| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
১০. পরিণতসিক্খাপদং
10. Pariṇatasikkhāpadaṃ
৬৫৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সাৰত্থিযং অঞ্ঞতরস্স পূগস্স সঙ্ঘস্স সচীৰরভত্তং পটিযত্তং হোতি – ‘‘ভোজেত্ৰা চীৰরেন অচ্ছাদেস্সামা’’তি। অথ খো ছব্বগ্গিযা ভিক্খূ যেন সো পূগো তেনুপসঙ্কমিংসু; উপসঙ্কমিত্ৰা তং পূগং এতদৰোচুং – ‘‘দেথাৰুসো, অম্হাকং ইমানি চীৰরানী’’তি। ‘‘ন মযং, ভন্তে, দস্সাম। অম্হাকং সঙ্ঘস্স অনুৰস্সং সচীৰরভিক্খা পঞ্ঞত্তা’’তি। ‘‘বহূ, আৰুসো, সঙ্ঘস্স দাযকা, বহূ সঙ্ঘস্স ভত্তা 1। মযং তুম্হে নিস্সায তুম্হে সম্পস্সন্তা ইধ ৰিহরাম। তুম্হে চে অম্হাকং ন দস্সথ, অথ কো চরহি অম্হাকং দস্সতি? দেথাৰুসো, অম্হাকং ইমানি চীৰরানী’’তি। অথ খো সো পূগো ছব্বগ্গিযেহি ভিক্খূহি নিপ্পীল়িযমানো যথাপটিযত্তং চীৰরং ছব্বগ্গিযানং ভিক্খূনং দত্ৰা সঙ্ঘং ভত্তেন পরিৰিসি। যে তে ভিক্খূ জানন্তি সঙ্ঘস্স সচীৰরভত্তং পটিযত্তং, ন চ জানন্তি ছব্বগ্গিযানং ভিক্খূনং দিন্নন্তি, তে এৰমাহংসু – ‘‘ওণোজেথাৰুসো, সঙ্ঘস্স চীৰর’’ন্তি। ‘‘নত্থি, ভন্তে। যথাপটিযত্তং চীৰরং অয্যা ছব্বগ্গিযা অত্তনো পরিণামেসু’’ন্তি। যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ জানং সঙ্ঘিকং লাভং পরিণতং অত্তনো পরিণামেস্সন্তী’’তি ! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে॰… ‘‘সচ্চং কির তুম্হে, ভিক্খৰে, জানং সঙ্ঘিকং লাভং পরিণতং অত্তনো পরিণামেথা’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, জানং সঙ্ঘিকং লাভং পরিণতং অত্তনো পরিণামেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
657. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāvatthiyaṃ aññatarassa pūgassa saṅghassa sacīvarabhattaṃ paṭiyattaṃ hoti – ‘‘bhojetvā cīvarena acchādessāmā’’ti. Atha kho chabbaggiyā bhikkhū yena so pūgo tenupasaṅkamiṃsu; upasaṅkamitvā taṃ pūgaṃ etadavocuṃ – ‘‘dethāvuso, amhākaṃ imāni cīvarānī’’ti. ‘‘Na mayaṃ, bhante, dassāma. Amhākaṃ saṅghassa anuvassaṃ sacīvarabhikkhā paññattā’’ti. ‘‘Bahū, āvuso, saṅghassa dāyakā, bahū saṅghassa bhattā 2. Mayaṃ tumhe nissāya tumhe sampassantā idha viharāma. Tumhe ce amhākaṃ na dassatha, atha ko carahi amhākaṃ dassati? Dethāvuso, amhākaṃ imāni cīvarānī’’ti. Atha kho so pūgo chabbaggiyehi bhikkhūhi nippīḷiyamāno yathāpaṭiyattaṃ cīvaraṃ chabbaggiyānaṃ bhikkhūnaṃ datvā saṅghaṃ bhattena parivisi. Ye te bhikkhū jānanti saṅghassa sacīvarabhattaṃ paṭiyattaṃ, na ca jānanti chabbaggiyānaṃ bhikkhūnaṃ dinnanti, te evamāhaṃsu – ‘‘oṇojethāvuso, saṅghassa cīvara’’nti. ‘‘Natthi, bhante. Yathāpaṭiyattaṃ cīvaraṃ ayyā chabbaggiyā attano pariṇāmesu’’nti. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma chabbaggiyā bhikkhū jānaṃ saṅghikaṃ lābhaṃ pariṇataṃ attano pariṇāmessantī’’ti ! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, jānaṃ saṅghikaṃ lābhaṃ pariṇataṃ attano pariṇāmethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, jānaṃ saṅghikaṃ lābhaṃ pariṇataṃ attano pariṇāmessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৬৫৮. ‘‘যো পন ভিক্খু জানং সঙ্ঘিকং লাভং পরিণতং অত্তনো পরিণামেয্য, নিস্সগ্গিযং পাচিত্তিয’’ন্তি।
658.‘‘Yo pana bhikkhu jānaṃ saṅghikaṃ lābhaṃ pariṇataṃ attano pariṇāmeyya, nissaggiyaṃ pācittiya’’nti.
