாயப³ந்த⁴னங் ஏகமேவ வட்டதி, பாமங்க³ஸண்டா²னங் பன ஏகம்பி ந வட்டதி, த³ஸா பன பாமங்க³ஸண்டா²னாபி வட்டதி, ப³ஹுரஜ்ஜுகே ஏகதோ கத்வா ஏகேன நிரந்தரங் வேடெ²த்வா கதங் ப³ஹுரஜ்ஜுகந்தி ந வத்தப்³ப³ங், தங் வட்டதி.
10. Kāyabandhanassa sobhanatthaṃ tahiṃ tahiṃ diguṇaṃ suttaṃ koṭṭenti, kakkaṭakkhīni uṭṭhāpenti, na vaṭṭati, ubhosu pana antesu dasāmukhassa thirabhāvāya diguṇaṃ koṭṭetuṃ vaṭṭati. Dasāmukhe pana ghaṭakaṃ vā makaramukhaṃ vā deḍḍubhasīsaṃ vā yaṃ kiñci vikārarūpaṃ kātuṃ na vaṭṭati, tattha tattha acchīni dassetvā mālākammādīni vā katvā koṭṭitakāyabandhanampi na vaṭṭati, ujukameva pana macchakaṇṭakaṃ vā khajjūripattakaṃ vā maṭṭhakapaṭṭikaṃ vā katvā koṭṭetuṃ vaṭṭati. Kāyabandhanassa dasā ekā vaṭṭati, dve tīṇi cattāripi vaṭṭanti, tato paraṃ na vaṭṭanti. Rajjukakāyabandhanaṃ ekameva vaṭṭati, pāmaṅgasaṇṭhānaṃ pana ekampi na vaṭṭati, dasā pana pāmaṅgasaṇṭhānāpi vaṭṭati, bahurajjuke ekato katvā ekena nirantaraṃ veṭhetvā kataṃ bahurajjukanti na vattabbaṃ, taṃ vaṭṭati.
காயப³ந்த⁴னவிதே⁴ அட்ட²மங்க³லாதி³கங் யங் கிஞ்சி விகாரரூபங் ந வட்டதி, பரிச்சே²த³லேகா²மத்தங் வட்டதி. வித⁴கஸ்ஸ உபோ⁴ஸு அந்தேஸு தி²ரகரணத்தா²ய க⁴டகங் கரொந்தி, அயம்பி வட்டதி.
Kāyabandhanavidhe aṭṭhamaṅgalādikaṃ yaṃ kiñci vikārarūpaṃ na vaṭṭati, paricchedalekhāmattaṃ vaṭṭati. Vidhakassa ubhosu antesu thirakaraṇatthāya ghaṭakaṃ karonti, ayampi vaṭṭati.
11. அஞ்ஜனியங் இத்தி²புரிஸசதுப்பத³ஸகுணரூபங் வா மாலாகம்மலதாகம்மமகரத³ந்தககோ³முத்தகஅட்³ட⁴சந்த³காதி³பே⁴த³ங் வா விகாரரூபங் ந வட்டதி, க⁴ங்ஸித்வா வா பி⁴ந்தி³த்வா வா யதா² வா ந பஞ்ஞாயதி, ததா² ஸுத்தகேன வேடெ²த்வா வளஞ்ஜேதப்³பா³. உஜுகமேவ பன சதுரங்ஸா வா அட்ட²ங்ஸா வா ஸோளஸங்ஸா வா அஞ்ஜனீ வட்டதி. ஹெட்ட²தோபிஸ்ஸா த்³வே வா திஸ்ஸோ வா வட்டலேகா²யோ வட்டந்தி, கீ³வாயம்பிஸ்ஸா பிதா⁴னகப³ந்த⁴னத்த²ங் ஏகா வட்டலேகா² வட்டதி.
11. Añjaniyaṃ itthipurisacatuppadasakuṇarūpaṃ vā mālākammalatākammamakaradantakagomuttakaaḍḍhacandakādibhedaṃ vā vikārarūpaṃ na vaṭṭati, ghaṃsitvā vā bhinditvā vā yathā vā na paññāyati, tathā suttakena veṭhetvā vaḷañjetabbā. Ujukameva pana caturaṃsā vā aṭṭhaṃsā vā soḷasaṃsā vā añjanī vaṭṭati. Heṭṭhatopissā dve vā tisso vā vaṭṭalekhāyo vaṭṭanti, gīvāyampissā pidhānakabandhanatthaṃ ekā vaṭṭalekhā vaṭṭati.
