| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
সেখিযকণ্ডং
Sekhiyakaṇḍaṃ
১. পরিমণ্ডলসিক্খাপদৰণ্ণনা
1. Parimaṇḍalasikkhāpadavaṇṇanā
‘‘অন্তরঘরে’’তি ৰিসেসেত্ৰা ন ৰুত্তত্তা ‘‘আরামেপি অন্তরঘরেপি সব্বত্থা’’তি ৰুত্তং। আরামেপীতি বুদ্ধূপট্ঠানাদিকালং সন্ধায ৰুত্তং। যথা ‘‘তত্রিমে চত্তারো পারাজিকা ধম্মা উদ্দেসং আগচ্ছন্তী’’তিআদিনা তত্থ তত্থ পরিচ্ছেদো কতো, এৰমেত্থাপি ‘‘তত্রিমে পঞ্চসত্ততি সেখিযা ধম্মা উদ্দেসং আগচ্ছন্তী’’তি কস্মা পরিচ্ছেদো ন কতোতি আহ ‘‘এত্থ চা’’তিআদি। ৰত্তক্খন্ধকে ৰুত্তৰত্তানিপীতি আগন্তুকাৰাসিকগমিকানুমোদনভত্তগ্গপিণ্ডচারিকারঞ্ঞসেনাসনজন্তাঘরৰচ্চকুটিউপজ্ঝাচরিযসদ্ধিৰিহারিকঅন্তেৰাসিকৰত্তানি। ইদঞ্চ নিদস্সনমত্তং অঞ্ঞেসম্পি খন্ধকৰত্তানং এত্থেৰ সঙ্গহস্স ইচ্ছিতব্বত্তা। অযঞ্হেত্থ অধিপ্পাযো – সেখিযগ্গহণেন চেত্থ ৰত্তক্খন্ধকাদীসু (চূল়ৰ॰ ৩৫৬ আদযো) আগতৰত্তাদীনম্পি গহণং। তেপি হি সিক্খিতব্বট্ঠেন ‘‘সেখিযা’’তি ইচ্ছিতা। তস্মা মাতিকাযং পারাজিকাদীনং ৰিয সেখিযানং পরিচ্ছেদো ন কতোতি। ন কেৰলং ৰত্তক্খন্ধকাদীসু (চূল়ৰ॰ ৩৫৬ আদযো) আগতৰত্তাদীনং গহণত্থমেৰাতি আহ ‘‘চারিত্তৰিনযদস্সনত্থঞ্চা’’তি। এত্থাপি পরিচ্ছেদো ন কতোতি আনেত্ৰা যোজেতব্বং। মাতিকায ‘‘দুক্কট’’ন্তি অৰুত্তে কথং পনেত্থ দুক্কটন্তি ৰেদিতব্বন্তি আহ ‘‘যো পনা’’তিআদি।
‘‘Antaraghare’’ti visesetvā na vuttattā ‘‘ārāmepi antaragharepi sabbatthā’’ti vuttaṃ. Ārāmepīti buddhūpaṭṭhānādikālaṃ sandhāya vuttaṃ. Yathā ‘‘tatrime cattāro pārājikā dhammā uddesaṃ āgacchantī’’tiādinā tattha tattha paricchedo kato, evametthāpi ‘‘tatrime pañcasattati sekhiyā dhammā uddesaṃ āgacchantī’’ti kasmā paricchedo na katoti āha ‘‘ettha cā’’tiādi. Vattakkhandhake vuttavattānipīti āgantukāvāsikagamikānumodanabhattaggapiṇḍacārikāraññasenāsanajantāgharavaccakuṭiupajjhācariyasaddhivihārikaantevāsikavattāni. Idañca nidassanamattaṃ aññesampi khandhakavattānaṃ ettheva saṅgahassa icchitabbattā. Ayañhettha adhippāyo – sekhiyaggahaṇena cettha vattakkhandhakādīsu (cūḷava. 356 ādayo) āgatavattādīnampi gahaṇaṃ. Tepi hi sikkhitabbaṭṭhena ‘‘sekhiyā’’ti icchitā. Tasmā mātikāyaṃ pārājikādīnaṃ viya sekhiyānaṃ paricchedo na katoti. Na kevalaṃ vattakkhandhakādīsu (cūḷava. 356 ādayo) āgatavattādīnaṃ gahaṇatthamevāti āha ‘‘cārittavinayadassanatthañcā’’ti. Etthāpi paricchedo na katoti ānetvā yojetabbaṃ. Mātikāya ‘‘dukkaṭa’’nti avutte kathaṃ panettha dukkaṭanti veditabbanti āha ‘‘yo panā’’tiādi.
অট্ঠঙ্গুলমত্তন্তি পকতঙ্গুলেন অট্ঠঙ্গুলমত্তং। যো পন সুক্খজঙ্ঘো ৰা মহাপিণ্ডিকমংসো ৰা হোতি, তস্স সারুপ্পত্থায অট্ঠঙ্গুলাধিকম্পি ওতারেত্ৰা নিৰাসেতুং ৰট্টতি।
Aṭṭhaṅgulamattanti pakataṅgulena aṭṭhaṅgulamattaṃ. Yo pana sukkhajaṅgho vā mahāpiṇḍikamaṃso vā hoti, tassa sāruppatthāya aṭṭhaṅgulādhikampi otāretvā nivāsetuṃ vaṭṭati.
পাসন্তন্তি পাসস্স অন্তং, দসামূলন্তি অত্থো।
Pāsantanti pāsassa antaṃ, dasāmūlanti attho.
অপরিমণ্ডলং নিৰাসেস্সামীতি ‘‘পুরতো ৰা পচ্ছতো ৰা ওলম্বেত্ৰা নিৰাসেস্সামী’’তি এৰং অসঞ্চিচ্চ। কিঞ্চাপি পরিমণ্ডলং নিৰাসেতুং অজানন্তস্স অনাপত্তি, তথাপি নিৰাসনৰত্তং সাধুকং উগ্গহেতব্বমেৰ। সঞ্চিচ্চ অনুগ্গহণঞ্হি অনাদরিযং সিযাতি আহ ‘‘অপিচ নিৰাসনৰত্তং উগ্গহেতব্ব’’ন্তি।
Aparimaṇḍalaṃ nivāsessāmīti ‘‘purato vā pacchato vā olambetvā nivāsessāmī’’ti evaṃ asañcicca. Kiñcāpi parimaṇḍalaṃ nivāsetuṃ ajānantassa anāpatti, tathāpi nivāsanavattaṃ sādhukaṃ uggahetabbameva. Sañcicca anuggahaṇañhi anādariyaṃ siyāti āha ‘‘apica nivāsanavattaṃ uggahetabba’’nti.
পরিমণ্ডলসিক্খাপদৰণ্ণনা নিট্ঠিতা।
Parimaṇḍalasikkhāpadavaṇṇanā niṭṭhitā.