৬৫৯. যো পনাতি যো যাদিসো…পে॰… ভিক্খূতি…পে॰… অয ইমস্মিং অত্থে অধিপ্পেতো ভিক্খূতি।
659.Yo panāti yo yādiso…pe… bhikkhūti…pe… aya imasmiṃ atthe adhippeto bhikkhūti.
3 জানাতি নাম সামং ৰা জানাতি অঞ্ঞে ৰা তস্স আরোচেন্তি সো ৰা আরোচেতি।
4Jānāti nāma sāmaṃ vā jānāti aññe vā tassa ārocenti so vā āroceti.
7 লাভো নাম চীৰরপিণ্ডপাতসেনাসনগিলানপ্পচ্চযভেসজ্জপরিক্খারা। অন্তমসো চুণ্ণপিণ্ডোপি, দন্তকট্ঠম্পি, দসিকসুত্তম্পি।
8Lābho nāma cīvarapiṇḍapātasenāsanagilānappaccayabhesajjaparikkhārā. Antamaso cuṇṇapiṇḍopi, dantakaṭṭhampi, dasikasuttampi.
9 পরিণতং নাম দস্সাম করিস্সামাতি ৰাচা ভিন্না হোতি।
10Pariṇataṃ nāma dassāma karissāmāti vācā bhinnā hoti.
অত্তনো পরিণামেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা। এৰঞ্চ পন, ভিক্খৰে, নিস্সজ্জিতব্বং…পে॰… ইদং মে, ভন্তে, জানং সঙ্ঘিকং লাভং পরিণতং অত্তনো পরিণামিতং নিস্সগ্গিযং। ইমাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… আযস্মতো দম্মীতি।
Attano pariṇāmeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, jānaṃ saṅghikaṃ lābhaṃ pariṇataṃ attano pariṇāmitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
৬৬০. পরিণতে পরিণতসঞ্ঞী অত্তনো পরিণামেতি, নিস্সগ্গিযং পাচিত্তিযং।
660. Pariṇate pariṇatasaññī attano pariṇāmeti, nissaggiyaṃ pācittiyaṃ.
পরিণতে ৰেমতিকো অত্তনো পরিণামেতি, আপত্তি দুক্কটস্স। পরিণতে অপরিণতসঞ্ঞী অত্তনো পরিণামেতি, অনাপত্তি। সঙ্ঘস্স পরিণতং অঞ্ঞসঙ্ঘস্স ৰা চেতিযস্স ৰা পরিণামেতি, আপত্তি দুক্কটস্স। চেতিযস্স পরিণতং অঞ্ঞচেতিযস্স ৰা সঙ্ঘস্স ৰা পুগ্গলস্স ৰা পরিণামেতি, আপত্তি দুক্কটস্স। পুগ্গলস্স পরিণতং অঞ্ঞপুগ্গলস্স ৰা সঙ্ঘস্স ৰা চেতিযস্স ৰা পরিণামেতি, আপত্তি দুক্কটস্স। অপরিণতে পরিণতসঞ্ঞী, আপত্তি দুক্কটস্স। অপরিণতে ৰেমতিকো, আপত্তি দুক্কটস্স। অপরিণতে অপরিণতসঞ্ঞী, অনাপত্তি।
Pariṇate vematiko attano pariṇāmeti, āpatti dukkaṭassa. Pariṇate apariṇatasaññī attano pariṇāmeti, anāpatti. Saṅghassa pariṇataṃ aññasaṅghassa vā cetiyassa vā pariṇāmeti, āpatti dukkaṭassa. Cetiyassa pariṇataṃ aññacetiyassa vā saṅghassa vā puggalassa vā pariṇāmeti, āpatti dukkaṭassa. Puggalassa pariṇataṃ aññapuggalassa vā saṅghassa vā cetiyassa vā pariṇāmeti, āpatti dukkaṭassa. Apariṇate pariṇatasaññī, āpatti dukkaṭassa. Apariṇate vematiko, āpatti dukkaṭassa. Apariṇate apariṇatasaññī, anāpatti.
