| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. பரினிப்³பா³னஸுத்தவண்ணனா
5. Parinibbānasuttavaṇṇanā
186. பஞ்சமே உபவத்தனே மல்லானங் ஸாலவனேதி யதே²வ ஹி கத³ம்ப³னதீ³தீரதோ ராஜமாதுவிஹாரத்³வாரேன தூ²பாராமங் க³ந்தப்³ப³ங் ஹோதி, ஏவங் ஹிரஞ்ஞவதிகாய நாம நதி³யா பாரிமதீரதோ ஸாலவனங் உய்யானங். யதா² அனுராத⁴புரஸ்ஸ தூ²பாராமோ, ஏவங் தங் குஸினாராய ஹோதி. யதா² தூ²பாராமதோ த³க்கி²ணத்³வாரேன நக³ரங் பவிஸனமக்³கோ³ பாசீனமுகோ² க³ந்த்வா உத்தரேன நிவத்ததி, ஏவங் உய்யானதோ ஸாலபந்தி பாசீனமுகா² க³ந்த்வா உத்தரேன நிவத்தா. தஸ்மா தங் ‘‘உபவத்தன’’ந்தி வுச்சதி. தஸ்மிங் உபவத்தனே மல்லானங் ஸாலவனே. அந்தரேன யமகஸாலானந்தி மூலக்க²ந்த⁴விடபபத்தேஹி அஞ்ஞமஞ்ஞங் ஸங்ஸிப்³பி³த்வா டி²தஸாலானங் அந்தரிகாய. அப்பமாதே³ன ஸம்பாதே³தா²தி ஸதிஅவிப்பவாஸேன கத்தப்³ப³கிச்சானி ஸம்பாத³யத². இதி ப⁴க³வா யதா² நாம மரணமஞ்சே நிபன்னோ மஹத்³த⁴னோ குடும்பி³கோ புத்தானங் த⁴னஸாரங் ஆசிக்கெ²ய்ய, ஏவமேவங் பரினிப்³பா³னமஞ்சே நிபன்னோ பஞ்சசத்தாலீஸ வஸ்ஸானி தி³ன்னங் ஓவாத³ங் ஸப்³ப³ங் ஏகஸ்மிங் அப்பமாத³பதே³யேவ பக்கி²பித்வா அபா⁴ஸி. அயங் ததா²க³தஸ்ஸ பச்சி²மா வாசாதி இத³ங் பன ஸங்கீ³திகாரானங் வசனங்.
186. Pañcame upavattane mallānaṃ sālavaneti yatheva hi kadambanadītīrato rājamātuvihāradvārena thūpārāmaṃ gantabbaṃ hoti, evaṃ hiraññavatikāya nāma nadiyā pārimatīrato sālavanaṃ uyyānaṃ. Yathā anurādhapurassa thūpārāmo, evaṃ taṃ kusinārāya hoti. Yathā thūpārāmato dakkhiṇadvārena nagaraṃ pavisanamaggo pācīnamukho gantvā uttarena nivattati, evaṃ uyyānato sālapanti pācīnamukhā gantvā uttarena nivattā. Tasmā taṃ ‘‘upavattana’’nti vuccati. Tasmiṃ upavattane mallānaṃ sālavane. Antarenayamakasālānanti mūlakkhandhaviṭapapattehi aññamaññaṃ saṃsibbitvā ṭhitasālānaṃ antarikāya. Appamādena sampādethāti satiavippavāsena kattabbakiccāni sampādayatha. Iti bhagavā yathā nāma maraṇamañce nipanno mahaddhano kuṭumbiko puttānaṃ dhanasāraṃ ācikkheyya, evamevaṃ parinibbānamañce nipanno pañcacattālīsa vassāni dinnaṃ ovādaṃ sabbaṃ ekasmiṃ appamādapadeyeva pakkhipitvā abhāsi. Ayaṃ tathāgatassa pacchimā vācāti idaṃ pana saṅgītikārānaṃ vacanaṃ.
