| Library / Tipiṭaka / তিপিটক • Tipiṭaka / ৰিনযালঙ্কার-টীকা • Vinayālaṅkāra-ṭīkā |
২. পরিক্খারৰিনিচ্ছযকথা
2. Parikkhāravinicchayakathā
৬. এৰং দিৰাসেয্যৰিনিচ্ছযং কথেত্ৰা ইদানি পরিক্খারৰিনিচ্ছযং কথেতুং ‘‘পরিক্খারোতি সমণপরিক্খারো’’তিআদিমাহ। তত্থ দিৰাসেয্যৰিনিচ্ছযকথায আদিম্হি ৰুত্তং ‘‘তত্থা’’তি পদং আনেত্ৰা তত্থ তেসু মাতিকাপদেসু সমভিনিৰিট্ঠস্স ‘‘পরিক্খারো’’তি পদস্স ‘‘সমণপরিক্খারো’’তি অত্থো দট্ঠব্বোতি যোজনা, এস নযো ইতো পরেপি। সমণপরিক্খারো ৰুত্তো, ন গিহিপরিক্খারোতি অধিপ্পাযো। পরিসমন্ততো করিযতেতি পরিক্খারো, ছত্তাদিকো। তত্রাতি সমণপরিক্খারে। কপ্পতীতি কপ্পিযো, ন কপ্পিযো অকপ্পিযো, কপ্পিযো চ অকপ্পিযো চ কপ্পিযাকপ্পিযো, সমাহারদ্ৰন্দেপি পুল্লিঙ্গমিচ্ছন্তি পণ্ডিতা। কপ্পিযাকপ্পিযো চ সো পরিক্খারো চেতি তথা, তস্স ৰিনিচ্ছযো কপ্পিযাকপ্পিযপরিক্খারৰিনিচ্ছযো।
6. Evaṃ divāseyyavinicchayaṃ kathetvā idāni parikkhāravinicchayaṃ kathetuṃ ‘‘parikkhāroti samaṇaparikkhāro’’tiādimāha. Tattha divāseyyavinicchayakathāya ādimhi vuttaṃ ‘‘tatthā’’ti padaṃ ānetvā tattha tesu mātikāpadesu samabhiniviṭṭhassa ‘‘parikkhāro’’ti padassa ‘‘samaṇaparikkhāro’’ti attho daṭṭhabboti yojanā, esa nayo ito parepi. Samaṇaparikkhāro vutto, na gihiparikkhāroti adhippāyo. Parisamantato kariyateti parikkhāro, chattādiko. Tatrāti samaṇaparikkhāre. Kappatīti kappiyo, na kappiyo akappiyo, kappiyo ca akappiyo ca kappiyākappiyo, samāhāradvandepi pulliṅgamicchanti paṇḍitā. Kappiyākappiyo ca so parikkhāro ceti tathā, tassa vinicchayo kappiyākappiyaparikkhāravinicchayo.
কেচি তালপণ্ণচ্ছত্তন্তি ইদং উপলক্খণমত্তং। সব্বম্পি হি ছত্তং তথাকরিযমানং ন ৰট্টতি। তেনেৰাহ ৰজিরবুদ্ধিটীকাযং (ৰজির॰ টী॰ পারাজিক ৮৫) ‘‘সব্বপরিক্খারেসু ৰণ্ণমট্ঠৰিকারং করোন্তস্স দুক্কটন্তি দীপেন্তেন ন ৰট্টতীতি ৰুত্তন্তি ৰেদিতব্ব’’ন্তি। ন ৰণ্ণমট্ঠত্থাযাতি ইমিনা থিরকরণত্থং একৰণ্ণসুত্তেন ৰিনন্ধিযমানং যদি ৰণ্ণমট্ঠং হোতি, তত্থ ন দোসোতি দস্সেতি। আরগ্গেনাতি নিখাদনমুখেন। যদি ন ৰট্টতি, তাদিসং ছত্তদণ্ডং লভিত্ৰা কিং কাতব্বন্তি আহ ‘‘ঘটকং ৰা’’তিআদি। সুত্তকেন ৰা দণ্ডো ৰেঠেতব্বোতি যথা লেখা ন পঞ্ঞাযতি, তথা ৰেঠেতব্বো। দণ্ডবুন্দেতি দণ্ডমূলে, ছত্তদণ্ডস্স হেট্ঠিমকোটিযন্তি অত্থো। ছত্তমণ্ডলিকন্তি ছত্তস্স অন্তো খুদ্দকমণ্ডলং, ছত্তপঞ্জরে মণ্ডলাকারেন বদ্ধদণ্ডৰলযং ৰা। উক্কিরিত্ৰাতি নিন্নং, উন্নতং ৰা কত্ৰা উট্ঠাপেত্ৰা। সা ৰট্টতীতি সা লেখা রজ্জুকেহি বন্ধন্তু ৰা মা ৰা, বন্ধিতুং যুত্তট্ঠানত্তা ৰট্টতি। তেন ৰুত্তং আচরিযবুদ্ধদত্তমহাথেরেন –
Keci tālapaṇṇacchattanti idaṃ upalakkhaṇamattaṃ. Sabbampi hi chattaṃ tathākariyamānaṃ na vaṭṭati. Tenevāha vajirabuddhiṭīkāyaṃ (vajira. ṭī. pārājika 85) ‘‘sabbaparikkhāresu vaṇṇamaṭṭhavikāraṃ karontassa dukkaṭanti dīpentena na vaṭṭatīti vuttanti veditabba’’nti. Na vaṇṇamaṭṭhatthāyāti iminā thirakaraṇatthaṃ ekavaṇṇasuttena vinandhiyamānaṃ yadi vaṇṇamaṭṭhaṃ hoti, tattha na dosoti dasseti. Āraggenāti nikhādanamukhena. Yadi na vaṭṭati, tādisaṃ chattadaṇḍaṃ labhitvā kiṃ kātabbanti āha ‘‘ghaṭakaṃ vā’’tiādi. Suttakena vā daṇḍo veṭhetabboti yathā lekhā na paññāyati, tathā veṭhetabbo. Daṇḍabundeti daṇḍamūle, chattadaṇḍassa heṭṭhimakoṭiyanti attho. Chattamaṇḍalikanti chattassa anto khuddakamaṇḍalaṃ, chattapañjare maṇḍalākārena baddhadaṇḍavalayaṃ vā. Ukkiritvāti ninnaṃ, unnataṃ vā katvā uṭṭhāpetvā. Sā vaṭṭatīti sā lekhā rajjukehi bandhantu vā mā vā, bandhituṃ yuttaṭṭhānattā vaṭṭati. Tena vuttaṃ ācariyabuddhadattamahātherena –
‘‘ছত্তং পণ্ণমযং কিঞ্চি, বহি অন্তো চ সব্বসো।
‘‘Chattaṃ paṇṇamayaṃ kiñci, bahi anto ca sabbaso;
পঞ্চৰণ্ণেন সুত্তেন, সিব্বিতুং ন চ ৰট্টতি॥
Pañcavaṇṇena suttena, sibbituṃ na ca vaṭṭati.
‘‘ছিন্দিতুং অড্ঢচন্দং ৰা, পণ্ণে মকরদন্তকং।
‘‘Chindituṃ aḍḍhacandaṃ vā, paṇṇe makaradantakaṃ;
ঘটকং ৰাল়রূপং ৰা, লেখা দণ্ডে ন ৰট্টতি॥
Ghaṭakaṃ vāḷarūpaṃ vā, lekhā daṇḍe na vaṭṭati.
‘‘সিব্বিতুং একৰণ্ণেন, ছত্তং সুত্তেন ৰট্টতি।
‘‘Sibbituṃ ekavaṇṇena, chattaṃ suttena vaṭṭati;
থিরত্থং পঞ্চৰণ্ণেন, পঞ্জরং ৰা ৰিনন্ধিতুং॥
Thiratthaṃ pañcavaṇṇena, pañjaraṃ vā vinandhituṃ.
‘‘ঘটকং ৰাল়রূপং ৰা, লেখা ৰা পন কেৰলা।
‘‘Ghaṭakaṃ vāḷarūpaṃ vā, lekhā vā pana kevalā;
ছিন্দিত্ৰা ৰাপি ঘংসিত্ৰা, ধারেতুং পন ৰট্টতি॥
Chinditvā vāpi ghaṃsitvā, dhāretuṃ pana vaṭṭati.
‘‘অহিচ্ছত্তকসণ্ঠানং , দণ্ডবুন্দম্হি ৰট্টতি।
‘‘Ahicchattakasaṇṭhānaṃ , daṇḍabundamhi vaṭṭati;
উক্কিরিত্ৰা কতা লেখা, বন্ধনত্থায ৰট্টতী’’তি॥
Ukkiritvā katā lekhā, bandhanatthāya vaṭṭatī’’ti.
তস্স ৰণ্ণনাযম্পি ছত্তং পণ্ণমযং কিঞ্চীতি তালপণ্ণাদিপণ্ণচ্ছদনং যং কিঞ্চি ছত্তং। বহীতি উপরি। অন্তোতি হেট্ঠা। সিব্বিতুন্তি রূপং দস্সেত্ৰা সূচিকম্মং কাতুং। পণ্ণেতি ছদনপণ্ণে। অড্ঢচন্দন্তি অড্ঢচন্দাকারং। মকরদন্তকন্তি মকরদন্তাকারং, যং ‘‘গিরিকূট’’ন্তি ৰুচ্চতি। ছিন্দিতুং ন ৰট্টতীতি সম্বন্ধো। মুখৰট্টিযা নামেত্ৰা বদ্ধপণ্ণকোটিযা ৰা মত্থকমণ্ডলকোটিযা ৰা গিরিকূটাদিং করোন্তি, ইমিনা তং পটিক্খিত্তং। দণ্ডেতি ছত্তদণ্ডে। ঘটকন্তি ঘটাকারো। ৰাল়রূপং ৰাতি ব্যগ্ঘাদিৰাল়ানং রূপকং ৰা। লেখাতি উক্কিরিত্ৰা ৰা ছিন্দিত্ৰা ৰা চিত্তকম্মৰসেন ৰা কতরাজি। পঞ্চৰণ্ণানং সুত্তানং অন্তরে নীলাদিএকৰণ্ণেন সুত্তেন থিরত্থং ছত্তং অন্তো চ বহি চ সিব্বিতুং ৰা ছত্তদণ্ডগ্গাহকসলাকপঞ্জরং থিরত্থং ৰিনন্ধিতুং ৰা ৰট্টতীতি যোজনা। পঞ্চৰণ্ণানং একৰণ্ণেন থিরত্থন্তি ইমিনা অনেকৰণ্ণেহি সুত্তেহি ৰণ্ণমট্ঠত্থায সিব্বিতুঞ্চ ৰিনন্ধিতুঞ্চ ন ৰট্টতীতি দীপেতি। পোত্থকেসু পন ‘‘পঞ্চৰণ্ণেনা’’তি পাঠো দিস্সতি, তস্স একৰণ্ণেন পঞ্চৰণ্ণেন ৰা সুত্তেন থিরত্থং সিব্বিতুং ৰিনন্ধিতুং ৰা ৰট্টতীতি যোজনা কাতব্বা হোতি।
Tassa vaṇṇanāyampi chattaṃ paṇṇamayaṃ kiñcīti tālapaṇṇādipaṇṇacchadanaṃ yaṃ kiñci chattaṃ. Bahīti upari. Antoti heṭṭhā. Sibbitunti rūpaṃ dassetvā sūcikammaṃ kātuṃ. Paṇṇeti chadanapaṇṇe. Aḍḍhacandanti aḍḍhacandākāraṃ. Makaradantakanti makaradantākāraṃ, yaṃ ‘‘girikūṭa’’nti vuccati. Chindituṃ na vaṭṭatīti sambandho. Mukhavaṭṭiyā nāmetvā baddhapaṇṇakoṭiyā vā matthakamaṇḍalakoṭiyā vā girikūṭādiṃ karonti, iminā taṃ paṭikkhittaṃ. Daṇḍeti chattadaṇḍe. Ghaṭakanti ghaṭākāro. Vāḷarūpaṃ vāti byagghādivāḷānaṃ rūpakaṃ vā. Lekhāti ukkiritvā vā chinditvā vā cittakammavasena vā katarāji. Pañcavaṇṇānaṃ suttānaṃ antare nīlādiekavaṇṇena suttena thiratthaṃ chattaṃ anto ca bahi ca sibbituṃ vā chattadaṇḍaggāhakasalākapañjaraṃ thiratthaṃ vinandhituṃ vā vaṭṭatīti yojanā. Pañcavaṇṇānaṃ ekavaṇṇena thiratthanti iminā anekavaṇṇehi suttehi vaṇṇamaṭṭhatthāya sibbituñca vinandhituñca na vaṭṭatīti dīpeti. Potthakesu pana ‘‘pañcavaṇṇenā’’ti pāṭho dissati, tassa ekavaṇṇena pañcavaṇṇena vā suttena thiratthaṃ sibbituṃ vinandhituṃ vā vaṭṭatīti yojanā kātabbā hoti.
এত্থ চ হেট্ঠা ৰুত্তেন ‘‘পঞ্চৰণ্ণেন সুত্তেন সিব্বিতুং ন চ ৰট্টতী’’তি পাঠেন চ ‘‘কেচি তালপণ্ণচ্ছত্তং অন্তো ৰা বহি ৰা পঞ্চৰণ্ণেন সুত্তেন সিব্বেত্ৰা ৰণ্ণমট্ঠং করোন্তি, তং ন ৰট্টতি, একৰণ্ণে পন নীলেন ৰা পীতকেন ৰা যেন কেনচি সুত্তেন অন্তো ৰা বহি ৰা সিব্বিতুং, ছত্তদণ্ডগ্গাহকং সলাকপঞ্জরং ৰা ৰিনন্ধিতুং ৰট্টতি, তঞ্চ খো থিরকরণত্থং, ন ৰণ্ণমট্ঠত্থাযা’’তি অট্ঠকথাপাঠেন চ ৰিরুজ্ঝতি, তস্মা সো ন গহেতব্বো।
Ettha ca heṭṭhā vuttena ‘‘pañcavaṇṇena suttena sibbituṃ na ca vaṭṭatī’’ti pāṭhena ca ‘‘keci tālapaṇṇacchattaṃ anto vā bahi vā pañcavaṇṇena suttena sibbetvā vaṇṇamaṭṭhaṃ karonti, taṃ na vaṭṭati, ekavaṇṇe pana nīlena vā pītakena vā yena kenaci suttena anto vā bahi vā sibbituṃ, chattadaṇḍaggāhakaṃ salākapañjaraṃ vā vinandhituṃ vaṭṭati, tañca kho thirakaraṇatthaṃ, na vaṇṇamaṭṭhatthāyā’’ti aṭṭhakathāpāṭhena ca virujjhati, tasmā so na gahetabbo.
