| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
7. ஸேகி²யகண்ட³ங்
7. Sekhiyakaṇḍaṃ
1. பரிமண்ட³லவக்³க³வண்ணனா
1. Parimaṇḍalavaggavaṇṇanā
யானி ஸிக்கி²தஸிக்கே²ன, ஸேகி²யானீதி தாதி³னா;
Yāni sikkhitasikkhena, sekhiyānīti tādinā;
பா⁴ஸிதானி அயங் தா³னி, தேஸம்பி வண்ணனாக்கமோ.
Bhāsitāni ayaṃ dāni, tesampi vaṇṇanākkamo.
576. தத்த² பரிமண்ட³லந்தி ஸமந்ததோ மண்ட³லங். நாபி⁴மண்ட³லங் ஜாணுமண்ட³லந்தி உத்³த⁴ங் நாபி⁴மண்ட³லங் அதோ⁴ ஜாணுமண்ட³லங் படிச்சா²தெ³ந்தேன ஜாணுமண்ட³லஸ்ஸ ஹெட்டா² ஜங்க⁴ட்டி²கதோ பட்டா²ய அட்ட²ங்கு³லமத்தங் நிவாஸனங் ஓதாரெத்வா நிவாஸேதப்³ப³ங், ததோ பரங் ஓதாரெந்தஸ்ஸ து³க்கடந்தி வுத்தங். யதா² நிஸின்னஸ்ஸ ஜாணுமண்ட³லதோ ஹெட்டா² சதுரங்கு³லமத்தங் படிச்ச²ன்னங் ஹோதீதி மஹாபச்சரியங் வுத்தங்; ஏவங் நிவாஸெந்தஸ்ஸ பன நிவாஸனங் பமாணிகங் வட்டதி. தத்ரித³ங் பமாணங் – தீ³க⁴தோ முட்டி²பஞ்சகங், திரியங் அட்³ட⁴தெய்யஹத்த²ங். தாதி³ஸஸ்ஸ பன அலாபே⁴ திரியங் த்³விஹத்த²பமாணம்பி வட்டதி ஜாணுமண்ட³லபடிச்சா²த³னத்த²ங், நாபி⁴மண்ட³லங் பன சீவரேனாபி ஸக்கா படிச்சா²தே³துந்தி. தத்த² ஏகபட்டசீவரங் ஏவங் நிவத்த²ம்பி நிவத்த²ட்டா²னே ந திட்ட²தி, து³பட்டங் பன திட்ட²தி.
576. Tattha parimaṇḍalanti samantato maṇḍalaṃ. Nābhimaṇḍalaṃ jāṇumaṇḍalanti uddhaṃ nābhimaṇḍalaṃ adho jāṇumaṇḍalaṃ paṭicchādentena jāṇumaṇḍalassa heṭṭhā jaṅghaṭṭhikato paṭṭhāya aṭṭhaṅgulamattaṃ nivāsanaṃ otāretvā nivāsetabbaṃ, tato paraṃ otārentassa dukkaṭanti vuttaṃ. Yathā nisinnassa jāṇumaṇḍalato heṭṭhā caturaṅgulamattaṃ paṭicchannaṃ hotīti mahāpaccariyaṃ vuttaṃ; evaṃ nivāsentassa pana nivāsanaṃ pamāṇikaṃ vaṭṭati. Tatridaṃ pamāṇaṃ – dīghato muṭṭhipañcakaṃ, tiriyaṃ aḍḍhateyyahatthaṃ. Tādisassa pana alābhe tiriyaṃ dvihatthapamāṇampi vaṭṭati jāṇumaṇḍalapaṭicchādanatthaṃ, nābhimaṇḍalaṃ pana cīvarenāpi sakkā paṭicchādetunti. Tattha ekapaṭṭacīvaraṃ evaṃ nivatthampi nivatthaṭṭhāne na tiṭṭhati, dupaṭṭaṃ pana tiṭṭhati.
ஓலம்பெ³ந்தோ நிவாஸேதி ஆபத்தி து³க்கடஸ்ஸாதி எத்த² ந கேவலங் புரதோ ச பச்ச²தோ ச ஓலம்பெ³த்வா நிவாஸெந்தஸ்ஸேவ து³க்கடங், யே பனஞ்ஞே ‘‘தேன கோ² பன ஸமயேன ச²ப்³ப³க்³கி³யா பி⁴க்கூ² கி³ஹினிவத்த²ங் நிவாஸெந்தி ஹத்தி²ஸொண்ட³கங் மச்ச²வாலகங் சதுக்கண்ணகங் தாலவண்டகங் ஸதவலிகங் நிவாஸெந்தீ’’திஆதி³னா (சூளவ॰ 280) நயேன க²ந்த⁴கே நிவாஸனதோ³ஸா வுத்தா, ததா² நிவாஸெந்தஸ்ஸாபி து³க்கடமேவ. தே ஸப்³பே³ வுத்தனயேன பரிமண்ட³லங் நிவாஸெந்தஸ்ஸ ந ஹொந்தி. அயமெத்த² ஸங்கே²போ, வித்தா²ரதோ பன தத்தே²வ ஆவி ப⁴விஸ்ஸதி.