இதோ பரங் யங் பரினிப்³பா³னபரிகம்மங் கத்வா ப⁴க³வா பரினிப்³பு³தோ, தங் த³ஸ்ஸேதுங், அத² கோ² ப⁴க³வா பட²மங் ஜா²னந்திஆதி³ வுத்தங். தத்த² ஸஞ்ஞாவேத³யிதனிரோத⁴ங் ஸமாபன்னே ப⁴க³வதி அஸ்ஸாஸபஸ்ஸாஸானங் அப்பவத்திங் தி³ஸ்வா, ‘‘பரினிப்³பு³தோ ஸத்தா²’’தி ஸஞ்ஞாய தே³வமனுஸ்ஸா ஏகப்பஹாரேன விரவிங்ஸு, ஆனந்த³த்தே²ரோபி – ‘‘பரினிப்³பு³தோ நு கோ², ப⁴ந்தே, அனுருத்³த⁴ ப⁴க³வா’’தி தே²ரங் புச்சி². தே²ரோ ‘‘ந கோ², ஆவுஸோ ஆனந்த³, ததா²க³தோ பரினிப்³பு³தோ, அபிச ஸஞ்ஞாவேத³யிதனிரோத⁴ங் ஸமாபன்னோ’’தி ஆஹ. கத²ங் பன ஸோ அஞ்ஞாஸி? தே²ரோ கிர ஸத்தா²ரா ஸத்³தி⁴ங்யேவ தங் தங் ஸமாபத்திங் ஸமாபஜ்ஜந்தோ யாவ நேவஸஞ்ஞானாஸஞ்ஞாயதனவுட்டா²னங், தாவ க³ந்த்வா, ‘‘இதா³னி ப⁴க³வா நிரோத⁴ங் ஸமாபன்னோ, அந்தோனிரோதே⁴ ச காலங்கிரியா நாம நத்தீ²’’தி அஞ்ஞாஸி.
Ito paraṃ yaṃ parinibbānaparikammaṃ katvā bhagavā parinibbuto, taṃ dassetuṃ, atha kho bhagavā paṭhamaṃ jhānantiādi vuttaṃ. Tattha saññāvedayitanirodhaṃ samāpanne bhagavati assāsapassāsānaṃ appavattiṃ disvā, ‘‘parinibbuto satthā’’ti saññāya devamanussā ekappahārena viraviṃsu, ānandattheropi – ‘‘parinibbuto nu kho, bhante, anuruddha bhagavā’’ti theraṃ pucchi. Thero ‘‘na kho, āvuso ānanda, tathāgato parinibbuto, apica saññāvedayitanirodhaṃ samāpanno’’ti āha. Kathaṃ pana so aññāsi? Thero kira satthārā saddhiṃyeva taṃ taṃ samāpattiṃ samāpajjanto yāva nevasaññānāsaññāyatanavuṭṭhānaṃ, tāva gantvā, ‘‘idāni bhagavā nirodhaṃ samāpanno, antonirodhe ca kālaṃkiriyā nāma natthī’’ti aññāsi.
அத² கோ² ப⁴க³வா ஸஞ்ஞாவேத³யிதனிரோத⁴ஸமாபத்திதோ வுட்ட²ஹித்வா நேவஸஞ்ஞானாஸஞ்ஞாயதனங் ஸமாபஜ்ஜி…பே॰… ததியஜ்ஜா²னா வுட்ட²ஹித்வா சதுத்த²ங் ஜா²னங் ஸமாபஜ்ஜீதி எத்த² பன ப⁴க³வா சதுவீஸதியா டா²னேஸு பட²மங் ஜா²னங் ஸமாபஜ்ஜி, தேரஸஸு டா²னேஸு து³தியங் ஜா²னங்… ததா² ததியங்… பன்னரஸஸு டா²னேஸு சதுத்த²ங் ஜா²னங் ஸமாபஜ்ஜி. கத²ங்? த³ஸஸு அஸுபே⁴ஸு த்³வத்திங்ஸாகாரே அட்ட²ஸு கஸிணேஸு மெத்தாகருணாமுதி³தேஸு ஆனாபானே பரிச்சே²தா³காஸேதி இமேஸு தாவ சதுவீஸதியா டா²னேஸு பட²மங் ஜா²னங் ஸமாபஜ்ஜி. ட²பெத்வா பன த்³வத்திங்ஸாகாரஞ்ச த³ஸ ச அஸுபா⁴னி ஸேஸேஸு தேரஸஸு து³தியங் ஜா²னங்… தேஸுயேவ ததியங் ஜா²னங் ஸமாபஜ்ஜி. அட்ட²ஸு பன கஸிணேஸு உபெக்கா²ப்³ரஹ்மவிஹாரே ஆனாபானே பரிச்சே²தா³காஸே சதூஸு அரூபேஸூதி இமேஸு பன்னரஸஸு டா²னேஸு சதுத்த²ங் ஜா²னங் ஸமாபஜ்ஜி. அயம்பி ச ஸங்கே²பகதா²வ. நிப்³பா³னபுரங் பவிஸந்தோ பன ப⁴க³வா த⁴ம்மஸ்ஸாமி ஸப்³பா³பி சதுவீஸதிகோடிஸதஸஹஸ்ஸஸங்கா² ஸமாபத்தியோ பவிஸித்வா விதே³ஸங் க³ச்ச²ந்தோ ஞாதிஜனங் ஆலிங்கெ³த்வா விய ஸப்³ப³ஸமாபத்திஸுக²ங் அனுப⁴வித்வா பவிட்டோ².
