| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
10. පරිණතසික්‌ඛාපදං
10. Pariṇatasikkhāpadaṃ
657. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන සාවත්‌ථියං අඤ්‌ඤතරස්‌ස පූගස්‌ස සඞ්‌ඝස්‌ස සචීවරභත්‌තං පටියත්‌තං හොති – ‘‘භොජෙත්‌වා චීවරෙන අච්‌ඡාදෙස්‌සාමා’’ති. අථ ඛො ඡබ්‌බග්‌ගියා භික්‌ඛූ යෙන සො පූගො තෙනුපසඞ්‌කමිංසු; උපසඞ්‌කමිත්‌වා තං පූගං එතදවොචුං – ‘‘දෙථාවුසො, අම්‌හාකං ඉමානි චීවරානී’’ති. ‘‘න මයං, භන්‌තෙ, දස්‌සාම. අම්‌හාකං සඞ්‌ඝස්‌ස අනුවස්‌සං සචීවරභික්‌ඛා පඤ්‌ඤත්‌තා’’ති. ‘‘බහූ, ආවුසො, සඞ්‌ඝස්‌ස දායකා, බහූ සඞ්‌ඝස්‌ස භත්‌තා 1. මයං තුම්‌හෙ නිස්‌සාය තුම්‌හෙ සම්‌පස්‌සන්‌තා ඉධ විහරාම. තුම්‌හෙ චෙ අම්‌හාකං න දස්‌සථ, අථ කො චරහි අම්‌හාකං දස්‌සති? දෙථාවුසො, අම්‌හාකං ඉමානි චීවරානී’’ති. අථ ඛො සො පූගො ඡබ්‌බග්‌ගියෙහි භික්‌ඛූහි නිප්‌පීළියමානො යථාපටියත්‌තං චීවරං ඡබ්‌බග්‌ගියානං භික්‌ඛූනං දත්‌වා සඞ්‌ඝං භත්‌තෙන පරිවිසි. යෙ තෙ භික්‌ඛූ ජානන්‌ති සඞ්‌ඝස්‌ස සචීවරභත්‌තං පටියත්‌තං, න ච ජානන්‌ති ඡබ්‌බග්‌ගියානං භික්‌ඛූනං දින්‌නන්‌ති, තෙ එවමාහංසු – ‘‘ඔණොජෙථාවුසො, සඞ්‌ඝස්‌ස චීවර’’න්‌ති. ‘‘නත්‌ථි, භන්‌තෙ. යථාපටියත්‌තං චීවරං අය්‍යා ඡබ්‌බග්‌ගියා අත්‌තනො පරිණාමෙසු’’න්‌ති. යෙ තෙ භික්‌ඛූ අප්‌පිච්‌ඡා… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛූ ජානං සඞ්‌ඝිකං ලාභං පරිණතං අත්‌තනො පරිණාමෙස්‌සන්‌තී’’ති ! අථ ඛො තෙ භික්‌ඛූ ඡබ්‌බග්‌ගියෙ භික්‌ඛූ අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… ‘‘සච්‌චං කිර තුම්‌හෙ, භික්‌ඛවෙ, ජානං සඞ්‌ඝිකං ලාභං පරිණතං අත්‌තනො පරිණාමෙථා’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම තුම්‌හෙ, මොඝපුරිසා, ජානං සඞ්‌ඝිකං ලාභං පරිණතං අත්‌තනො පරිණාමෙස්‌සථ! නෙතං, මොඝපුරිසා, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
657. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāvatthiyaṃ aññatarassa pūgassa saṅghassa sacīvarabhattaṃ paṭiyattaṃ hoti – ‘‘bhojetvā cīvarena acchādessāmā’’ti. Atha kho chabbaggiyā bhikkhū yena so pūgo tenupasaṅkamiṃsu; upasaṅkamitvā taṃ pūgaṃ etadavocuṃ – ‘‘dethāvuso, amhākaṃ imāni cīvarānī’’ti. ‘‘Na mayaṃ, bhante, dassāma. Amhākaṃ saṅghassa anuvassaṃ sacīvarabhikkhā paññattā’’ti. ‘‘Bahū, āvuso, saṅghassa dāyakā, bahū saṅghassa bhattā 2. Mayaṃ tumhe nissāya tumhe sampassantā idha viharāma. Tumhe ce amhākaṃ na dassatha, atha ko carahi amhākaṃ dassati? Dethāvuso, amhākaṃ imāni cīvarānī’’ti. Atha kho so pūgo chabbaggiyehi bhikkhūhi nippīḷiyamāno yathāpaṭiyattaṃ cīvaraṃ chabbaggiyānaṃ bhikkhūnaṃ datvā saṅghaṃ bhattena parivisi. Ye te bhikkhū jānanti saṅghassa sacīvarabhattaṃ paṭiyattaṃ, na ca jānanti chabbaggiyānaṃ bhikkhūnaṃ dinnanti, te evamāhaṃsu – ‘‘oṇojethāvuso, saṅghassa cīvara’’nti. ‘‘Natthi, bhante. Yathāpaṭiyattaṃ cīvaraṃ ayyā chabbaggiyā attano pariṇāmesu’’nti. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma chabbaggiyā bhikkhū jānaṃ saṅghikaṃ lābhaṃ pariṇataṃ attano pariṇāmessantī’’ti ! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, jānaṃ saṅghikaṃ lābhaṃ pariṇataṃ attano pariṇāmethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, jānaṃ saṅghikaṃ lābhaṃ pariṇataṃ attano pariṇāmessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
658. ‘‘යො පන භික්‌ඛු ජානං සඞ්‌ඝිකං ලාභං පරිණතං අත්‌තනො පරිණාමෙය්‍ය, නිස්‌සග්‌ගියං පාචිත්‌තිය’’න්‌ති.
