| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༥. པརིནིབྦཱནསུཏྟཝཎྞནཱ
5. Parinibbānasuttavaṇṇanā
༡༨༦. པཉྩམེ ཨུཔཝཏྟནེ མལླཱནཾ སཱལཝནེཏི ཡཐེཝ ཧི ཀདམྦནདཱིཏཱིརཏོ རཱཛམཱཏུཝིཧཱརདྭཱརེན ཐཱུཔཱརཱམཾ གནྟབྦཾ ཧོཏི, ཨེཝཾ ཧིརཉྙཝཏིཀཱཡ ནཱམ ནདིཡཱ པཱརིམཏཱིརཏོ སཱལཝནཾ ཨུཡྻཱནཾ། ཡཐཱ ཨནུརཱདྷཔུརསྶ ཐཱུཔཱརཱམོ, ཨེཝཾ ཏཾ ཀུསིནཱརཱཡ ཧོཏི། ཡཐཱ ཐཱུཔཱརཱམཏོ དཀྑིཎདྭཱརེན ནགརཾ པཝིསནམགྒོ པཱཙཱིནམུཁོ གནྟྭཱ ཨུཏྟརེན ནིཝཏྟཏི, ཨེཝཾ ཨུཡྻཱནཏོ སཱལཔནྟི པཱཙཱིནམུཁཱ གནྟྭཱ ཨུཏྟརེན ནིཝཏྟཱ། ཏསྨཱ ཏཾ ‘‘ཨུཔཝཏྟན’’ནྟི ཝུཙྩཏི། ཏསྨིཾ ཨུཔཝཏྟནེ མལླཱནཾ སཱལཝནེ། ཨནྟརེན ཡམཀསཱལཱནནྟི མཱུལཀྑནྡྷཝིཊཔཔཏྟེཧི ཨཉྙམཉྙཾ སཾསིབྦིཏྭཱ ཋིཏསཱལཱནཾ ཨནྟརིཀཱཡ། ཨཔྤམཱདེན སམྤཱདེཐཱཏི སཏིཨཝིཔྤཝཱསེན ཀཏྟབྦཀིཙྩཱནི སམྤཱདཡཐ། ཨིཏི བྷགཝཱ ཡཐཱ ནཱམ མརཎམཉྩེ ནིཔནྣོ མཧདྡྷནོ ཀུཊུམྦིཀོ པུཏྟཱནཾ དྷནསཱརཾ ཨཱཙིཀྑེཡྻ, ཨེཝམེཝཾ པརིནིབྦཱནམཉྩེ ནིཔནྣོ པཉྩཙཏྟཱལཱིས ཝསྶཱནི དིནྣཾ ཨོཝཱདཾ སབྦཾ ཨེཀསྨིཾ ཨཔྤམཱདཔདེཡེཝ པཀྑིཔིཏྭཱ ཨབྷཱསི། ཨཡཾ ཏཐཱགཏསྶ པཙྪིམཱ ཝཱཙཱཏི ཨིདཾ པན སངྒཱིཏིཀཱརཱནཾ ཝཙནཾ།
186. Pañcame upavattane mallānaṃ sālavaneti yatheva hi kadambanadītīrato rājamātuvihāradvārena thūpārāmaṃ gantabbaṃ hoti, evaṃ hiraññavatikāya nāma nadiyā pārimatīrato sālavanaṃ uyyānaṃ. Yathā anurādhapurassa thūpārāmo, evaṃ taṃ kusinārāya hoti. Yathā thūpārāmato dakkhiṇadvārena nagaraṃ pavisanamaggo pācīnamukho gantvā uttarena nivattati, evaṃ uyyānato sālapanti pācīnamukhā gantvā uttarena nivattā. Tasmā taṃ ‘‘upavattana’’nti vuccati. Tasmiṃ upavattane mallānaṃ sālavane. Antarenayamakasālānanti mūlakkhandhaviṭapapattehi aññamaññaṃ saṃsibbitvā ṭhitasālānaṃ antarikāya. Appamādena sampādethāti satiavippavāsena kattabbakiccāni sampādayatha. Iti bhagavā yathā nāma maraṇamañce nipanno mahaddhano kuṭumbiko puttānaṃ dhanasāraṃ ācikkheyya, evamevaṃ parinibbānamañce nipanno pañcacattālīsa vassāni dinnaṃ ovādaṃ sabbaṃ ekasmiṃ appamādapadeyeva pakkhipitvā abhāsi. Ayaṃ tathāgatassa pacchimā vācāti idaṃ pana saṅgītikārānaṃ vacanaṃ.
