| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
10. பரிணதஸிக்கா²பத³வண்ணனா
10. Pariṇatasikkhāpadavaṇṇanā
657. தே³தா²வுஸோ அம்ஹாகந்தி எத்த² அகதவிஞ்ஞத்தி ஹோதி ந ஹோதீதி? ஹோதி, யதி³ ஏவங் அஞ்ஞாதகவிஞ்ஞத்திஸிக்கா²பத³ஸ்ஸ ச இமஸ்ஸ ச கிங் நானாகரணந்தி? தங் அஞ்ஞாதகஅப்பவாரிதேயேவ விஞ்ஞாபெந்தஸ்ஸ, இத³ங் ஞாதகபவாரிதேபி, தங் அனச்சி²ன்னசீவரஸ்ஸேவ, இத³ங் தஸ்ஸபி, தங் சீவரங்யேவ விஞ்ஞாபெந்தஸ்ஸ, இத³ங் அசீவரம்பி. ஏவங் ஸந்தே இத³ங் தங் அந்தோகத்வா டி²தங் ஹோதி, தஸ்மா த்³வின்னம்பி அங்க³ஸம்பத்தியா ஸதி கேன ப⁴விதப்³ப³ந்தி? இமினா ப⁴விதப்³ப³ங் இமஸ்ஸ நிப்பதே³ஸதோதி ஏகே. த்³வீஹிபி ப⁴விதப்³ப³ங் உபி⁴ன்னம்பி அங்க³ஸித்³தி⁴தோதி ஏகே. இமானி தஸ்ஸ அங்கா³னி விகப்பனுபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய ச படிலாபோ⁴தி சத்தாரி. இமஸ்ஸ பன ஸங்கே⁴ பரிணதபா⁴வோ, ஞத்வா அத்தனோ பரிணாமனங், படிலாபோ⁴தி தீணி. எத்த² பட²மோ வாதோ³ அயுத்தோ கத்வாபி ஓகாஸங் அட்ட²கதா²யங், பரிவாரே ச அவிசாரிதத்தா. யதி³ ஏவங் தத்த² அங்கே³ஸு ‘‘அனஞ்ஞபரிணததா’’தி வத்தப்³ப³ந்தி சே? ந வத்தப்³ப³ங், அத்த²தோ ஸித்³த⁴த்தா. பரிணதஸிக்கா²பத³த்³வயஸித்³தி⁴தோ, பரிணதஸஞ்ஞிதோ, ஆபத்திஸம்ப⁴வதோ ச ‘‘மய்ஹம்பி தே³தா²’’தி வத³தி, ‘‘வட்டதீ’’தி அனுத்³தி³ட்ட²ங், ‘‘அம்ஹாகம்பி அத்தீ²’’தி வுத்தத்தா வட்டதி. ‘‘ஸங்க⁴ஸ்ஸ பரிணதங்…பே॰… ஆபத்தி து³க்கடஸ்ஸா’’தி எத்த² ‘‘புக்³க³லஸ்ஸா’’தி ந வுத்தங், யதோ ஸுத்³த⁴பாசித்தியவஸேன ஆக³தத்தா. ‘‘அஞ்ஞசேதியஸ்ஸா’’தி ந வுத்தங் ஸங்க⁴ஸ்ஸ அசேதியத்தா, தஸ்மாயேவ ‘‘சேதியஸ்ஸ பரிணதங்…பே॰… ஆபத்தி து³க்கடஸ்ஸா’’தி எத்தா²பி ‘‘அஞ்ஞஸங்க⁴ஸ்ஸ அஞ்ஞபுக்³க³லஸ்ஸா’’தி ந வுத்தங். ‘‘யதோ ததா² இத⁴ ச ‘புக்³க³லஸ்ஸ பரிணதங்…பே॰… ஆபத்தி து³க்கடஸ்ஸா’தி எத்த² ச ‘அத்தனோபீ’தி கிஞ்சாபி ந வுத்தங், ததா²பி ஸம்ப⁴வதீ’’தி வத³ந்தி. தங் பன இத⁴ அத்தனோ பரிணாமனாதி⁴காரத்தா இமஸ்ஸ ஸிக்கா²பத³ஸ்ஸ ந வுத்தந்தி ஏகே. ததுத்தரிஸிக்கா²பதே³ ‘‘அஞ்ஞஸ்ஸத்தா²யா’’தி (பாரா॰ அட்ட²॰ 2.526) பத³ங் வியாதி ஏகே. தங் ந, எத்த² புக்³க³லபரிணாமனஸிக்கா²பதே³ அவுத்தத்தா. த⁴ம்மஸிரித்தே²ரோ பனாஹ –
657.Dethāvusoamhākanti ettha akataviññatti hoti na hotīti? Hoti, yadi evaṃ aññātakaviññattisikkhāpadassa ca imassa ca kiṃ nānākaraṇanti? Taṃ aññātakaappavāriteyeva viññāpentassa, idaṃ ñātakapavāritepi, taṃ anacchinnacīvarasseva, idaṃ tassapi, taṃ cīvaraṃyeva viññāpentassa, idaṃ acīvarampi. Evaṃ sante idaṃ taṃ antokatvā ṭhitaṃ hoti, tasmā dvinnampi aṅgasampattiyā sati kena bhavitabbanti? Iminā bhavitabbaṃ imassa nippadesatoti eke. Dvīhipi bhavitabbaṃ ubhinnampi aṅgasiddhitoti eke. Imāni tassa aṅgāni vikappanupagacīvaratā, samayābhāvo, aññātakaviññatti, tāya ca paṭilābhoti cattāri. Imassa pana saṅghe pariṇatabhāvo, ñatvā attano pariṇāmanaṃ, paṭilābhoti tīṇi. Ettha paṭhamo vādo ayutto katvāpi okāsaṃ aṭṭhakathāyaṃ, parivāre ca avicāritattā. Yadi evaṃ tattha aṅgesu ‘‘anaññapariṇatatā’’ti vattabbanti ce? Na vattabbaṃ, atthato