| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
7. ஸேகி²யகண்ட³ங்
7. Sekhiyakaṇḍaṃ
1. பரிமண்ட³லவக்³க³வண்ணனா
1. Parimaṇḍalavaggavaṇṇanā
576. ஸேகி²யேஸு யஸ்மா வத்தக்க²ந்த⁴கே (சூளவ॰ 356 ஆத³யோ) வுத்தவத்தானிபி ஸிக்கி²தப்³ப³த்தா ஸேகி²யானேவ, தஸ்மா பாராஜிகாதீ³ஸு வியெத்த² பாளியங் பரிச்சே²தோ³ ந கதோ. சாரித்தனயத³ஸ்ஸனத்த²ஞ்ச ‘‘யோ பன பி⁴க்கு² ஓலம்பெ³ந்தோ நிவாஸெய்ய, து³க்கட’’ந்தி அவத்வா ‘‘ஸிக்கா² கரணீயா’’தி ஸப்³ப³த்த² பாளி ஆரோபிதா. பத³பா⁴ஜனே பன ‘‘ஆபத்தி து³க்கடஸ்ஸா’’தி வுத்தத்தா ஸப்³ப³த்த² அனாத³ரியகரணே து³க்கடங் வேதி³தப்³ப³ங்.
576. Sekhiyesu yasmā vattakkhandhake (cūḷava. 356 ādayo) vuttavattānipi sikkhitabbattā sekhiyāneva, tasmā pārājikādīsu viyettha pāḷiyaṃ paricchedo na kato. Cārittanayadassanatthañca ‘‘yo pana bhikkhu olambento nivāseyya, dukkaṭa’’nti avatvā ‘‘sikkhā karaṇīyā’’ti sabbattha pāḷi āropitā. Padabhājane pana ‘‘āpatti dukkaṭassā’’ti vuttattā sabbattha anādariyakaraṇe dukkaṭaṃ veditabbaṃ.
அட்ட²ங்கு³லமத்தந்தி மத்த-ஸத்³தே³ன ததோ கிஞ்சி அதி⁴கங், ஊனம்பி ஸங்க³ண்ஹாதி. தேனேவ நிஸின்னஸ்ஸ சதுரங்கு³லமத்தம்பி வுத்தங். ந ஹி நிஸின்னஸ்ஸ சதுரங்கு³லப்பமாணங், டி²தஸ்ஸ அட்ட²ங்கு³லமேவாதி ஸக்கா நியமேதுங் ஊனாதி⁴கத்தஸம்ப⁴வதோ. தஸ்மா யதா² ஸாருப்பங் ஹோதி ஏவங் அட்ட²ங்கு³லானுஸாரேன நிவாஸனஞ்ஞேவ அதி⁴ப்பேதந்தி க³ஹேதப்³ப³ங். தேனேவ வக்க²தி ‘‘யோ பன பி⁴க்கு² ஸுக்க²ஜங்கோ⁴ வா’’திஆதி³. குருந்தி³யங் ‘‘அஜானந்தஸ்ஸ அனாபத்தீ’’தி ஆத³ரங் கத்வா உக்³க³ண்ஹந்தஸ்ஸாபி அஜானநங் ஸந்தா⁴ய வுத்தங். தேனாபி நிரந்தரங் நிவாஸனபாருபனவத்தங் ஸிக்கி²தப்³ப³ங், அஸிக்கி²தோ அனாத³ரியமேவ. பரிமண்ட³லக்³க³ஹணேன உக்கி²பித்வா நிவாஸனம்பி படிக்கி²த்தந்தி ஆஹ ‘‘உக்கி²பித்வா வா ஓதாரெத்வா வா’’தி.
