| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೩೫. ಪರಿನಿಬ್ಬಾನಞಾಣನಿದ್ದೇಸೋ
35. Parinibbānañāṇaniddeso
೮೬. ಕಥಂ ಸಮ್ಪಜಾನಸ್ಸ ಪವತ್ತಪರಿಯಾದಾನೇ ಪಞ್ಞಾ ಪರಿನಿಬ್ಬಾನೇ ಞಾಣಂ? ಇಧ ಸಮ್ಪಜಾನೋ ನೇಕ್ಖಮ್ಮೇನ ಕಾಮಚ್ಛನ್ದಸ್ಸ ಪವತ್ತಂ ಪರಿಯಾದಿಯತಿ, ಅಬ್ಯಾಪಾದೇನ ಬ್ಯಾಪಾದಸ್ಸ ಪವತ್ತಂ ಪರಿಯಾದಿಯತಿ, ಆಲೋಕಸಞ್ಞಾಯ ಥಿನಮಿದ್ಧಸ್ಸ ಪವತ್ತಂ ಪರಿಯಾದಿಯತಿ, ಅವಿಕ್ಖೇಪೇನ ಉದ್ಧಚ್ಚಸ್ಸ ಪವತ್ತಂ ಪರಿಯಾದಿಯತಿ, ಧಮ್ಮವವತ್ಥಾನೇನ ವಿಚಿಕಿಚ್ಛಾಯ…ಪೇ॰… ಞಾಣೇನ ಅವಿಜ್ಜಾಯ… ಪಾಮೋಜ್ಜೇನ ಅರತಿಯಾ … ಪಠಮೇನ ಝಾನೇನ ನೀವರಣಾನಂ ಪವತ್ತಂ ಪರಿಯಾದಿಯತಿ…ಪೇ॰… ಅರಹತ್ತಮಗ್ಗೇನ ಸಬ್ಬಕಿಲೇಸಾನಂ ಪವತ್ತಂ ಪರಿಯಾದಿಯತಿ।
86. Kathaṃ sampajānassa pavattapariyādāne paññā parinibbāne ñāṇaṃ? Idha sampajāno nekkhammena kāmacchandassa pavattaṃ pariyādiyati, abyāpādena byāpādassa pavattaṃ pariyādiyati, ālokasaññāya thinamiddhassa pavattaṃ pariyādiyati, avikkhepena uddhaccassa pavattaṃ pariyādiyati, dhammavavatthānena vicikicchāya…pe… ñāṇena avijjāya… pāmojjena aratiyā … paṭhamena jhānena nīvaraṇānaṃ pavattaṃ pariyādiyati…pe… arahattamaggena sabbakilesānaṃ pavattaṃ pariyādiyati.
ಅಥ ವಾ ಪನ ಸಮ್ಪಜಾನಸ್ಸ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯನ್ತಸ್ಸ ಇದಞ್ಚೇವ ಚಕ್ಖುಪವತ್ತಂ ಪರಿಯಾದಿಯತಿ, ಅಞ್ಞಞ್ಚ ಚಕ್ಖುಪವತ್ತಂ ನ ಉಪ್ಪಜ್ಜತಿ। ಇದಞ್ಚೇವ ಸೋತಪವತ್ತಂ…ಪೇ॰… ಘಾನಪವತ್ತಂ… ಜಿವ್ಹಾಪವತ್ತಂ… ಕಾಯಪವತ್ತಂ… ಮನೋಪವತ್ತಂ ಪರಿಯಾದಿಯತಿ, ಅಞ್ಞಞ್ಚ ಮನೋಪವತ್ತಂ ನ ಉಪ್ಪಜ್ಜತಿ। ಇದಂ ಸಮ್ಪಜಾನಸ್ಸ ಪವತ್ತಪರಿಯಾದಾನೇ ಪಞ್ಞಾ ಪರಿನಿಬ್ಬಾನೇ ಞಾಣಂ। ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ। ತೇನ ವುಚ್ಚತಿ – ‘‘ಸಮ್ಪಜಾನಸ್ಸ ಪವತ್ತಪರಿಯಾದಾನೇ ಪಞ್ಞಾ ಪರಿನಿಬ್ಬಾನೇ ಞಾಣಂ’’।
Atha vā pana sampajānassa anupādisesāya nibbānadhātuyā parinibbāyantassa idañceva cakkhupavattaṃ pariyādiyati, aññañca cakkhupavattaṃ na uppajjati. Idañceva sotapavattaṃ…pe… ghānapavattaṃ… jivhāpavattaṃ… kāyapavattaṃ… manopavattaṃ pariyādiyati, aññañca manopavattaṃ na uppajjati. Idaṃ sampajānassa pavattapariyādāne paññā parinibbāne ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sampajānassa pavattapariyādāne paññā parinibbāne ñāṇaṃ’’.
ಪರಿನಿಬ್ಬಾನಞಾಣನಿದ್ದೇಸೋ ಪಞ್ಚತಿಂಸತಿಮೋ।
Parinibbānañāṇaniddeso pañcatiṃsatimo.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೩೫. ಪರಿನಿಬ್ಬಾನಞಾಣನಿದ್ದೇಸವಣ್ಣನಾ • 35. Parinibbānañāṇaniddesavaṇṇanā