লেখা ৰা পন কেৰলাতি যথাৰুত্তপ্পকারা সকলা লেখা ৰা। ছিন্দিত্ৰাতি উক্কিরিত্ৰা কতং ছিন্দিত্ৰা। ঘংসিত্ৰাতি চিত্তকম্মাদিৰসেন কতং ঘংসিত্ৰা। দণ্ডবুন্দম্হীতি ছত্তদণ্ডস্স পঞ্জরে গাহণত্থায ফালিতবুন্দম্হি, মূলেতি অত্থো। অযমেত্থ নিস্সন্দেহে ৰুত্তনযো। খুদ্দসিক্খাগণ্ঠিপদে পন ‘‘ছত্তপিণ্ডিযা মূলে’’তি ৰুত্তং। অহিচ্ছত্তকসণ্ঠানন্তি ফুল্লঅহিচ্ছত্তকাকারং। রজ্জুকেহি গাহাপেত্ৰা দণ্ডে বন্ধন্তি, তস্মিং বন্ধনট্ঠানে ৰলযমিৰ উক্কিরিত্ৰাতি ৰলযং ৰিয উপট্ঠাপেত্ৰা। বন্ধনত্থাযাতি ৰাতেন যথা ন চলতি, এৰং রজ্জূহি দণ্ডে পঞ্জরস্স বন্ধনত্থায। উক্কিরিত্ৰা কতা লেখা ৰট্টতীতি যোজনা। যথা ৰাতপ্পহারেন অচলনত্থং ছত্তমণ্ডলিকং রজ্জুকেহি গাহাপেত্ৰা দণ্ডে বন্ধন্তি, তস্মিং বন্ধনট্ঠানে ৰলযমিৰ উক্কিরিত্ৰা লেখং ঠপেন্তি, সা ৰট্টতীতি। সচেপি ন বন্ধতি, বন্ধনারহট্ঠানত্তা ৰলযং উক্কিরিত্ৰা ৰট্টতীতি গণ্ঠিপদে ৰত্তন্তীতি আগতং, তস্মা পক্খরণেসু আগতনযেনেৰ ছত্তে পটিপজ্জিতব্বন্তি।
Lekhāvā pana kevalāti yathāvuttappakārā sakalā lekhā vā. Chinditvāti ukkiritvā kataṃ chinditvā. Ghaṃsitvāti cittakammādivasena kataṃ ghaṃsitvā. Daṇḍabundamhīti chattadaṇḍassa pañjare gāhaṇatthāya phālitabundamhi, mūleti attho. Ayamettha nissandehe vuttanayo. Khuddasikkhāgaṇṭhipade pana ‘‘chattapiṇḍiyā mūle’’ti vuttaṃ. Ahicchattakasaṇṭhānanti phullaahicchattakākāraṃ. Rajjukehi gāhāpetvā daṇḍe bandhanti, tasmiṃ bandhanaṭṭhāne valayamiva ukkiritvāti valayaṃ viya upaṭṭhāpetvā. Bandhanatthāyāti vātena yathā na calati, evaṃ rajjūhi daṇḍe pañjarassa bandhanatthāya. Ukkiritvā katā lekhā vaṭṭatīti yojanā. Yathā vātappahārena acalanatthaṃ chattamaṇḍalikaṃ rajjukehi gāhāpetvā daṇḍe bandhanti, tasmiṃ bandhanaṭṭhāne valayamiva ukkiritvā lekhaṃ ṭhapenti, sā vaṭṭatīti. Sacepi na bandhati, bandhanārahaṭṭhānattā valayaṃ ukkiritvā vaṭṭatīti gaṇṭhipade vattantīti āgataṃ, tasmā pakkharaṇesu āgatanayeneva chatte paṭipajjitabbanti.
৭. চীৰরে পন নানাসুত্তকেহীতি (সারত্থ॰ টী॰ ২.৮৫; ৰি॰ ৰি॰ টী॰ ১.৮৫) নানাৰণ্ণেহি সুত্তেহি। ইদঞ্চ তথা করোন্তানং ৰসেন ৰুত্তং, একৰণ্ণসুত্তকেনপি ন ৰট্টতিযেৰ। ‘‘পকতিসূচিকম্মমেৰ ৰট্টতী’’তি হি ৰুত্তং। পট্টমুখেতি দ্ৰিন্নং পট্টানং সঙ্ঘটিতট্ঠানং সন্ধাযেতং ৰুত্তং। পরিযন্তেতি চীৰরপরিযন্তে। অনুৰাতং সন্ধাযেতং ৰুত্তং। ৰেণীতি ৰরকসীসাকারেন সিব্বনং। সঙ্খলিকন্তি দ্ৰিগুণসঙ্খলিকাকারেন সিব্বনং, বিল়ালসঙ্খলিকাকারেন সিব্বনং ৰা। ৰেণিং ৰা সঙ্খলিকং ৰা করোন্তীতি করণকিরিযায সম্বন্ধো। অগ্ঘিযং নাম চেতিযসণ্ঠানং , যং ‘‘অগ্ঘিযত্থম্ভো’’তি ৰদন্তি। গযা নাম মূলে তনুকং অগ্গে মহন্তং কত্ৰা গদাকারেন সিব্বনং। মুগ্গরো নাম মূলে চ অগ্গে চ একসদিসং কত্ৰা মুগ্গরাকারেন সিব্বনং। কক্কটক্খীনি উক্কিরন্তীতি গণ্ঠিকপট্টপাসকপট্টানং অন্তে পাল়িবদ্ধং কত্ৰা কক্কটকানং অক্খিসণ্ঠানং পট্ঠপেন্তি, করোন্তীতি অত্থো। ‘‘কোণসুত্তপিল়কাতি গণ্ঠিকপাসকপট্টানং কোণেহি নীহটসুত্তানং কোটিযো’’তি তীসুপি গণ্ঠিপদেসু ৰুত্তং। কথং পন তা পিল়কা দুৰিঞ্ঞেয্যরূপা কাতব্বাতি? কোণেহি নীহটসুত্তানং অন্তেসু একৰারং গণ্ঠিককরণেন ৰা পুন নিৰত্তেত্ৰা সিব্বনেন ৰা দুৰিঞ্ঞেয্যসভাৰং কত্ৰা সুত্তকোটিযো রস্সং কত্ৰা ছিন্দিতব্বা। ধম্মসিরিত্থেরেন পন ‘‘কোণসুত্তা চ পিল়কা, দুৰিঞ্ঞেয্যাৰ কপ্পরে’’তি ৰুত্তং, তথা আচরিযবুদ্ধদত্তত্থেরেনপি ‘‘সুত্তা চ পিল়কা তত্থ, দুৰিঞ্ঞেয্যাৰ দীপিতা’’তি ৰুত্তং, তস্মা তেসং মতেন কোণসুত্তা চ পিল়কা চ কোণসুত্তপিল়কাতি এৰমেত্থ অত্থো দট্ঠব্বো।
7. Cīvare pana nānāsuttakehīti (sārattha. ṭī. 2.85; vi. vi. ṭī. 1.85) nānāvaṇṇehi suttehi. Idañca tathā karontānaṃ vasena vuttaṃ, ekavaṇṇasuttakenapi na vaṭṭatiyeva. ‘‘Pakatisūcikammameva vaṭṭatī’’ti hi vuttaṃ. Paṭṭamukheti dvinnaṃ paṭṭānaṃ saṅghaṭitaṭṭhānaṃ sandhāyetaṃ vuttaṃ. Pariyanteti cīvarapariyante. Anuvātaṃ sandhāyetaṃ vuttaṃ. Veṇīti varakasīsākārena sibbanaṃ. Saṅkhalikanti dviguṇasaṅkhalikākārena sibbanaṃ, biḷālasaṅkhalikākārena sibbanaṃ vā. Veṇiṃ vā saṅkhalikaṃ vā karontīti karaṇakiriyāya sambandho. Agghiyaṃ nāma cetiyasaṇṭhānaṃ , yaṃ ‘‘agghiyatthambho’’ti vadanti. Gayā nāma mūle tanukaṃ agge mahantaṃ katvā gadākārena sibbanaṃ. Muggaro nāma mūle ca agge ca ekasadisaṃ katvā muggarākārena sibbanaṃ. Kakkaṭakkhīni ukkirantīti gaṇṭhikapaṭṭapāsakapaṭṭānaṃ ante pāḷibaddhaṃ katvā kakkaṭakānaṃ akkhisaṇṭhānaṃ paṭṭhapenti, karontīti attho. ‘‘Koṇasuttapiḷakāti gaṇṭhikapāsakapaṭṭānaṃ koṇehi nīhaṭasuttānaṃ koṭiyo’’ti tīsupi gaṇṭhipadesu vuttaṃ. Kathaṃ pana tā piḷakā duviññeyyarūpā kātabbāti? Koṇehi nīhaṭasuttānaṃ antesu ekavāraṃ gaṇṭhikakaraṇena vā puna nivattetvā sibbanena vā duviññeyyasabhāvaṃ katvā suttakoṭiyo rassaṃ katvā chinditabbā. Dhammasirittherena pana ‘‘koṇasuttā ca piḷakā, duviññeyyāva kappare’’ti vuttaṃ, tathā ācariyabuddhadattattherenapi ‘‘suttā ca piḷakā tattha, duviññeyyāva dīpitā’’ti vuttaṃ, tasmā tesaṃ matena koṇasuttā ca piḷakā ca koṇasuttapiḷakāti evamettha attho daṭṭhabbo.
ৰিমতিৰিনোদনিযম্পি (ৰি॰ ৰি॰ টী॰ ১.৮৫) কোণসুত্তপিল়কাতি গণ্ঠিকপাসকপট্টানং কোণেহি বহি নিগ্গতসুত্তানং পিল়কাকারেন ঠপিতকোটিযোতি কেচি ৰদন্তি, তে পিল়কে ছিন্দিত্ৰা দুৰিঞ্ঞেয্যা কাতব্বাতি তেসং অধিপ্পাযো। কেচি পন ‘‘কোণসুত্তা চ পিল়কা চাতি দ্ৰেযেৰা’’তি ৰদন্তি, তেসং মতেন গণ্ঠিকপাসকপট্টানং কোণতো কোণং নীহটসুত্তা কোণসুত্তা নাম। সমন্ততো পন পরিযন্তেন গতা চতুরস্সসুত্তা পিল়কা নাম। তং দুৰিধম্পি কেচি চীৰরতো ৰিসুং পঞ্ঞানত্থায ৰিকারযুত্তং করোন্তি, তং নিসেধায ‘‘দুৰিঞ্ঞেয্যরূপা ৰট্টতী’’তি ৰুত্তং, ন পন সব্বথা অচক্খুগোচরভাৰেন সিব্বনত্থায তথাসিব্বনস্স অসক্কুণেয্যত্তা, যথা পকতিচীৰরতো ৰিকারো ন পঞ্ঞাযতি, এৰং সিব্বিতব্বন্তি অধিপ্পাযো। রজনকম্মতো পুব্বে পঞ্ঞাযমানোপি ৰিসেসো চীৰরে রত্তে একৰণ্ণতো ন পঞ্ঞাযতীতি আহ ‘‘চীৰরে রত্তে’’তি।
Vimativinodaniyampi (vi. vi. ṭī. 1.85) koṇasuttapiḷakāti gaṇṭhikapāsakapaṭṭānaṃ koṇehi bahi niggatasuttānaṃ piḷakākārena ṭhapitakoṭiyoti keci vadanti, te piḷake chinditvā duviññeyyā kātabbāti tesaṃ adhippāyo. Keci pana ‘‘koṇasuttā ca piḷakā cāti dveyevā’’ti vadanti, tesaṃ matena gaṇṭhikapāsakapaṭṭānaṃ koṇato koṇaṃ nīhaṭasuttā koṇasuttā nāma. Samantato pana pariyantena gatā caturassasuttā piḷakā nāma. Taṃ duvidhampi keci cīvarato visuṃ paññānatthāya vikārayuttaṃ karonti, taṃ nisedhāya ‘‘duviññeyyarūpā vaṭṭatī’’ti vuttaṃ, na pana sabbathā acakkhugocarabhāvena sibbanatthāya tathāsibbanassa asakkuṇeyyattā, yathā pakaticīvarato vikāro na paññāyati, evaṃ sibbitabbanti adhippāyo. Rajanakammato pubbe paññāyamānopi viseso cīvare ratte ekavaṇṇato na paññāyatīti āha ‘‘cīvare ratte’’ti.
৮. মণিনাতি নীলমণিআদিপাসাণেন, অংসবদ্ধককাযবন্ধনাদিকং অচীৰরত্তা সঙ্খাদীহি ঘংসিতুং ৰট্টতীতি ৰদন্তি। কণ্ণসুত্তকন্তি চীৰরস্স দীঘতো তিরিযঞ্চ সিব্বিতানং চতূসু কণ্ণেসু কোণেসু চ নিক্খন্তানং সুত্তসীসানমেতং নামং, তং ছিন্দিত্ৰাৰ পারুপিতব্বং। তেনাহ ‘‘রজিতকালে ছিন্দিতব্ব’’ন্তি। ভগৰতা অনুঞ্ঞাতং একং কণ্ণসুত্তম্পি অত্থি, তং পন নামেন সদিসম্পি ইতো অঞ্ঞমেৰাতি দস্সেতুং ‘‘যং পনা’’তিআদি ৰুত্তং। লগ্গনত্থাযাতি চীৰররজ্জুযং চীৰরবন্ধনত্থায। ৰিমতিৰিনোদনিযং (ৰি॰ ৰি॰ টী॰ ১.৮৫) এত্তকমেৰ ৰুত্তং।
8.Maṇināti nīlamaṇiādipāsāṇena, aṃsabaddhakakāyabandhanādikaṃ acīvarattā saṅkhādīhi ghaṃsituṃ vaṭṭatīti vadanti. Kaṇṇasuttakanti cīvarassa dīghato tiriyañca sibbitānaṃ catūsu kaṇṇesu koṇesu ca nikkhantānaṃ suttasīsānametaṃ nāmaṃ, taṃ chinditvāva pārupitabbaṃ. Tenāha ‘‘rajitakāle chinditabba’’nti. Bhagavatā anuññātaṃ ekaṃ kaṇṇasuttampi atthi, taṃ pana nāmena sadisampi ito aññamevāti dassetuṃ ‘‘yaṃ panā’’tiādi vuttaṃ. Lagganatthāyāti cīvararajjuyaṃ cīvarabandhanatthāya. Vimativinodaniyaṃ (vi. vi. ṭī. 1.85) ettakameva vuttaṃ.
সারত্থদীপনিযং (সারত্থ॰ টী॰ ২.৮৫) পন ‘‘পাসকং কত্ৰা বন্ধিতব্বন্তি রজনকালে বন্ধিতব্বং, সেসকালে মোচেত্ৰা ঠপেতব্ব’’ন্তি ৰুত্তং। ৰিনযসঙ্গহপ্পকরণস্স পোরাণটীকাযম্পি ইদমেৰ গহেত্ৰা ৰুত্তং, তং পন চীৰরক্খন্ধকে (মহাৰ॰ ৩৪৪) ‘‘মজ্ঝেন লগ্গেন্তি, উভতো গলতি, ভগৰতো এতমত্থং আরোচেসুং। অনুজানামি, ভিক্খৰে, কণ্ণে বন্ধিতুন্তি। কণ্ণো জীরতি। ভগৰতো এতমত্থং আরোচেসুং। অনুজানামি, ভিক্খৰে, কণ্ণসুত্তক’’ন্তি এৰং অনুঞ্ঞাতচীৰররজ্জুযং রজিত্ৰা পসারিতচীৰরস্স ওলম্বকসুত্তং সন্ধায ৰুত্তন্তি দট্ঠব্বং।
Sāratthadīpaniyaṃ (sārattha. ṭī. 2.85) pana ‘‘pāsakaṃ katvā bandhitabbanti rajanakāle bandhitabbaṃ, sesakāle mocetvā ṭhapetabba’’nti vuttaṃ. Vinayasaṅgahappakaraṇassa porāṇaṭīkāyampi idameva gahetvā vuttaṃ, taṃ pana cīvarakkhandhake (mahāva. 344) ‘‘majjhena laggenti, ubhato galati, bhagavato etamatthaṃ ārocesuṃ. Anujānāmi, bhikkhave, kaṇṇe bandhitunti. Kaṇṇo jīrati. Bhagavato etamatthaṃ ārocesuṃ. Anujānāmi, bhikkhave, kaṇṇasuttaka’’nti evaṃ anuññātacīvararajjuyaṃ rajitvā pasāritacīvarassa olambakasuttaṃ sandhāya vuttanti daṭṭhabbaṃ.
গণ্ঠিকেতি চীৰরপারুপনকালে পাসকে লগ্গাপনত্থং কতে দন্তাদিমযে গণ্ঠিকে। পিল়কাতি বিন্দুং বিন্দুং কত্ৰা উট্ঠাপেতব্বপিল়কা। ৰুত্তঞ্হেতং ৰিনযৰিনিচ্ছযপ্পকরণে –
Gaṇṭhiketi cīvarapārupanakāle pāsake laggāpanatthaṃ kate dantādimaye gaṇṭhike. Piḷakāti binduṃ binduṃ katvā uṭṭhāpetabbapiḷakā. Vuttañhetaṃ vinayavinicchayappakaraṇe –
‘‘নানাৰণ্ণেহি সুত্তেহি, মণ্ডনত্থায চীৰরং।
‘‘Nānāvaṇṇehi suttehi, maṇḍanatthāya cīvaraṃ;
সমং সতপদাদীনং, সিব্বিতুং ন চ ৰট্টতি॥
Samaṃ satapadādīnaṃ, sibbituṃ na ca vaṭṭati.