Aṭṭhaṅgulamattanti matta-saddena tato kiñci adhikaṃ, ūnampi saṅgaṇhāti. Teneva nisinnassa caturaṅgulamattampi vuttaṃ. Na hi nisinnassa caturaṅgulappamāṇaṃ, ṭhitassa aṭṭhaṅgulamevāti sakkā niyametuṃ ūnādhikattasambhavato. Tasmā yathā sāruppaṃ hoti evaṃ aṭṭhaṅgulānusārena nivāsanaññeva adhippetanti gahetabbaṃ. Teneva vakkhati ‘‘yo pana bhikkhu sukkhajaṅgho vā’’tiādi. Kurundiyaṃ ‘‘ajānantassa anāpattī’’ti ādaraṃ katvā uggaṇhantassāpi ajānanaṃ sandhāya vuttaṃ. Tenāpi nirantaraṃ nivāsanapārupanavattaṃ sikkhitabbaṃ, asikkhito anādariyameva. Parimaṇḍalaggahaṇena ukkhipitvā nivāsanampi paṭikkhittanti āha ‘‘ukkhipitvā vā otāretvā vā’’ti.
ஸசித்தகந்தி வத்து²விஜானநசித்தேன ஸசித்தகங். ஸாரத்த²தீ³பனியங் பன உபதிஸ்ஸத்தே²ரவாத³னயேன லோகவஜ்ஜத்தங் க³ஹெத்வா ‘‘வத்து²விஜானநசித்தேன, பண்ணத்திவிஜானநசித்தேன ச ஸசித்தக’’ந்தி (ஸாரத்த²॰ டீ॰ ஸேகி²யகண்ட³ 3.576) வுத்தங். தத்த² ச வத்து²விஜானநங் விஸுங் ந வத்தப்³ப³ங். பண்ணத்திவிஜானநேன தஸ்ஸாபி அந்தோக³த⁴பா⁴வதோ இத³ங் வத்து²ங் ஏவங் வீதிக்கமந்தஸ்ஸ ஆபத்தீதி விஜானந்தோ ஹி பண்ணத்திங் விஜானாதீதி வுச்சதி. உபதிஸ்ஸத்தே²ரவாதே³ செத்த² பண்ணத்திங் அஜானித்வா அபரிமண்ட³லனிவாஸனாதி³வத்து²மேவ ஜானந்தஸ்ஸ பண்ணத்திவீதிக்கமானாத³ரியாபா⁴வா ஸப்³ப³ஸேகி²யேஸு அனாபத்தி ஏவ அபி⁴மதா, தஞ்ச ந யுத்தங் கோஸம்ப³க்க²ந்த⁴கே (மஹாவ॰ 451 ஆத³யோ) வச்சகுடியங் உத³காவஸேஸங் ட²பெந்தஸ்ஸ பண்ணத்திவிஜானநாபா⁴வேபி ஆபத்தியா வுத்தத்தா. வுத்தஞ்ஹி தத்த² ‘‘தேன கோ² பன ஸமயேன அஞ்ஞதரோ பி⁴க்கு² ஆபத்திங் ஆபன்னோ ஹோதி …பே॰… ஸோ அபரேன ஸமயேன தஸ்ஸா ஆபத்தியா அனாபத்திதி³ட்டி² ஹோதீ’’திஆதி³ (மஹாவ॰ 451). அட்ட²கதா²யஞ்சஸ்ஸ ‘‘த்வங் எத்த² ஆபத்திபா⁴வங் ந ஜானாஸீதி, ஆம ந ஜானாமீதி. ஹோது ஆவுஸோ, எத்த² ஆபத்தீதி, ஸசே ஹோதி, தே³ஸெஸ்ஸாமீதி. ஸசே பன தே, ஆவுஸோ, அஸஞ்சிச்ச அஸதியா கதங், நத்தி² ஆபத்தீதி. ஸோ தஸ்ஸா ஆபத்தியா அனாபத்திதி³ட்டி² அஹோஸீ’’தி (மஹாவ॰ அட்ட²॰ 451) வுத்தங், ததா² ‘‘அத⁴ம்மவாதீ³தி உக்கி²த்தானுவத்தகேஸு அஞ்ஞதரோ’’தி (மஹாவ॰ அட்ட²॰ 457-458) ச வுத்தங். க²ந்த⁴கவத்தானஞ்ஹி ஸேகி²யத்தா தத்த² வுத்தோ நயோ இமேஸங், இத⁴ வுத்தோ ச தேஸங் ஸாதா⁴ரணோவ ஹோதீதி. தேனேவ ‘‘அஸஞ்சிச்ச அஸதியா கதங், நத்தி² ஆபத்தீ’’தி ஏவங் இத⁴ வுத்தோ ஆபத்தினயோ தத்தா²பி த³ஸ்ஸிதோ. தஸ்மா பு²ஸ்ஸதே³வத்தே²ரவாதே³ ஏவ ட²த்வா வத்து²விஜானநசித்தேனேவ ஸப்³ப³ஸேகி²யானி ஸசித்தகானி, ந பண்ணத்திவிஜானநசித்தேன. பி⁴ய்யோகம்யதாயஸூபப்³யஞ்ஜனபடிச்சா²த³னஉஜ்ஜா²னஸஞ்ஞீதி த்³வே ஸிக்கா²பதா³னி லோகவஜ்ஜானி அகுஸலசித்தானி, ஸேஸானி பண்ணத்திவஜ்ஜானி, திசித்தானி, திவேத³னானி சாதி க³ஹணமேவ யுத்ததரங் தி³ஸ்ஸதி. தேனேவெத்த² ‘‘அஸஞ்சிச்சாதி புரதோ வா பச்ச²தோ வா ஓலம்பெ³த்வா நிவாஸெஸ்ஸாமீதி ஏவங் அஸஞ்சிச்சா’’திஆதி³னா வத்து²அஜானநவஸேனேவ அனாபத்திவண்ணனா கதா, ந பண்ணத்திவிஜானநசித்தவஸேன.