Olambento nivāseti āpatti dukkaṭassāti ettha na kevalaṃ purato ca pacchato ca olambetvā nivāsentasseva dukkaṭaṃ, ye panaññe ‘‘tena kho pana samayena chabbaggiyā bhikkhū gihinivatthaṃ nivāsenti hatthisoṇḍakaṃ macchavālakaṃ catukkaṇṇakaṃ tālavaṇṭakaṃ satavalikaṃ nivāsentī’’tiādinā (cūḷava. 280) nayena khandhake nivāsanadosā vuttā, tathā nivāsentassāpi dukkaṭameva. Te sabbe vuttanayena parimaṇḍalaṃ nivāsentassa na honti. Ayamettha saṅkhepo, vitthārato pana tattheva āvi bhavissati.
அஸஞ்சிச்சாதி புரதோ வா பச்ச²தோ வா ஓலம்பெ³த்வா நிவாஸெஸ்ஸாமீதி ஏவங் அஸஞ்சிச்ச; அத² கோ² பரிமண்ட³லங்யேவ நிவாஸெஸ்ஸாமீதி விரஜ்ஜி²த்வா அபரிமண்ட³லங் நிவாஸெந்தஸ்ஸ அனாபத்தி. அஸ்ஸதியாதி அஞ்ஞவிஹிதஸ்ஸாபி ததா² நிவாஸெந்தஸ்ஸ அனாபத்தி. அஜானந்தஸ்ஸாதி எத்த² நிவாஸனவத்தங் அஜானந்தஸ்ஸ மொக்கோ² நத்தி². நிவாஸனவத்தஞ்ஹி ஸாது⁴கங் உக்³க³ஹேதப்³ப³ங், தஸ்ஸ அனுக்³க³ஹணமேவஸ்ஸ அனாத³ரியங். தங் பன ஸஞ்சிச்ச அனுக்³க³ண்ஹந்தஸ்ஸ யுஜ்ஜதி, தஸ்மா உக்³க³ஹிதவத்தோபி யோ ஆருள்ஹபா⁴வங் வா ஓருள்ஹபா⁴வங் வா ந ஜானாதி, தஸ்ஸ அனாபத்தி. குருந்தி³யங் பன ‘‘பரிமண்ட³லங் நிவாஸேதுங் அஜானந்தஸ்ஸ அனாபத்தீ’’தி வுத்தங். யோ பன ஸுக்க²ஜங்கோ⁴ வா மஹாபிண்டி³கமங்ஸோ வா ஹோதி, தஸ்ஸ ஸாருப்பத்தா²ய ஜாணுமண்ட³லதோ அட்ட²ங்கு³லாதி⁴கம்பி ஓதாரெத்வா நிவாஸேதுங் வட்டதி.
Asañciccāti purato vā pacchato vā olambetvā nivāsessāmīti evaṃ asañcicca; atha kho parimaṇḍalaṃyeva nivāsessāmīti virajjhitvā aparimaṇḍalaṃ nivāsentassa anāpatti. Assatiyāti aññavihitassāpi tathā nivāsentassa anāpatti. Ajānantassāti ettha nivāsanavattaṃ ajānantassa mokkho natthi. Nivāsanavattañhi sādhukaṃ uggahetabbaṃ, tassa anuggahaṇamevassa anādariyaṃ. Taṃ pana sañcicca anuggaṇhantassa yujjati, tasmā uggahitavattopi yo āruḷhabhāvaṃ vā oruḷhabhāvaṃ vā na jānāti, tassa anāpatti. Kurundiyaṃ pana ‘‘parimaṇḍalaṃ nivāsetuṃ ajānantassa anāpattī’’ti vuttaṃ. Yo pana sukkhajaṅgho vā mahāpiṇḍikamaṃso vā hoti, tassa sāruppatthāya jāṇumaṇḍalato aṭṭhaṅgulādhikampi otāretvā nivāsetuṃ vaṭṭati.