‘‘পত্তস্স পরিযন্তে ৰা, তথা পত্তমুখেপি চ।
‘‘Pattassa pariyante vā, tathā pattamukhepi ca;
ৰেণিং সঙ্খলিকং ৰাপি, করোতো হোতি দুক্কটং॥
Veṇiṃ saṅkhalikaṃ vāpi, karoto hoti dukkaṭaṃ.
‘‘পট্টম্পি গণ্ঠিপাসানং, অট্ঠকোণাদিকং ৰিধিং।
‘‘Paṭṭampi gaṇṭhipāsānaṃ, aṭṭhakoṇādikaṃ vidhiṃ;
তত্থগ্ঘিযগদারূপং, মুগ্গরাদিং করোন্তি চ॥
Tatthagghiyagadārūpaṃ, muggarādiṃ karonti ca.
‘‘তত্থ কক্কটকক্খীনি, উট্ঠাপেন্তি ন ৰট্টতি।
‘‘Tattha kakkaṭakakkhīni, uṭṭhāpenti na vaṭṭati;
সুত্তা চ পিল়কা তত্থ, দুৰিঞ্ঞেয্যাৰ দীপিতা॥
Suttā ca piḷakā tattha, duviññeyyāva dīpitā.
‘‘চতুকোণাৰ ৰট্টন্তি, গণ্ঠিপাসকপট্টকা।
‘‘Catukoṇāva vaṭṭanti, gaṇṭhipāsakapaṭṭakā;
কণ্ণকোণেসু সুত্তানি, রত্তে ছিন্দেয্য চীৰরে॥
Kaṇṇakoṇesu suttāni, ratte chindeyya cīvare.
‘‘সূচিকম্মৰিকারং ৰা, অঞ্ঞং ৰা পন কিঞ্চিপি।
‘‘Sūcikammavikāraṃ vā, aññaṃ vā pana kiñcipi;
চীৰরে ভিক্খুনা কাতুং, কারাপেতুং ন ৰট্টতি॥
Cīvare bhikkhunā kātuṃ, kārāpetuṃ na vaṭṭati.
‘‘যো চ পক্খিপতি ভিক্খু চীৰরং,
‘‘Yo ca pakkhipati bhikkhu cīvaraṃ,
কঞ্জিপিট্ঠখলিঅল্লিকাদিসু।
Kañjipiṭṭhakhaliallikādisu;
ৰণ্ণমট্ঠমভিপত্থযং পরং।
Vaṇṇamaṭṭhamabhipatthayaṃ paraṃ;
তস্স নত্থি পন মুত্তি দুক্কটা॥
Tassa natthi pana mutti dukkaṭā.
‘‘সূচিহত্থমলাদীনং, করণে চীৰরস্স চ।
‘‘Sūcihatthamalādīnaṃ, karaṇe cīvarassa ca;
তথা কিলিট্ঠকালে চ, ধোৰনত্থং তু ৰট্টতি॥
Tathā kiliṭṭhakāle ca, dhovanatthaṃ tu vaṭṭati.
‘‘রজনে পন গন্ধং ৰা, তেলং ৰা লাখমেৰ ৰা।
‘‘Rajane pana gandhaṃ vā, telaṃ vā lākhameva vā;
কিঞ্চি পক্খিপিতুং তত্থ, ভিক্খুনো ন চ ৰট্টতি॥
Kiñci pakkhipituṃ tattha, bhikkhuno na ca vaṭṭati.
‘‘সঙ্খেন মণিনা ৰাপি, অঞ্ঞেনপি চ কেনচি।
‘‘Saṅkhena maṇinā vāpi, aññenapi ca kenaci;
চীৰরং ন চ ঘট্টেয্য, ঘংসিতব্বং ন দোণিযা॥
Cīvaraṃ na ca ghaṭṭeyya, ghaṃsitabbaṃ na doṇiyā.
‘‘চীৰরং দোণিযং কত্ৰা, নাতিঘট্টেয্য মুট্ঠিনা।
‘‘Cīvaraṃ doṇiyaṃ katvā, nātighaṭṭeyya muṭṭhinā;
রত্তং পহরিতুং কিঞ্চি, হত্থেহেৰ চ ৰট্টতি॥
Rattaṃ paharituṃ kiñci, hattheheva ca vaṭṭati.
‘‘গণ্ঠিকে পন লেখা ৰা, পিল়কা ৰা ন ৰট্টতি।
‘‘Gaṇṭhike pana lekhā vā, piḷakā vā na vaṭṭati;
কপ্পবিন্দুৰিকারো ৰা, পাল়িকণ্ণিকভেদতো’’তি॥
Kappabinduvikāro vā, pāḷikaṇṇikabhedato’’ti.
ৰিনযসারত্থসন্দীপনিযম্পি সমং সতপদাদীনন্তি সতপদাদীহি সদিসং। তুল্যত্থে করণৰচনপ্পসঙ্গে সামিৰচনং। পট্টস্স পরিযন্তে ৰাতি অনুৰাতস্স উভযপরিযন্তে ৰা। পট্টমুখেপি ৰাতি দ্ৰিন্নং আযামৰিত্থারপট্টানং সঙ্ঘটিতট্ঠানে, কণ্ণেপি ৰা একস্সেৰ ৰা পট্টস্স ঊনপূরণত্থং ঘটিতট্ঠানেপি ৰা । ৰেণীতি কুদ্রূসসীসাকারেন সিব্বনং। কেচি ‘‘ৰরকসীসাকারেনা’’তি ৰদন্তি। সঙ্খলিকন্তি বিল়ালদামসদিসসিব্বনং। কেচি ‘‘সতপদিসদিস’’ন্তি ৰদন্তি।
Vinayasāratthasandīpaniyampi samaṃ satapadādīnanti satapadādīhi sadisaṃ. Tulyatthe karaṇavacanappasaṅge sāmivacanaṃ. Paṭṭassa pariyante vāti anuvātassa ubhayapariyante vā. Paṭṭamukhepi vāti dvinnaṃ āyāmavitthārapaṭṭānaṃ saṅghaṭitaṭṭhāne, kaṇṇepi vā ekasseva vā paṭṭassa ūnapūraṇatthaṃ ghaṭitaṭṭhānepi vā . Veṇīti kudrūsasīsākārena sibbanaṃ. Keci ‘‘varakasīsākārenā’’ti vadanti. Saṅkhalikanti biḷāladāmasadisasibbanaṃ. Keci ‘‘satapadisadisa’’nti vadanti.
পট্টম্পীতি পত্তম্পি। অট্ঠকোণাদিকো ৰিধি পকারো এতস্সাতি অট্ঠকোণাদিকৰিধি, তং। অট্ঠকোণাদিকন্তি ৰা গাথাবন্ধৰসেন নিগ্গহিতাগমো। ‘‘অট্ঠকোণাদিকং ৰিধি’’ন্তি এতং ‘‘পট্ট’’ন্তি এতস্স সমানাধিকরণৰিসেসনং, কিরিযাৰিসেসনং ৰা। ‘‘করোন্তী’’তি ইমিনা সম্বন্ধো। অথ ৰা পট্টন্তি এত্থ ভুম্মত্থে উপযোগৰচনং, পট্টেতি অত্থো। ইমস্মিং পক্খে অট্ঠকোণাদিকন্তি উপযোগৰচনং। ৰিধিন্তি এতস্স ৰিসেসনং। ইধ ৰক্খমানচতুকোণসণ্ঠানতো অঞ্ঞং অট্ঠকোণাদিকং নাম। তত্থাতি তস্মিং পট্টদ্ৰযে। অগ্ঘিযগদারূপন্তি অগ্ঘিযসণ্ঠানঞ্চেৰ গদাসণ্ঠানঞ্চ সিব্বনং। মুগ্গরন্তি লগুল়সণ্ঠানসিব্বনং। আদি-সদ্দেন চেতিযাদিসণ্ঠানানং গহণং।
Paṭṭampīti pattampi. Aṭṭhakoṇādiko vidhi pakāro etassāti aṭṭhakoṇādikavidhi, taṃ. Aṭṭhakoṇādikanti vā gāthābandhavasena niggahitāgamo. ‘‘Aṭṭhakoṇādikaṃ vidhi’’nti etaṃ ‘‘paṭṭa’’nti etassa samānādhikaraṇavisesanaṃ, kiriyāvisesanaṃ vā. ‘‘Karontī’’ti iminā sambandho. Atha vā paṭṭanti ettha bhummatthe upayogavacanaṃ, paṭṭeti attho. Imasmiṃ pakkhe aṭṭhakoṇādikanti upayogavacanaṃ. Vidhinti etassa visesanaṃ. Idha vakkhamānacatukoṇasaṇṭhānato aññaṃ aṭṭhakoṇādikaṃ nāma. Tatthāti tasmiṃ paṭṭadvaye. Agghiyagadārūpanti agghiyasaṇṭhānañceva gadāsaṇṭhānañca sibbanaṃ. Muggaranti laguḷasaṇṭhānasibbanaṃ. Ādi-saddena cetiyādisaṇṭhānānaṃ gahaṇaṃ.
তত্থাতি পট্টদ্ৰযে তস্মিং ঠানে। কক্কটকক্খীনীতি কুল়ীরকচ্ছিসদিসানি সিব্বনৰিকারানি। উট্ঠাপেন্তীতি করোন্তি। তত্থাতি তস্মিং গণ্ঠিকপাসকপট্টকে। সুত্তাতি কোণতো কোণং সিব্বিতসুত্তা চেৰ চতুরস্সে সিব্বিতসুত্তা চ। পিল়কাতি তেসমেৰ সুত্তানং নিৰত্তেত্ৰা সিব্বিতকোটিযো চ। দুৰিঞ্ঞেয্যাৰাতি রজনকালে দুৰিঞ্ঞেয্যরূপা অনোল়ারিকা দীপিতা ৰট্টন্তীতি। যথাহ ‘‘কোণসুত্তপিল়কা চ চীৰরে রত্তে দুৰিঞ্ঞেয্যরূপা ৰট্টন্তী’’তি (পারা॰ অট্ঠ॰ ১.৮৫)।
Tatthāti paṭṭadvaye tasmiṃ ṭhāne. Kakkaṭakakkhīnīti kuḷīrakacchisadisāni sibbanavikārāni. Uṭṭhāpentīti karonti. Tatthāti tasmiṃ gaṇṭhikapāsakapaṭṭake. Suttāti koṇato koṇaṃ sibbitasuttā ceva caturasse sibbitasuttā ca. Piḷakāti tesameva suttānaṃ nivattetvā sibbitakoṭiyo ca. Duviññeyyāvāti rajanakāle duviññeyyarūpā anoḷārikā dīpitā vaṭṭantīti. Yathāha ‘‘koṇasuttapiḷakā ca cīvare ratte duviññeyyarūpā vaṭṭantī’’ti (pārā. aṭṭha. 1.85).
গণ্ঠিকপট্টিকা পাসপট্টিকাতি যোজনা। কণ্ণকোণেসু সুত্তানীতি চীৰরকণ্ণে সুত্তা চেৰ পাসকপট্টানং কোণেসু সুত্তানি চ অচ্ছিন্দতি। এত্থ চ চীৰরে আযামতো ৰিত্থারতো চ সিব্বিত্ৰা অনুৰাততো বহি নিক্খমিতসুত্তং চীৰরং রজিত্ৰা সুক্খাপনকালে রজ্জুযা ৰা চীৰরৰংসে ৰা বন্ধিত্ৰা ওলম্বিতুং অনুৰাতে বন্ধসুত্তানি চ কণ্ণসুত্তানি নাম। যথাহ ‘‘চীৰরস্স কণ্ণসুত্তকং ন চ ৰট্টতি, রজিতকালে ছিন্দিতব্বং, যং পন ‘অনুজানামি ভিক্খৰে কণ্ণসুত্তক’ন্তি এৰং অনুঞ্ঞাতং, তং অনুৰাতে পাসকং কত্ৰা বন্ধিতব্বং রজনকালে লগ্গনত্থাযা’’তি (পারা॰ অট্ঠ॰ ১.৮৫)।
Gaṇṭhikapaṭṭikā pāsapaṭṭikāti yojanā. Kaṇṇakoṇesu suttānīti cīvarakaṇṇe suttā ceva pāsakapaṭṭānaṃ koṇesu suttāni ca acchindati. Ettha ca cīvare āyāmato vitthārato ca sibbitvā anuvātato bahi nikkhamitasuttaṃ cīvaraṃ rajitvā sukkhāpanakāle rajjuyā vā cīvaravaṃse vā bandhitvā olambituṃ anuvāte bandhasuttāni ca kaṇṇasuttāni nāma. Yathāha ‘‘cīvarassa kaṇṇasuttakaṃ na ca vaṭṭati, rajitakāle chinditabbaṃ, yaṃ pana ‘anujānāmi bhikkhave kaṇṇasuttaka’nti evaṃ anuññātaṃ, taṃ anuvāte pāsakaṃ katvā bandhitabbaṃ rajanakāle lagganatthāyā’’ti (pārā. aṭṭha. 1.85).
সূচিকম্মৰিকারং ৰাতি চীৰরমণ্ডনত্থায নানাসুত্তকেহি সতপদিসদিসং সিব্বন্তা আগন্তুকপট্টং ঠপেন্তি, এৰরূপং সূচিকম্মৰিকারং ৰা। অঞ্ঞং ৰা পন কিঞ্চিপীতি অঞ্ঞম্পি যং কিঞ্চি মালাকম্মমিগপক্খিপদাদিকং সিব্বনৰিকারং। কাতুন্তি সযং কাতুং। কারাপেতুন্তি অঞ্ঞেন ৰা কারাপেতুং।
Sūcikammavikāraṃ vāti cīvaramaṇḍanatthāya nānāsuttakehi satapadisadisaṃ sibbantā āgantukapaṭṭaṃ ṭhapenti, evarūpaṃ sūcikammavikāraṃ vā. Aññaṃ vā pana kiñcipīti aññampi yaṃ kiñci mālākammamigapakkhipadādikaṃ sibbanavikāraṃ. Kātunti sayaṃ kātuṃ. Kārāpetunti aññena vā kārāpetuṃ.
যো ভিক্খু পরং উত্তমং ৰণ্ণমট্ঠমভিপত্থযন্তো কঞ্জিকপিট্ঠখলিঅল্লিকাদীসু চীৰরং পক্খিপতি, তস্স পন ভিক্খুনো দুক্কটা মোক্খো ন ৰিজ্জতীতি যোজনা। কঞ্জিকন্তি ৰাযনতন্তমক্খনং কঞ্জিকসদিসা সুলাকঞ্জিকং। পিট্ঠন্তি তণ্ডুলপিট্ঠং। তণ্ডুলপিট্ঠেহি পক্কা খলি। অল্লিকাতি নিয্যাসো। আদি-সদ্দেন লাখাদীনং গহণং। চীৰরস্স করণে করণকালে সমুট্ঠিতানং সূচিহত্থমলাদীনং কিলিট্ঠকালে ধোৰনত্থঞ্চ কঞ্জিকপিট্ঠখলিঅল্লিকাদীসু পক্খিপতি, ৰট্টতীতি যোজনা।
Yo bhikkhu paraṃ uttamaṃ vaṇṇamaṭṭhamabhipatthayanto kañjikapiṭṭhakhaliallikādīsu cīvaraṃ pakkhipati, tassa pana bhikkhuno dukkaṭā mokkho na vijjatīti yojanā. Kañjikanti vāyanatantamakkhanaṃ kañjikasadisā sulākañjikaṃ. Piṭṭhanti taṇḍulapiṭṭhaṃ. Taṇḍulapiṭṭhehi pakkā khali. Allikāti niyyāso. Ādi-saddena lākhādīnaṃ gahaṇaṃ. Cīvarassa karaṇe karaṇakāle samuṭṭhitānaṃ sūcihatthamalādīnaṃ kiliṭṭhakāle dhovanatthañca kañjikapiṭṭhakhaliallikādīsu pakkhipati, vaṭṭatīti yojanā.
