| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃၅. ပရိနိဗ္ဗာနဉာဏနိဒ္ဒေသော
35. Parinibbānañāṇaniddeso
၈၆. ကထံ သမ္ပဇာနသ္သ ပဝတ္တပရိယာဒာနေ ပညာ ပရိနိဗ္ဗာနေ ဉာဏံ? ဣဓ သမ္ပဇာနော နေက္ခမ္မေန ကာမစ္ဆန္ဒသ္သ ပဝတ္တံ ပရိယာဒိယတိ, အဗ္ယာပာဒေန ဗ္ယာပာဒသ္သ ပဝတ္တံ ပရိယာဒိယတိ, အာလောကသညာယ ထိနမိဒ္ဓသ္သ ပဝတ္တံ ပရိယာဒိယတိ, အဝိက္ခေပေန ဥဒ္ဓစ္စသ္သ ပဝတ္တံ ပရိယာဒိယတိ, ဓမ္မဝဝတ္ထာနေန ဝိစိကိစ္ဆာယ။ပေ.။ ဉာဏေန အဝိဇ္ဇာယ။ ပာမောဇ္ဇေန အရတိယာ ။ ပဌမေန ဈာနေန နီဝရဏာနံ ပဝတ္တံ ပရိယာဒိယတိ။ပေ.။ အရဟတ္တမဂ္ဂေန သဗ္ဗကိလေသာနံ ပဝတ္တံ ပရိယာဒိယတိ။
86. Kathaṃ sampajānassa pavattapariyādāne paññā parinibbāne ñāṇaṃ? Idha sampajāno nekkhammena kāmacchandassa pavattaṃ pariyādiyati, abyāpādena byāpādassa pavattaṃ pariyādiyati, ālokasaññāya thinamiddhassa pavattaṃ pariyādiyati, avikkhepena uddhaccassa pavattaṃ pariyādiyati, dhammavavatthānena vicikicchāya…pe… ñāṇena avijjāya… pāmojjena aratiyā … paṭhamena jhānena nīvaraṇānaṃ pavattaṃ pariyādiyati…pe… arahattamaggena sabbakilesānaṃ pavattaṃ pariyādiyati.
အထ ဝာ ပန သမ္ပဇာနသ္သ အနုပာဒိသေသာယ နိဗ္ဗာနဓာတုယာ ပရိနိဗ္ဗာယန္တသ္သ ဣဒဉ္စေဝ စက္ခုပဝတ္တံ ပရိယာဒိယတိ, အညဉ္စ စက္ခုပဝတ္တံ န ဥပ္ပဇ္ဇတိ။ ဣဒဉ္စေဝ သောတပဝတ္တံ။ပေ.။ ဃာနပဝတ္တံ။ ဇိဝ္ဟာပဝတ္တံ။ ကာယပဝတ္တံ။ မနောပဝတ္တံ ပရိယာဒိယတိ, အညဉ္စ မနောပဝတ္တံ န ဥပ္ပဇ္ဇတိ။ ဣဒံ သမ္ပဇာနသ္သ ပဝတ္တပရိယာဒာနေ ပညာ ပရိနိဗ္ဗာနေ ဉာဏံ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘သမ္ပဇာနသ္သ ပဝတ္တပရိယာဒာနေ ပညာ ပရိနိဗ္ဗာနေ ဉာဏံ’’။
Atha vā pana sampajānassa anupādisesāya nibbānadhātuyā parinibbāyantassa idañceva cakkhupavattaṃ pariyādiyati, aññañca cakkhupavattaṃ na uppajjati. Idañceva sotapavattaṃ…pe… ghānapavattaṃ… jivhāpavattaṃ… kāyapavattaṃ… manopavattaṃ pariyādiyati, aññañca manopavattaṃ na uppajjati. Idaṃ sampajānassa pavattapariyādāne paññā parinibbāne ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sampajānassa pavattapariyādāne paññā parinibbāne ñāṇaṃ’’.
ပရိနိဗ္ဗာနဉာဏနိဒ္ဒေသော ပဉ္စတိံသတိမော။
Parinibbānañāṇaniddeso pañcatiṃsatimo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၃၅. ပရိနိဗ္ဗာနဉာဏနိဒ္ဒေသဝဏ္ဏနာ • 35. Parinibbānañāṇaniddesavaṇṇanā
