| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৭. সেখিযকণ্ডং
7. Sekhiyakaṇḍaṃ
১. পরিমণ্ডলৰগ্গৰণ্ণনা
1. Parimaṇḍalavaggavaṇṇanā
যানি সিক্খিতসিক্খেন, সেখিযানীতি তাদিনা।
Yāni sikkhitasikkhena, sekhiyānīti tādinā;
ভাসিতানি অযং দানি, তেসম্পি ৰণ্ণনাক্কমো॥
Bhāsitāni ayaṃ dāni, tesampi vaṇṇanākkamo.
৫৭৬. তত্থ পরিমণ্ডলন্তি সমন্ততো মণ্ডলং। নাভিমণ্ডলং জাণুমণ্ডলন্তি উদ্ধং নাভিমণ্ডলং অধো জাণুমণ্ডলং পটিচ্ছাদেন্তেন জাণুমণ্ডলস্স হেট্ঠা জঙ্ঘট্ঠিকতো পট্ঠায অট্ঠঙ্গুলমত্তং নিৰাসনং ওতারেত্ৰা নিৰাসেতব্বং, ততো পরং ওতারেন্তস্স দুক্কটন্তি ৰুত্তং। যথা নিসিন্নস্স জাণুমণ্ডলতো হেট্ঠা চতুরঙ্গুলমত্তং পটিচ্ছন্নং হোতীতি মহাপচ্চরিযং ৰুত্তং; এৰং নিৰাসেন্তস্স পন নিৰাসনং পমাণিকং ৰট্টতি। তত্রিদং পমাণং – দীঘতো মুট্ঠিপঞ্চকং, তিরিযং অড্ঢতেয্যহত্থং। তাদিসস্স পন অলাভে তিরিযং দ্ৰিহত্থপমাণম্পি ৰট্টতি জাণুমণ্ডলপটিচ্ছাদনত্থং, নাভিমণ্ডলং পন চীৰরেনাপি সক্কা পটিচ্ছাদেতুন্তি। তত্থ একপট্টচীৰরং এৰং নিৰত্থম্পি নিৰত্থট্ঠানে ন তিট্ঠতি, দুপট্টং পন তিট্ঠতি।
576. Tattha parimaṇḍalanti samantato maṇḍalaṃ. Nābhimaṇḍalaṃ jāṇumaṇḍalanti uddhaṃ nābhimaṇḍalaṃ adho jāṇumaṇḍalaṃ paṭicchādentena jāṇumaṇḍalassa heṭṭhā jaṅghaṭṭhikato paṭṭhāya aṭṭhaṅgulamattaṃ nivāsanaṃ otāretvā nivāsetabbaṃ, tato paraṃ otārentassa dukkaṭanti vuttaṃ. Yathā nisinnassa jāṇumaṇḍalato heṭṭhā caturaṅgulamattaṃ paṭicchannaṃ hotīti mahāpaccariyaṃ vuttaṃ; evaṃ nivāsentassa pana nivāsanaṃ pamāṇikaṃ vaṭṭati. Tatridaṃ pamāṇaṃ – dīghato muṭṭhipañcakaṃ, tiriyaṃ aḍḍhateyyahatthaṃ. Tādisassa pana alābhe tiriyaṃ dvihatthapamāṇampi vaṭṭati jāṇumaṇḍalapaṭicchādanatthaṃ, nābhimaṇḍalaṃ pana cīvarenāpi sakkā paṭicchādetunti. Tattha ekapaṭṭacīvaraṃ evaṃ nivatthampi nivatthaṭṭhāne na tiṭṭhati, dupaṭṭaṃ pana tiṭṭhati.