তত্থাতি যেন কসাৰেন চীৰরং রজতি, তস্মিং রজনে চীৰরস্স সুগন্ধভাৰত্থায গন্ধং ৰা উজ্জলভাৰত্থায তেলং ৰা ৰণ্ণত্থায লাখং ৰা। কিঞ্চীতি এৰরূপং যং কিঞ্চি। মণিনাতি পাসাণেন। অঞ্ঞেনপি চ কেনচীতি যেন উজ্জলং হোতি, এৰরূপেন মুগ্গরাদিনা অঞ্ঞেনপি কেনচি ৰত্থুনা। দোণিযাতি রজনম্বণে ন ঘংসিতব্বং হত্থেন গাহাপেত্ৰা ন গহেতব্বং। রত্তং চীৰরং হত্থেহি কিঞ্চি থোকং পহরিতুং ৰট্টতীতি যোজনা। যত্থ পক্করজনং পক্খিপন্তি, সা রজনদোণী। তত্থ অংসবদ্ধককাযবন্ধনাদিং ঘট্টেতুং ৰট্টতীতি গণ্ঠিপদে ৰুত্তং।
Tatthāti yena kasāvena cīvaraṃ rajati, tasmiṃ rajane cīvarassa sugandhabhāvatthāya gandhaṃ vā ujjalabhāvatthāya telaṃ vā vaṇṇatthāya lākhaṃ vā. Kiñcīti evarūpaṃ yaṃ kiñci. Maṇināti pāsāṇena. Aññenapi ca kenacīti yena ujjalaṃ hoti, evarūpena muggarādinā aññenapi kenaci vatthunā. Doṇiyāti rajanambaṇe na ghaṃsitabbaṃ hatthena gāhāpetvā na gahetabbaṃ. Rattaṃ cīvaraṃ hatthehi kiñci thokaṃ paharituṃ vaṭṭatīti yojanā. Yattha pakkarajanaṃ pakkhipanti, sā rajanadoṇī. Tattha aṃsabaddhakakāyabandhanādiṃ ghaṭṭetuṃ vaṭṭatīti gaṇṭhipade vuttaṃ.
গণ্ঠিকেতি ৰেল়ুদন্তৰিসাণাদিমযগণ্ঠিকে। লেখা ৰাতি ৰট্টাদিভেদা লেখা ৰা। পিল়কাতি সাসপবীজসদিসা খুদ্দকবুব্বুল়া। পাল়িকণ্ণিকভেদতোতি মণিকাৰল়িরূপপুপ্ফকণ্ণিকরূপভেদতো। ‘‘কপ্পবিন্দুৰিকারো ৰা ন ৰট্টতীতি যোজনা’’তি ৰুত্তং, তস্মা তথেৰ চীৰরে পটিপজ্জিতব্বং।
Gaṇṭhiketi veḷudantavisāṇādimayagaṇṭhike. Lekhā vāti vaṭṭādibhedā lekhā vā. Piḷakāti sāsapabījasadisā khuddakabubbuḷā. Pāḷikaṇṇikabhedatoti maṇikāvaḷirūpapupphakaṇṇikarūpabhedato. ‘‘Kappabinduvikāro vā na vaṭṭatīti yojanā’’ti vuttaṃ, tasmā tatheva cīvare paṭipajjitabbaṃ.
৯. পত্তে ৰা থালকে ৰাতিআদীসু থালকেতি তম্বাদিমযে পুগ্গলিকে তিৰিধেপি কপ্পিযথালকে। ন ৰট্টতীতি মণিৰণ্ণকরণপযোগো ন ৰট্টতি, তেলৰণ্ণপযোগো পন ৰট্টতি। তেলৰণ্ণোতি সমণসারুপ্পৰণ্ণং সন্ধায ৰুত্তং, মণিৰণ্ণং পন পত্তং অঞ্ঞেন কতং লভিত্ৰা পরিভুঞ্জিতুং ৰট্টতীতি ৰদন্তি। পত্তমণ্ডলেতি তিপুসীসাদিমযে পত্তট্ঠপনকমণ্ডলে। ‘‘ন ভিক্খৰে ৰিচিত্রানি পত্তমণ্ডলানি ধারেতব্বানি রূপকাকিণ্ণানি ভিত্তিকম্মকতানী’’তি (চূল়ৰ॰ ২৫৩) ৰুত্তত্তা ‘‘ভিত্তিকম্মং ন ৰট্টতী’’তি ৰুত্তং। ‘‘অনুজানামি, ভিক্খৰে, মকরদন্তকং ছিন্দিতু’’ন্তি (চূল়ৰ॰ ২৫৩) ৰুত্তত্তা ‘‘মকরদন্তকং পন ৰট্টতী’’তি ৰুত্তং। তেনাহু পোরাণা –
9.Patte vā thālake vātiādīsu thālaketi tambādimaye puggalike tividhepi kappiyathālake. Na vaṭṭatīti maṇivaṇṇakaraṇapayogo na vaṭṭati, telavaṇṇapayogo pana vaṭṭati. Telavaṇṇoti samaṇasāruppavaṇṇaṃ sandhāya vuttaṃ, maṇivaṇṇaṃ pana pattaṃ aññena kataṃ labhitvā paribhuñjituṃ vaṭṭatīti vadanti. Pattamaṇḍaleti tipusīsādimaye pattaṭṭhapanakamaṇḍale. ‘‘Na bhikkhave vicitrāni pattamaṇḍalāni dhāretabbāni rūpakākiṇṇāni bhittikammakatānī’’ti (cūḷava. 253) vuttattā ‘‘bhittikammaṃ na vaṭṭatī’’ti vuttaṃ. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā ‘‘makaradantakaṃ pana vaṭṭatī’’ti vuttaṃ. Tenāhu porāṇā –
‘‘থালকস্স চ পত্তস্স, বহি অন্তোপি ৰা পন।
‘‘Thālakassa ca pattassa, bahi antopi vā pana;
আরগ্গেন কতা লেখা, ন চ ৰট্টতি কাচিপি॥
Āraggena katā lekhā, na ca vaṭṭati kācipi.
‘‘আরোপেত্ৰা ভমং পত্তং, মজ্জিত্ৰা চে পচন্তি চ।
‘‘Āropetvā bhamaṃ pattaṃ, majjitvā ce pacanti ca;
‘মণিৰণ্ণং করিস্সাম’, ইতি কাতুং ন ৰট্টতি॥
‘Maṇivaṇṇaṃ karissāma’, iti kātuṃ na vaṭṭati.
‘‘পত্তমণ্ডলকে কিঞ্চি।
‘‘Pattamaṇḍalake kiñci;
ভিত্তিকম্মং ন ৰট্টতি।
Bhittikammaṃ na vaṭṭati;
ন দোসো কোচি তত্থস্স।
Na doso koci tatthassa;
কাতুং মকরদন্তক’’ন্তি॥
Kātuṃ makaradantaka’’nti.
ৰিনযসারত্থসন্দীপনিযম্পি আরগ্গেনাতি আরকণ্টকগ্গেন, সূচিমুখেন ৰা। কাচিপি লেখাতি ৰট্টকগোমুত্তাদিসণ্ঠানা যা কাচিপি রাজি। ভমং আরোপেত্ৰাতি ভমে অল্লীযাপেত্ৰা। পত্তমণ্ডলকেতি পত্তে ছৰিরক্খণত্থায তিপুসীসাদীহি কতে পত্তস্স হেট্ঠা আধারাদীনং উপরি কাতব্বে পত্তমণ্ডলকে। ভিত্তিকম্মন্তি নানাকাররূপককম্মৰিচিত্তং। যথাহ ‘‘ন, ভিক্খৰে, ৰিচিত্রানি পত্তমণ্ডলানি ধারেতব্বানি রূপকাকিণ্ণানি ভিত্তিকম্মকতানী’’তি। তত্থাতি তস্মিং পত্তমণ্ডলে। অস্সাতি ভিক্খুস্স। মকরদন্তকন্তি গিরিকূটন্তি ৰুত্তং, তস্মা এৰং পত্তথালকাদীসু পটিপজ্জিতব্বং।
Vinayasāratthasandīpaniyampi āraggenāti ārakaṇṭakaggena, sūcimukhena vā. Kācipi lekhāti vaṭṭakagomuttādisaṇṭhānā yā kācipi rāji. Bhamaṃ āropetvāti bhame allīyāpetvā. Pattamaṇḍalaketi patte chavirakkhaṇatthāya tipusīsādīhi kate pattassa heṭṭhā ādhārādīnaṃ upari kātabbe pattamaṇḍalake. Bhittikammanti nānākārarūpakakammavicittaṃ. Yathāha ‘‘na, bhikkhave, vicitrāni pattamaṇḍalāni dhāretabbāni rūpakākiṇṇāni bhittikammakatānī’’ti. Tatthāti tasmiṃ pattamaṇḍale. Assāti bhikkhussa. Makaradantakanti girikūṭanti vuttaṃ, tasmā evaṃ pattathālakādīsu paṭipajjitabbaṃ.
ধমকরণ…পে॰… লেখা ন ৰট্টতীতি আরগ্গেন দিন্নলেখা ন ৰট্টতি, জাতিহিঙ্গুলিকাদিৰণ্ণেহি কতলেখা পন ৰট্টতি। ছত্তমুখৰট্টিযন্তি ধমকরণস্স হত্থেন গহণত্থং কতস্স ছত্তাকারস্স মুখৰট্টিযং। ‘‘পরিস্সাৰনবন্ধট্ঠানে’’তি কেচি। ৰিনযৰিনিচ্ছযেপি –
Dhamakaraṇa…pe… lekhā na vaṭṭatīti āraggena dinnalekhā na vaṭṭati, jātihiṅgulikādivaṇṇehi katalekhā pana vaṭṭati. Chattamukhavaṭṭiyanti dhamakaraṇassa hatthena gahaṇatthaṃ katassa chattākārassa mukhavaṭṭiyaṃ. ‘‘Parissāvanabandhaṭṭhāne’’ti keci. Vinayavinicchayepi –
‘‘ন ধম্মকরণচ্ছত্তে, লেখা কাচিপি ৰট্টতি।
‘‘Na dhammakaraṇacchatte, lekhā kācipi vaṭṭati;
কুচ্ছিযং ৰা ঠপেত্ৰা তং, লেখং তু মুখৰট্টিয’’ন্তি॥ –
Kucchiyaṃ vā ṭhapetvā taṃ, lekhaṃ tu mukhavaṭṭiya’’nti. –
ৰুত্তং। তট্টীকাযং পন ‘‘মুখৰট্টিযা যা লেখা পরিস্সাৰনবন্ধনত্থায অনুঞ্ঞাতা, তং লেখং ঠপেত্ৰা ধমকরণচ্ছত্তে ৰা কুচ্ছিযং ৰা কাচি লেখা ন ৰট্টতীতি যোজনা’’তি ৰুত্তং, তস্মা তত্থ ৰুত্তনযেনেৰ ধমকরণে পটিপজ্জিতব্বং।
Vuttaṃ. Taṭṭīkāyaṃ pana ‘‘mukhavaṭṭiyā yā lekhā parissāvanabandhanatthāya anuññātā, taṃ lekhaṃ ṭhapetvā dhamakaraṇacchatte vā kucchiyaṃ vā kāci lekhā na vaṭṭatīti yojanā’’ti vuttaṃ, tasmā tattha vuttanayeneva dhamakaraṇe paṭipajjitabbaṃ.
১০. কাযবন্ধনে পন কক্কটক্খীনীতি কক্কটকস্স অক্খিসদিসানি। মকরমুখন্তি মকরমুখসণ্ঠানং। দেড্ডুভসীসন্তি উদকসপ্পসীসসদিসসণ্ঠানানি। অচ্ছীনীতি কুঞ্জরচ্ছিসণ্ঠানানি। একমেৰ ৰট্টতীতি এত্থ একরজ্জুকং দ্ৰিগুণতিগুণং কত্ৰা বন্ধিতুং ন ৰট্টতি, একমেৰ পন সতৰারম্পি সরীরং পরিক্খিপিত্ৰা বন্ধিতুং ৰট্টতি। ‘‘বহুরজ্জুকে একতো কত্ৰা একেন নিরন্তরং ৰেঠেত্ৰা কতং বহুরজ্জুকন্তি ন ৰত্তব্বং, তং ৰট্টতী’’তি ৰুত্তত্তা তং মুরজসঙ্খং ন গচ্ছতীতি ৰেদিতব্বং। মুরজঞ্হি নানাৰণ্ণেহি সুত্তেহি মুরজৰট্টিসণ্ঠানং ৰেঠেত্ৰা করোন্তি। ইদং পন মুরজং মদ্দৰীণসঙ্খাতং পামঙ্গসণ্ঠানঞ্চ দসাসু ৰট্টতি ‘‘কাযবন্ধনস্স দসা জীরন্তি। অনুজানামি, ভিক্খৰে, মুরজং মদ্দৰীণ’’ন্তি (চূল়ৰ॰ ২৭৮) ৰুত্তত্তা।
10. Kāyabandhane pana kakkaṭakkhīnīti kakkaṭakassa akkhisadisāni. Makaramukhanti makaramukhasaṇṭhānaṃ. Deḍḍubhasīsanti udakasappasīsasadisasaṇṭhānāni. Acchīnīti kuñjaracchisaṇṭhānāni. Ekameva vaṭṭatīti ettha ekarajjukaṃ dviguṇatiguṇaṃ katvā bandhituṃ na vaṭṭati, ekameva pana satavārampi sarīraṃ parikkhipitvā bandhituṃ vaṭṭati. ‘‘Bahurajjuke ekato katvā ekena nirantaraṃ veṭhetvā kataṃ bahurajjukanti na vattabbaṃ, taṃ vaṭṭatī’’ti vuttattā taṃ murajasaṅkhaṃ na gacchatīti veditabbaṃ. Murajañhi nānāvaṇṇehi suttehi murajavaṭṭisaṇṭhānaṃ veṭhetvā karonti. Idaṃ pana murajaṃ maddavīṇasaṅkhātaṃ pāmaṅgasaṇṭhānañca dasāsu vaṭṭati ‘‘kāyabandhanassa dasā jīranti. Anujānāmi, bhikkhave, murajaṃ maddavīṇa’’nti (cūḷava. 278) vuttattā.
ৰিধেতি দসাপরিযোসানে থিরভাৰায দন্তৰিসাণসুত্তাদীহি কতে ৰিধে। সারত্থদীপনিযং (সারত্থ॰ টী॰ ২.৮৫) পন ‘‘কাযবন্ধনস্স পাসন্তে দসামূলে তস্স থিরভাৰত্থং কত্তব্বে দন্তৰিসাণাদিমযে ৰিধে’’তি ৰুত্তং। অট্ঠমঙ্গলানি নাম সঙ্খো, চক্কং, পুণ্ণকুম্ভো, গযা, সিরীৰচ্ছো, অঙ্কুসো, ধজং, সোৰত্থিকন্তি। মচ্ছযুগল়ছত্তনন্দিযাৰট্টাদিৰসেনপি ৰদন্তি। পরিচ্ছেদলেখামত্তন্তি দন্তাদীহি কতস্স ৰিধস্স উভোসু কোটীসু কাতব্বপরিচ্ছেদরাজিমত্তং। ৰিনযৰিনিচ্ছযপ্পকরণেপি –
Vidheti dasāpariyosāne thirabhāvāya dantavisāṇasuttādīhi kate vidhe. Sāratthadīpaniyaṃ (sārattha. ṭī. 2.85) pana ‘‘kāyabandhanassa pāsante dasāmūle tassa thirabhāvatthaṃ kattabbe dantavisāṇādimaye vidhe’’ti vuttaṃ. Aṭṭhamaṅgalāni nāma saṅkho, cakkaṃ, puṇṇakumbho, gayā, sirīvaccho, aṅkuso, dhajaṃ, sovatthikanti. Macchayugaḷachattanandiyāvaṭṭādivasenapi vadanti. Paricchedalekhāmattanti dantādīhi katassa vidhassa ubhosu koṭīsu kātabbaparicchedarājimattaṃ. Vinayavinicchayappakaraṇepi –
‘‘সুত্তং ৰা দিগুণং কত্ৰা, কোট্টেন্তি চ তহিং তহিং।
‘‘Suttaṃ vā diguṇaṃ katvā, koṭṭenti ca tahiṃ tahiṃ;
কাযবন্ধনসোভত্থং, তং ন ৰট্টতি ভিক্খুনো॥
Kāyabandhanasobhatthaṃ, taṃ na vaṭṭati bhikkhuno.