658.‘‘Yo pana bhikkhu jānaṃ saṅghikaṃ lābhaṃ pariṇataṃ attano pariṇāmeyya, nissaggiyaṃ pācittiya’’nti.
659. යො පනාති යො යාදිසො…පෙ.… භික්‌ඛූති…පෙ.… අය ඉමස්‌මිං අත්‌ථෙ අධිප්‌පෙතො භික්‌ඛූති.
659.Yo panāti yo yādiso…pe… bhikkhūti…pe… aya imasmiṃ atthe adhippeto bhikkhūti.
3 ජානාති නාම සාමං වා ජානාති අඤ්‌ඤෙ වා තස්‌ස ආරොචෙන්‌ති සො වා ආරොචෙති.
4Jānāti nāma sāmaṃ vā jānāti aññe vā tassa ārocenti so vā āroceti.
5 සඞ්‌ඝිකං නාම සඞ්‌ඝස්‌ස දින්‌නං හොති පරිච්‌චත්‌තං.
6Saṅghikaṃ nāma saṅghassa dinnaṃ hoti pariccattaṃ.
7 ලාභො නාම චීවරපිණ්‌ඩපාතසෙනාසනගිලානප්‌පච්‌චයභෙසජ්‌ජපරික්‌ඛාරා. අන්‌තමසො චුණ්‌ණපිණ්‌ඩොපි, දන්‌තකට්‌ඨම්‌පි, දසිකසුත්‌තම්‌පි.
8Lābho nāma cīvarapiṇḍapātasenāsanagilānappaccayabhesajjaparikkhārā. Antamaso cuṇṇapiṇḍopi, dantakaṭṭhampi, dasikasuttampi.
9 පරිණතං නාම දස්‌සාම කරිස්‌සාමාති වාචා භින්‌නා හොති.
10Pariṇataṃ nāma dassāma karissāmāti vācā bhinnā hoti.
අත්‌තනො පරිණාමෙති, පයොගෙ දුක්‌කටං. පටිලාභෙන නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා පුග්‌ගලස්‌ස වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බං…පෙ.… ඉදං මෙ, භන්‌තෙ, ජානං සඞ්‌ඝිකං ලාභං පරිණතං අත්‌තනො පරිණාමිතං නිස්‌සග්‌ගියං. ඉමාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති…පෙ.… දදෙය්‍යුන්‌ති…පෙ.… ආයස්‌මතො දම්‌මීති.
Attano pariṇāmeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, jānaṃ saṅghikaṃ lābhaṃ pariṇataṃ attano pariṇāmitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
660. පරිණතෙ පරිණතසඤ්‌ඤී අත්‌තනො පරිණාමෙති, නිස්‌සග්‌ගියං පාචිත්‌තියං.
660. Pariṇate pariṇatasaññī attano pariṇāmeti, nissaggiyaṃ pācittiyaṃ.
පරිණතෙ වෙමතිකො අත්‌තනො පරිණාමෙති, ආපත්‌ති දුක්‌කටස්‌ස. පරිණතෙ අපරිණතසඤ්‌ඤී අත්‌තනො පරිණාමෙති, අනාපත්‌ති. සඞ්‌ඝස්‌ස පරිණතං අඤ්‌ඤසඞ්‌ඝස්‌ස වා චෙතියස්‌ස වා පරිණාමෙති, ආපත්‌ති දුක්‌කටස්‌ස. චෙතියස්‌ස පරිණතං අඤ්‌ඤචෙතියස්‌ස වා සඞ්‌ඝස්‌ස වා පුග්‌ගලස්‌ස වා පරිණාමෙති, ආපත්‌ති දුක්‌කටස්‌ස. පුග්‌ගලස්‌ස පරිණතං අඤ්‌ඤපුග්‌ගලස්‌ස වා සඞ්‌ඝස්‌ස වා චෙතියස්‌ස වා පරිණාමෙති, ආපත්‌ති දුක්‌කටස්‌ස. අපරිණතෙ පරිණතසඤ්‌ඤී, ආපත්‌ති දුක්‌කටස්‌ස. අපරිණතෙ වෙමතිකො, ආපත්‌ති දුක්‌කටස්‌ස. අපරිණතෙ අපරිණතසඤ්‌ඤී, අනාපත්‌ති.