கி³லானஸ்ஸாதி ஜங்கா⁴ய வா பாதே³ வா வணோ ஹோதி, உக்கி²பித்வா வா ஓதாரெத்வா வா நிவாஸேதுங் வட்டதி. ஆபதா³ஸூதி வாளமிகா³ வா சோரா வா அனுப³ந்த⁴ந்தி, ஏவரூபாஸு ஆபதா³ஸு அனாபத்தி. ஸேஸமெத்த² உத்தானமேவ.
Gilānassāti jaṅghāya vā pāde vā vaṇo hoti, ukkhipitvā vā otāretvā vā nivāsetuṃ vaṭṭati. Āpadāsūti vāḷamigā vā corā vā anubandhanti, evarūpāsu āpadāsu anāpatti. Sesamettha uttānameva.
பட²மபாராஜிகஸமுட்டா²னங் – கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், அகுஸலசித்தங், து³க்க²வேத³னந்தி. பு²ஸ்ஸதே³வத்தே²ரோ ‘‘அசித்தகங், பண்ணத்திவஜ்ஜங், திவேத³ன’’ந்தி ஆஹ. உபதிஸ்ஸத்தே²ரோ பன ‘‘அனாத³ரியங் படிச்சா’’தி வுத்தத்தா ‘‘லோகவஜ்ஜங், அகுஸலசித்தங், து³க்க²வேத³ன’’ந்தி ஆஹ.
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dukkhavedananti. Phussadevatthero ‘‘acittakaṃ, paṇṇattivajjaṃ, tivedana’’nti āha. Upatissatthero pana ‘‘anādariyaṃ paṭiccā’’ti vuttattā ‘‘lokavajjaṃ, akusalacittaṃ, dukkhavedana’’nti āha.
577. பரிமண்ட³லங் பாருபிதப்³ப³ந்தி ‘‘தேன கோ² பன ஸமயேன ச²ப்³ப³க்³கி³யா பி⁴க்கூ² கி³ஹிபாருதங் பாருபந்தீ’’தி (சூளவ॰ 280) ஏவங் வுத்தங் அனேகப்பகாரங் கி³ஹிபாருபனங் அபாருபித்வா இத⁴ வுத்தனயேனேவ உபோ⁴ கண்ணே ஸமங் கத்வா பாருபனவத்தங் பூரெந்தேன பரிமண்ட³லங் பாருபிதப்³ப³ங். இமானி ச த்³வே ஸிக்கா²பதா³னி அவிஸேஸேன வுத்தானி. தஸ்மா விஹாரேபி அந்தரக⁴ரேபி பரிமண்ட³லமேவ நிவாஸேதப்³ப³ஞ்ச பாருபிதப்³ப³ஞ்சாதி. ஸமுட்டா²னாதீ³னி பட²மஸிக்கா²பதே³ வுத்தனயேனேவ வேதி³தப்³பா³னி ஸத்³தி⁴ங் தே²ரவாதே³ன.
577.Parimaṇḍalaṃ pārupitabbanti ‘‘tena kho pana samayena chabbaggiyā bhikkhū gihipārutaṃ pārupantī’’ti (cūḷava. 280) evaṃ vuttaṃ anekappakāraṃ gihipārupanaṃ apārupitvā idha vuttanayeneva ubho kaṇṇe samaṃ katvā pārupanavattaṃ pūrentena parimaṇḍalaṃ pārupitabbaṃ. Imāni ca dve sikkhāpadāni avisesena vuttāni. Tasmā vihārepi antaragharepi parimaṇḍalameva nivāsetabbañca pārupitabbañcāti. Samuṭṭhānādīni paṭhamasikkhāpade vuttanayeneva veditabbāni saddhiṃ theravādena.
578. காயங் விவரித்வாதி ஜத்தும்பி உரம்பி விவரித்வா. ஸுப்படிச்ச²ன்னேனாதி ந ஸஸீஸங் பாருதேன; அத² கோ² க³ண்டி²கங் படிமுஞ்சித்வா அனுவாதந்தேன கீ³வங் படிச்சா²தெ³த்வா உபோ⁴ கண்ணே ஸமங் கத்வா படிஸங்ஹரித்வா யாவ மணிப³ந்த⁴ங் படிச்சா²தெ³த்வா அந்தரக⁴ரே க³ந்தப்³ப³ங். து³தியஸிக்கா²பதே³ – க³லவாடகதோ பட்டா²ய ஸீஸங் மணிப³ந்த⁴தோ பட்டா²ய ஹத்தே² பிண்டி³கமங்ஸதோ ச பட்டா²ய பாதே³ விவரித்வா நிஸீதி³தப்³ப³ங்.