Sacittakanti vatthuvijānanacittena sacittakaṃ. Sāratthadīpaniyaṃ pana upatissattheravādanayena lokavajjattaṃ gahetvā ‘‘vatthuvijānanacittena, paṇṇattivijānanacittena ca sacittaka’’nti (sārattha. ṭī. sekhiyakaṇḍa 3.576) vuttaṃ. Tattha ca vatthuvijānanaṃ visuṃ na vattabbaṃ. Paṇṇattivijānanena tassāpi antogadhabhāvato idaṃ vatthuṃ evaṃ vītikkamantassa āpattīti vijānanto hi paṇṇattiṃ vijānātīti vuccati. Upatissattheravāde cettha paṇṇattiṃ ajānitvā aparimaṇḍalanivāsanādivatthumeva jānantassa paṇṇattivītikkamānādariyābhāvā sabbasekhiyesu anāpatti eva abhimatā, tañca na yuttaṃ kosambakkhandhake (mahāva. 451 ādayo) vaccakuṭiyaṃ udakāvasesaṃ ṭhapentassa paṇṇattivijānanābhāvepi āpattiyā vuttattā. Vuttañhi tattha ‘‘tena kho pana samayena aññataro bhikkhu āpattiṃ āpanno hoti …pe… so aparena samayena tassā āpattiyā anāpattidiṭṭhi hotī’’tiādi (mahāva. 451). Aṭṭhakathāyañcassa ‘‘tvaṃ ettha āpattibhāvaṃ na jānāsīti, āma na jānāmīti. Hotu āvuso, ettha āpattīti, sace hoti, desessāmīti. Sace pana te, āvuso, asañcicca asatiyā kataṃ, natthi āpattīti. So tassā āpattiyā anāpattidiṭṭhi ahosī’’ti (mahāva. aṭṭha. 451) vuttaṃ, tathā ‘‘adhammavādīti ukkhittānuvattakesu aññataro’’ti (mahāva. aṭṭha. 457-458) ca vuttaṃ. Khandhakavattānañhi sekhiyattā tattha vutto nayo imesaṃ, idha vutto ca tesaṃ sādhāraṇova hotīti. Teneva ‘‘asañcicca asatiyā kataṃ, natthi āpattī’’ti evaṃ idha vutto āpattinayo tatthāpi dassito. Tasmā phussadevattheravāde eva ṭhatvā vatthuvijānanacitteneva sabbasekhiyāni sacittakāni, na paṇṇattivijānanacittena. Bhiyyokamyatāyasūpabyañjanapaṭicchādanaujjhānasaññīti dve sikkhāpadāni lokavajjāni akusalacittāni, sesāni paṇṇattivajjāni, ticittāni, tivedanāni cāti gahaṇameva yuttataraṃ dissati. Tenevettha ‘‘asañciccāti purato vā pacchato vā olambetvā nivāsessāmīti evaṃ asañciccā’’tiādinā vatthuajānanavaseneva anāpattivaṇṇanā katā, na paṇṇattivijānanacittavasena.
