| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
སེཁིཡཀཎྜཾ
Sekhiyakaṇḍaṃ
༡. པརིམཎྜལསིཀྑཱཔདཝཎྞནཱ
1. Parimaṇḍalasikkhāpadavaṇṇanā
‘‘ཨནྟརགྷརེ’’ཏི ཝིསེསེཏྭཱ ན ཝུཏྟཏྟཱ ‘‘ཨཱརཱམེཔི ཨནྟརགྷརེཔི སབྦཏྠཱ’’ཏི ཝུཏྟཾ། ཨཱརཱམེཔཱིཏི བུདྡྷཱུཔཊྛཱནཱདིཀཱལཾ སནྡྷཱཡ ཝུཏྟཾ། ཡཐཱ ‘‘ཏཏྲིམེ ཙཏྟཱརོ པཱརཱཛིཀཱ དྷམྨཱ ཨུདྡེསཾ ཨཱགཙྪནྟཱི’’ཏིཨཱདིནཱ ཏཏྠ ཏཏྠ པརིཙྪེདོ ཀཏོ, ཨེཝམེཏྠཱཔི ‘‘ཏཏྲིམེ པཉྩསཏྟཏི སེཁིཡཱ དྷམྨཱ ཨུདྡེསཾ ཨཱགཙྪནྟཱི’’ཏི ཀསྨཱ པརིཙྪེདོ ན ཀཏོཏི ཨཱཧ ‘‘ཨེཏྠ ཙཱ’’ཏིཨཱདི། ཝཏྟཀྑནྡྷཀེ ཝུཏྟཝཏྟཱནིཔཱིཏི ཨཱགནྟུཀཱཝཱསིཀགམིཀཱནུམོདནབྷཏྟགྒཔིཎྜཙཱརིཀཱརཉྙསེནཱསནཛནྟཱགྷརཝཙྩཀུཊིཨུཔཛ྄ཛྷཱཙརིཡསདྡྷིཝིཧཱརིཀཨནྟེཝཱསིཀཝཏྟཱནི། ཨིདཉྩ ནིདསྶནམཏྟཾ ཨཉྙེསམྤི ཁནྡྷཀཝཏྟཱནཾ ཨེཏྠེཝ སངྒཧསྶ ཨིཙྪིཏབྦཏྟཱ། ཨཡཉྷེཏྠ ཨདྷིཔྤཱཡོ – སེཁིཡགྒཧཎེན ཙེཏྠ ཝཏྟཀྑནྡྷཀཱདཱིསུ (ཙཱུལ༹ཝ॰ ༣༥༦ ཨཱདཡོ) ཨཱགཏཝཏྟཱདཱིནམྤི གཧཎཾ། ཏེཔི ཧི སིཀྑིཏབྦཊྛེན ‘‘སེཁིཡཱ’’ཏི ཨིཙྪིཏཱ། ཏསྨཱ མཱཏིཀཱཡཾ པཱརཱཛིཀཱདཱིནཾ ཝིཡ སེཁིཡཱནཾ པརིཙྪེདོ ན ཀཏོཏི། ན ཀེཝལཾ ཝཏྟཀྑནྡྷཀཱདཱིསུ (ཙཱུལ༹ཝ॰ ༣༥༦ ཨཱདཡོ) ཨཱགཏཝཏྟཱདཱིནཾ གཧཎཏྠམེཝཱཏི ཨཱཧ ‘‘ཙཱརིཏྟཝིནཡདསྶནཏྠཉྩཱ’’ཏི། ཨེཏྠཱཔི པརིཙྪེདོ ན ཀཏོཏི ཨཱནེཏྭཱ ཡོཛེཏབྦཾ། མཱཏིཀཱཡ ‘‘དུཀྐཊ’’ནྟི ཨཝུཏྟེ ཀཐཾ པནེཏྠ དུཀྐཊནྟི ཝེདིཏབྦནྟི ཨཱཧ ‘‘ཡོ པནཱ’’ཏིཨཱདི།
‘‘Antaraghare’’ti visesetvā na vuttattā ‘‘ārāmepi antaragharepi sabbatthā’’ti vuttaṃ. Ārāmepīti buddhūpaṭṭhānādikālaṃ sandhāya vuttaṃ. Yathā ‘‘tatrime cattāro pārājikā dhammā uddesaṃ āgacchantī’’tiādinā tattha tattha paricchedo kato, evametthāpi ‘‘tatrime pañcasattati sekhiyā dhammā uddesaṃ āgacchantī’’ti kasmā paricchedo na katoti āha ‘‘ettha cā’’tiādi. Vattakkhandhake vuttavattānipīti āgantukāvāsikagamikānumodanabhattaggapiṇḍacārikāraññasenāsanajantāgharavaccakuṭiupajjhācariyasaddhivihārikaantevāsikavattāni. Idañca nidassanamattaṃ aññesampi khandhakavattānaṃ ettheva saṅgahassa icchitabbattā. Ayañhettha adhippāyo – sekhiyaggahaṇena cettha vattakkhandhakādīsu (cūḷava. 