৬৬১. অনাপত্তি কত্থ দেমাতি পুচ্ছিযমানো যত্থ তুম্হাকং দেয্যধম্মো পরিভোগং ৰা লভেয্য পটিসঙ্খারং ৰা লভেয্য চিরট্ঠিতিকো ৰা অস্স যত্থ ৰা পন তুম্হাকং চিত্তং পসীদতি তত্থ দেথাতি ভণতি, উম্মত্তকস্স, আদিকম্মিকস্সাতি।
661. Anāpatti kattha demāti pucchiyamāno yattha tumhākaṃ deyyadhammo paribhogaṃ vā labheyya paṭisaṅkhāraṃ vā labheyya ciraṭṭhitiko vā assa yattha vā pana tumhākaṃ cittaṃ pasīdati tattha dethāti bhaṇati, ummattakassa, ādikammikassāti.
পরিণতসিক্খাপদং নিট্ঠিতং দসমং।
Pariṇatasikkhāpadaṃ niṭṭhitaṃ dasamaṃ.
পত্তৰগ্গো ততিযো।
Pattavaggo tatiyo.
তস্সুদ্দানং –
Tassuddānaṃ –
দ্ৰে চ পত্তানি ভেসজ্জং, ৰস্সিকা দানপঞ্চমং।
Dve ca pattāni bhesajjaṃ, vassikā dānapañcamaṃ;
সামং ৰাযাপনচ্চেকো, সাসঙ্কং সঙ্ঘিকেন চাতি॥
Sāmaṃ vāyāpanacceko, sāsaṅkaṃ saṅghikena cāti.
৬৬২. উদ্দিট্ঠা খো, আযস্মন্তো, তিংস নিস্সগ্গিযা পাচিত্তিযা ধম্মা। তত্থাযস্মন্তে পুচ্ছামি – ‘কচ্চিত্থ পরিসুদ্ধা’? দুতিযম্পি পুচ্ছামি – ‘কচ্চিত্থ পরিসুদ্ধা’? ততিযম্পি পুচ্ছামি – ‘কচ্চিত্থ পরিসুদ্ধা’? পরিসুদ্ধেত্থাযস্মন্তো, তস্মা তুণ্হী, এৰমেতং ধারযামীতি।
662. Uddiṭṭhā kho, āyasmanto, tiṃsa nissaggiyā pācittiyā dhammā. Tatthāyasmante pucchāmi – ‘kaccittha parisuddhā’? Dutiyampi pucchāmi – ‘kaccittha parisuddhā’? Tatiyampi pucchāmi – ‘kaccittha parisuddhā’? Parisuddhetthāyasmanto, tasmā tuṇhī, evametaṃ dhārayāmīti.
নিস্সগ্গিযকণ্ডং নিট্ঠিতং।
Nissaggiyakaṇḍaṃ niṭṭhitaṃ.
পারাজিকপাল়ি নিট্ঠিতা।
Pārājikapāḷi niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১০. পরিণতসিক্খাপদৰণ্ণনা • 10. Pariṇatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১০. পরিণতসিক্খাপদৰণ্ণনা • 10. Pariṇatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১০. পরিণতসিক্খাপদৰণ্ণনা • 10. Pariṇatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১০. পরিণতসিক্খাপদৰণ্ণনা • 10. Pariṇatasikkhāpadavaṇṇanā
