| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
ஸேகி²யகண்ட³ங்
Sekhiyakaṇḍaṃ
1. பரிமண்ட³லஸிக்கா²பத³வண்ணனா
1. Parimaṇḍalasikkhāpadavaṇṇanā
‘‘அந்தரக⁴ரே’’தி விஸேஸெத்வா ந வுத்தத்தா ‘‘ஆராமேபி அந்தரக⁴ரேபி ஸப்³ப³த்தா²’’தி வுத்தங். ஆராமேபீதி பு³த்³தூ⁴பட்டா²னாதி³காலங் ஸந்தா⁴ய வுத்தங். யதா² ‘‘தத்ரிமே சத்தாரோ பாராஜிகா த⁴ம்மா உத்³தே³ஸங் ஆக³ச்ச²ந்தீ’’திஆதி³னா தத்த² தத்த² பரிச்சே²தோ³ கதோ, ஏவமெத்தா²பி ‘‘தத்ரிமே பஞ்சஸத்ததி ஸேகி²யா த⁴ம்மா உத்³தே³ஸங் ஆக³ச்ச²ந்தீ’’தி கஸ்மா பரிச்சே²தோ³ ந கதோதி ஆஹ ‘‘எத்த² சா’’திஆதி³. வத்தக்க²ந்த⁴கே வுத்தவத்தானிபீதி ஆக³ந்துகாவாஸிகக³மிகானுமோத³னப⁴த்தக்³க³பிண்ட³சாரிகாரஞ்ஞஸேனாஸனஜந்தாக⁴ரவச்சகுடிஉபஜ்ஜா²சரியஸத்³தி⁴விஹாரிகஅந்தேவாஸிகவத்தானி. இத³ஞ்ச நித³ஸ்ஸனமத்தங் அஞ்ஞேஸம்பி க²ந்த⁴கவத்தானங் எத்தே²வ ஸங்க³ஹஸ்ஸ இச்சி²தப்³ப³த்தா. அயஞ்ஹெத்த² அதி⁴ப்பாயோ – ஸேகி²யக்³க³ஹணேன செத்த² வத்தக்க²ந்த⁴காதீ³ஸு (சூளவ॰ 356 ஆத³யோ) ஆக³தவத்தாதீ³னம்பி க³ஹணங். தேபி ஹி ஸிக்கி²தப்³ப³ட்டே²ன ‘‘ஸேகி²யா’’தி இச்சி²தா. தஸ்மா மாதிகாயங் பாராஜிகாதீ³னங் விய ஸேகி²யானங் பரிச்சே²தோ³ ந கதோதி. ந கேவலங் வத்தக்க²ந்த⁴காதீ³ஸு (சூளவ॰ 356 ஆத³யோ) ஆக³தவத்தாதீ³னங் க³ஹணத்த²மேவாதி ஆஹ ‘‘சாரித்தவினயத³ஸ்ஸனத்த²ஞ்சா’’தி. எத்தா²பி பரிச்சே²தோ³ ந கதோதி ஆனெத்வா யோஜேதப்³ப³ங். மாதிகாய ‘‘து³க்கட’’ந்தி அவுத்தே கத²ங் பனெத்த² து³க்கடந்தி வேதி³தப்³ப³ந்தி ஆஹ ‘‘யோ பனா’’திஆதி³.
‘‘Antaraghare’’ti visesetvā na vuttattā ‘‘ārāmepi antaragharepi sabbatthā’’ti vuttaṃ. Ārāmepīti buddhūpaṭṭhānādikālaṃ sandhāya vuttaṃ. Yathā ‘‘tatrime cattāro pārājikā dhammā uddesaṃ āgacchantī’’tiādinā tattha tattha paricchedo kato, evametthāpi ‘‘tatrime pañcasattati sekhiyā dhammā uddesaṃ āgacchantī’’ti kasmā paricchedo na katoti āha ‘‘ettha cā’’tiādi. Vattakkhandhake vuttavattānipīti āgantukāvāsikagamikānumodanabhattaggapiṇḍacārikāraññasenāsanajantāgharavaccakuṭiupajjhācariyasaddhivihārikaantevāsikavattāni. Idañca nidassanamattaṃ aññesampi khandhakavattānaṃ ettheva saṅgahassa icchitabbattā. Ayañhettha adhippāyo – sekhiyaggahaṇena cettha vattakkhandhakādīsu (cūḷava. 356 ādayo) āgatavattādīnampi gahaṇaṃ. Tepi hi sikkhitabbaṭṭhena ‘‘sekhiyā’’ti icchitā. Tasmā mātikāyaṃ pārājikādīnaṃ viya sekhiyānaṃ paricchedo na katoti. Na kevalaṃ vattakkhandhakādīsu (cūḷava. 356 ādayo) āgatavattādīnaṃ gahaṇatthamevāti āha ‘‘cārittavinayadassanatthañcā’’ti. Etthāpi paricchedo na katoti ānetvā yojetabbaṃ. Mātikāya ‘‘dukkaṭa’’nti avutte kathaṃ panettha dukkaṭanti veditabbanti āha ‘‘yo panā’’tiādi.
அட்ட²ங்கு³லமத்தந்தி பகதங்கு³லேன அட்ட²ங்கு³லமத்தங். யோ பன ஸுக்க²ஜங்கோ⁴ வா மஹாபிண்டி³கமங்ஸோ வா ஹோதி, தஸ்ஸ ஸாருப்பத்தா²ய அட்ட²ங்கு³லாதி⁴கம்பி ஓதாரெத்வா நிவாஸேதுங் வட்டதி.
Aṭṭhaṅgulamattanti pakataṅgulena aṭṭhaṅgulamattaṃ. Yo pana sukkhajaṅgho vā mahāpiṇḍikamaṃso vā hoti, tassa sāruppatthāya aṭṭhaṅgulādhikampi otāretvā nivāsetuṃ vaṭṭati.
பாஸந்தந்தி பாஸஸ்ஸ அந்தங், த³ஸாமூலந்தி அத்தோ².
Pāsantanti pāsassa antaṃ, dasāmūlanti attho.
அபரிமண்ட³லங் நிவாஸெஸ்ஸாமீதி ‘‘புரதோ வா பச்ச²தோ வா ஓலம்பெ³த்வா நிவாஸெஸ்ஸாமீ’’தி ஏவங் அஸஞ்சிச்ச. கிஞ்சாபி பரிமண்ட³லங் நிவாஸேதுங் அஜானந்தஸ்ஸ அனாபத்தி, ததா²பி நிவாஸனவத்தங் ஸாது⁴கங் உக்³க³ஹேதப்³ப³மேவ. ஸஞ்சிச்ச அனுக்³க³ஹணஞ்ஹி அனாத³ரியங் ஸியாதி ஆஹ ‘‘அபிச நிவாஸனவத்தங் உக்³க³ஹேதப்³ப³’’ந்தி.
Aparimaṇḍalaṃ nivāsessāmīti ‘‘purato vā pacchato vā olambetvā nivāsessāmī’’ti evaṃ asañcicca. Kiñcāpi parimaṇḍalaṃ nivāsetuṃ ajānantassa anāpatti, tathāpi nivāsanavattaṃ sādhukaṃ uggahetabbameva. Sañcicca anuggahaṇañhi anādariyaṃ siyāti āha ‘‘apica nivāsanavattaṃ uggahetabba’’nti.
பரிமண்ட³லஸிக்கா²பத³வண்ணனா நிட்டி²தா.
Parimaṇḍalasikkhāpadavaṇṇanā niṭṭhitā.