ওলম্বেন্তো নিৰাসেতি আপত্তি দুক্কটস্সাতি এত্থ ন কেৰলং পুরতো চ পচ্ছতো চ ওলম্বেত্ৰা নিৰাসেন্তস্সেৰ দুক্কটং, যে পনঞ্ঞে ‘‘তেন খো পন সমযেন ছব্বগ্গিযা ভিক্খূ গিহিনিৰত্থং নিৰাসেন্তি হত্থিসোণ্ডকং মচ্ছৰালকং চতুক্কণ্ণকং তালৰণ্টকং সতৰলিকং নিৰাসেন্তী’’তিআদিনা (চূল়ৰ॰ ২৮০) নযেন খন্ধকে নিৰাসনদোসা ৰুত্তা, তথা নিৰাসেন্তস্সাপি দুক্কটমেৰ। তে সব্বে ৰুত্তনযেন পরিমণ্ডলং নিৰাসেন্তস্স ন হোন্তি। অযমেত্থ সঙ্খেপো, ৰিত্থারতো পন তত্থেৰ আৰি ভৰিস্সতি।
Olambento nivāseti āpatti dukkaṭassāti ettha na kevalaṃ purato ca pacchato ca olambetvā nivāsentasseva dukkaṭaṃ, ye panaññe ‘‘tena kho pana samayena chabbaggiyā bhikkhū gihinivatthaṃ nivāsenti hatthisoṇḍakaṃ macchavālakaṃ catukkaṇṇakaṃ tālavaṇṭakaṃ satavalikaṃ nivāsentī’’tiādinā (cūḷava. 280) nayena khandhake nivāsanadosā vuttā, tathā nivāsentassāpi dukkaṭameva. Te sabbe vuttanayena parimaṇḍalaṃ nivāsentassa na honti. Ayamettha saṅkhepo, vitthārato pana tattheva āvi bhavissati.
অসঞ্চিচ্চাতি পুরতো ৰা পচ্ছতো ৰা ওলম্বেত্ৰা নিৰাসেস্সামীতি এৰং অসঞ্চিচ্চ; অথ খো পরিমণ্ডলংযেৰ নিৰাসেস্সামীতি ৰিরজ্ঝিত্ৰা অপরিমণ্ডলং নিৰাসেন্তস্স অনাপত্তি। অস্সতিযাতি অঞ্ঞৰিহিতস্সাপি তথা নিৰাসেন্তস্স অনাপত্তি। অজানন্তস্সাতি এত্থ নিৰাসনৰত্তং অজানন্তস্স মোক্খো নত্থি। নিৰাসনৰত্তঞ্হি সাধুকং উগ্গহেতব্বং, তস্স অনুগ্গহণমেৰস্স অনাদরিযং। তং পন সঞ্চিচ্চ অনুগ্গণ্হন্তস্স যুজ্জতি, তস্মা উগ্গহিতৰত্তোপি যো আরুল়্হভাৰং ৰা ওরুল়্হভাৰং ৰা ন জানাতি, তস্স অনাপত্তি। কুরুন্দিযং পন ‘‘পরিমণ্ডলং নিৰাসেতুং অজানন্তস্স অনাপত্তী’’তি ৰুত্তং। যো পন সুক্খজঙ্ঘো ৰা মহাপিণ্ডিকমংসো ৰা হোতি, তস্স সারুপ্পত্থায জাণুমণ্ডলতো অট্ঠঙ্গুলাধিকম্পি ওতারেত্ৰা নিৰাসেতুং ৰট্টতি।
Asañciccāti purato vā pacchato vā olambetvā nivāsessāmīti evaṃ asañcicca; atha kho parimaṇḍalaṃyeva nivāsessāmīti virajjhitvā aparimaṇḍalaṃ nivāsentassa anāpatti. Assatiyāti aññavihitassāpi tathā nivāsentassa anāpatti. Ajānantassāti ettha nivāsanavattaṃ ajānantassa mokkho natthi. Nivāsanavattañhi sādhukaṃ uggahetabbaṃ, tassa anuggahaṇamevassa anādariyaṃ. Taṃ pana sañcicca anuggaṇhantassa yujjati, tasmā uggahitavattopi yo āruḷhabhāvaṃ vā oruḷhabhāvaṃ vā na jānāti, tassa anāpatti. Kurundiyaṃ pana ‘‘parimaṇḍalaṃ nivāsetuṃ ajānantassa anāpattī’’ti vuttaṃ. Yo pana sukkhajaṅgho vā mahāpiṇḍikamaṃso vā hoti, tassa sāruppatthāya jāṇumaṇḍalato aṭṭhaṅgulādhikampi otāretvā nivāsetuṃ vaṭṭati.
