| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
১০. পরিণতসিক্খাপদৰণ্ণনা
10. Pariṇatasikkhāpadavaṇṇanā
৬৫৭. দেথাৰুসো অম্হাকন্তি এত্থ অকতৰিঞ্ঞত্তি হোতি ন হোতীতি? হোতি, যদি এৰং অঞ্ঞাতকৰিঞ্ঞত্তিসিক্খাপদস্স চ ইমস্স চ কিং নানাকরণন্তি? তং অঞ্ঞাতকঅপ্পৰারিতেযেৰ ৰিঞ্ঞাপেন্তস্স, ইদং ঞাতকপৰারিতেপি, তং অনচ্ছিন্নচীৰরস্সেৰ, ইদং তস্সপি, তং চীৰরংযেৰ ৰিঞ্ঞাপেন্তস্স, ইদং অচীৰরম্পি। এৰং সন্তে ইদং তং অন্তোকত্ৰা ঠিতং হোতি, তস্মা দ্ৰিন্নম্পি অঙ্গসম্পত্তিযা সতি কেন ভৰিতব্বন্তি? ইমিনা ভৰিতব্বং ইমস্স নিপ্পদেসতোতি একে। দ্ৰীহিপি ভৰিতব্বং উভিন্নম্পি অঙ্গসিদ্ধিতোতি একে। ইমানি তস্স অঙ্গানি ৰিকপ্পনুপগচীৰরতা, সমযাভাৰো, অঞ্ঞাতকৰিঞ্ঞত্তি, তায চ পটিলাভোতি চত্তারি। ইমস্স পন সঙ্ঘে পরিণতভাৰো, ঞত্ৰা অত্তনো পরিণামনং, পটিলাভোতি তীণি। এত্থ পঠমো ৰাদো অযুত্তো কত্ৰাপি ওকাসং অট্ঠকথাযং, পরিৰারে চ অৰিচারিতত্তা। যদি এৰং তত্থ অঙ্গেসু ‘‘অনঞ্ঞপরিণততা’’তি ৰত্তব্বন্তি চে? ন ৰত্তব্বং, অত্থতো সিদ্ধত্তা। পরিণতসিক্খাপদদ্ৰযসিদ্ধিতো, পরিণতসঞ্ঞিতো, আপত্তিসম্ভৰতো চ ‘‘ময্হম্পি দেথা’’তি ৰদতি, ‘‘ৰট্টতী’’তি অনুদ্দিট্ঠং, ‘‘অম্হাকম্পি অত্থী’’তি ৰুত্তত্তা ৰট্টতি। ‘‘সঙ্ঘস্স পরিণতং…পে॰… আপত্তি দুক্কটস্সা’’তি এত্থ ‘‘পুগ্গলস্সা’’তি ন ৰুত্তং, যতো সুদ্ধপাচিত্তিযৰসেন আগতত্তা। ‘‘অঞ্ঞচেতিযস্সা’’তি ন ৰুত্তং সঙ্ঘস্স অচেতিযত্তা, তস্মাযেৰ ‘‘চেতিযস্স পরিণতং…পে॰… আপত্তি দুক্কটস্সা’’তি এত্থাপি ‘‘অঞ্ঞসঙ্ঘস্স অঞ্ঞপুগ্গলস্সা’’তি ন ৰুত্তং। ‘‘যতো তথা ইধ চ ‘পুগ্গলস্স পরিণতং…পে॰… আপত্তি দুক্কটস্সা’তি এত্থ চ ‘অত্তনোপী’তি কিঞ্চাপি ন ৰুত্তং, তথাপি সম্ভৰতী’’তি ৰদন্তি। তং পন ইধ অত্তনো পরিণামনাধিকারত্তা ইমস্স সিক্খাপদস্স ন ৰুত্তন্তি একে। ততুত্তরিসিক্খাপদে ‘‘অঞ্ঞস্সত্থাযা’’তি (পারা॰ অট্ঠ॰ ২.৫২৬) পদং ৰিযাতি একে। তং ন, এত্থ পুগ্গলপরিণামনসিক্খাপদে অৰুত্তত্তা। ধম্মসিরিত্থেরো পনাহ –
657.Dethāvusoamhākanti ettha akataviññatti hoti na hotīti? Hoti, yadi evaṃ aññātakaviññattisikkhāpadassa ca imassa ca kiṃ nānākaraṇanti? Taṃ aññātakaappavāriteyeva viññāpentassa, idaṃ ñātakapavāritepi, taṃ anacchinnacīvarasseva, idaṃ tassapi, taṃ cīvaraṃyeva viññāpentassa, idaṃ acīvarampi. Evaṃ sante idaṃ taṃ antokatvā ṭhitaṃ hoti, tasmā dvinnampi aṅgasampattiyā sati kena bhavitabbanti? Iminā bhavitabbaṃ imassa nippadesatoti eke. Dvīhipi bhavitabbaṃ ubhinnampi aṅgasiddhitoti eke. Imāni tassa aṅgāni vikappanupagacīvaratā, samayābhāvo, aññātakaviññatti, tāya ca paṭilābhoti cattāri. Imassa pana saṅghe pariṇatabhāvo, ñatvā attano pariṇāmanaṃ, paṭilābhoti tīṇi. Ettha paṭhamo vādo ayutto katvāpi okāsaṃ aṭṭhakathāyaṃ, parivāre ca avicāritattā. Yadi evaṃ tattha aṅgesu ‘‘anaññapariṇatatā’’ti vattabbanti ce? Na vattabbaṃ, atthato siddhattā. Pariṇatasikkhāpadadvayasiddhito, pariṇatasaññito, āpattisambhavato