அஞ்ஜனீஸலாகாயபி வண்ணமட்ட²கம்மங் ந வட்டதி, அஞ்ஜனீத²விகாயபி யங் கிஞ்சி நானாவண்ணேன ஸுத்தேன வண்ணமட்ட²கம்மங் ந வட்டதி. ஏஸேவ நயோ குஞ்சிககோஸகேபி. குஞ்சிகாய வண்ணமட்ட²கம்மங் ந வட்டதி, ததா² ஸிபாடிகாய. ஏகவண்ணஸுத்தேன பன யேன கேனசி யங் கிஞ்சி ஸிப்³பி³துங் வட்டதி.
Añjanīsalākāyapi vaṇṇamaṭṭhakammaṃ na vaṭṭati, añjanīthavikāyapi yaṃ kiñci nānāvaṇṇena suttena vaṇṇamaṭṭhakammaṃ na vaṭṭati. Eseva nayo kuñcikakosakepi. Kuñcikāya vaṇṇamaṭṭhakammaṃ na vaṭṭati, tathā sipāṭikāya. Ekavaṇṇasuttena pana yena kenaci yaṃ kiñci sibbituṃ vaṭṭati.
12. ஆரகண்டகேபி வட்டமணிகங் வா அஞ்ஞங் வா வண்ணமட்ட²ங் ந வட்டதி, கீ³வாயங் பன பரிச்சே²த³லேகா² வட்டதி. பிப்ப²லிகேபி மணிகங் வா பீளகங் வா யங் கிஞ்சி உட்டா²பேதுங் ந வட்டதி, த³ண்ட³கே பன பரிச்சே²த³லேகா² வட்டதி. நக²ச்சே²த³னங் வலிதகங்யேவ கரொந்தி, தஸ்மா தங் வட்டதி. உத்தராரணியங் வாபி அரணித⁴னுகே வா உபரிபேல்லனத³ண்ட³கே வா மாலாகம்மாதி³ யங் கிஞ்சி வண்ணமட்ட²ங் ந வட்டதி. பேல்லனத³ண்ட³கஸ்ஸ பன வேமஜ்ஜே² மண்ட³லங் ஹோதி, தத்த² பரிச்சே²த³லேகா²மத்தங் வட்டதி. ஸூசிஸண்டா³ஸங் கரொந்தி, யேன ஸூசிங் ட³ங்ஸாபெத்வா க⁴ங்ஸந்தி, தத்த² மகரமுகா²தி³கங் யங் கிஞ்சி வண்ணமட்ட²ங் ந வட்டதி, ஸூசிட³ங்ஸனத்த²ங் பன முக²மத்தங் ஹோதி, தங் வட்டதி.
12. Ārakaṇṭakepi vaṭṭamaṇikaṃ vā aññaṃ vā vaṇṇamaṭṭhaṃ na vaṭṭati, gīvāyaṃ pana paricchedalekhā vaṭṭati. Pipphalikepi maṇikaṃ vā pīḷakaṃ vā yaṃ kiñci uṭṭhāpetuṃ na vaṭṭati, daṇḍake pana paricchedalekhā vaṭṭati. Nakhacchedanaṃ valitakaṃyeva karonti, tasmā taṃ vaṭṭati. Uttarāraṇiyaṃ vāpi araṇidhanuke vā uparipellanadaṇḍake vā mālākammādi yaṃ kiñci vaṇṇamaṭṭhaṃ na vaṭṭati. Pellanadaṇḍakassa pana vemajjhe maṇḍalaṃ hoti, tattha paricchedalekhāmattaṃ vaṭṭati. Sūcisaṇḍāsaṃ karonti, yena sūciṃ ḍaṃsāpetvā ghaṃsanti, tattha makaramukhādikaṃ yaṃ kiñci vaṇṇamaṭṭhaṃ na vaṭṭati, sūciḍaṃsanatthaṃ pana mukhamattaṃ hoti, taṃ vaṭṭati.
த³ந்தகட்ட²ச்சே²த³னவாஸியம்பி யங் கிஞ்சி வண்ணமட்ட²ங் ந வட்டதி, உஜுகமேவ கப்பியலோஹேன உபோ⁴ஸு வா பஸ்ஸேஸு சதுரங்ஸங் வா அட்ட²ங்ஸங் வா ப³ந்தி⁴துங் வட்டதி. கத்தரத³ண்டே³பி யங் கிஞ்சி வண்ணமட்ட²ங் ந வட்டதி, ஹெட்டா² ஏகா வா த்³வே வா வட்டலேகா² உபரி அஹிச்ச²த்தகமகுளமத்தஞ்ச வட்டதி.