গিলানস্সাতি জঙ্ঘায ৰা পাদে ৰা ৰণো হোতি, উক্খিপিত্ৰা ৰা ওতারেত্ৰা ৰা নিৰাসেতুং ৰট্টতি। আপদাসূতি ৰাল়মিগা ৰা চোরা ৰা অনুবন্ধন্তি, এৰরূপাসু আপদাসু অনাপত্তি। সেসমেত্থ উত্তানমেৰ।
Gilānassāti jaṅghāya vā pāde vā vaṇo hoti, ukkhipitvā vā otāretvā vā nivāsetuṃ vaṭṭati. Āpadāsūti vāḷamigā vā corā vā anubandhanti, evarūpāsu āpadāsu anāpatti. Sesamettha uttānameva.
পঠমপারাজিকসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, অকুসলচিত্তং, দুক্খৰেদনন্তি। ফুস্সদেৰত্থেরো ‘‘অচিত্তকং, পণ্ণত্তিৰজ্জং, তিৰেদন’’ন্তি আহ। উপতিস্সত্থেরো পন ‘‘অনাদরিযং পটিচ্চা’’তি ৰুত্তত্তা ‘‘লোকৰজ্জং, অকুসলচিত্তং, দুক্খৰেদন’’ন্তি আহ।
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dukkhavedananti. Phussadevatthero ‘‘acittakaṃ, paṇṇattivajjaṃ, tivedana’’nti āha. Upatissatthero pana ‘‘anādariyaṃ paṭiccā’’ti vuttattā ‘‘lokavajjaṃ, akusalacittaṃ, dukkhavedana’’nti āha.
৫৭৭. পরিমণ্ডলং পারুপিতব্বন্তি ‘‘তেন খো পন সমযেন ছব্বগ্গিযা ভিক্খূ গিহিপারুতং পারুপন্তী’’তি (চূল়ৰ॰ ২৮০) এৰং ৰুত্তং অনেকপ্পকারং গিহিপারুপনং অপারুপিত্ৰা ইধ ৰুত্তনযেনেৰ উভো কণ্ণে সমং কত্ৰা পারুপনৰত্তং পূরেন্তেন পরিমণ্ডলং পারুপিতব্বং। ইমানি চ দ্ৰে সিক্খাপদানি অৰিসেসেন ৰুত্তানি। তস্মা ৰিহারেপি অন্তরঘরেপি পরিমণ্ডলমেৰ নিৰাসেতব্বঞ্চ পারুপিতব্বঞ্চাতি। সমুট্ঠানাদীনি পঠমসিক্খাপদে ৰুত্তনযেনেৰ ৰেদিতব্বানি সদ্ধিং থেরৰাদেন।
577.Parimaṇḍalaṃ pārupitabbanti ‘‘tena kho pana samayena chabbaggiyā bhikkhū gihipārutaṃ pārupantī’’ti (cūḷava. 280) evaṃ vuttaṃ anekappakāraṃ gihipārupanaṃ apārupitvā idha vuttanayeneva ubho kaṇṇe samaṃ katvā pārupanavattaṃ pūrentena parimaṇḍalaṃ pārupitabbaṃ. Imāni ca dve sikkhāpadāni avisesena vuttāni. Tasmā vihārepi antaragharepi parimaṇḍalameva nivāsetabbañca pārupitabbañcāti. Samuṭṭhānādīni paṭhamasikkhāpade vuttanayeneva veditabbāni saddhiṃ theravādena.
৫৭৮. কাযং ৰিৰরিত্ৰাতি জত্তুম্পি উরম্পি ৰিৰরিত্ৰা। সুপ্পটিচ্ছন্নেনাতি ন সসীসং পারুতেন; অথ খো গণ্ঠিকং পটিমুঞ্চিত্ৰা অনুৰাতন্তেন গীৰং পটিচ্ছাদেত্ৰা উভো কণ্ণে সমং কত্ৰা পটিসংহরিত্ৰা যাৰ মণিবন্ধং পটিচ্ছাদেত্ৰা অন্তরঘরে গন্তব্বং। দুতিযসিক্খাপদে – গলৰাটকতো পট্ঠায সীসং মণিবন্ধতো পট্ঠায হত্থে পিণ্ডিকমংসতো চ পট্ঠায পাদে ৰিৰরিত্ৰা নিসীদিতব্বং।
578.Kāyaṃ vivaritvāti jattumpi urampi vivaritvā. Suppaṭicchannenāti na sasīsaṃ pārutena; atha kho gaṇṭhikaṃ paṭimuñcitvā anuvātantena gīvaṃ paṭicchādetvā ubho kaṇṇe samaṃ katvā paṭisaṃharitvā yāva maṇibandhaṃ paṭicchādetvā antaraghare gantabbaṃ. Dutiyasikkhāpade – galavāṭakato paṭṭhāya sīsaṃ maṇibandhato paṭṭhāya hatthe piṇḍikamaṃsato ca paṭṭhāya pāde vivaritvā nisīditabbaṃ.
