| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৭. সেখিযকণ্ডং
7. Sekhiyakaṇḍaṃ
১. পরিমণ্ডলৰগ্গৰণ্ণনা
1. Parimaṇḍalavaggavaṇṇanā
সেখিযেসু সিক্খিতসিক্খেনাতি চতূহি মগ্গেহি তিস্সো সিক্খা সিক্খিত্ৰা ঠিতেন, সব্বসো পরিনিট্ঠিতকিচ্চেনাতি ৰুত্তং হোতি। তাদিনাতি অট্ঠহি লোকধম্মেহি অকম্পিযট্ঠেন তাদিনা।
Sekhiyesu sikkhitasikkhenāti catūhi maggehi tisso sikkhā sikkhitvā ṭhitena, sabbaso pariniṭṭhitakiccenāti vuttaṃ hoti. Tādināti aṭṭhahi lokadhammehi akampiyaṭṭhena tādinā.
৫৭৬. সিক্খা করণীযাতি ‘‘এৰং নিৰাসেস্সামী’’তি আরামেপি অন্তরঘরেপি সব্বত্থ সিক্খা কত্তব্বা। এত্থ চ যস্মা ৰত্তক্খন্ধকে ৰুত্তৰত্তানিপি সিক্খিতব্বত্তা সেখিযানেৰ হোন্তি, তস্মা পারাজিকাদীসু ৰিয পরিচ্ছেদো ন কতো, চারিত্তনযদস্সনত্থঞ্চ ‘‘যো পন ভিক্খু ওলম্বেন্তো নিৰাসেয্য, দুক্কট’’ন্তি এৰং আপত্তিনামেন অৰত্ৰা ‘‘সিক্খা করণীযা’’তি এৰং সব্বসিক্খাপদেসু পাল়ি আরোপিতা। পদভাজনে পন ‘‘আপত্তি দুক্কটস্সা’’তি ৰুত্তত্তা সব্বত্থ অনাদরিযকরণে দুক্কটং ৰেদিতব্বং। ৰুত্তন্তি মহাঅট্ঠকথাযং ৰুত্তং। যস্মা অট্ঠঙ্গুলমত্তং ওতারেত্ৰা নিৰত্থমেৰ নিসিন্নস্স চতুরঙ্গুলমত্তং হোতি, তস্মা উভোপেতে অট্ঠকথাৰাদা একপরিচ্ছেদা। তে সব্বেতি নিৰাসনদোসা।
576.Sikkhā karaṇīyāti ‘‘evaṃ nivāsessāmī’’ti ārāmepi antaragharepi sabbattha sikkhā kattabbā. Ettha ca yasmā vattakkhandhake vuttavattānipi sikkhitabbattā sekhiyāneva honti, tasmā pārājikādīsu viya paricchedo na kato, cārittanayadassanatthañca ‘‘yo pana bhikkhu olambento nivāseyya, dukkaṭa’’nti evaṃ āpattināmena avatvā ‘‘sikkhā karaṇīyā’’ti evaṃ sabbasikkhāpadesu pāḷi āropitā. Padabhājane pana ‘‘āpatti dukkaṭassā’’ti vuttattā sabbattha anādariyakaraṇe dukkaṭaṃ veditabbaṃ. Vuttanti mahāaṭṭhakathāyaṃ vuttaṃ. Yasmā aṭṭhaṅgulamattaṃ otāretvā nivatthameva nisinnassa caturaṅgulamattaṃ hoti, tasmā ubhopete aṭṭhakathāvādā ekaparicchedā. Te sabbeti nivāsanadosā.
তং পনাতি তং অনাদরিযং। কিঞ্চাপি কুরুন্দিৰাদং পচ্ছা ৰদন্তেন ‘‘পরিমণ্ডলং নিৰাসেতুং অজানন্তস্স অনাপত্তী’’তি অযমত্থো পতিট্ঠাপিতো, তথাপি নিৰাসনৰত্তং সাধুকং উগ্গহেতব্বমেৰ। সঞ্চিচ্চ অনুগ্গণ্হন্তস্স অনাদরিযং সিযা। তেনেৰ মাতিকাট্ঠকথাযং (কঙ্খা॰ অট্ঠ॰ পরিমণ্ডলসিক্খাপদৰণ্ণনা) ৰুত্তং ‘‘অজানন্তস্সাতি পরিমণ্ডলং নিৰাসেতুং অজানন্তস্স অনাপত্তি, অপিচ নিৰাসনৰত্তং উগ্গহেতব্ব’’ন্তি।
Taṃ panāti taṃ anādariyaṃ. Kiñcāpi kurundivādaṃ pacchā vadantena ‘‘parimaṇḍalaṃ nivāsetuṃ ajānantassa anāpattī’’ti ayamattho patiṭṭhāpito, tathāpi nivāsanavattaṃ sādhukaṃ uggahetabbameva. Sañcicca anuggaṇhantassa anādariyaṃ siyā. Teneva mātikāṭṭhakathāyaṃ (kaṅkhā. aṭṭha. parimaṇḍalasikkhāpadavaṇṇanā) vuttaṃ ‘‘ajānantassāti parimaṇḍalaṃ nivāsetuṃ ajānantassa anāpatti, apica nivāsanavattaṃ uggahetabba’’nti.