‘‘দসামুখে দল়্হত্থায, দ্ৰীসু অন্তেসু ৰট্টতি।
‘‘Dasāmukhe daḷhatthāya, dvīsu antesu vaṭṭati;
মালাকম্মলতাকম্ম-চিত্তিকম্পি ন ৰট্টতি॥
Mālākammalatākamma-cittikampi na vaṭṭati.
‘‘অক্খীনি তত্থ দস্সেত্ৰা।
‘‘Akkhīni tattha dassetvā;
কোট্টিতে পন কা কথা॥
Koṭṭite pana kā kathā.
কক্কটক্খীনি ৰা তত্থ।
Kakkaṭakkhīni vā tattha;
উট্ঠাপেতুং ন ৰট্টতি॥
Uṭṭhāpetuṃ na vaṭṭati.
‘‘ঘটং দেড্ডুভসীসং ৰা, মকরস্স মুখম্পি ৰা।
‘‘Ghaṭaṃ deḍḍubhasīsaṃ vā, makarassa mukhampi vā;
ৰিকাররূপং যং কিঞ্চি, ন ৰট্টতি দসামুখে॥
Vikārarūpaṃ yaṃ kiñci, na vaṭṭati dasāmukhe.
‘‘উজুকং মচ্ছকণ্টং ৰা, মট্ঠং ৰা পন পট্টিকং।
‘‘Ujukaṃ macchakaṇṭaṃ vā, maṭṭhaṃ vā pana paṭṭikaṃ;
খজ্জূরিপত্তকাকারং, কত্ৰা ৰট্টতি কোট্টিতং॥
Khajjūripattakākāraṃ, katvā vaṭṭati koṭṭitaṃ.
‘‘পট্টিকা সূকরন্তন্তি, দুৰিধং কাযবন্ধনং।
‘‘Paṭṭikā sūkarantanti, duvidhaṃ kāyabandhanaṃ;
রজ্জুকা দুস্সপট্টাদি, সব্বং তস্সানুলোমিকং॥
Rajjukā dussapaṭṭādi, sabbaṃ tassānulomikaṃ.
‘‘মুরজং মদ্দৰীণঞ্চ, দেড্ডুভঞ্চ কলাবুকং।
‘‘Murajaṃ maddavīṇañca, deḍḍubhañca kalābukaṃ;
রজ্জুযো চ ন ৰট্টন্তি, পুরিমা দ্ৰেদসা সিযুং॥
Rajjuyo ca na vaṭṭanti, purimā dvedasā siyuṃ.
‘‘দসা পামঙ্গসণ্ঠানা, নিদ্দিট্ঠা কাযবন্ধনে।
‘‘Dasā pāmaṅgasaṇṭhānā, niddiṭṭhā kāyabandhane;
একা দ্ৰিতিচতস্সো ৰা, ৰট্টন্তি ন ততো পরং॥
Ekā dviticatasso vā, vaṭṭanti na tato paraṃ.
‘‘একরজ্জুমযং ৰুত্তং, মুনিনা কাযবন্ধনং।
‘‘Ekarajjumayaṃ vuttaṃ, muninā kāyabandhanaṃ;
তঞ্চ পামঙ্গসণ্ঠানং, একম্পি চ ন ৰট্টতি॥
Tañca pāmaṅgasaṇṭhānaṃ, ekampi ca na vaṭṭati.
‘‘রজ্জুকে একতো কত্ৰা, বহূ একায রজ্জুযা।
‘‘Rajjuke ekato katvā, bahū ekāya rajjuyā;
নিরন্তরঞ্হি ৰেঠেত্ৰা, কতং ৰট্টতি বন্ধিতুং॥
Nirantarañhi veṭhetvā, kataṃ vaṭṭati bandhituṃ.
‘‘দন্তকট্ঠৰিসাণট্ঠি-লোহৰেল়ুনল়ব্ভৰা।
‘‘Dantakaṭṭhavisāṇaṭṭhi-lohaveḷunaḷabbhavā;
জতুসঙ্খমযা সুত্ত-ফলজা ৰিধকা মতা॥
Jatusaṅkhamayā sutta-phalajā vidhakā matā.
‘‘কাযবন্ধনৰিধেপি , ৰিকারো ন চ ৰট্টতি।
‘‘Kāyabandhanavidhepi , vikāro na ca vaṭṭati;
তত্থ তত্থ পরিচ্ছেদ-লেখামত্তং তু ৰট্টতী’’তি॥ –
Tattha tattha pariccheda-lekhāmattaṃ tu vaṭṭatī’’ti. –
ৰুত্তং।
Vuttaṃ.
ৰিনযসারত্থসন্দীপনিযম্পি তহিং তহিন্তি পট্টিকায তত্থ তত্থ। তন্তি তথাকোট্টিতদিগুণসুত্তকাযবন্ধনং। অন্তেসু দল়্হত্থায দসামুখে দিগুণং কত্ৰা কোট্টেন্তি, ৰট্টতীতি যোজনা। চিত্তকম্পীতি মালাকম্মলতাকম্মচিত্তযুত্তম্পি কাযবন্ধনং। অক্খীনীতি কুঞ্জরক্খীনি। তত্থাতি কাযবন্ধনে ন ৰট্টতীতি কা কথা। উট্ঠাপেতুন্তি উক্কিরিতুং।
Vinayasāratthasandīpaniyampi tahiṃ tahinti paṭṭikāya tattha tattha. Tanti tathākoṭṭitadiguṇasuttakāyabandhanaṃ. Antesu daḷhatthāya dasāmukhe diguṇaṃ katvā koṭṭenti, vaṭṭatīti yojanā. Cittakampīti mālākammalatākammacittayuttampi kāyabandhanaṃ. Akkhīnīti kuñjarakkhīni. Tatthāti kāyabandhane na vaṭṭatīti kā kathā. Uṭṭhāpetunti ukkirituṃ.
ঘটন্তি ঘটসণ্ঠানং। দেড্ডুভসীসং ৰাতি উদকসপ্পসীসং মুখসণ্ঠানং ৰা। যং কিঞ্চি ৰিকাররূপং দসামুখে ন ৰট্টতীতি যোজনা। এত্থ চ উভযপস্সেসু মচ্ছকণ্টকযুত্তং মচ্ছস্স পিট্ঠিকণ্টকং ৰিয যস্সা পট্টিকায ৰাযনং হোতি, ইদং কাযবন্ধনং মচ্ছকণ্টকং নাম। যস্স খজ্জূরিপত্তসণ্ঠানমিৰ ৰাযনং হোতি, তং খজ্জূরিপত্তকাকারং নাম।
Ghaṭanti ghaṭasaṇṭhānaṃ. Deḍḍubhasīsaṃ vāti udakasappasīsaṃ mukhasaṇṭhānaṃ vā. Yaṃ kiñci vikārarūpaṃ dasāmukhe na vaṭṭatīti yojanā. Ettha ca ubhayapassesu macchakaṇṭakayuttaṃ macchassa piṭṭhikaṇṭakaṃ viya yassā paṭṭikāya vāyanaṃ hoti, idaṃ kāyabandhanaṃ macchakaṇṭakaṃ nāma. Yassa khajjūripattasaṇṭhānamiva vāyanaṃ hoti, taṃ khajjūripattakākāraṃ nāma.
পকতিৰিকারা পট্টিকা সূকরন্তং নাম কুঞ্চিকাকোসসণ্ঠানং। তস্স দুৰিধস্স কাযবন্ধনস্স। তত্থ রজ্জুকা সূকরন্তানুলোমিকা, দুস্সপট্টং পট্টিকানুলোমিকং। আদি-সদ্দেন মুদ্দিককাযবন্ধনং গহিতং, তঞ্চ সূকরন্তানুলোমিকং। যথাহ ‘‘একরজ্জুকং পন মুদ্দিককাযবন্ধনঞ্চ সূকরন্তং অনুলোমেতী’’তি (চূল়ৰ॰ অট্ঠ॰ ২৭৮)। তত্থ রজ্জুকা নাম একাৰট্টা, বহুরজ্জুকস্স অকপ্পিযভাৰং ৰক্খতি। মুদ্দিককাযবন্ধনং নাম চতুরস্সং অকত্ৰা সজ্জিতন্তি গণ্ঠিপদে ৰুত্তং।
Pakativikārā paṭṭikā sūkarantaṃ nāma kuñcikākosasaṇṭhānaṃ. Tassa duvidhassa kāyabandhanassa. Tattha rajjukā sūkarantānulomikā, dussapaṭṭaṃ paṭṭikānulomikaṃ. Ādi-saddena muddikakāyabandhanaṃ gahitaṃ, tañca sūkarantānulomikaṃ. Yathāha ‘‘ekarajjukaṃ pana muddikakāyabandhanañca sūkarantaṃ anulometī’’ti (cūḷava. aṭṭha. 278). Tattha rajjukā nāma ekāvaṭṭā, bahurajjukassa akappiyabhāvaṃ vakkhati. Muddikakāyabandhanaṃ nāma caturassaṃ akatvā sajjitanti gaṇṭhipade vuttaṃ.
মুরজং নাম মুরজৰট্টিসণ্ঠানং ৰেঠেত্ৰা কতং। ৰেঠেত্ৰাতি নানাসুত্তেহি ৰেঠেত্ৰা। সিক্খাভাজনৰিনিচ্ছযে পন ‘‘বহুকা রজ্জুযো একতো কত্ৰা একায রজ্জুযা ৰেঠিত’’ন্তি ৰুত্তং। মদ্দৰীণং নাম পামঙ্গসণ্ঠানং। দেড্ডুভকং নাম উদকসপ্পসদিসং। কলাবুকং নাম বহুরজ্জুকং। রজ্জুযোতি উভযকোটিযং একতো অবন্ধা বহুরজ্জুযো, তথাবন্ধা কলাবুকং নাম হোতি। ন ৰট্টন্তীতি মুরজাদীনি ইমানি সব্বানি কাযবন্ধনানি ন ৰট্টন্তি। পুরিমা দ্ৰেতি মুরজং মদ্দৰীণনামঞ্চাতি দ্ৰে। ‘‘দসাসু সিযু’’ন্তি ৰত্তব্বে গাথাবন্ধৰসেন ৰণ্ণলোপেন ‘‘দসা সিযু’’ন্তি ৰুত্তং। যথাহ ‘‘মুরজং মদ্দৰীণন্তি ইদং দসাসুযেৰ অনুঞ্ঞাত’’ন্তি।
Murajaṃ nāma murajavaṭṭisaṇṭhānaṃ veṭhetvā kataṃ. Veṭhetvāti nānāsuttehi veṭhetvā. Sikkhābhājanavinicchaye pana ‘‘bahukā rajjuyo ekato katvā ekāya rajjuyā veṭhita’’nti vuttaṃ. Maddavīṇaṃ nāma pāmaṅgasaṇṭhānaṃ. Deḍḍubhakaṃ nāma udakasappasadisaṃ. Kalābukaṃ nāma bahurajjukaṃ. Rajjuyoti ubhayakoṭiyaṃ ekato abandhā bahurajjuyo, tathābandhā kalābukaṃ nāma hoti. Na vaṭṭantīti murajādīni imāni sabbāni kāyabandhanāni na vaṭṭanti. Purimā dveti murajaṃ maddavīṇanāmañcāti dve. ‘‘Dasāsu siyu’’nti vattabbe gāthābandhavasena vaṇṇalopena ‘‘dasā siyu’’nti vuttaṃ. Yathāha ‘‘murajaṃ maddavīṇanti idaṃ dasāsuyeva anuññāta’’nti.
পামঙ্গসণ্ঠানাতি পামঙ্গদামং ৰিয চতুরস্সসণ্ঠানা। একরজ্জুমযন্তি নানাৰট্টে একতো ৰট্টেত্ৰা কতং রজ্জুমযং কাযবন্ধনং ৰত্তুং ৰট্টতীতি ‘‘রজ্জুকা দুস্সপট্টাদী’’তি এত্থ একৰট্টরজ্জুকা গহিতা। ইধ পন নানাৰট্টে একতো ৰট্টেত্ৰা কতা একাৰ রজ্জু গহিতা। তঞ্চাতি তং ৰা নযম্পি একরজ্জুককাযবন্ধনং পামঙ্গসণ্ঠানেন গন্থিতং। একম্পি চ ন ৰট্টতীতি কেৰলম্পি ন ৰট্টতি।
Pāmaṅgasaṇṭhānāti pāmaṅgadāmaṃ viya caturassasaṇṭhānā. Ekarajjumayanti nānāvaṭṭe ekato vaṭṭetvā kataṃ rajjumayaṃ kāyabandhanaṃ vattuṃ vaṭṭatīti ‘‘rajjukā dussapaṭṭādī’’ti ettha ekavaṭṭarajjukā gahitā. Idha pana nānāvaṭṭe ekato vaṭṭetvā katā ekāva rajju gahitā. Tañcāti taṃ vā nayampi ekarajjukakāyabandhanaṃ pāmaṅgasaṇṭhānena ganthitaṃ. Ekampi ca na vaṭṭatīti kevalampi na vaṭṭati.
বহূ রজ্জুকে একতো কত্ৰাতি যোজনা। ৰট্টতি বন্ধিতুন্তি মুরজং কলাবুকঞ্চ ন হোতি, রজ্জুককাযবন্ধনমেৰ হোতীতি অধিপ্পাযো। অযং পন ৰিনিচ্ছযো ‘‘বহুরজ্জুকে একতো কত্ৰা একেন নিরন্তরং ৰেঠেত্ৰা কতং বহুরজ্জুকন্তি ন ৰত্তব্বং, তং ৰট্টতী’’তি অট্ঠকথাগতো ইধ ৰুত্তো। সিক্খাভাজনৰিনিচ্ছযে ‘‘বহুরজ্জুযো একতো কত্ৰা একায ৰেঠিতং মুরজং নামা’’তি যং ৰুত্তং, তং ইমিনা ৰিরুজ্ঝনতো ন গহেতব্বং।
Bahū rajjuke ekato katvāti yojanā. Vaṭṭati bandhitunti murajaṃ kalābukañca na hoti, rajjukakāyabandhanameva hotīti adhippāyo. Ayaṃ pana vinicchayo ‘‘bahurajjuke ekato katvā ekena nirantaraṃ veṭhetvā kataṃ bahurajjukanti na vattabbaṃ, taṃ vaṭṭatī’’ti aṭṭhakathāgato idha vutto. Sikkhābhājanavinicchaye ‘‘bahurajjuyo ekato katvā ekāya veṭhitaṃ murajaṃ nāmā’’ti yaṃ vuttaṃ, taṃ iminā virujjhanato na gahetabbaṃ.