356 ādayo) āgatavattādīnampi gahaṇaṃ. Tepi hi sikkhitabbaṭṭhena ‘‘sekhiyā’’ti icchitā. Tasmā mātikāyaṃ pārājikādīnaṃ viya sekhiyānaṃ paricchedo na katoti. Na kevalaṃ vattakkhandhakādīsu (cūḷava. 356 ādayo) āgatavattādīnaṃ gahaṇatthamevāti āha ‘‘cārittavinayadassanatthañcā’’ti. Etthāpi paricchedo na katoti ānetvā yojetabbaṃ. Mātikāya ‘‘dukkaṭa’’nti avutte kathaṃ panettha dukkaṭanti veditabbanti āha ‘‘yo panā’’tiādi.
ཨཊྛངྒུལམཏྟནྟི པཀཏངྒུལེན ཨཊྛངྒུལམཏྟཾ། ཡོ པན སུཀྑཛངྒྷོ ཝཱ མཧཱཔིཎྜིཀམཾསོ ཝཱ ཧོཏི, ཏསྶ སཱརུཔྤཏྠཱཡ ཨཊྛངྒུལཱདྷིཀམྤི ཨོཏཱརེཏྭཱ ནིཝཱསེཏུཾ ཝཊྚཏི།
Aṭṭhaṅgulamattanti pakataṅgulena aṭṭhaṅgulamattaṃ. Yo pana sukkhajaṅgho vā mahāpiṇḍikamaṃso vā hoti, tassa sāruppatthāya aṭṭhaṅgulādhikampi otāretvā nivāsetuṃ vaṭṭati.
པཱསནྟནྟི པཱསསྶ ཨནྟཾ, དསཱམཱུལནྟི ཨཏྠོ།
Pāsantanti pāsassa antaṃ, dasāmūlanti attho.
ཨཔརིམཎྜལཾ ནིཝཱསེསྶཱམཱིཏི ‘‘པུརཏོ ཝཱ པཙྪཏོ ཝཱ ཨོལམྦེཏྭཱ ནིཝཱསེསྶཱམཱི’’ཏི ཨེཝཾ ཨསཉྩིཙྩ། ཀིཉྩཱཔི པརིམཎྜལཾ ནིཝཱསེཏུཾ ཨཛཱནནྟསྶ ཨནཱཔཏྟི, ཏཐཱཔི ནིཝཱསནཝཏྟཾ སཱདྷུཀཾ ཨུགྒཧེཏབྦམེཝ། སཉྩིཙྩ ཨནུགྒཧཎཉྷི ཨནཱདརིཡཾ སིཡཱཏི ཨཱཧ ‘‘ཨཔིཙ ནིཝཱསནཝཏྟཾ ཨུགྒཧེཏབྦ’’ནྟི།
Aparimaṇḍalaṃ nivāsessāmīti ‘‘purato vā pacchato vā olambetvā nivāsessāmī’’ti evaṃ asañcicca. Kiñcāpi parimaṇḍalaṃ nivāsetuṃ ajānantassa anāpatti, tathāpi nivāsanavattaṃ sādhukaṃ uggahetabbameva. Sañcicca anuggahaṇañhi anādariyaṃ siyāti āha ‘‘apica nivāsanavattaṃ uggahetabba’’nti.
པརིམཎྜལསིཀྑཱཔདཝཎྞནཱ ནིཊྛིཏཱ།
Parimaṇḍalasikkhāpadavaṇṇanā niṭṭhitā.