Atha kho bhagavā saññāvedayitanirodhasamāpattito vuṭṭhahitvā nevasaññānāsaññāyatanaṃ samāpajji…pe… tatiyajjhānā vuṭṭhahitvā catutthaṃ jhānaṃ samāpajjīti ettha pana bhagavā catuvīsatiyā ṭhānesu paṭhamaṃ jhānaṃ samāpajji, terasasu ṭhānesu dutiyaṃ jhānaṃ… tathā tatiyaṃ… pannarasasu ṭhānesu catutthaṃ jhānaṃ samāpajji. Kathaṃ? Dasasu asubhesu dvattiṃsākāre aṭṭhasu kasiṇesu mettākaruṇāmuditesu ānāpāne paricchedākāseti imesu tāva catuvīsatiyā ṭhānesu paṭhamaṃ jhānaṃ samāpajji. Ṭhapetvā pana dvattiṃsākārañca dasa ca asubhāni sesesu terasasu dutiyaṃ jhānaṃ… tesuyeva tatiyaṃ jhānaṃ samāpajji. Aṭṭhasu pana kasiṇesu upekkhābrahmavihāre ānāpāne paricchedākāse catūsu arūpesūti imesu pannarasasu ṭhānesu catutthaṃ jhānaṃ samāpajji. Ayampi ca saṅkhepakathāva. Nibbānapuraṃ pavisanto pana bhagavā dhammassāmi sabbāpi catuvīsatikoṭisatasahassasaṅkhā samāpattiyo pavisitvā videsaṃ gacchanto ñātijanaṃ āliṅgetvā viya sabbasamāpattisukhaṃ anubhavitvā paviṭṭho.
சதுத்த²ஜ்ஜா²னா வுட்ட²ஹித்வா ஸமனந்தரா ப⁴க³வா பரினிப்³பா³யீதி எத்த² ச ஜா²னஸமனந்தரங் பச்சவெக்க²ணஸமனந்தரந்தி, த்³வே ஸமனந்தரானி. சதுத்த²ஜ்ஜா²னா வுட்டா²ய ப⁴வங்க³ங் ஓதிண்ணஸ்ஸ தத்தே²வ பரினிப்³பா³னங் ஜா²னஸமனந்தரங் நாம, சதுத்த²ஜ்ஜா²னா வுட்ட²ஹித்வா புன ஜா²னங்கா³னி பச்சவெக்கி²த்வா ப⁴வங்க³ங் ஓதிண்ணஸ்ஸ தத்தே²வ பரினிப்³பா³னங் பச்சவெக்க²ணஸமனந்தரங் நாம. இமானி த்³வேபி ஸமனந்தரானேவ. ப⁴க³வா பன ஜா²னங் ஸமாபஜ்ஜித்வா ஜா²னா வுட்டா²ய ஜா²னங்கா³னி பச்சவெக்கி²த்வா ப⁴வங்க³சித்தேன அப்³யாகதேன து³க்க²ஸச்சேன பரினிப்³பா³யி. யே ஹி கேசி பு³த்³தா⁴ வா பச்சேகபு³த்³தா⁴ வா அரியஸாவகா வா அந்தமஸோ குந்த²கிபில்லிகங் உபாதா³ய ஸப்³பே³ ப⁴வங்க³சித்தேனேவ அப்³யாகதேன து³க்க²ஸச்சேன காலங் கரொந்தி.
Catutthajjhānā vuṭṭhahitvā samanantarā bhagavā parinibbāyīti ettha ca jhānasamanantaraṃ paccavekkhaṇasamanantaranti, dve samanantarāni. Catutthajjhānā vuṭṭhāya bhavaṅgaṃ otiṇṇassa tattheva parinibbānaṃ jhānasamanantaraṃ nāma, catutthajjhānā vuṭṭhahitvā puna jhānaṅgāni paccavekkhitvā bhavaṅgaṃ otiṇṇassa tattheva parinibbānaṃ paccavekkhaṇasamanantaraṃ nāma. Imāni dvepi samanantarāneva. Bhagavā pana jhānaṃ samāpajjitvā jhānā vuṭṭhāya jhānaṅgāni paccavekkhitvā bhavaṅgacittena abyākatena dukkhasaccena parinibbāyi. Ye hi keci buddhā vā paccekabuddhā vā ariyasāvakā vā antamaso kunthakipillikaṃ upādāya sabbe bhavaṅgacitteneva abyākatena dukkhasaccena kālaṃ karonti.
