| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣༥. པརིནིབྦཱནཉཱཎནིདྡེསོ
35. Parinibbānañāṇaniddeso
༨༦. ཀཐཾ སམྤཛཱནསྶ པཝཏྟཔརིཡཱདཱནེ པཉྙཱ པརིནིབྦཱནེ ཉཱཎཾ? ཨིདྷ སམྤཛཱནོ ནེཀྑམྨེན ཀཱམཙྪནྡསྶ པཝཏྟཾ པརིཡཱདིཡཏི, ཨབྱཱཔཱདེན བྱཱཔཱདསྶ པཝཏྟཾ པརིཡཱདིཡཏི, ཨཱལོཀསཉྙཱཡ ཐིནམིདྡྷསྶ པཝཏྟཾ པརིཡཱདིཡཏི, ཨཝིཀྑེཔེན ཨུདྡྷཙྩསྶ པཝཏྟཾ པརིཡཱདིཡཏི, དྷམྨཝཝཏྠཱནེན ཝིཙིཀིཙྪཱཡ…པེ॰… ཉཱཎེན ཨཝིཛྫཱཡ… པཱམོཛྫེན ཨརཏིཡཱ … པཋམེན ཛྷཱནེན ནཱིཝརཎཱནཾ པཝཏྟཾ པརིཡཱདིཡཏི…པེ॰… ཨརཧཏྟམགྒེན སབྦཀིལེསཱནཾ པཝཏྟཾ པརིཡཱདིཡཏི།
86. Kathaṃ sampajānassa pavattapariyādāne paññā parinibbāne ñāṇaṃ? Idha sampajāno nekkhammena kāmacchandassa pavattaṃ pariyādiyati, abyāpādena byāpādassa pavattaṃ pariyādiyati, ālokasaññāya thinamiddhassa pavattaṃ pariyādiyati, avikkhepena uddhaccassa pavattaṃ pariyādiyati, dhammavavatthānena vicikicchāya…pe… ñāṇena avijjāya… pāmojjena aratiyā … paṭhamena jhānena nīvaraṇānaṃ pavattaṃ pariyādiyati…pe… arahattamaggena sabbakilesānaṃ pavattaṃ pariyādiyati.
ཨཐ ཝཱ པན སམྤཛཱནསྶ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡནྟསྶ ཨིདཉྩེཝ ཙཀྑུཔཝཏྟཾ པརིཡཱདིཡཏི, ཨཉྙཉྩ ཙཀྑུཔཝཏྟཾ ན ཨུཔྤཛྫཏི། ཨིདཉྩེཝ སོཏཔཝཏྟཾ…པེ॰… གྷཱནཔཝཏྟཾ… ཛིཝ྄ཧཱཔཝཏྟཾ… ཀཱཡཔཝཏྟཾ… མནོཔཝཏྟཾ པརིཡཱདིཡཏི, ཨཉྙཉྩ མནོཔཝཏྟཾ ན ཨུཔྤཛྫཏི། ཨིདཾ སམྤཛཱནསྶ པཝཏྟཔརིཡཱདཱནེ པཉྙཱ པརིནིབྦཱནེ ཉཱཎཾ། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘སམྤཛཱནསྶ པཝཏྟཔརིཡཱདཱནེ པཉྙཱ པརིནིབྦཱནེ ཉཱཎཾ’’།
Atha vā pana sampajānassa anupādisesāya nibbānadhātuyā parinibbāyantassa idañceva cakkhupavattaṃ pariyādiyati, aññañca cakkhupavattaṃ na uppajjati. Idañceva sotapavattaṃ…pe… ghānapavattaṃ… jivhāpavattaṃ… kāyapavattaṃ… manopavattaṃ pariyādiyati, aññañca manopavattaṃ na uppajjati. Idaṃ sampajānassa pavattapariyādāne paññā parinibbāne ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sampajānassa pavattapariyādāne paññā parinibbāne ñāṇaṃ’’.
པརིནིབྦཱནཉཱཎནིདྡེསོ པཉྩཏིཾསཏིམོ།
Parinibbānañāṇaniddeso pañcatiṃsatimo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣༥. པརིནིབྦཱནཉཱཎནིདྡེསཝཎྞནཱ • 35. Parinibbānañāṇaniddesavaṇṇanā