Pariṇate vematiko attano pariṇāmeti, āpatti dukkaṭassa. Pariṇate apariṇatasaññī attano pariṇāmeti, anāpatti. Saṅghassa pariṇataṃ aññasaṅghassa vā cetiyassa vā pariṇāmeti, āpatti dukkaṭassa. Cetiyassa pariṇataṃ aññacetiyassa vā saṅghassa vā puggalassa vā pariṇāmeti, āpatti dukkaṭassa. Puggalassa pariṇataṃ aññapuggalassa vā saṅghassa vā cetiyassa vā pariṇāmeti, āpatti dukkaṭassa. Apariṇate pariṇatasaññī, āpatti dukkaṭassa. Apariṇate vematiko, āpatti dukkaṭassa. Apariṇate apariṇatasaññī, anāpatti.
661. අනාපත්‌ති කත්‌ථ දෙමාති පුච්‌ඡියමානො යත්‌ථ තුම්‌හාකං දෙය්‍යධම්‌මො පරිභොගං වා ලභෙය්‍ය පටිසඞ්‌ඛාරං වා ලභෙය්‍ය චිරට්‌ඨිතිකො වා අස්‌ස යත්‌ථ වා පන තුම්‌හාකං චිත්‌තං පසීදති තත්‌ථ දෙථාති භණති, උම්‌මත්‌තකස්‌ස, ආදිකම්‌මිකස්‌සාති.
661. Anāpatti kattha demāti pucchiyamāno yattha tumhākaṃ deyyadhammo paribhogaṃ vā labheyya paṭisaṅkhāraṃ vā labheyya ciraṭṭhitiko vā assa yattha vā pana tumhākaṃ cittaṃ pasīdati tattha dethāti bhaṇati, ummattakassa, ādikammikassāti.
පරිණතසික්‌ඛාපදං නිට්‌ඨිතං දසමං.
Pariṇatasikkhāpadaṃ niṭṭhitaṃ dasamaṃ.
පත්‌තවග්‌ගො තතියො.
Pattavaggo tatiyo.
තස්‌සුද්‌දානං –
Tassuddānaṃ –
ද්‌වෙ ච පත්‌තානි භෙසජ්‌ජං, වස්‌සිකා දානපඤ්‌චමං;
Dve ca pattāni bhesajjaṃ, vassikā dānapañcamaṃ;
සාමං වායාපනච්‌චෙකො, සාසඞ්‌කං සඞ්‌ඝිකෙන චාති.
Sāmaṃ vāyāpanacceko, sāsaṅkaṃ saṅghikena cāti.
662. උද්‌දිට්‌ඨා ඛො, ආයස්‌මන්‌තො, තිංස නිස්‌සග්‌ගියා පාචිත්‌තියා ධම්‌මා. තත්‌ථායස්‌මන්‌තෙ පුච්‌ඡාමි – ‘කච්‌චිත්‌ථ පරිසුද්‌ධා’? දුතියම්‌පි පුච්‌ඡාමි – ‘කච්‌චිත්‌ථ පරිසුද්‌ධා’? තතියම්‌පි පුච්‌ඡාමි – ‘කච්‌චිත්‌ථ පරිසුද්‌ධා’? පරිසුද්‌ධෙත්‌ථායස්‌මන්‌තො, තස්‌මා තුණ්‌හී, එවමෙතං ධාරයාමීති.
662. Uddiṭṭhā kho, āyasmanto, tiṃsa nissaggiyā pācittiyā dhammā. Tatthāyasmante pucchāmi – ‘kaccittha parisuddhā’? Dutiyampi pucchāmi – ‘kaccittha parisuddhā’? Tatiyampi pucchāmi – ‘kaccittha parisuddhā’? Parisuddhetthāyasmanto, tasmā tuṇhī, evametaṃ dhārayāmīti.
නිස්‌සග්‌ගියකණ්‌ඩං නිට්‌ඨිතං.
Nissaggiyakaṇḍaṃ niṭṭhitaṃ.
පාරාජිකපාළි නිට්‌ඨිතා.
Pārājikapāḷi niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 10. පරිණතසික්‌ඛාපදවණ්‌ණනා • 10. Pariṇatasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 10. පරිණතසික්‌ඛාපදවණ්‌ණනා • 10. Pariṇatasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 10. පරිණතසික්‌ඛාපදවණ්‌ණනා • 10. Pariṇatasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 10. පරිණතසික්‌ඛාපදවණ්‌ණනා • 10. Pariṇatasikkhāpadavaṇṇanā