Dantakaṭṭhacchedanavāsiyampi yaṃ kiñci vaṇṇamaṭṭhaṃ na vaṭṭati, ujukameva kappiyalohena ubhosu vā passesu caturaṃsaṃ vā aṭṭhaṃsaṃ vā bandhituṃ vaṭṭati. Kattaradaṇḍepi yaṃ kiñci vaṇṇamaṭṭhaṃ na vaṭṭati, heṭṭhā ekā vā dve vā vaṭṭalekhā upari ahicchattakamakuḷamattañca vaṭṭati.
13. தேலபா⁴ஜனேஸு விஸாணே வா நாளியங் வா அலாபு³கே வா ஆமண்ட³ஸாரகே வா ட²பெத்வா இத்தி²ரூபங் புரிஸரூபஞ்ச அவஸேஸங் ஸப்³ப³ம்பி வண்ணமட்ட²கம்மங் வட்டதி. மஞ்சபீடே² பி⁴ஸிபி³ம்போ³ஹனே பூ⁴மத்த²ரணே பாத³புஞ்ச²னே சங்கமனபி⁴ஸியா ஸம்முஞ்ஜனியங் கசவரச²ட்³ட³னகே ரஜனதோ³ணிகாய பானீயஉளுங்கே பானீயக⁴டே பாத³கத²லிகாய ப²லகபீட²கே வலயாதா⁴ரகே த³ண்டா³தா⁴ரகே பத்தபிதா⁴னே தாலவண்டே பீ³ஜனேதி ஏதேஸு ஸப்³ப³ங் மாலாகம்மாதி³ வண்ணமட்ட²கம்மங் வட்டதி.
13. Telabhājanesu visāṇe vā nāḷiyaṃ vā alābuke vā āmaṇḍasārake vā ṭhapetvā itthirūpaṃ purisarūpañca avasesaṃ sabbampi vaṇṇamaṭṭhakammaṃ vaṭṭati. Mañcapīṭhe bhisibimbohane bhūmattharaṇe pādapuñchane caṅkamanabhisiyā sammuñjaniyaṃ kacavarachaḍḍanake rajanadoṇikāya pānīyauḷuṅke pānīyaghaṭe pādakathalikāya phalakapīṭhake valayādhārake daṇḍādhārake pattapidhāne tālavaṇṭe bījaneti etesu sabbaṃ mālākammādi vaṇṇamaṭṭhakammaṃ vaṭṭati.
14. ஸேனாஸனே பன த்³வாரகவாடவாதபானகவாடாதீ³ஸு ஸப்³ப³ரதனமயம்பி வண்ணமட்ட²கம்மங் வட்டதி. ஸேனாஸனே கிஞ்சி படிஸேதே⁴தப்³ப³ங் நத்தி² அஞ்ஞத்ர விருத்³த⁴ஸேனாஸனா . விருத்³த⁴ஸேனாஸனங் நாம அஞ்ஞேஸங் ஸீமாய ராஜவல்லபே⁴ஹி கதஸேனாஸனங் வுச்சதி. தஸ்மா யே தாதி³ஸங் ஸேனாஸனங் கரொந்தி, தே வத்தப்³பா³ ‘‘மா அம்ஹாகங் ஸீமாய ஸேனாஸனங் கரோதா²’’தி. அனாதி³யித்வா கரொந்தியேவ, புனபி வத்தப்³பா³ ‘‘மா ஏவங் அகத்த², மா அம்ஹாகங் உபோஸத²பவாரணானங் அந்தராயமகத்த², மா ஸாமக்³கி³ங் பி⁴ந்தி³த்த², தும்ஹாகங் ஸேனாஸனங் கதம்பி கதட்டா²னே ந ட²ஸ்ஸதீ’’தி. ஸசே ப³லக்காரேன கரொந்தியேவ, யதா³ தேஸங் லஜ்ஜிபரிஸா உஸ்ஸன்னா ஹோதி, ஸக்கா ச ஹோதி லத்³து⁴ங் த⁴ம்மிகோ வினிச்ச²யோ, ததா³ தேஸங் பேஸேதப்³ப³ங் ‘‘தும்ஹாகங் ஆவாஸங் ஹரதா²’’தி. ஸசே யாவததியங் பேஸிதே ஹரந்தி, ஸாது⁴. நோ சே ஹரந்தி, ட²பெத்வா போ³தி⁴ஞ்ச சேதியஞ்ச அவஸேஸஸேனாஸனானி பி⁴ந்தி³தப்³பா³னி, நோ ச கோ² அபரிபோ⁴க³ங் கரொந்தேஹி, படிபாடியா பன ச²த³னகோ³பானஸீஇட்ட²காதீ³னி அபனெத்வா தேஸங் பேஸேதப்³ப³ங் ‘‘தும்ஹாகங் த³ப்³ப³ஸம்பா⁴ரே ஹரதா²’’தி. ஸசே ஹரந்தி, ஸாது⁴. நோ சே ஹரந்தி, அத² தேஸு த³ப்³ப³ஸம்பா⁴ரேஸு ஹிமவஸ்ஸவாதாதபாதீ³ஹி