ཨིཏོ པརཾ ཡཾ པརིནིབྦཱནཔརིཀམྨཾ ཀཏྭཱ བྷགཝཱ པརིནིབྦུཏོ, ཏཾ དསྶེཏུཾ, ཨཐ ཁོ བྷགཝཱ པཋམཾ ཛྷཱནནྟིཨཱདི ཝུཏྟཾ། ཏཏྠ སཉྙཱཝེདཡིཏནིརོདྷཾ སམཱཔནྣེ བྷགཝཏི ཨསྶཱསཔསྶཱསཱནཾ ཨཔྤཝཏྟིཾ དིསྭཱ, ‘‘པརིནིབྦུཏོ སཏྠཱ’’ཏི སཉྙཱཡ དེཝམནུསྶཱ ཨེཀཔྤཧཱརེན ཝིརཝིཾསུ, ཨཱནནྡཏྠེརོཔི – ‘‘པརིནིབྦུཏོ ནུ ཁོ, བྷནྟེ, ཨནུརུདྡྷ བྷགཝཱ’’ཏི ཐེརཾ པུཙྪི། ཐེརོ ‘‘ན ཁོ, ཨཱཝུསོ ཨཱནནྡ, ཏཐཱགཏོ པརིནིབྦུཏོ, ཨཔིཙ སཉྙཱཝེདཡིཏནིརོདྷཾ སམཱཔནྣོ’’ཏི ཨཱཧ། ཀཐཾ པན སོ ཨཉྙཱསི? ཐེརོ ཀིར སཏྠཱརཱ སདྡྷིཾཡེཝ ཏཾ ཏཾ སམཱཔཏྟིཾ སམཱཔཛྫནྟོ ཡཱཝ ནེཝསཉྙཱནཱསཉྙཱཡཏནཝུཊྛཱནཾ, ཏཱཝ གནྟྭཱ, ‘‘ཨིདཱནི བྷགཝཱ ནིརོདྷཾ སམཱཔནྣོ, ཨནྟོནིརོདྷེ ཙ ཀཱལཾཀིརིཡཱ ནཱམ ནཏྠཱི’’ཏི ཨཉྙཱསི།
Ito paraṃ yaṃ parinibbānaparikammaṃ katvā bhagavā parinibbuto, taṃ dassetuṃ, atha kho bhagavā paṭhamaṃ jhānantiādi vuttaṃ. Tattha saññāvedayitanirodhaṃ samāpanne bhagavati assāsapassāsānaṃ appavattiṃ disvā, ‘‘parinibbuto satthā’’ti saññāya devamanussā ekappahārena viraviṃsu, ānandattheropi – ‘‘parinibbuto nu kho, bhante, anuruddha bhagavā’’ti theraṃ pucchi. Thero ‘‘na kho, āvuso ānanda, tathāgato parinibbuto, apica saññāvedayitanirodhaṃ samāpanno’’ti āha. Kathaṃ pana so aññāsi? Thero kira satthārā saddhiṃyeva taṃ taṃ samāpattiṃ samāpajjanto yāva nevasaññānāsaññāyatanavuṭṭhānaṃ, tāva gantvā, ‘‘idāni bhagavā nirodhaṃ samāpanno, antonirodhe ca kālaṃkiriyā nāma natthī’’ti aññāsi.