দন্ত-সদ্দেন হত্থিদন্তা ৰুত্তা। জতূতি লাখা। সঙ্খমযন্তি সঙ্খনাভিমযং। ৰিধকা মতাতি এত্থ ৰেধিকাতিপি পাঠো, ৰিধপরিযাযো। কাযবন্ধনৰিধেতি কাযবন্ধনস্স দসায থিরভাৰত্থং কট্ঠদন্তাদীহি কতে ৰিধে। ৰিকারো অট্ঠমঙ্গলাদিকো। তত্থ তত্থাতি তস্মিং তস্মিং ঠানে। তু-সদ্দেন ঘটাকারোপি ৰট্টতীতি দীপেতীতি অত্থো পকাসিতো, তস্মা তেন নযেন কাযবন্ধনৰিচারো কাতব্বোতি।
Danta-saddena hatthidantā vuttā. Jatūti lākhā. Saṅkhamayanti saṅkhanābhimayaṃ. Vidhakā matāti ettha vedhikātipi pāṭho, vidhapariyāyo. Kāyabandhanavidheti kāyabandhanassa dasāya thirabhāvatthaṃ kaṭṭhadantādīhi kate vidhe. Vikāro aṭṭhamaṅgalādiko. Tattha tatthāti tasmiṃ tasmiṃ ṭhāne. Tu-saddena ghaṭākāropi vaṭṭatīti dīpetīti attho pakāsito, tasmā tena nayena kāyabandhanavicāro kātabboti.
১১. অঞ্জনিযং ‘‘উজুকমেৰা’’তি ৰুত্তত্তা চতুরস্সাদিসণ্ঠানাপি ৰঙ্কগতিকা ন ৰট্টতি। সিপাটিকাযাতি ৰাসিআদিভণ্ডপক্খিপনে। ৰিনযৰিনিচ্ছযপ্পকরণে পন –
11.Añjaniyaṃ ‘‘ujukamevā’’ti vuttattā caturassādisaṇṭhānāpi vaṅkagatikā na vaṭṭati. Sipāṭikāyāti vāsiādibhaṇḍapakkhipane. Vinayavinicchayappakaraṇe pana –
‘‘মালাকম্মলতাকম্ম-নানারূপৰিচিত্তিতা।
‘‘Mālākammalatākamma-nānārūpavicittitā;
ন চ ৰট্টতি ভিক্খূনং, অঞ্জনী জনরঞ্জনী॥
Na ca vaṭṭati bhikkhūnaṃ, añjanī janarañjanī.
‘‘তাদিসং পন ঘংসিত্ৰা, ৰেঠেত্ৰা সুত্তকেন ৰা।
‘‘Tādisaṃ pana ghaṃsitvā, veṭhetvā suttakena vā;
ৰল়ঞ্জন্তস্স ভিক্খুস্স, ন দোসো কোচি ৰিজ্জতি॥
Vaḷañjantassa bhikkhussa, na doso koci vijjati.
‘‘ৰট্টা ৰা চতুরস্সা ৰা, অট্ঠংসা ৰাপি অঞ্জনী।
‘‘Vaṭṭā vā caturassā vā, aṭṭhaṃsā vāpi añjanī;
ৰট্টতেৰাতি নিদ্দিট্ঠা, ৰণ্ণমট্ঠা ন ৰট্টতি॥
Vaṭṭatevāti niddiṭṭhā, vaṇṇamaṭṭhā na vaṭṭati.
‘‘তথাঞ্জনিসলাকাপি, অঞ্জনিথৰিকায চ।
‘‘Tathāñjanisalākāpi, añjanithavikāya ca;
নানাৰণ্ণেহি সুত্তেহি, চিত্তকম্মং ন ৰট্টতি॥
Nānāvaṇṇehi suttehi, cittakammaṃ na vaṭṭati.
‘‘একৰণ্ণেন সুত্তেন, সিপাটিং যেন কেনচি।
‘‘Ekavaṇṇena suttena, sipāṭiṃ yena kenaci;
যং কিঞ্চি পন সিব্বেত্ৰা, ৰল়ঞ্জন্তস্স ৰট্টতী’’তি॥ –
Yaṃ kiñci pana sibbetvā, vaḷañjantassa vaṭṭatī’’ti. –
আগতং।
Āgataṃ.
তট্টীকাযম্পি মালা…পে॰… চিত্তিতাতি মালাকম্মলতাকম্মেহি চ মিগপক্খিরূপাদিনানারূপেহি চ ৰিচিত্তিতা। জনরঞ্জনীতি বালজনপলোভিনী। অট্ঠংসা ৰাপীতি এত্থ অপি-সদ্দেন সোল়সংসাদীনং গহণং। ৰণ্ণমট্ঠাতি মালাকম্মাদিৰণ্ণমট্ঠা। অঞ্জনীসলাকাপি তথা ৰণ্ণমট্ঠা ন ৰট্টতীতি যোজনা। অঞ্জনীথৰিকায চ নানাৰণ্ণেহি সুত্তেহি চিত্তকম্মং ন ৰট্টতীতি পাঠো যুজ্জতি, ‘‘থৰিকাপি ৰা’’তি পাঠো দিস্সতি, সো ন গহেতব্বো। ‘‘পীতাদিনা যেন কেনচি একৰণ্ণেন সুত্তেন পিলোতিকাদিমযং কিঞ্চিপি সিপাটিকং সিব্বেত্ৰা ৰল়ঞ্জন্তস্স ৰট্টতীতি যোজনা’’তি আগতং।
Taṭṭīkāyampi mālā…pe… cittitāti mālākammalatākammehi ca migapakkhirūpādinānārūpehi ca vicittitā. Janarañjanīti bālajanapalobhinī. Aṭṭhaṃsā vāpīti ettha api-saddena soḷasaṃsādīnaṃ gahaṇaṃ. Vaṇṇamaṭṭhāti mālākammādivaṇṇamaṭṭhā. Añjanīsalākāpi tathā vaṇṇamaṭṭhā na vaṭṭatīti yojanā. Añjanīthavikāya ca nānāvaṇṇehi suttehi cittakammaṃ na vaṭṭatīti pāṭho yujjati, ‘‘thavikāpi vā’’ti pāṭho dissati, so na gahetabbo. ‘‘Pītādinā yena kenaci ekavaṇṇena suttena pilotikādimayaṃ kiñcipi sipāṭikaṃ sibbetvā vaḷañjantassa vaṭṭatīti yojanā’’ti āgataṃ.
১২. আরকণ্টকাদীসু আরকণ্টকেতি পোত্থকাদিঅভিসঙ্খরণত্থং কতে দীঘমুখসত্থকে। ভমকারানং দারুআদিলিখনসত্থকন্তি কেচি। ৰট্টমণিকন্তি ৰট্টং কত্ৰা উট্ঠাপেতব্ববুব্বুল়কং। অঞ্ঞন্তি ইমিনা পিল়কাদিং সঙ্গণ্হাতি। পিপ্ফলিকেতি যং কিঞ্চি ছেদনকে খুদ্দকসত্থে। মণিকন্তি একৰট্টমণি। পিল়কন্তি সাসপমত্তিকামুত্তরাজিসদিসা বহুৰট্টলেখা। ইমস্মিং অধিকারে অৰুত্তত্তা লেখনিযং যং কিঞ্চি ৰণ্ণমট্ঠং ৰট্টতীতি ৰদন্তি। ৰজিরবুদ্ধিটীকাযং পন ‘‘কুঞ্চিকায সেনাসনপরিক্খারত্তা সুৰণ্ণরূপিযমযাপি ৰট্টতীতি ছাযা দিস্সতি। ‘কুঞ্চিকায ৰণ্ণমট্ঠকম্মং ন ৰট্টতী’তি (পারা॰ অট্ঠ॰ ১.৮৫) ৰচনতো অঞ্ঞে কপ্পিযলোহাদিমযাৰ কুঞ্চিকা কপ্পন্তি পরিহরণীযপরিক্খারত্তা’’তি ৰুত্তং। আরকণ্টকো পোত্থকাদিকরণসত্থকজাতি, আমণ্ডসারকো আমলকফলমযোতি ৰদন্তি।
12.Ārakaṇṭakādīsu ārakaṇṭaketi potthakādiabhisaṅkharaṇatthaṃ kate dīghamukhasatthake. Bhamakārānaṃ dāruādilikhanasatthakanti keci. Vaṭṭamaṇikanti vaṭṭaṃ katvā uṭṭhāpetabbabubbuḷakaṃ. Aññanti iminā piḷakādiṃ saṅgaṇhāti. Pipphaliketi yaṃ kiñci chedanake khuddakasatthe. Maṇikanti ekavaṭṭamaṇi. Piḷakanti sāsapamattikāmuttarājisadisā bahuvaṭṭalekhā. Imasmiṃ adhikāre avuttattā lekhaniyaṃ yaṃ kiñci vaṇṇamaṭṭhaṃ vaṭṭatīti vadanti. Vajirabuddhiṭīkāyaṃ pana ‘‘kuñcikāya senāsanaparikkhārattā suvaṇṇarūpiyamayāpi vaṭṭatīti chāyā dissati. ‘Kuñcikāya vaṇṇamaṭṭhakammaṃ na vaṭṭatī’ti (pārā. aṭṭha. 1.85) vacanato aññe kappiyalohādimayāva kuñcikā kappanti pariharaṇīyaparikkhārattā’’ti vuttaṃ. Ārakaṇṭako potthakādikaraṇasatthakajāti, āmaṇḍasārako āmalakaphalamayoti vadanti.
ৰলিতকন্তি নখচ্ছেদনকালে দল়্হগ্গহণত্থং ৰলিযুত্তমেৰ করোন্তি। তস্মা তং ৰট্টতীতি ইমিনা অঞ্ঞম্পি ৰিকারং দল়্হীকম্মাদিঅত্থায করোন্তি, ন ৰণ্ণমট্ঠত্থায, তং ৰট্টতীতি দীপিতং, তেন চ কত্তরদণ্ডকোটিযং অঞ্ঞমঞ্ঞং সঙ্ঘট্টনেন সদ্দনিচ্ছরণত্থায কতৰলযাদিকং অৰুত্তম্পি যতো উপপন্নং হোতি। এত্থ চ দল়্হীকম্মাদীতি আদি-সদ্দেন পরিস্সযৰিনোদনাদিং সঙ্গণ্হাতি, তেন কত্তরযট্ঠিকোটিযং কতৰলযানং অঞ্ঞমঞ্ঞসঙ্ঘট্টনেন সদ্দনিচ্ছরণং দীঘজাতিকাদিপরিস্সযৰিনোদনত্থং হোতি, তস্মা ৰট্টতীতি দীপেতি। তেনাহ আচরিযৰরো –
Valitakanti nakhacchedanakāle daḷhaggahaṇatthaṃ valiyuttameva karonti. Tasmā taṃ vaṭṭatīti iminā aññampi vikāraṃ daḷhīkammādiatthāya karonti, na vaṇṇamaṭṭhatthāya, taṃ vaṭṭatīti dīpitaṃ, tena ca kattaradaṇḍakoṭiyaṃ aññamaññaṃ saṅghaṭṭanena saddaniccharaṇatthāya katavalayādikaṃ avuttampi yato upapannaṃ hoti. Ettha ca daḷhīkammādīti ādi-saddena parissayavinodanādiṃ saṅgaṇhāti, tena kattarayaṭṭhikoṭiyaṃ katavalayānaṃ aññamaññasaṅghaṭṭanena saddaniccharaṇaṃ dīghajātikādiparissayavinodanatthaṃ hoti, tasmā vaṭṭatīti dīpeti. Tenāha ācariyavaro –
‘‘মণিকং পিল়কং ৰাপি, পিপ্ফলে আরকণ্টকে।
‘‘Maṇikaṃ piḷakaṃ vāpi, pipphale ārakaṇṭake;
ঠপেতুং পন যং কিঞ্চি, ন চ ৰট্টতি ভিক্খুনো॥
Ṭhapetuṃ pana yaṃ kiñci, na ca vaṭṭati bhikkhuno.
‘‘দণ্ডকেপি পরিচ্ছেদ-লেখামত্তং তু ৰট্টতি।
‘‘Daṇḍakepi pariccheda-lekhāmattaṃ tu vaṭṭati;
ৰলিত্ৰা চ নখচ্ছেদং, করোন্তীতি হি ৰট্টতী’’তি॥
Valitvā ca nakhacchedaṃ, karontīti hi vaṭṭatī’’ti.
তস্স ৰণ্ণনাযম্পি মণিকন্তি থূলবুব্বুল়ং। পীল়কন্তি সুখুমবুব্বুল়ং। পিপ্ফলেতি ৰত্থচ্ছেদনসত্থে। আরকণ্টকেতি পত্তধারৰলযানং ৰিজ্ঝনকণ্টকে। ঠপেতুন্তি উট্ঠাপেতুং। যং কিঞ্চীতি সেসৰণ্ণমট্ঠম্পি চ। দণ্ডকেতি পিপ্ফলিদণ্ডকে। যথাহ ‘‘পিপ্ফলিকেপি মণিকং ৰা পিল়কং ৰা যং কিঞ্চি ঠপেতুং ন ৰট্টতি, দণ্ডকে পন পরিচ্ছেদলেখা ৰট্টতী’’তি। পরিচ্ছেদলেখামত্তন্তি আণিবন্ধনট্ঠানং পত্ৰা পরিচ্ছিন্দনত্থং একাৰ লেখা ৰট্টতীতি। ৰলিত্ৰাতি উভযকোটিমুখং কত্ৰা মজ্ঝে ৰলিযো গাহেত্ৰা নখচ্ছেদং যস্মা করোন্তি, তস্মা ৰট্টতীতি যোজনাতি আগতা।
Tassa vaṇṇanāyampi maṇikanti thūlabubbuḷaṃ. Pīḷakanti sukhumabubbuḷaṃ. Pipphaleti vatthacchedanasatthe. Ārakaṇṭaketi pattadhāravalayānaṃ vijjhanakaṇṭake. Ṭhapetunti uṭṭhāpetuṃ. Yaṃ kiñcīti sesavaṇṇamaṭṭhampi ca. Daṇḍaketi pipphalidaṇḍake. Yathāha ‘‘pipphalikepi maṇikaṃ vā piḷakaṃ vā yaṃ kiñci ṭhapetuṃ na vaṭṭati, daṇḍake pana paricchedalekhā vaṭṭatī’’ti. Paricchedalekhāmattanti āṇibandhanaṭṭhānaṃ patvā paricchindanatthaṃ ekāva lekhā vaṭṭatīti. Valitvāti ubhayakoṭimukhaṃ katvā majjhe valiyo gāhetvā nakhacchedaṃ yasmā karonti, tasmā vaṭṭatīti yojanāti āgatā.
উত্তরারণিযং মণ্ডলন্তি উত্তরারণিযা পৰেসনত্থং আৰাটমণ্ডলং হোতি। দন্তকট্ঠচ্ছেদনৰাসিযং উজুকমেৰ বন্ধিতুন্তি সম্বন্ধো। এত্থ চ উজুকমেৰাতি ইমিনা ৰঙ্কং কত্ৰা বন্ধিতুং ন ৰট্টতীতি দস্সেতি, তেনেৰ অঞ্জনিযম্পি তথা দস্সিতং। উভোসু পস্সেসু একপস্সে ৰাতি ৰচনসেসো, ৰাসিদণ্ডস্স উভোসু পস্সেসু দণ্ডকোটীনং অচলনত্থং বন্ধিতুন্তি অত্থো। কপ্পিযলোহেন চতুরস্সং ৰা অট্ঠংসং ৰা কাতুং ৰট্টতীতি যোজনা।
Uttarāraṇiyaṃ maṇḍalanti uttarāraṇiyā pavesanatthaṃ āvāṭamaṇḍalaṃ hoti. Dantakaṭṭhacchedanavāsiyaṃ ujukameva bandhitunti sambandho. Ettha ca ujukamevāti iminā vaṅkaṃ katvā bandhituṃ na vaṭṭatīti dasseti, teneva añjaniyampi tathā dassitaṃ. Ubhosu passesu ekapasse vāti vacanaseso, vāsidaṇḍassa ubhosu passesu daṇḍakoṭīnaṃ acalanatthaṃ bandhitunti attho. Kappiyalohena caturassaṃ vā aṭṭhaṃsaṃ vā kātuṃ vaṭṭatīti yojanā.