578.Kāyaṃ vivaritvāti jattumpi urampi vivaritvā. Suppaṭicchannenāti na sasīsaṃ pārutena; atha kho gaṇṭhikaṃ paṭimuñcitvā anuvātantena gīvaṃ paṭicchādetvā ubho kaṇṇe samaṃ katvā paṭisaṃharitvā yāva maṇibandhaṃ paṭicchādetvā antaraghare gantabbaṃ. Dutiyasikkhāpade – galavāṭakato paṭṭhāya sīsaṃ maṇibandhato paṭṭhāya hatthe piṇḍikamaṃsato ca paṭṭhāya pāde vivaritvā nisīditabbaṃ.
579. வாஸூபக³தஸ்ஸாதி வாஸத்தா²ய உபக³தஸ்ஸ ரத்திபா⁴கே³ வா தி³வஸபா⁴கே³ வா காயங் விவரித்வாபி நிஸீத³தோ அனாபத்தி.
579.Vāsūpagatassāti vāsatthāya upagatassa rattibhāge vā divasabhāge vā kāyaṃ vivaritvāpi nisīdato anāpatti.
580. ஸுஸங்வுதோதி ஹத்த²ங் வா பாத³ங் வா அகீளாபெந்தோ; ஸுவினீதோதி அத்தோ².
580.Susaṃvutoti hatthaṃ vā pādaṃ vā akīḷāpento; suvinītoti attho.
582. ஒக்கி²த்தசக்கூ²தி ஹெட்டா² கி²த்தசக்கு² ஹுத்வா. யுக³மத்தங் பெக்க²மானோதி யுக³யுத்தகோ ஹி த³ந்தோ ஆஜானெய்யோ யுக³மத்தங் பெக்க²தி, புரதோ சதுஹத்த²ப்பமாணங் பூ⁴மிபா⁴க³ங்; இமினாபி எத்தகங் பெக்க²ந்தேன க³ந்தப்³ப³ங். யோ அனாத³ரியங் படிச்ச தஹங் தஹங் ஓலோகெந்தோதி யோ தங்தங்தி³ஸாபா⁴க³ங் பாஸாத³ங் கூடாகா³ரங் வீதி²ங் ஓலோகெந்தோ க³ச்ச²தி, ஆபத்தி து³க்கடஸ்ஸ. ஏகஸ்மிங் பன டா²னே ட²த்வா ஹத்தி²அஸ்ஸாதி³பரிஸ்ஸயாபா⁴வங் ஓலோகேதுங் வட்டதி. நிஸீத³ந்தேனாபி ஒக்கி²த்தசக்கு²னாவ நிஸீதி³தப்³ப³ங்.
582.Okkhittacakkhūti heṭṭhā khittacakkhu hutvā. Yugamattaṃ pekkhamānoti yugayuttako hi danto ājāneyyo yugamattaṃ pekkhati, purato catuhatthappamāṇaṃ bhūmibhāgaṃ; imināpi ettakaṃ pekkhantena gantabbaṃ. Yo anādariyaṃ paṭicca tahaṃ tahaṃ olokentoti yo taṃtaṃdisābhāgaṃ pāsādaṃ kūṭāgāraṃ vīthiṃ olokento gacchati, āpatti dukkaṭassa. Ekasmiṃ pana ṭhāne ṭhatvā hatthiassādiparissayābhāvaṃ oloketuṃ vaṭṭati. Nisīdantenāpi okkhittacakkhunāva nisīditabbaṃ.
584. உக்கி²த்தகாயாதி உக்கே²பேன; இத்த²ம்பூ⁴தலக்க²ணே கரணவசனங் ஏகதோ வா உப⁴தோ வா உக்கி²த்தசீவரோ ஹுத்வாதி அத்தோ². அந்தோஇந்த³கீ²லதோ பட்டா²ய ந ஏவங் க³ந்தப்³ப³ங். நிஸின்னகாலே பன த⁴மகரணங் நீஹரந்தேனாபி சீவரங் அனுக்கி²பித்வாவ நீஹரிதப்³ப³ந்தி.
584.Ukkhittakāyāti ukkhepena; itthambhūtalakkhaṇe karaṇavacanaṃ ekato vā ubhato vā ukkhittacīvaro hutvāti attho. Antoindakhīlato paṭṭhāya na evaṃ gantabbaṃ. Nisinnakāle pana dhamakaraṇaṃ nīharantenāpi cīvaraṃ anukkhipitvāva nīharitabbanti.
பட²மோ வக்³கோ³.
Paṭhamo vaggo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பரிமண்ட³லவக்³கோ³ • 1. Parimaṇḍalavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பரிமண்ட³லவக்³க³-அத்த²யோஜனா • 1. Parimaṇḍalavagga-atthayojanā