பூ⁴தாதி ஸத்தா. அப்படிபுக்³க³லோதி படிபா⁴க³புக்³க³லவிரஹிதோ. ப³லப்பத்தோதி த³ஸவித⁴ங் ஞாணப³லங் பத்தோ. உப்பாத³வயத⁴ம்மினோதி உப்பாத³வயஸபா⁴வா. தேஸங் வூபஸமோதி தேஸங் ஸங்கா²ரானங் வூபஸமோ. ஸுகோ²தி அஸங்க²தங் நிப்³பா³னமேவ ஸுக²ந்தி அத்தோ². ததா³ஸீதி ‘‘ஸஹ பரினிப்³பா³னா மஹாபூ⁴மிசாலோ அஹோஸீ’’தி ஏவங் மஹாபரினிப்³பா³னே (தீ³॰ நி॰ 2.220) வுத்தங் பூ⁴மிசாலங் ஸந்தா⁴யாஹ. ஸோ ஹி லோமஹங்ஸனகோ ச பி⁴ங்ஸனகோ ச ஆஸி. ஸப்³பா³காரவரூபேதேதி ஸப்³பா³காரவரகு³ணூபேதே. நாஹு அஸ்ஸாஸபஸ்ஸாஸோதி ந ஜாதோ அஸ்ஸாஸபஸ்ஸாஸோ. அனேஜோதி தண்ஹாஸங்கா²தாய ஏஜாய அபா⁴வேன அனேஜோ. ஸந்திமாரப்³பா⁴தி அனுபாதி³ஸேஸங் நிப்³பா³னங் ஆரப்³ப⁴ படிச்ச ஸந்தா⁴ய. சக்கு²மாதி பஞ்சஹி சக்கூ²ஹி சக்கு²மா. பரினிப்³பு³தோதி க²ந்த⁴பரினிப்³பா³னேன பரினிப்³பு³தோ. அஸல்லீனேனாதி அனல்லீனேன அஸங்குடிதேன ஸுவிகஸிதேனேவ சித்தேன. வேத³னங் அஜ்ஜ²வாஸயீதி வேத³னங் அதி⁴வாஸேஸி, ந வேத³னானுவத்தீ ஹுத்வா இதோ சிதோ ஸம்பரிவத்தி. விமொக்கோ²தி கேனசி த⁴ம்மேன அனாவரணவிமொக்கோ² ஸப்³ப³ஸோ அபஞ்ஞத்திபா⁴வூபக³மோ பஜ்ஜோதனிப்³பா³னஸதி³ஸோ ஜாதோதி. பஞ்சமங்.
Bhūtāti sattā. Appaṭipuggaloti paṭibhāgapuggalavirahito. Balappattoti dasavidhaṃ ñāṇabalaṃ patto. Uppādavayadhamminoti uppādavayasabhāvā. Tesaṃ vūpasamoti tesaṃ saṅkhārānaṃ vūpasamo. Sukhoti asaṅkhataṃ nibbānameva sukhanti attho. Tadāsīti ‘‘saha parinibbānā mahābhūmicālo ahosī’’ti evaṃ mahāparinibbāne (dī. ni. 2.220) vuttaṃ bhūmicālaṃ sandhāyāha. So hi lomahaṃsanako ca bhiṃsanako ca āsi. Sabbākāravarūpeteti sabbākāravaraguṇūpete. Nāhu assāsapassāsoti na jāto assāsapassāso. Anejoti taṇhāsaṅkhātāya ejāya abhāvena anejo. Santimārabbhāti anupādisesaṃ nibbānaṃ ārabbha paṭicca sandhāya. Cakkhumāti pañcahi cakkhūhi cakkhumā. Parinibbutoti khandhaparinibbānena parinibbuto. Asallīnenāti anallīnena asaṅkuṭitena suvikasiteneva cittena. Vedanaṃ ajjhavāsayīti vedanaṃ adhivāsesi, na vedanānuvattī hutvā ito cito samparivatti. Vimokkhoti kenaci dhammena anāvaraṇavimokkho sabbaso apaññattibhāvūpagamo pajjotanibbānasadiso jātoti. Pañcamaṃ.
து³தியோ வக்³கோ³.
Dutiyo vaggo.
இதி ஸாரத்த²ப்பகாஸினியா
Iti sāratthappakāsiniyā
ஸங்யுத்தனிகாய-அட்ட²கதா²ய
Saṃyuttanikāya-aṭṭhakathāya
ப்³ரஹ்மஸங்யுத்தவண்ணனா நிட்டி²தா.
Brahmasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. பரினிப்³பா³னஸுத்தங் • 5. Parinibbānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. பரினிப்³பா³னஸுத்தவண்ணனா • 5. Parinibbānasuttavaṇṇanā