১৩. আমণ্ডসারকেতি আমলকফলানি পিসিত্ৰা তেন কক্কেন কততেলভাজনে। তত্থ কির পক্খিত্তং তেলং সীতং হোতি। তথা হি ৰুত্তং আচরিযেন –
13.Āmaṇḍasāraketi āmalakaphalāni pisitvā tena kakkena katatelabhājane. Tattha kira pakkhittaṃ telaṃ sītaṃ hoti. Tathā hi vuttaṃ ācariyena –
‘‘উত্তরারণিযং ৰাপি, ধনুকে পেল্লদণ্ডকে।
‘‘Uttarāraṇiyaṃ vāpi, dhanuke pelladaṇḍake;
মালাকম্মাদি যং কিঞ্চি, ৰণ্ণমট্ঠং ন ৰট্টতি॥
Mālākammādi yaṃ kiñci, vaṇṇamaṭṭhaṃ na vaṭṭati.
‘‘সণ্ডাসে দন্তকট্ঠানং, তথা ছেদনৰাসিযা।
‘‘Saṇḍāse dantakaṭṭhānaṃ, tathā chedanavāsiyā;
দ্ৰীসু পস্সেসু লোহেন, বন্ধিতুং পন ৰট্টতি॥
Dvīsu passesu lohena, bandhituṃ pana vaṭṭati.
‘‘তথা কত্তরদণ্ডেপি, চিত্তকম্মং ন ৰট্টতি।
‘‘Tathā kattaradaṇḍepi, cittakammaṃ na vaṭṭati;
ৰট্টলেখাৰ ৰট্টন্তি, একা ৰা দ্ৰেপি হেট্ঠতো॥
Vaṭṭalekhāva vaṭṭanti, ekā vā dvepi heṭṭhato.
‘‘ৰিসাণে নাল়িযং ৰাপি, তথেৰামণ্ডসারকে।
‘‘Visāṇe nāḷiyaṃ vāpi, tathevāmaṇḍasārake;
তেলভাজনকে সব্বং, ৰণ্ণমট্ঠং তু ৰট্টতী’’তি॥
Telabhājanake sabbaṃ, vaṇṇamaṭṭhaṃ tu vaṭṭatī’’ti.
টীকাযম্পি অরণিসহিতে ভন্তকিচ্চকরো দণ্ডো উত্তরারণী নাম। ৰাপীতি পি-সদ্দেন অধরারণিং সঙ্গণ্হাতি। উদুক্খলদণ্ডস্সেতং অধিৰচনং। অঞ্ছনকযন্তধনু ধনুকং নাম। মুসলমত্থকপীল়নদণ্ডকো পেল্লদণ্ডকো নাম। সণ্ডাসেতি অগ্গিসণ্ডাসে। দন্তকট্ঠানং ছেদনৰাসিযা তথা যং কিঞ্চি ৰণ্ণমট্ঠং ন ৰট্টতীতি সম্বন্ধো। দ্ৰীসু পস্সেসূতি ৰাসিযা উভোসু পস্সেসু। লোহেনাতি কপ্পিযলোহেন। বন্ধিতুং ৰট্টতীতি উজুকমেৰ ৰা চতুরস্সং ৰা অট্ঠংসং ৰা বন্ধিতুং ৰট্টতি। সণ্ডাসেতি অগ্গিসণ্ডাসেতি নিস্সন্দেহে ৰুত্তং। অট্ঠকথাযং পনেত্থ সূচিসণ্ডাসো দস্সিতো । হেট্ঠাতি হেট্ঠা অযোপট্টৰলযে। ‘‘উপরি অহিচ্ছত্তকমকুল়মত্ত’’ন্তি অট্ঠকথাযং ৰুত্তং। ৰিসাণেতি তেলাসিঞ্চনকগৰযমহিংসাদিসিঙ্গে। নাল়িযং ৰাপীতি ৰেল়ুনাল়িকাদিনাল়িযং। অপি-সদ্দেন অলাবুং সঙ্গণ্হাতি। আমণ্ডসারকেতি আমলকচুণ্ণমযতেলঘটে । তেলভাজনকেতি ৰুত্তপ্পকারেযেৰ তেলভাজনে। সব্বং ৰণ্ণমট্ঠং ৰট্টতীতি পুমিত্থিরূপরহিতং মালাকম্মাদি সব্বং ৰণ্ণমট্ঠং ৰট্টতীতি আগতং।
Ṭīkāyampi araṇisahite bhantakiccakaro daṇḍo uttarāraṇī nāma. Vāpīti pi-saddena adharāraṇiṃ saṅgaṇhāti. Udukkhaladaṇḍassetaṃ adhivacanaṃ. Añchanakayantadhanu dhanukaṃ nāma. Musalamatthakapīḷanadaṇḍako pelladaṇḍako nāma. Saṇḍāseti aggisaṇḍāse. Dantakaṭṭhānaṃ chedanavāsiyā tathā yaṃ kiñci vaṇṇamaṭṭhaṃ na vaṭṭatīti sambandho. Dvīsu passesūti vāsiyā ubhosu passesu. Lohenāti kappiyalohena. Bandhituṃ vaṭṭatīti ujukameva vā caturassaṃ vā aṭṭhaṃsaṃ vā bandhituṃ vaṭṭati. Saṇḍāseti aggisaṇḍāseti nissandehe vuttaṃ. Aṭṭhakathāyaṃ panettha sūcisaṇḍāso dassito . Heṭṭhāti heṭṭhā ayopaṭṭavalaye. ‘‘Upari ahicchattakamakuḷamatta’’nti aṭṭhakathāyaṃ vuttaṃ. Visāṇeti telāsiñcanakagavayamahiṃsādisiṅge. Nāḷiyaṃ vāpīti veḷunāḷikādināḷiyaṃ. Api-saddena alābuṃ saṅgaṇhāti. Āmaṇḍasāraketi āmalakacuṇṇamayatelaghaṭe . Telabhājanaketi vuttappakāreyeva telabhājane. Sabbaṃ vaṇṇamaṭṭhaṃ vaṭṭatīti pumitthirūparahitaṃ mālākammādi sabbaṃ vaṇṇamaṭṭhaṃ vaṭṭatīti āgataṃ.
ভূমত্থরণেতি কটসারাদিমযে পরিকম্মকতায ভূমিযা অত্থরিতব্বঅত্থরণে। পানীযঘটেতি ইমিনা সব্বভাজনে সঙ্গণ্হাতি। সব্বং…পে॰… ৰট্টতীতি যথাৰুত্তেসু মঞ্চাদীসু ইত্থিপুরিসরূপম্পি ৰট্টতি। তেলভাজনেসুযেৰ ইত্থিপুরিসরূপানং পটিক্খিপিতত্তা তেলভাজনেন সহ অগণেত্ৰা ৰিসুং মঞ্চাদীনং গহিতত্তা চাতি ৰদন্তি। কিঞ্চাপি ৰদন্তি, এতেসং পন মঞ্চাদীনং হত্থেন আমসিতব্বভণ্ডত্তা ইত্থিরূপমেত্থ ন ৰট্টতীতি গহেতব্বং। ৰজিরবুদ্ধিটীকাযং (ৰজির॰ টী॰ পারাজিক ৮৫) পন ‘‘তালৰণ্টবীজনিআদীসু ৰণ্ণমট্ঠকম্মং ৰট্টতী’’তি ৰুত্তং। কিঞ্চাপি তানি কুঞ্চিকা ৰিয পরিহরণীযানি, অথ খো উচ্চাৰচানি ন ধারেতব্বানীতি পটিক্খেপাভাৰতো ৰুত্তং। কেৰলঞ্হি তানি ‘‘অনুজানামি ভিক্খৰে ৰিধূপনঞ্চ তালৰণ্টঞ্চা’’তিআদিনা ৰুত্তানি। গণ্ঠিপদে পন ‘‘তেলভাজনেসু ৰণ্ণমট্ঠকম্মং ৰট্টতি, সেনাসনপরিক্খারত্তা ৰুত্ত’’ন্তি ৰুত্তং। আচরিযবুদ্ধদত্তত্থেরেনপি ৰুত্তমেৰ –
Bhūmattharaṇeti kaṭasārādimaye parikammakatāya bhūmiyā attharitabbaattharaṇe. Pānīyaghaṭeti iminā sabbabhājane saṅgaṇhāti. Sabbaṃ…pe… vaṭṭatīti yathāvuttesu mañcādīsu itthipurisarūpampi vaṭṭati. Telabhājanesuyeva itthipurisarūpānaṃ paṭikkhipitattā telabhājanena saha agaṇetvā visuṃ mañcādīnaṃ gahitattā cāti vadanti. Kiñcāpi vadanti, etesaṃ pana mañcādīnaṃ hatthena āmasitabbabhaṇḍattā itthirūpamettha na vaṭṭatīti gahetabbaṃ. Vajirabuddhiṭīkāyaṃ (vajira. ṭī. pārājika 85) pana ‘‘tālavaṇṭabījaniādīsu vaṇṇamaṭṭhakammaṃ vaṭṭatī’’ti vuttaṃ. Kiñcāpi tāni kuñcikā viya pariharaṇīyāni, atha kho uccāvacāni na dhāretabbānīti paṭikkhepābhāvato vuttaṃ. Kevalañhi tāni ‘‘anujānāmi bhikkhave vidhūpanañca tālavaṇṭañcā’’tiādinā vuttāni. Gaṇṭhipade pana ‘‘telabhājanesu vaṇṇamaṭṭhakammaṃ vaṭṭati, senāsanaparikkhārattā vutta’’nti vuttaṃ. Ācariyabuddhadattattherenapi vuttameva –
‘‘পানীযস্স উল়ুঙ্কেপি, দোণিযং রজনস্সপি।
‘‘Pānīyassa uḷuṅkepi, doṇiyaṃ rajanassapi;
ঘটে ফলকপীঠেপি, ৰলযাধারকাদিকে॥
Ghaṭe phalakapīṭhepi, valayādhārakādike.
‘‘তথা পত্তপিধানে চ, তালৰণ্টে চ বীজনে।
‘‘Tathā pattapidhāne ca, tālavaṇṭe ca bījane;
পাদপুঞ্ছনিযং ৰাপি, সম্মুঞ্জনিযমেৰ চ॥
Pādapuñchaniyaṃ vāpi, sammuñjaniyameva ca.
‘‘মঞ্চে ভূমত্থরে পীঠে, ভিসিবিম্বোহনেসু চ।
‘‘Mañce bhūmatthare pīṭhe, bhisibimbohanesu ca;
মালাকম্মাদিকং চিত্তং, সব্বমেৰ চ ৰট্টতী’’তি॥
Mālākammādikaṃ cittaṃ, sabbameva ca vaṭṭatī’’ti.
১৪. এৰং সমণপরিক্খারেসু কপ্পিযাকপ্পিযং কথেত্ৰা ইদানি সেনাসনে কথেতুং ‘‘সেনাসনে পনা’’ত্যাদিমাহ। এত্থ পন-সদ্দো ৰিসেসজোতকো। তেন সব্বরতনমযম্পি ৰণ্ণমট্ঠকম্মং ৰট্টতি, কিমঙ্গং পন অঞ্ঞৰণ্ণমট্ঠকম্মন্তি অত্থং জোতেতি। যদি এৰং কিস্মিঞ্চি পটিসেধেতব্বে সন্তেপি তথা ৰত্তব্বং সিযাতি আহ ‘‘সেনাসনে কিঞ্চি পটিসেধেতব্বং নত্থী’’তি। ৰুত্তম্পি চেতং আচরিযবুদ্ধদত্তত্থেরেন –
14. Evaṃ samaṇaparikkhāresu kappiyākappiyaṃ kathetvā idāni senāsane kathetuṃ ‘‘senāsane panā’’tyādimāha. Ettha pana-saddo visesajotako. Tena sabbaratanamayampi vaṇṇamaṭṭhakammaṃ vaṭṭati, kimaṅgaṃ pana aññavaṇṇamaṭṭhakammanti atthaṃ joteti. Yadi evaṃ kismiñci paṭisedhetabbe santepi tathā vattabbaṃ siyāti āha ‘‘senāsane kiñci paṭisedhetabbaṃ natthī’’ti. Vuttampi cetaṃ ācariyabuddhadattattherena –
‘‘নানামণিমযত্থম্ভ-কৰাটদ্ৰারভিত্তিকং ।
‘‘Nānāmaṇimayatthambha-kavāṭadvārabhittikaṃ ;
সেনাসনমনুঞ্ঞাতং, কা কথা ৰণ্ণমট্ঠকে॥
Senāsanamanuññātaṃ, kā kathā vaṇṇamaṭṭhake.
‘‘সোৰণ্ণিযং দ্ৰারকৰাটবদ্ধং।
‘‘Sovaṇṇiyaṃ dvārakavāṭabaddhaṃ;
সুৰণ্ণনানামণিভিত্তিভূমিং।
Suvaṇṇanānāmaṇibhittibhūmiṃ;
ন কিঞ্চি একম্পি নিসেধনীযং।
Na kiñci ekampi nisedhanīyaṃ;
সেনাসনং ৰট্টতি সব্বমেৰা’’তি॥
Senāsanaṃ vaṭṭati sabbamevā’’ti.
সমন্তপাসাদিকাযম্পি পঠমসঙ্ঘাদিসেসৰণ্ণনাযং (পারা॰ অট্ঠ॰ ২.২৮১) ‘‘সেনাসনপরিভোগো পন সব্বকপ্পিযো, তস্মা জাতরূপরজতমযা সব্বেপি সেনাসনপরিক্খারা আমাসা। ভিক্খূনং ধম্মৰিনযৰণ্ণনট্ঠানে রতনমণ্ডপে করোন্তি ফলিকত্থম্ভে রতনদামপটিমণ্ডিতে। তত্থ সব্বুপকরণানি ভিক্খূনং পটিজগ্গিতুং ৰট্টন্তী’’তি আগতং। তস্সা ৰণ্ণনাযং পন ৰিমতিৰিনোদনিযং (ৰি॰ ৰি॰ টী॰ ১.২৮১) ‘‘সব্বকপ্পিযোতি যথাৰুত্তসুৰণ্ণাদিমযানং সেনাসনপরিক্খারানং আমসনগোপনাদিৰসেন পরিভোগো সব্বথা কপ্পিযোতি অধিপ্পাযো। তেনাহ ‘তস্মা’তিআদি। ‘ভিক্খূনং ধম্মৰিনযৰণ্ণনট্ঠানে’তি ৰুত্তত্তা সঙ্ঘিকমেৰ সুৰণ্ণমযং সেনাসনং সেনাসনপরিক্খারা চ ৰট্টন্তি, ন পুগ্গলিকানীতি ৰেদিতব্ব’’ন্তি ৰণ্ণিতং।
Samantapāsādikāyampi paṭhamasaṅghādisesavaṇṇanāyaṃ (pārā. aṭṭha. 2.281) ‘‘senāsanaparibhogo pana sabbakappiyo, tasmā jātarūparajatamayā sabbepi senāsanaparikkhārā āmāsā. Bhikkhūnaṃ dhammavinayavaṇṇanaṭṭhāne ratanamaṇḍape karonti phalikatthambhe ratanadāmapaṭimaṇḍite. Tattha sabbupakaraṇāni bhikkhūnaṃ paṭijaggituṃ vaṭṭantī’’ti āgataṃ. Tassā vaṇṇanāyaṃ pana vimativinodaniyaṃ (vi. vi. ṭī. 1.281) ‘‘sabbakappiyoti yathāvuttasuvaṇṇādimayānaṃ senāsanaparikkhārānaṃ āmasanagopanādivasena paribhogo sabbathā kappiyoti adhippāyo. Tenāha ‘tasmā’tiādi. ‘Bhikkhūnaṃ dhammavinayavaṇṇanaṭṭhāne’ti vuttattā saṅghikameva suvaṇṇamayaṃ senāsanaṃ senāsanaparikkhārā ca vaṭṭanti, na puggalikānīti veditabba’’nti vaṇṇitaṃ.