அபிச ‘‘யஸ்ஸ ஸசித்தகபக்கே² சித்தங் அகுஸலமேவ ஹோதி, தங் லோகவஜ்ஜ’’ந்தி (கங்கா²॰ அட்ட²॰ பட²மபாராஜிகவண்ணனா) இமினா லக்க²ணவசனேனாபி சேதங் ஸிஜ்ஜ²தி. வத்து²விஜானநசித்தவஸேனேவ ஹெத்த² ‘‘ஸசித்தகபக்கே²’’தி வுத்தங். இதரதா² பண்ணத்திவிஜானநசித்தவஸேன ஸப்³ப³ஸிக்கா²பதா³னம்பி ஸசித்தகபக்கே² சித்தஸ்ஸ அகுஸலத்தனியமேன லோகவஜ்ஜத்தப்பஸங்க³தோ பண்ணத்திவஜ்ஜமேவ ந ஸியா, இத³ஞ்ச வசனங் நிரத்த²கங் ஸியா இமினா வசனேன நிவத்தேதப்³ப³ஸ்ஸ ஸிக்கா²பத³ஸ்ஸ அபா⁴வா. ந ச ஸேகி²யேஸு வத்து²விஜானநசித்தேன ஸசித்தகபக்கே² சித்தங் பாணாதிபாதாதீ³ஸு விய அகுஸலமேவாதி நியமோ அத்தி², யேனெத்த² லோகவஜ்ஜதா பஸஜ்ஜெய்ய, ‘‘அனாத³ரியங் படிச்சா’’தி சேதங் பாளிவசனங் வத்து²ங் ஜானித்வா தீஹி சித்தேஹி வீதிக்கமமேவ அனாத³ரியங் கத்வா வுத்தங், ந பண்ணத்திங் ஜானித்வா அகுஸலசித்தேனேவ வீதிக்கமந்தி க³ஹேதப்³ப³ங். அஞ்ஞதா² க²ந்த⁴கபாளியா, அட்ட²கதா²யஞ்ச புப்³பா³பரஞ்ச விருஜ்ஜ²னதோதி அம்ஹாகங் க²ந்தி. யதா² வா ந விருஜ்ஜ²தி, ததா² எத்த² அதி⁴ப்பாயோ க³வேஸிதப்³போ³. அனாத³ரியங், அனாபத்திகாரணாபா⁴வோ , அபரிமண்ட³லனிவாஸனந்தி இமானெத்த² தீணி அங்கா³னி. யதா² செத்த², ஏவங் ஸப்³ப³த்த². கேவலங் தத்த² தத்த² வுத்தபடிபக்க²கரணவஸேன ததியங்க³யோஜனமேவ விஸேஸோ.
