| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩৫. পরিনিব্বানঞাণনিদ্দেসো
35. Parinibbānañāṇaniddeso
৮৬. কথং সম্পজানস্স পৰত্তপরিযাদানে পঞ্ঞা পরিনিব্বানে ঞাণং? ইধ সম্পজানো নেক্খম্মেন কামচ্ছন্দস্স পৰত্তং পরিযাদিযতি, অব্যাপাদেন ব্যাপাদস্স পৰত্তং পরিযাদিযতি, আলোকসঞ্ঞায থিনমিদ্ধস্স পৰত্তং পরিযাদিযতি, অৰিক্খেপেন উদ্ধচ্চস্স পৰত্তং পরিযাদিযতি, ধম্মৰৰত্থানেন ৰিচিকিচ্ছায…পে॰… ঞাণেন অৰিজ্জায… পামোজ্জেন অরতিযা … পঠমেন ঝানেন নীৰরণানং পৰত্তং পরিযাদিযতি…পে॰… অরহত্তমগ্গেন সব্বকিলেসানং পৰত্তং পরিযাদিযতি।
86. Kathaṃ sampajānassa pavattapariyādāne paññā parinibbāne ñāṇaṃ? Idha sampajāno nekkhammena kāmacchandassa pavattaṃ pariyādiyati, abyāpādena byāpādassa pavattaṃ pariyādiyati, ālokasaññāya thinamiddhassa pavattaṃ pariyādiyati, avikkhepena uddhaccassa pavattaṃ pariyādiyati, dhammavavatthānena vicikicchāya…pe… ñāṇena avijjāya… pāmojjena aratiyā … paṭhamena jhānena nīvaraṇānaṃ pavattaṃ pariyādiyati…pe… arahattamaggena sabbakilesānaṃ pavattaṃ pariyādiyati.
অথ ৰা পন সম্পজানস্স অনুপাদিসেসায নিব্বানধাতুযা পরিনিব্বাযন্তস্স ইদঞ্চেৰ চক্খুপৰত্তং পরিযাদিযতি, অঞ্ঞঞ্চ চক্খুপৰত্তং ন উপ্পজ্জতি। ইদঞ্চেৰ সোতপৰত্তং…পে॰… ঘানপৰত্তং… জিৰ্হাপৰত্তং… কাযপৰত্তং… মনোপৰত্তং পরিযাদিযতি, অঞ্ঞঞ্চ মনোপৰত্তং ন উপ্পজ্জতি। ইদং সম্পজানস্স পৰত্তপরিযাদানে পঞ্ঞা পরিনিব্বানে ঞাণং। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘সম্পজানস্স পৰত্তপরিযাদানে পঞ্ঞা পরিনিব্বানে ঞাণং’’।
Atha vā pana sampajānassa anupādisesāya nibbānadhātuyā parinibbāyantassa idañceva cakkhupavattaṃ pariyādiyati, aññañca cakkhupavattaṃ na uppajjati. Idañceva sotapavattaṃ…pe… ghānapavattaṃ… jivhāpavattaṃ… kāyapavattaṃ… manopavattaṃ pariyādiyati, aññañca manopavattaṃ na uppajjati. Idaṃ sampajānassa pavattapariyādāne paññā parinibbāne ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sampajānassa pavattapariyādāne paññā parinibbāne ñāṇaṃ’’.
পরিনিব্বানঞাণনিদ্দেসো পঞ্চতিংসতিমো।
Parinibbānañāṇaniddeso pañcatiṃsatimo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৩৫. পরিনিব্বানঞাণনিদ্দেসৰণ্ণনা • 35. Parinibbānañāṇaniddesavaṇṇanā
