| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
7. ஸேகி²யகண்ட³ங்
7. Sekhiyakaṇḍaṃ
1. பரிமண்ட³லவக்³க³வண்ணனா
1. Parimaṇḍalavaggavaṇṇanā
ஸேகி²யேஸு ஸிக்கி²தஸிக்கே²னாதி சதூஹி மக்³கே³ஹி திஸ்ஸோ ஸிக்கா² ஸிக்கி²த்வா டி²தேன, ஸப்³ப³ஸோ பரினிட்டி²தகிச்சேனாதி வுத்தங் ஹோதி. தாதி³னாதி அட்ட²ஹி லோகத⁴ம்மேஹி அகம்பியட்டே²ன தாதி³னா.
Sekhiyesu sikkhitasikkhenāti catūhi maggehi tisso sikkhā sikkhitvā ṭhitena, sabbaso pariniṭṭhitakiccenāti vuttaṃ hoti. Tādināti aṭṭhahi lokadhammehi akampiyaṭṭhena tādinā.
576. ஸிக்கா² கரணீயாதி ‘‘ஏவங் நிவாஸெஸ்ஸாமீ’’தி ஆராமேபி அந்தரக⁴ரேபி ஸப்³ப³த்த² ஸிக்கா² கத்தப்³பா³. எத்த² ச யஸ்மா வத்தக்க²ந்த⁴கே வுத்தவத்தானிபி ஸிக்கி²தப்³ப³த்தா ஸேகி²யானேவ ஹொந்தி, தஸ்மா பாராஜிகாதீ³ஸு விய பரிச்சே²தோ³ ந கதோ, சாரித்தனயத³ஸ்ஸனத்த²ஞ்ச ‘‘யோ பன பி⁴க்கு² ஓலம்பெ³ந்தோ நிவாஸெய்ய, து³க்கட’’ந்தி ஏவங் ஆபத்தினாமேன அவத்வா ‘‘ஸிக்கா² கரணீயா’’தி ஏவங் ஸப்³ப³ஸிக்கா²பதே³ஸு பாளி ஆரோபிதா. பத³பா⁴ஜனே பன ‘‘ஆபத்தி து³க்கடஸ்ஸா’’தி வுத்தத்தா ஸப்³ப³த்த² அனாத³ரியகரணே து³க்கடங் வேதி³தப்³ப³ங். வுத்தந்தி மஹாஅட்ட²கதா²யங் வுத்தங். யஸ்மா அட்ட²ங்கு³லமத்தங் ஓதாரெத்வா நிவத்த²மேவ நிஸின்னஸ்ஸ சதுரங்கு³லமத்தங் ஹோதி, தஸ்மா உபோ⁴பேதே அட்ட²கதா²வாதா³ ஏகபரிச்சே²தா³. தே ஸப்³பே³தி நிவாஸனதோ³ஸா.
576.Sikkhā karaṇīyāti ‘‘evaṃ nivāsessāmī’’ti ārāmepi antaragharepi sabbattha sikkhā kattabbā. Ettha ca yasmā vattakkhandhake vuttavattānipi sikkhitabbattā sekhiyāneva honti, tasmā pārājikādīsu viya paricchedo na kato, cārittanayadassanatthañca ‘‘yo pana bhikkhu olambento nivāseyya, dukkaṭa’’nti evaṃ āpattināmena avatvā ‘‘sikkhā karaṇīyā’’ti evaṃ sabbasikkhāpadesu pāḷi āropitā. Padabhājane pana ‘‘āpatti dukkaṭassā’’ti vuttattā sabbattha anādariyakaraṇe dukkaṭaṃ veditabbaṃ. Vuttanti mahāaṭṭhakathāyaṃ vuttaṃ. Yasmā aṭṭhaṅgulamattaṃ otāretvā nivatthameva nisinnassa caturaṅgulamattaṃ hoti, tasmā ubhopete aṭṭhakathāvādā ekaparicchedā. Te sabbeti nivāsanadosā.
தங் பனாதி தங் அனாத³ரியங். கிஞ்சாபி குருந்தி³வாத³ங் பச்சா² வத³ந்தேன ‘‘பரிமண்ட³லங் நிவாஸேதுங் அஜானந்தஸ்ஸ அனாபத்தீ’’தி அயமத்தோ² பதிட்டா²பிதோ, ததா²பி நிவாஸனவத்தங் ஸாது⁴கங் உக்³க³ஹேதப்³ப³மேவ. ஸஞ்சிச்ச அனுக்³க³ண்ஹந்தஸ்ஸ அனாத³ரியங் ஸியா. தேனேவ மாதிகாட்ட²கதா²யங் (கங்கா²॰ அட்ட²॰ பரிமண்ட³லஸிக்கா²பத³வண்ணனா) வுத்தங் ‘‘அஜானந்தஸ்ஸாதி பரிமண்ட³லங் நிவாஸேதுங் அஜானந்தஸ்ஸ அனாபத்தி, அபிச நிவாஸனவத்தங் உக்³க³ஹேதப்³ப³’’ந்தி.
Taṃ panāti taṃ anādariyaṃ. Kiñcāpi kurundivādaṃ pacchā vadantena ‘‘parimaṇḍalaṃ nivāsetuṃ ajānantassa anāpattī’’ti ayamattho patiṭṭhāpito, tathāpi nivāsanavattaṃ sādhukaṃ uggahetabbameva. Sañcicca anuggaṇhantassa anādariyaṃ siyā. Teneva mātikāṭṭhakathāyaṃ (kaṅkhā. aṭṭha. parimaṇḍalasikkhāpadavaṇṇanā) vuttaṃ ‘‘ajānantassāti parimaṇḍalaṃ nivāsetuṃ ajānantassa anāpatti, apica nivāsanavattaṃ uggahetabba’’nti.