Apica ‘‘yassa sacittakapakkhe cittaṃ akusalameva hoti, taṃ lokavajja’’nti (kaṅkhā. aṭṭha. paṭhamapārājikavaṇṇanā) iminā lakkhaṇavacanenāpi cetaṃ sijjhati. Vatthuvijānanacittavaseneva hettha ‘‘sacittakapakkhe’’ti vuttaṃ. Itarathā paṇṇattivijānanacittavasena sabbasikkhāpadānampi sacittakapakkhe cittassa akusalattaniyamena lokavajjattappasaṅgato paṇṇattivajjameva na siyā, idañca vacanaṃ niratthakaṃ siyā iminā vacanena nivattetabbassa sikkhāpadassa abhāvā. Na ca sekhiyesu vatthuvijānanacittena sacittakapakkhe cittaṃ pāṇātipātādīsu viya akusalamevāti niyamo atthi, yenettha lokavajjatā pasajjeyya, ‘‘anādariyaṃ paṭiccā’’ti cetaṃ pāḷivacanaṃ vatthuṃ jānitvā tīhi cittehi vītikkamameva anādariyaṃ katvā vuttaṃ, na paṇṇattiṃ jānitvā akusalacitteneva vītikkamanti gahetabbaṃ. Aññathā khandhakapāḷiyā, aṭṭhakathāyañca pubbāparañca virujjhanatoti amhākaṃ khanti. Yathā vā na virujjhati, tathā ettha adhippāyo gavesitabbo. Anādariyaṃ, anāpattikāraṇābhāvo , aparimaṇḍalanivāsananti imānettha tīṇi aṅgāni. Yathā cettha, evaṃ sabbattha. Kevalaṃ tattha tattha vuttapaṭipakkhakaraṇavasena tatiyaṅgayojanameva viseso.
577. து³தியாதீ³ஸு கி³ஹிபாருதந்தி ஸேதபடபாருதாதி³. விஹாரேபீதி ஸங்க⁴ஸன்னிபாதபு³த்³து⁴பட்டா²னாதி³காலங் ஸந்தா⁴ய வுத்தங்.
577. Dutiyādīsu gihipārutanti setapaṭapārutādi. Vihārepīti saṅghasannipātabuddhupaṭṭhānādikālaṃ sandhāya vuttaṃ.
578. க³ண்டி²கங் படிமுஞ்சித்வாதிஆதி³ படிச்சா²த³னவிதி⁴த³ஸ்ஸனங். கீ³வங் படிச்சா²தெ³த்வாதிஆதி³னா வுத்தத்தா ஸஞ்சிச்ச கீ³வங், மணிப³ந்த⁴னஞ்ச அப்படிச்சா²தெ³ந்தஸ்ஸ ஆபத்தி. எத்தா²பி பரிமண்ட³லஸிக்கா²பத³ஸ்ஸ ஸாதா⁴ரணத்தா ஜாணுமண்ட³லதோ ஹெட்டா² சதுரங்கு³லமத்தங் ஓதாரெத்வா அனோலம்பெ³த்வா பரிமண்ட³லமேவ பாருபிதப்³ப³ங்.
578.Gaṇṭhikaṃ paṭimuñcitvātiādi paṭicchādanavidhidassanaṃ. Gīvaṃ paṭicchādetvātiādinā vuttattā sañcicca gīvaṃ, maṇibandhanañca appaṭicchādentassa āpatti. Etthāpi parimaṇḍalasikkhāpadassa sādhāraṇattā jāṇumaṇḍalato heṭṭhā caturaṅgulamattaṃ otāretvā anolambetvā parimaṇḍalameva pārupitabbaṃ.