பூதிபூ⁴தேஸு வா சோரேஹி வா ஹடேஸு அக்³கி³னா வா த³ட்³டே⁴ஸு ஸீமஸாமிகா பி⁴க்கூ² அனுபவஜ்ஜா, ந லப்³பா⁴ சோதே³துங் ‘‘தும்ஹேஹி அம்ஹாகங் த³ப்³ப³ஸம்பா⁴ரா நாஸிதா’’தி வா ‘‘தும்ஹாகங் கீ³வா’’தி வா. யங் பன ஸீமஸாமிகேஹி பி⁴க்கூ²ஹி கதங், தங் ஸுகதமேவ ஹோதி. யோபி பி⁴க்கு² ப³ஹுஸ்ஸுதோ வினயஞ்ஞூ அஞ்ஞங் பி⁴க்கு²ங் அகப்பியபரிக்கா²ரங் க³ஹெத்வா விசரந்தங் தி³ஸ்வா சி²ந்தா³பெய்ய வா பி⁴ந்தா³பெய்ய வா, அனுபவஜ்ஜோ, ஸோ நேவ சோதே³தப்³போ³ ந ஸாரேதப்³போ³, ந தங் லப்³பா⁴ வத்துங் ‘‘அயங் நாம மம பரிக்கா²ரோ தயா நாஸிதோ, தங் மே தே³ஹீ’’தி.
14. Senāsane pana dvārakavāṭavātapānakavāṭādīsu sabbaratanamayampi vaṇṇamaṭṭhakammaṃ vaṭṭati. Senāsane kiñci paṭisedhetabbaṃ natthi aññatra viruddhasenāsanā . Viruddhasenāsanaṃ nāma aññesaṃ sīmāya rājavallabhehi katasenāsanaṃ vuccati. Tasmā ye tādisaṃ senāsanaṃ karonti, te vattabbā ‘‘mā amhākaṃ sīmāya senāsanaṃ karothā’’ti. Anādiyitvā karontiyeva, punapi vattabbā ‘‘mā evaṃ akattha, mā amhākaṃ uposathapavāraṇānaṃ antarāyamakattha, mā sāmaggiṃ bhindittha, tumhākaṃ senāsanaṃ katampi kataṭṭhāne na ṭhassatī’’ti. Sace balakkārena karontiyeva, yadā tesaṃ lajjiparisā ussannā hoti, sakkā ca hoti laddhuṃ dhammiko vinicchayo, tadā tesaṃ pesetabbaṃ ‘‘tumhākaṃ āvāsaṃ harathā’’ti. Sace yāvatatiyaṃ pesite haranti, sādhu. No ce haranti, ṭhapetvā bodhiñca cetiyañca avasesasenāsanāni bhinditabbāni, no ca kho aparibhogaṃ karontehi, paṭipāṭiyā pana chadanagopānasīiṭṭhakādīni apanetvā tesaṃ pesetabbaṃ ‘‘tumhākaṃ dabbasambhāre harathā’’ti. Sace haranti, sādhu. No ce haranti, atha tesu dabbasambhāresu himavassavātātapādīhi pūtibhūtesu vā corehi vā haṭesu agginā vā daḍḍhesu sīmasāmikā bhikkhū anupavajjā, na labbhā codetuṃ ‘‘tumhehi amhākaṃ dabbasambhārā nāsitā’’ti vā ‘‘tumhākaṃ gīvā’’ti vā. Yaṃ pana sīmasāmikehi bhikkhūhi kataṃ, taṃ sukatameva hoti. Yopi bhikkhu bahussuto vinayaññū aññaṃ bhikkhuṃ akappiyaparikkhāraṃ gahetvā vicarantaṃ disvā chindāpeyya vā bhindāpeyya vā, anupavajjo, so neva codetabbo na sāretabbo, na taṃ labbhā vattuṃ ‘‘ayaṃ nāma mama parikkhāro tayā nāsito, taṃ me dehī’’ti.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
பரிக்கா²ரவினிச்ச²யகதா² ஸமத்தா.
Parikkhāravinicchayakathā samattā.