ca ‘‘mayhampi dethā’’ti vadati, ‘‘vaṭṭatī’’ti anuddiṭṭhaṃ, ‘‘amhākampi atthī’’ti vuttattā vaṭṭati. ‘‘Saṅghassa pariṇataṃ…pe… āpatti dukkaṭassā’’ti ettha ‘‘puggalassā’’ti na vuttaṃ, yato suddhapācittiyavasena āgatattā. ‘‘Aññacetiyassā’’ti na vuttaṃ saṅghassa acetiyattā, tasmāyeva ‘‘cetiyassa pariṇataṃ…pe… āpatti dukkaṭassā’’ti etthāpi ‘‘aññasaṅghassa aññapuggalassā’’ti na vuttaṃ. ‘‘Yato tathā idha ca ‘puggalassa pariṇataṃ…pe… āpatti dukkaṭassā’ti ettha ca ‘attanopī’ti kiñcāpi na vuttaṃ, tathāpi sambhavatī’’ti vadanti. Taṃ pana idha attano pariṇāmanādhikārattā imassa sikkhāpadassa na vuttanti eke. Tatuttarisikkhāpade ‘‘aññassatthāyā’’ti (pārā. aṭṭha. 2.526) padaṃ viyāti eke. Taṃ na, ettha puggalapariṇāmanasikkhāpade avuttattā. Dhammasiritthero panāha –
‘‘অত্তনো অঞ্ঞতো লাভং, সঙ্ঘস্সঞ্ঞস্স ৰা নতং।
‘‘Attano aññato lābhaṃ, saṅghassaññassa vā nataṃ;
পরিণামেয্য নিস্সগ্গি, পাচিত্তিযম্পি দুক্কট’’ন্তি॥
Pariṇāmeyya nissaggi, pācittiyampi dukkaṭa’’nti.
তস্সত্থো – সঙ্ঘস্স পরিণতং অত্তনো পরিণামেয্য নিস্সগ্গিযং। তদেৰ অঞ্ঞতো পরিণামেয্য পাচিত্তিযং। অঞ্ঞস্স পরিণতং অত্তনো ৰা পরস্স ৰা পরিণামেয্য দুক্কটন্তি, তস্মা অঞ্ঞাতকৰিঞ্ঞত্তিআদীসু ৰুত্তাপত্তিসম্ভৰতো ইধ পরিণতদ্ৰযে ‘‘অত্তনো’’তি পদং ন ৰুত্তং। তস্মিঞ্হি ৰুত্তে দুক্কটমত্তপ্পসঙ্গো সিযা, অৰুত্তে পনেতেসু ৰুত্তাপত্তীনং যথাগমমঞ্ঞতরা চ ইধ অৰুত্তসিদ্ধি দুক্কটঞ্চাতি দ্ৰে আপত্তিযো একতো হোন্তীতি ৰিনযধরানং অনৰসেসঞাণস্স ওকাসো কতো হোতীতি।
Tassattho – saṅghassa pariṇataṃ attano pariṇāmeyya nissaggiyaṃ. Tadeva aññato pariṇāmeyya pācittiyaṃ. Aññassa pariṇataṃ attano vā parassa vā pariṇāmeyya dukkaṭanti, tasmā aññātakaviññattiādīsu vuttāpattisambhavato idha pariṇatadvaye ‘‘attano’’ti padaṃ na vuttaṃ. Tasmiñhi vutte dukkaṭamattappasaṅgo siyā, avutte panetesu vuttāpattīnaṃ yathāgamamaññatarā ca idha avuttasiddhi dukkaṭañcāti dve āpattiyo ekato hontīti vinayadharānaṃ anavasesañāṇassa okāso kato hotīti.
ইতি তিংসককণ্ডং সারমণ্ডং,
Iti tiṃsakakaṇḍaṃ sāramaṇḍaṃ,
অলমেতং ৰিনযস্স সারমণ্ডে।
Alametaṃ vinayassa sāramaṇḍe;
ইধ নিট্ঠিতসব্বসারমণ্ডং,
Idha niṭṭhitasabbasāramaṇḍaṃ,
ৰিনযৰসেন পুনাতি সারমণ্ডন্তি॥
Vinayavasena punāti sāramaṇḍanti.
পরিণতসিক্খাপদৰণ্ণনা নিট্ঠিতা।
Pariṇatasikkhāpadavaṇṇanā niṭṭhitā.
নিট্ঠিতো পত্তৰগ্গো ততিযো।
Niṭṭhito pattavaggo tatiyo.
নিস্সগ্গিযৰণ্ণনা নিট্ঠিতা।
Nissaggiyavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১০. পরিণতসিক্খাপদং • 10. Pariṇatasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১০. পরিণতসিক্খাপদৰণ্ণনা • 10. Pariṇatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১০. পরিণতসিক্খাপদৰণ্ণনা • 10. Pariṇatasikkhāpadavaṇṇanā