579. விவரித்வா நிஸீத³தோதி விஹாரே விய ஏகங்ஸபாருபனங் ஸந்தா⁴ய வுத்தங். ‘‘வாஸத்தா²ய உபக³தஸ்ஸா’’தி வுத்தத்தா வாஸாதி⁴ப்பாயங் வினா த⁴ம்மதே³ஸனபரித்தப⁴ணனாதி³அத்தா²ய ஸுசிரம்பி நிஸீத³ந்தேன ஸப்³ப³ங் அந்தரக⁴ரவத்தங் பூரெந்தேனேவ நிஸீதி³தப்³ப³ங். நிஸீத³னபடிஸங்யுத்தேஸு ஏவ ச ஸிக்கா²பதே³ஸு ‘‘வாஸூபக³தஸ்ஸா’’தி அனாபத்தியா வுத்தத்தா வாஸத்தா²ய அந்தரக⁴ரங் உபக³ச்ச²ந்தேனாபி ஸுப்படிச்ச²ன்னதாதி³ஸப்³ப³ங் அகோபெந்தேனேவ க³ந்தப்³ப³ங். ‘‘வாஸூபக³தஸ்ஸா’’தி ஹி வுத்தங், ந பன உபக³ச்ச²மானஸ்ஸாதி. கேசி பன ‘‘ஏகேகஸ்மிங் பட²மங் க³ந்த்வா வாஸபரிக்³க³ஹே கதே ததோ அஞ்ஞேஹி யதா²ஸுக²ங் க³ந்துங் வட்டதீ’’தி வத³ந்தி. அபரே பன ‘‘கே³ஹஸ்ஸாமிகேஹி ‘யாவ தும்ஹே நிவஸிஸ்ஸத², தாவ தும்ஹாகங் இமங் கே³ஹங் தே³மீ’தி தி³ன்னே அஞ்ஞேஹி அவாஸாதி⁴ப்பாயேஹி அந்தராராமே விய யதா²ஸுக²ங் க³ந்துங், நிஸீதி³துஞ்ச வட்டதீ’’தி வத³ந்தி, தங் ஸப்³ப³ங் ந க³ஹேதப்³ப³ங் ததா²வசனாபா⁴வா, தா³னலக்க²ணாபா⁴வா, தாவத்தகேன விஹாரஸங்க்²யானுபக³மனதோ ச. ‘‘யாவ நிஸீதி³ஸ்ஸத², தாவ தும்ஹாகங் இமங் கே³ஹங் தே³மீ’’தி தெ³ந்தோபி ஹி தாவகாலிகமேவ தே³தி வத்து²பரிச்சாக³லக்க²ணத்தா தா³னஸ்ஸ.
579.Vivaritvā nisīdatoti vihāre viya ekaṃsapārupanaṃ sandhāya vuttaṃ. ‘‘Vāsatthāya upagatassā’’ti vuttattā vāsādhippāyaṃ vinā dhammadesanaparittabhaṇanādiatthāya sucirampi nisīdantena sabbaṃ antaragharavattaṃ pūrenteneva nisīditabbaṃ. Nisīdanapaṭisaṃyuttesu eva ca sikkhāpadesu ‘‘vāsūpagatassā’’ti anāpattiyā vuttattā vāsatthāya antaragharaṃ upagacchantenāpi suppaṭicchannatādisabbaṃ akopenteneva gantabbaṃ. ‘‘Vāsūpagatassā’’ti hi vuttaṃ, na pana upagacchamānassāti. Keci pana ‘‘ekekasmiṃ paṭhamaṃ gantvā vāsapariggahe kate tato aññehi yathāsukhaṃ gantuṃ vaṭṭatī’’ti vadanti. Apare pana ‘‘gehassāmikehi ‘yāva tumhe nivasissatha, tāva tumhākaṃ imaṃ gehaṃ demī’ti dinne aññehi avāsādhippāyehi antarārāme viya yathāsukhaṃ gantuṃ, nisīdituñca vaṭṭatī’’ti vadanti, taṃ sabbaṃ na gahetabbaṃ tathāvacanābhāvā, dānalakkhaṇābhāvā, tāvattakena vihārasaṅkhyānupagamanato ca. ‘‘Yāva nisīdissatha, tāva tumhākaṃ imaṃ gehaṃ demī’’ti dentopi hi tāvakālikameva deti vatthupariccāgalakkhaṇattā dānassa.
582. சதுஹத்த²ப்பமாணந்தி வட்³ட⁴கீஹத்த²ங் ஸந்தா⁴ய வுத்தந்தி வத³ந்தி.