ஸசித்தகந்தி வத்து²விஜானநசித்தேன பண்ணத்திவிஜானநசித்தேன ச ஸசித்தகங் ‘‘அனாத³ரியங் படிச்சா’’தி வுத்தத்தா. ‘‘பாணாதிபாதாதி³ விய நிவாஸனதோ³ஸோ லோகக³ரஹிதோ ந ஹோதீதி பண்ணத்திவஜ்ஜ’’ந்தி பு²ஸ்ஸதே³வத்தே²ரோ ஆஹ. உபதிஸ்ஸத்தே²ரோ பன ‘‘யஸ்மா அனாத³ரியவஸேனேவ ஆபஜ்ஜிதப்³ப³த்தா கேவலங் அகுஸலமேவ, தஞ்ச பகதியா வஜ்ஜங், ஸஞ்சிச்ச வீதிக்கமனஞ்ச தோ³மனஸ்ஸிதஸ்ஸேவ ஹோதி, தஸ்மா லோகவஜ்ஜங் அகுஸலசித்தங் து³க்க²வேத³ன’’ந்தி ஆஹ. அனாத³ரியங், அனாபத்திகாரணாபா⁴வோ, அபரிமண்ட³லனிவாஸனந்தி இமானி பனெத்த² தீணி அங்கா³னி. யதா² செத்த², ஏவங் ஸப்³ப³த்த² புரிமானி த்³வே தத்த² தத்த² வுத்தபடிபக்க²கரணஞ்சாதி தீணியேவ ஹொந்தி.
Sacittakanti vatthuvijānanacittena paṇṇattivijānanacittena ca sacittakaṃ ‘‘anādariyaṃ paṭiccā’’ti vuttattā. ‘‘Pāṇātipātādi viya nivāsanadoso lokagarahito na hotīti paṇṇattivajja’’nti phussadevatthero āha. Upatissatthero pana ‘‘yasmā anādariyavaseneva āpajjitabbattā kevalaṃ akusalameva, tañca pakatiyā vajjaṃ, sañcicca vītikkamanañca domanassitasseva hoti, tasmā lokavajjaṃ akusalacittaṃ dukkhavedana’’nti āha. Anādariyaṃ, anāpattikāraṇābhāvo, aparimaṇḍalanivāsananti imāni panettha tīṇi aṅgāni. Yathā cettha, evaṃ sabbattha purimāni dve tattha tattha vuttapaṭipakkhakaraṇañcāti tīṇiyeva honti.
577. து³தியாதீ³ஸு அனேகப்பகாரங் கி³ஹிபாருதந்தி ஸேதபடபாருதங் பரிப்³பா³ஜகபாருதங் ஏகஸாடகபாருதந்திஆதி³ அனேகப்பபே⁴த³ங் கி³ஹிபாருதங். தஸ்ஸத்தோ² க²ந்த⁴கேயேவ ஆவி ப⁴விஸ்ஸதி. விஹாரேபீதி பு³த்³து⁴பட்டா²னாதி³காலங் ஸந்தா⁴ய வுத்தங்.
577. Dutiyādīsu anekappakāraṃ gihipārutanti setapaṭapārutaṃ paribbājakapārutaṃ ekasāṭakapārutantiādi anekappabhedaṃ gihipārutaṃ. Tassattho khandhakeyeva āvi bhavissati. Vihārepīti buddhupaṭṭhānādikālaṃ sandhāya vuttaṃ.
578. ‘‘ஸுப்படிச்ச²ன்னோ’’தி வுத்தத்தா ‘‘ஸஸீஸங் பாருதோ ஸப்³ப³தா² ஸுப்படிச்ச²ன்னத்தா ஸுப்படிச்ச²ன்னோ நாம ஹோதீ’’தி யஸ்ஸ ஸியா, தங் ஸந்தா⁴யாஹ ‘‘ந ஸஸீஸங் பாருதேனா’’திஆதி³.
578. ‘‘Suppaṭicchanno’’ti vuttattā ‘‘sasīsaṃ pāruto sabbathā suppaṭicchannattā suppaṭicchanno nāma hotī’’ti yassa siyā, taṃ sandhāyāha ‘‘na sasīsaṃ pārutenā’’tiādi.
582. ஏகஸ்மிங் பன டா²னே ட²த்வாதி எத்த² ‘‘க³ச்ச²ந்தோபி பரிஸ்ஸயாபா⁴வங் ஓலோகேதுங் லப⁴தியேவ, ததா² கா³மே பூஜ’’ந்தி தீஸுபி க³ண்டி²பதே³ஸு வுத்தங்.
582.Ekasmiṃ pana ṭhāne ṭhatvāti ettha ‘‘gacchantopi parissayābhāvaṃ oloketuṃ labhatiyeva, tathā gāme pūja’’nti tīsupi gaṇṭhipadesu vuttaṃ.
பரிமண்ட³லவக்³க³வண்ணனா நிட்டி²தா.
Parimaṇḍalavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பரிமண்ட³லவக்³கோ³ • 1. Parimaṇḍalavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பரிமண்ட³லவக்³க³-அத்த²யோஜனா • 1. Parimaṇḍalavagga-atthayojanā