৫৭৯. ৰাসূপগতস্সাতি ৰাসত্থায উপগতস্স রত্তিভাগে ৰা দিৰসভাগে ৰা কাযং ৰিৰরিত্ৰাপি নিসীদতো অনাপত্তি।
579.Vāsūpagatassāti vāsatthāya upagatassa rattibhāge vā divasabhāge vā kāyaṃ vivaritvāpi nisīdato anāpatti.
৫৮০. সুসংৰুতোতি হত্থং ৰা পাদং ৰা অকীল়াপেন্তো; সুৰিনীতোতি অত্থো।
580.Susaṃvutoti hatthaṃ vā pādaṃ vā akīḷāpento; suvinītoti attho.
৫৮২. ওক্খিত্তচক্খূতি হেট্ঠা খিত্তচক্খু হুত্ৰা। যুগমত্তং পেক্খমানোতি যুগযুত্তকো হি দন্তো আজানেয্যো যুগমত্তং পেক্খতি, পুরতো চতুহত্থপ্পমাণং ভূমিভাগং; ইমিনাপি এত্তকং পেক্খন্তেন গন্তব্বং। যো অনাদরিযং পটিচ্চ তহং তহং ওলোকেন্তোতি যো তংতংদিসাভাগং পাসাদং কূটাগারং ৰীথিং ওলোকেন্তো গচ্ছতি, আপত্তি দুক্কটস্স। একস্মিং পন ঠানে ঠত্ৰা হত্থিঅস্সাদিপরিস্সযাভাৰং ওলোকেতুং ৰট্টতি। নিসীদন্তেনাপি ওক্খিত্তচক্খুনাৰ নিসীদিতব্বং।
582.Okkhittacakkhūti heṭṭhā khittacakkhu hutvā. Yugamattaṃ pekkhamānoti yugayuttako hi danto ājāneyyo yugamattaṃ pekkhati, purato catuhatthappamāṇaṃ bhūmibhāgaṃ; imināpi ettakaṃ pekkhantena gantabbaṃ. Yo anādariyaṃ paṭicca tahaṃ tahaṃ olokentoti yo taṃtaṃdisābhāgaṃ pāsādaṃ kūṭāgāraṃ vīthiṃ olokento gacchati, āpatti dukkaṭassa. Ekasmiṃ pana ṭhāne ṭhatvā hatthiassādiparissayābhāvaṃ oloketuṃ vaṭṭati. Nisīdantenāpi okkhittacakkhunāva nisīditabbaṃ.
৫৮৪. উক্খিত্তকাযাতি উক্খেপেন; ইত্থম্ভূতলক্খণে করণৰচনং একতো ৰা উভতো ৰা উক্খিত্তচীৰরো হুত্ৰাতি অত্থো। অন্তোইন্দখীলতো পট্ঠায ন এৰং গন্তব্বং। নিসিন্নকালে পন ধমকরণং নীহরন্তেনাপি চীৰরং অনুক্খিপিত্ৰাৰ নীহরিতব্বন্তি।
584.Ukkhittakāyāti ukkhepena; itthambhūtalakkhaṇe karaṇavacanaṃ ekato vā ubhato vā ukkhittacīvaro hutvāti attho. Antoindakhīlato paṭṭhāya na evaṃ gantabbaṃ. Nisinnakāle pana dhamakaraṇaṃ nīharantenāpi cīvaraṃ anukkhipitvāva nīharitabbanti.
পঠমো ৰগ্গো।
Paṭhamo vaggo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. পরিমণ্ডলৰগ্গো • 1. Parimaṇḍalavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. পরিমণ্ডলৰগ্গৰণ্ণনা • 1. Parimaṇḍalavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পরিমণ্ডলৰগ্গৰণ্ণনা • 1. Parimaṇḍalavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পরিমণ্ডলৰগ্গৰণ্ণনা • 1. Parimaṇḍalavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পরিমণ্ডলৰগ্গ-অত্থযোজনা • 1. Parimaṇḍalavagga-atthayojanā