582.Catuhatthappamāṇanti vaḍḍhakīhatthaṃ sandhāya vuttanti vadanti.
584. உக்கி²த்தசீவரோ ஹுத்வாதி கடிதோ உத்³த⁴ங் காயப³ந்த⁴னாதி³த³ஸ்ஸனவஸேனேவுக்கி²பனங் ஸந்தா⁴ய வுத்தங் பிண்டா³ய சரதோ பத்தக்³க³ஹணாதி³மத்தஸ்ஸ அனுஞ்ஞாதத்தா. தேனேவ ‘‘நிஸின்னகாலே பன த⁴மகரண’’ந்திஆதி³ வுத்தங். நிஸின்னகாலே ஹி க²ந்தே⁴ லக்³க³பத்தத்த²விகாதி³தோ த⁴மகரணங் நீஹரந்தஸ்ஸ கடிதோ உத்³த⁴ம்பி தி³ஸ்ஸதி, ததா² அத³ஸ்ஸெத்வா நீஹரிதப்³ப³ந்தி அதி⁴ப்பாயோ. ஆஸனே நிஸீத³ந்தஸ்ஸாபி ச பாருபிதசீவரங் கிஞ்சி உக்கி²பித்வா ஸங்கா⁴டிங் ஜங்க⁴பிண்டே³ஹி அனுக்கி²பித்வாவ நிஸீதி³தப்³ப³ங். இமஸ்மிஞ்ஞேவ பன ஸிக்கா²பதே³ ‘‘வாஸூபக³தஸ்ஸா’’தி வுத்தத்தா நிஸீத³னபடிஸங்யுத்தேஸு ச²ட்ட²அட்ட²மேஸு அவுத்தத்தா வாஸூபக³தேனாபி ஸுஸங்வுதேன ஒக்கி²த்தசக்கு²னாவ நிஸீதி³தப்³ப³ங். தேனேவ மாதிகாட்ட²கதா²யம்பி தேஸங் விஸேஸங் அவத்வா இதே⁴வ ‘‘வாஸூபக³தஸ்ஸ பன அனாபத்தீ’’தி (கங்கா²॰ அட்ட²॰ உக்கி²த்தகஸிக்கா²பத³வண்ணனா) வுத்தா.
584.Ukkhittacīvarohutvāti kaṭito uddhaṃ kāyabandhanādidassanavasenevukkhipanaṃ sandhāya vuttaṃ piṇḍāya carato pattaggahaṇādimattassa anuññātattā. Teneva ‘‘nisinnakāle pana dhamakaraṇa’’ntiādi vuttaṃ. Nisinnakāle hi khandhe laggapattatthavikādito dhamakaraṇaṃ nīharantassa kaṭito uddhampi dissati, tathā adassetvā nīharitabbanti adhippāyo. Āsane nisīdantassāpi ca pārupitacīvaraṃ kiñci ukkhipitvā saṅghāṭiṃ jaṅghapiṇḍehi anukkhipitvāva nisīditabbaṃ. Imasmiññeva pana sikkhāpade ‘‘vāsūpagatassā’’ti vuttattā nisīdanapaṭisaṃyuttesu chaṭṭhaaṭṭhamesu avuttattā vāsūpagatenāpi susaṃvutena okkhittacakkhunāva nisīditabbaṃ. Teneva mātikāṭṭhakathāyampi tesaṃ visesaṃ avatvā idheva ‘‘vāsūpagatassa pana anāpattī’’ti (kaṅkhā. aṭṭha. ukkhittakasikkhāpadavaṇṇanā) vuttā.
பரிமண்ட³லவக்³க³வண்ணனா நிட்டி²தா.
Parimaṇḍalavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பரிமண்ட³லவக்³கோ³ • 1. Parimaṇḍalavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பரிமண்ட³லவக்³க³வண்ணனா • 1. Parimaṇḍalavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பரிமண்ட³லவக்³க³-அத்த²யோஜனா • 1. Parimaṇḍalavagga-atthayojanā