সচিত্তকন্তি ৰত্থুৰিজাননচিত্তেন পণ্ণত্তিৰিজাননচিত্তেন চ সচিত্তকং ‘‘অনাদরিযং পটিচ্চা’’তি ৰুত্তত্তা। ‘‘পাণাতিপাতাদি ৰিয নিৰাসনদোসো লোকগরহিতো ন হোতীতি পণ্ণত্তিৰজ্জ’’ন্তি ফুস্সদেৰত্থেরো আহ। উপতিস্সত্থেরো পন ‘‘যস্মা অনাদরিযৰসেনেৰ আপজ্জিতব্বত্তা কেৰলং অকুসলমেৰ, তঞ্চ পকতিযা ৰজ্জং, সঞ্চিচ্চ ৰীতিক্কমনঞ্চ দোমনস্সিতস্সেৰ হোতি, তস্মা লোকৰজ্জং অকুসলচিত্তং দুক্খৰেদন’’ন্তি আহ। অনাদরিযং, অনাপত্তিকারণাভাৰো, অপরিমণ্ডলনিৰাসনন্তি ইমানি পনেত্থ তীণি অঙ্গানি। যথা চেত্থ, এৰং সব্বত্থ পুরিমানি দ্ৰে তত্থ তত্থ ৰুত্তপটিপক্খকরণঞ্চাতি তীণিযেৰ হোন্তি।
Sacittakanti vatthuvijānanacittena paṇṇattivijānanacittena ca sacittakaṃ ‘‘anādariyaṃ paṭiccā’’ti vuttattā. ‘‘Pāṇātipātādi viya nivāsanadoso lokagarahito na hotīti paṇṇattivajja’’nti phussadevatthero āha. Upatissatthero pana ‘‘yasmā anādariyavaseneva āpajjitabbattā kevalaṃ akusalameva, tañca pakatiyā vajjaṃ, sañcicca vītikkamanañca domanassitasseva hoti, tasmā lokavajjaṃ akusalacittaṃ dukkhavedana’’nti āha. Anādariyaṃ, anāpattikāraṇābhāvo, aparimaṇḍalanivāsananti imāni panettha tīṇi aṅgāni. Yathā cettha, evaṃ sabbattha purimāni dve tattha tattha vuttapaṭipakkhakaraṇañcāti tīṇiyeva honti.
৫৭৭. দুতিযাদীসু অনেকপ্পকারং গিহিপারুতন্তি সেতপটপারুতং পরিব্বাজকপারুতং একসাটকপারুতন্তিআদি অনেকপ্পভেদং গিহিপারুতং। তস্সত্থো খন্ধকেযেৰ আৰি ভৰিস্সতি। ৰিহারেপীতি বুদ্ধুপট্ঠানাদিকালং সন্ধায ৰুত্তং।
577. Dutiyādīsu anekappakāraṃ gihipārutanti setapaṭapārutaṃ paribbājakapārutaṃ ekasāṭakapārutantiādi anekappabhedaṃ gihipārutaṃ. Tassattho khandhakeyeva āvi bhavissati. Vihārepīti buddhupaṭṭhānādikālaṃ sandhāya vuttaṃ.
৫৭৮. ‘‘সুপ্পটিচ্ছন্নো’’তি ৰুত্তত্তা ‘‘সসীসং পারুতো সব্বথা সুপ্পটিচ্ছন্নত্তা সুপ্পটিচ্ছন্নো নাম হোতী’’তি যস্স সিযা, তং সন্ধাযাহ ‘‘ন সসীসং পারুতেনা’’তিআদি।
578. ‘‘Suppaṭicchanno’’ti vuttattā ‘‘sasīsaṃ pāruto sabbathā suppaṭicchannattā suppaṭicchanno nāma hotī’’ti yassa siyā, taṃ sandhāyāha ‘‘na sasīsaṃ pārutenā’’tiādi.
৫৮২. একস্মিং পন ঠানে ঠত্ৰাতি এত্থ ‘‘গচ্ছন্তোপি পরিস্সযাভাৰং ওলোকেতুং লভতিযেৰ, তথা গামে পূজ’’ন্তি তীসুপি গণ্ঠিপদেসু ৰুত্তং।
582.Ekasmiṃ pana ṭhāne ṭhatvāti ettha ‘‘gacchantopi parissayābhāvaṃ oloketuṃ labhatiyeva, tathā gāme pūja’’nti tīsupi gaṇṭhipadesu vuttaṃ.
পরিমণ্ডলৰগ্গৰণ্ণনা নিট্ঠিতা।
Parimaṇḍalavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. পরিমণ্ডলৰগ্গো • 1. Parimaṇḍalavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. পরিমণ্ডলৰগ্গৰণ্ণনা • 1. Parimaṇḍalavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পরিমণ্ডলৰগ্গৰণ্ণনা • 1. Parimaṇḍalavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পরিমণ্ডলৰগ্গৰণ্ণনা • 1. Parimaṇḍalavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পরিমণ্ডলৰগ্গ-অত্থযোজনা • 1. Parimaṇḍalavagga-atthayojanā