সেনাসনক্খন্ধকৰণ্ণনাযম্পি সমন্তপাসাদিকাযং (চূল়ৰ॰ অট্ঠ॰ ৩২০) ‘সব্বং পাসাদপরিভোগন্তি সুৰণ্ণরজতাদিৰিচিত্রানি কৰাটানি মঞ্চপীঠানি তালৰণ্টানি সুৰণ্ণরজতমযপানীযঘটপানীযসরাৰানি যং কিঞ্চি চিত্তকম্মকতং, সব্বং ৰট্টতি। পাসাদস্স দাসিদাসং খেত্তং ৰত্থুং গোমহিংসং দেমাতি ৰদন্তি, পাটেক্কং গহণকিচ্চং নত্থি, পাসাদে পটিগ্গহিতে পটিগ্গহিতমেৰ হোতি। গোনকাদীনি সঙ্ঘিকৰিহারে ৰা পুগ্গলিকৰিহারে ৰা মঞ্চপীঠেসু অত্থরিত্ৰা পরিভুঞ্জিতুং ন ৰট্টন্তি, ধম্মাসনে পন গিহিৰিকতনীহারেন লব্ভন্তি, তত্রাপি নিপজ্জিতুং ন ৰট্টতী’’তি আগতং। তস্সা ৰণ্ণনাযং পন ৰিমতিৰিনোদনিযং (ৰি॰ ৰি॰ টী॰ চূল়ৰগ্গ ২.৩২০) ‘‘সুৰণ্ণরজতাদিৰিচিত্রানীতি সঙ্ঘিকসেনাসনং সন্ধায ৰুত্তং, পুগ্গলিকং পন সুৰণ্ণাদিৰিচিত্রং ভিক্খুস্স সম্পটিচ্ছিতুমেৰ ন ৰট্টতি ‘ন ত্ৰেৰাহং ভিক্খৰে কেনচি পরিযাযেন জাতরূপরজতং সাদিতব্ব’ন্তি (মহাৰ॰ ২৯৯) ৰুত্তত্তা, তেনেৰেত্থ অট্ঠকথাযং ‘সঙ্ঘিকৰিহারে ৰা পুগ্গলিকৰিহারে ৰা’তি ন ৰুত্তং, গোনকাদিঅকপ্পিযভণ্ডৰিসযেৰ এৰং ৰুত্তং, একভিক্খুস্সপি তেসং গহণে দোসাভাৰা’’তি ৰণ্ণিতং।
Senāsanakkhandhakavaṇṇanāyampi samantapāsādikāyaṃ (cūḷava. aṭṭha. 320) ‘sabbaṃ pāsādaparibhoganti suvaṇṇarajatādivicitrāni kavāṭāni mañcapīṭhāni tālavaṇṭāni suvaṇṇarajatamayapānīyaghaṭapānīyasarāvāni yaṃ kiñci cittakammakataṃ, sabbaṃ vaṭṭati. Pāsādassa dāsidāsaṃ khettaṃ vatthuṃ gomahiṃsaṃ demāti vadanti, pāṭekkaṃ gahaṇakiccaṃ natthi, pāsāde paṭiggahite paṭiggahitameva hoti. Gonakādīni saṅghikavihāre vā puggalikavihāre vā mañcapīṭhesu attharitvā paribhuñjituṃ na vaṭṭanti, dhammāsane pana gihivikatanīhārena labbhanti, tatrāpi nipajjituṃ na vaṭṭatī’’ti āgataṃ. Tassā vaṇṇanāyaṃ pana vimativinodaniyaṃ (vi. vi. ṭī. cūḷavagga 2.320) ‘‘suvaṇṇarajatādivicitrānīti saṅghikasenāsanaṃ sandhāya vuttaṃ, puggalikaṃ pana suvaṇṇādivicitraṃ bhikkhussa sampaṭicchitumeva na vaṭṭati ‘na tvevāhaṃ bhikkhave kenaci pariyāyena jātarūparajataṃ sāditabba’nti (mahāva. 299) vuttattā, tenevettha aṭṭhakathāyaṃ ‘saṅghikavihāre vā puggalikavihāre vā’ti na vuttaṃ, gonakādiakappiyabhaṇḍavisayeva evaṃ vuttaṃ, ekabhikkhussapi tesaṃ gahaṇe dosābhāvā’’ti vaṇṇitaṃ.
তস্মিংযেৰ খন্ধকে অট্ঠকথাযং (চূল়ৰ॰ অট্ঠ॰ ৩২১) ‘‘সচেপি রাজরাজমহামত্তাদযো একপ্পহারেনেৰ মঞ্চসতং ৰা মঞ্চসহস্সং ৰা দেন্তি, সব্বে কপ্পিযমঞ্চা সম্পটিচ্ছিতব্বা, সম্পটিচ্ছিত্ৰা ৰুড্ঢপটিপাটিযা সঙ্ঘিকপরিভোগেন পরিভুঞ্জথাতি দাতব্বা, পুগ্গলিকৰসেন ন দাতব্বা’’তি আগতং। তস্সা ৰণ্ণনাযংযেৰ ৰিমতিৰিনোদনিযং ‘‘কপ্পিযমঞ্চা সম্পটিচ্ছিতব্বাতি ইমিনা সুৰণ্ণাদিৰিচিত্তং অকপ্পিযমঞ্চং ‘সঙ্ঘস্সা’তি ৰুত্তেপি সম্পটিচ্ছিতুং ন ৰট্টতীতি দস্সেতি, ‘ৰিহারস্স দেমা’তি ৰুত্তে সঙ্ঘস্সেৰ ৰট্টতি, ন পুগ্গলস্স খেত্তাদি ৰিযাতি দট্ঠব্ব’’ন্তি ৰণ্ণিতং, তস্মা ভগৰতো আণং সম্পটিচ্ছন্তেহি লজ্জিপেসলবহুস্সুতসিক্খাকামভূতেহি ভিক্খূহি সুট্ঠু মনসিকাতব্বমিদং ঠানং।
Tasmiṃyeva khandhake aṭṭhakathāyaṃ (cūḷava. aṭṭha. 321) ‘‘sacepi rājarājamahāmattādayo ekappahāreneva mañcasataṃ vā mañcasahassaṃ vā denti, sabbe kappiyamañcā sampaṭicchitabbā, sampaṭicchitvā vuḍḍhapaṭipāṭiyā saṅghikaparibhogena paribhuñjathāti dātabbā, puggalikavasena na dātabbā’’ti āgataṃ. Tassā vaṇṇanāyaṃyeva vimativinodaniyaṃ ‘‘kappiyamañcā sampaṭicchitabbāti iminā suvaṇṇādivicittaṃ akappiyamañcaṃ ‘saṅghassā’ti vuttepi sampaṭicchituṃ na vaṭṭatīti dasseti, ‘vihārassa demā’ti vutte saṅghasseva vaṭṭati, na puggalassa khettādi viyāti daṭṭhabba’’nti vaṇṇitaṃ, tasmā bhagavato āṇaṃ sampaṭicchantehi lajjipesalabahussutasikkhākāmabhūtehi bhikkhūhi suṭṭhu manasikātabbamidaṃ ṭhānaṃ.
ননু চ সেনাসনে ৰিরুদ্ধসেনাসনং নাম পটিসেধেতব্বং অত্থি, অথ কস্মা ‘‘সেনাসনে কিঞ্চি পটিসেধেতব্বং নত্থী’’তি ৰুত্তন্তি চোদনং সন্ধাযাহ ‘‘অঞ্ঞত্র ৰিরুদ্ধসেনাসনা’’তি। তস্সত্থো – ৰিরুদ্ধসেনাসনা ৰিরুদ্ধসেনাসনং অঞ্ঞত্র ঠপেত্ৰা অঞ্ঞং ৰণ্ণমট্ঠকম্মাদিকম্মং সন্ধায সেনাসনে কিঞ্চি পটিসেধেতব্বং নত্থীতি ৰুত্তং, ন তদভাৰোতি। যদি এৰং তং ৰিরুদ্ধসেনাসনং আচরিযেন ৰত্তব্বং, কতমং ৰিরুদ্ধসেনাসনং নামাতি পুচ্ছাযমাহ ‘‘ৰিরুদ্ধ…পে॰… ৰুচ্চতী’’তি। তত্থ অঞ্ঞেসন্তি সীমস্সামিকানং। রাজৰল্লভেহীতি লজ্জিপেসলানং উপোসথাদিঅন্তরাযকরা অলজ্জিনো ভিন্নলদ্ধিকা চ ভিক্খূ অধিপ্পেতা তেহি সহ উপোসথাদিকরণাযোগতো। তেন চ ‘‘সীমাযা’’তি ৰুত্তং। তেসং লজ্জিপরিসাতি তেসং সীমস্সামিকানং অনুবলং দাতুং সমত্থা লজ্জিপরিসা। ভিক্খূহি কতন্তি যং অলজ্জীনং সেনাসনভেদনাদিকং লজ্জিভিক্খূহি কতং, তং সব্বং সুকতমেৰ অলজ্জিনিগ্গহত্থায পৰত্তেতব্বতো।
Nanu ca senāsane viruddhasenāsanaṃ nāma paṭisedhetabbaṃ atthi, atha kasmā ‘‘senāsane kiñci paṭisedhetabbaṃ natthī’’ti vuttanti codanaṃ sandhāyāha ‘‘aññatra viruddhasenāsanā’’ti. Tassattho – viruddhasenāsanā viruddhasenāsanaṃ aññatra ṭhapetvā aññaṃ vaṇṇamaṭṭhakammādikammaṃ sandhāya senāsane kiñci paṭisedhetabbaṃ natthīti vuttaṃ, na tadabhāvoti. Yadi evaṃ taṃ viruddhasenāsanaṃ ācariyena vattabbaṃ, katamaṃ viruddhasenāsanaṃ nāmāti pucchāyamāha ‘‘viruddha…pe… vuccatī’’ti. Tattha aññesanti sīmassāmikānaṃ. Rājavallabhehīti lajjipesalānaṃ uposathādiantarāyakarā alajjino bhinnaladdhikā ca bhikkhū adhippetā tehi saha uposathādikaraṇāyogato. Tena ca ‘‘sīmāyā’’ti vuttaṃ. Tesaṃ lajjiparisāti tesaṃ sīmassāmikānaṃ anubalaṃ dātuṃ samatthā lajjiparisā. Bhikkhūhi katanti yaṃ alajjīnaṃ senāsanabhedanādikaṃ lajjibhikkhūhi kataṃ, taṃ sabbaṃ sukatameva alajjiniggahatthāya pavattetabbato.
এত্থ চ সিযা – ‘‘অঞ্ঞেসং সীমাযা’’তি অট্ঠকথাযং ৰুত্তং, সীমা নাম বহুৰিধা, কতরসীমং সন্ধাযাতি? বদ্ধসীমং সন্ধাযাতি দট্ঠব্বং। কথং ৰিঞ্ঞাযতীতি চে? ‘‘মা অম্হাকং উপোসথপৰারণানং অন্তরাযমকত্থা’’তি অট্ঠকথাযমেৰ ৰুত্তত্তা, সারত্থদীপনিযম্পি (সারত্থ॰টী॰ ২.৮৫) ‘‘উপোসথপৰারণানং অন্তরাযকরা অলজ্জিনো রাজকুলূপকা ৰুচ্চন্তী’’তি ৰুত্তত্তা, উপোসথাদিৰিনযকম্মখেত্তভূতায এৰ সীমায ইধ অধিপ্পেতত্তা । যদি এৰং গামসীমসত্তব্ভন্তরসীমউদকুক্খেপসীমাযোপি তংখেত্তভূতা এৰ, তস্মা তাপি সন্ধাযাতি ৰত্তব্বন্তি? ন ৰত্তব্বং তাসং অবদ্ধসীমত্তা, ন তে তাসং সামিকা, বদ্ধসীমাযেৰ ভিক্খূনং কিরিযায সিদ্ধত্তা তাসংযেৰ তে সামিকা। তেন ৰুত্তং ‘‘যং পন সীমস্সামিকেহি ভিক্খূহী’’তি। যং পন ৰদন্তি ‘‘উপচারসীমাপি তংখেত্তভূতা’’তি, তং ন গহেতব্বং, তস্সা তদক্খেত্তভাৰং উপরি সীমাৰিনিচ্ছযকথাদীসু (ৰি॰ সঙ্গ॰ অট্ঠ॰ ১৫৬ আদযো) কথযিস্সাম। অপিচ গামসীমায অঞ্ঞেসং সেনাসনকরণস্স পটিসেধিতুমযুত্তত্তা সত্তব্ভন্তরউদকুক্খেপসীমানঞ্চ সব্বদা অতিট্ঠনতো বদ্ধসীমাযেৰ অধিপ্পেতাতি ৰিঞ্ঞাযতীতি।
Ettha ca siyā – ‘‘aññesaṃ sīmāyā’’ti aṭṭhakathāyaṃ vuttaṃ, sīmā nāma bahuvidhā, katarasīmaṃ sandhāyāti? Baddhasīmaṃ sandhāyāti daṭṭhabbaṃ. Kathaṃ viññāyatīti ce? ‘‘Mā amhākaṃ uposathapavāraṇānaṃ antarāyamakatthā’’ti aṭṭhakathāyameva vuttattā, sāratthadīpaniyampi (sārattha.ṭī. 2.85) ‘‘uposathapavāraṇānaṃ antarāyakarā alajjino rājakulūpakā vuccantī’’ti vuttattā, uposathādivinayakammakhettabhūtāya eva sīmāya idha adhippetattā . Yadi evaṃ gāmasīmasattabbhantarasīmaudakukkhepasīmāyopi taṃkhettabhūtā eva, tasmā tāpi sandhāyāti vattabbanti? Na vattabbaṃ tāsaṃ abaddhasīmattā, na te tāsaṃ sāmikā, baddhasīmāyeva bhikkhūnaṃ kiriyāya siddhattā tāsaṃyeva te sāmikā. Tena vuttaṃ ‘‘yaṃ pana sīmassāmikehi bhikkhūhī’’ti. Yaṃ pana vadanti ‘‘upacārasīmāpi taṃkhettabhūtā’’ti, taṃ na gahetabbaṃ, tassā tadakkhettabhāvaṃ upari sīmāvinicchayakathādīsu (vi. saṅga. aṭṭha. 156 ādayo) kathayissāma. Apica gāmasīmāya aññesaṃ senāsanakaraṇassa paṭisedhitumayuttattā sattabbhantaraudakukkhepasīmānañca sabbadā atiṭṭhanato baddhasīmāyeva adhippetāti viññāyatīti.
ছিন্দাপেয্য ৰা ভিন্দাপেয্য ৰা, অনুপৰজ্জোতি ইদং সব্বমত্তিকামযকুটী ৰিয সব্বথা অনুপযোগারহং সন্ধায ৰুত্তং। যং পন পঞ্চৰণ্ণসুত্তেহি ৰিনদ্ধছত্তাদিকং, তত্থ অকপ্পিযভাগোৰ ছিন্দিতব্বো, ন তদৰসেসো, তস্স কপ্পিযত্তাতি ছিন্দন্তো উপৰজ্জোৰ হোতি। তেনেৰ ৰুত্তং ‘‘ঘটকম্পি ৰাল়রূপম্পি ছিন্দিত্ৰা ধারেতব্ব’’ন্তিআদি।
Chindāpeyya vā bhindāpeyya vā, anupavajjoti idaṃ sabbamattikāmayakuṭī viya sabbathā anupayogārahaṃ sandhāya vuttaṃ. Yaṃ pana pañcavaṇṇasuttehi vinaddhachattādikaṃ, tattha akappiyabhāgova chinditabbo, na tadavaseso, tassa kappiyattāti chindanto upavajjova hoti. Teneva vuttaṃ ‘‘ghaṭakampi vāḷarūpampi chinditvā dhāretabba’’ntiādi.
ইতি ৰিনযসঙ্গহসংৰণ্ণনাভূতে ৰিনযালঙ্কারে
Iti vinayasaṅgahasaṃvaṇṇanābhūte vinayālaṅkāre
পরিক্খারৰিনিচ্ছযকথালঙ্কারো নাম
Parikkhāravinicchayakathālaṅkāro nāma
দুতিযো পরিচ্ছেদো।
Dutiyo paricchedo.