siddhattā. Pariṇatasikkhāpadadvayasiddhito, pariṇatasaññito, āpattisambhavato ca ‘‘mayhampi dethā’’ti vadati, ‘‘vaṭṭatī’’ti anuddiṭṭhaṃ, ‘‘amhākampi atthī’’ti vuttattā vaṭṭati. ‘‘Saṅghassa pariṇataṃ…pe… āpatti dukkaṭassā’’ti ettha ‘‘puggalassā’’ti na vuttaṃ, yato suddhapācittiyavasena āgatattā. ‘‘Aññacetiyassā’’ti na vuttaṃ saṅghassa acetiyattā, tasmāyeva ‘‘cetiyassa pariṇataṃ…pe… āpatti dukkaṭassā’’ti etthāpi ‘‘aññasaṅghassa aññapuggalassā’’ti na vuttaṃ. ‘‘Yato tathā idha ca ‘puggalassa pariṇataṃ…pe… āpatti dukkaṭassā’ti ettha ca ‘attanopī’ti kiñcāpi na vuttaṃ, tathāpi sambhavatī’’ti vadanti. Taṃ pana idha attano pariṇāmanādhikārattā imassa sikkhāpadassa na vuttanti eke. Tatuttarisikkhāpade ‘‘aññassatthāyā’’ti (pārā. aṭṭha. 2.526) padaṃ viyāti eke. Taṃ na, ettha puggalapariṇāmanasikkhāpade avuttattā. Dhammasiritthero panāha –
‘‘அத்தனோ அஞ்ஞதோ லாப⁴ங், ஸங்க⁴ஸ்ஸஞ்ஞஸ்ஸ வா நதங்;
‘‘Attano aññato lābhaṃ, saṅghassaññassa vā nataṃ;
பரிணாமெய்ய நிஸ்ஸக்³கி³, பாசித்தியம்பி து³க்கட’’ந்தி.
Pariṇāmeyya nissaggi, pācittiyampi dukkaṭa’’nti.
தஸ்ஸத்தோ² – ஸங்க⁴ஸ்ஸ பரிணதங் அத்தனோ பரிணாமெய்ய நிஸ்ஸக்³கி³யங். ததே³வ அஞ்ஞதோ பரிணாமெய்ய பாசித்தியங். அஞ்ஞஸ்ஸ பரிணதங் அத்தனோ வா பரஸ்ஸ வா பரிணாமெய்ய து³க்கடந்தி, தஸ்மா அஞ்ஞாதகவிஞ்ஞத்திஆதீ³ஸு வுத்தாபத்திஸம்ப⁴வதோ இத⁴ பரிணதத்³வயே ‘‘அத்தனோ’’தி பத³ங் ந வுத்தங். தஸ்மிஞ்ஹி வுத்தே து³க்கடமத்தப்பஸங்கோ³ ஸியா, அவுத்தே பனேதேஸு வுத்தாபத்தீனங் யதா²க³மமஞ்ஞதரா ச இத⁴ அவுத்தஸித்³தி⁴ து³க்கடஞ்சாதி த்³வே ஆபத்தியோ ஏகதோ ஹொந்தீதி வினயத⁴ரானங் அனவஸேஸஞாணஸ்ஸ ஓகாஸோ கதோ ஹோதீதி.
Tassattho – saṅghassa pariṇataṃ attano pariṇāmeyya nissaggiyaṃ. Tadeva aññato pariṇāmeyya pācittiyaṃ. Aññassa pariṇataṃ attano vā parassa vā pariṇāmeyya dukkaṭanti, tasmā aññātakaviññattiādīsu vuttāpattisambhavato idha pariṇatadvaye ‘‘attano’’ti padaṃ na vuttaṃ. Tasmiñhi vutte dukkaṭamattappasaṅgo siyā, avutte panetesu vuttāpattīnaṃ yathāgamamaññatarā ca idha avuttasiddhi dukkaṭañcāti dve āpattiyo ekato hontīti vinayadharānaṃ anavasesañāṇassa okāso kato hotīti.
இதி திங்ஸககண்ட³ங் ஸாரமண்ட³ங்,
Iti tiṃsakakaṇḍaṃ sāramaṇḍaṃ,
அலமேதங் வினயஸ்ஸ ஸாரமண்டே³;
Alametaṃ vinayassa sāramaṇḍe;
இத⁴ நிட்டி²தஸப்³ப³ஸாரமண்ட³ங்,
Idha niṭṭhitasabbasāramaṇḍaṃ,
வினயவஸேன புனாதி ஸாரமண்ட³ந்தி.
Vinayavasena punāti sāramaṇḍanti.
பரிணதஸிக்கா²பத³வண்ணனா நிட்டி²தா.
Pariṇatasikkhāpadavaṇṇanā niṭṭhitā.
நிட்டி²தோ பத்தவக்³கோ³ ததியோ.
Niṭṭhito pattavaggo tatiyo.
நிஸ்ஸக்³கி³யவண்ணனா நிட்டி²தா.
Nissaggiyavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. பரிணதஸிக்கா²பத³ங் • 10. Pariṇatasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. பரிணதஸிக்கா²பத³வண்ணனா • 10. Pariṇatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. பரிணதஸிக்கா²பத³வண்ணனா • 10. Pariṇatasikkhāpadavaṇṇanā