ཨཐ ཁོ བྷགཝཱ སཉྙཱཝེདཡིཏནིརོདྷསམཱཔཏྟིཏོ ཝུཊྛཧིཏྭཱ ནེཝསཉྙཱནཱསཉྙཱཡཏནཾ སམཱཔཛྫི…པེ॰… ཏཏིཡཛ྄ཛྷཱནཱ ཝུཊྛཧིཏྭཱ ཙཏུཏྠཾ ཛྷཱནཾ སམཱཔཛྫཱིཏི ཨེཏྠ པན བྷགཝཱ ཙཏུཝཱིསཏིཡཱ ཋཱནེསུ པཋམཾ ཛྷཱནཾ སམཱཔཛྫི, ཏེརསསུ ཋཱནེསུ དུཏིཡཾ ཛྷཱནཾ… ཏཐཱ ཏཏིཡཾ… པནྣརསསུ ཋཱནེསུ ཙཏུཏྠཾ ཛྷཱནཾ སམཱཔཛྫི། ཀཐཾ? དསསུ ཨསུབྷེསུ དྭཏྟིཾསཱཀཱརེ ཨཊྛསུ ཀསིཎེསུ མེཏྟཱཀརུཎཱམུདིཏེསུ ཨཱནཱཔཱནེ པརིཙྪེདཱཀཱསེཏི ཨིམེསུ ཏཱཝ ཙཏུཝཱིསཏིཡཱ ཋཱནེསུ པཋམཾ ཛྷཱནཾ སམཱཔཛྫི། ཋཔེཏྭཱ པན དྭཏྟིཾསཱཀཱརཉྩ དས ཙ ཨསུབྷཱནི སེསེསུ ཏེརསསུ དུཏིཡཾ ཛྷཱནཾ… ཏེསུཡེཝ ཏཏིཡཾ ཛྷཱནཾ སམཱཔཛྫི། ཨཊྛསུ པན ཀསིཎེསུ ཨུཔེཀྑཱབྲཧྨཝིཧཱརེ ཨཱནཱཔཱནེ པརིཙྪེདཱཀཱསེ ཙཏཱུསུ ཨརཱུཔེསཱུཏི ཨིམེསུ པནྣརསསུ ཋཱནེསུ ཙཏུཏྠཾ ཛྷཱནཾ སམཱཔཛྫི། ཨཡམྤི ཙ སངྑེཔཀཐཱཝ། ནིབྦཱནཔུརཾ པཝིསནྟོ པན བྷགཝཱ དྷམྨསྶཱམི སབྦཱཔི ཙཏུཝཱིསཏིཀོཊིསཏསཧསྶསངྑཱ སམཱཔཏྟིཡོ པཝིསིཏྭཱ ཝིདེསཾ གཙྪནྟོ ཉཱཏིཛནཾ ཨཱལིངྒེཏྭཱ ཝིཡ སབྦསམཱཔཏྟིསུཁཾ ཨནུབྷཝིཏྭཱ པཝིཊྛོ།
Atha kho bhagavā saññāvedayitanirodhasamāpattito vuṭṭhahitvā nevasaññānāsaññāyatanaṃ samāpajji…pe… tatiyajjhānā vuṭṭhahitvā catutthaṃ jhānaṃ samāpajjīti ettha pana bhagavā catuvīsatiyā ṭhānesu paṭhamaṃ jhānaṃ samāpajji, terasasu ṭhānesu dutiyaṃ jhānaṃ… tathā tatiyaṃ… pannarasasu ṭhānesu catutthaṃ jhānaṃ samāpajji. Kathaṃ? Dasasu asubhesu dvattiṃsākāre aṭṭhasu kasiṇesu mettākaruṇāmuditesu ānāpāne paricchedākāseti imesu tāva catuvīsatiyā ṭhānesu paṭhamaṃ jhānaṃ samāpajji. Ṭhapetvā pana dvattiṃsākārañca dasa ca asubhāni sesesu terasasu dutiyaṃ jhānaṃ… tesuyeva tatiyaṃ jhānaṃ samāpajji. Aṭṭhasu pana kasiṇesu upekkhābrahmavihāre ānāpāne paricchedākāse catūsu arūpesūti imesu pannarasasu ṭhānesu catutthaṃ jhānaṃ samāpajji. Ayampi ca saṅkhepakathāva. Nibbānapuraṃ pavisanto pana bhagavā dhammassāmi sabbāpi catuvīsatikoṭisatasahassasaṅkhā samāpattiyo pavisitvā videsaṃ gacchanto ñātijanaṃ āliṅgetvā viya sabbasamāpattisukhaṃ anubhavitvā paviṭṭho.
ཙཏུཏྠཛ྄ཛྷཱནཱ ཝུཊྛཧིཏྭཱ སམནནྟརཱ བྷགཝཱ པརིནིབྦཱཡཱིཏི ཨེཏྠ ཙ ཛྷཱནསམནནྟརཾ པཙྩཝེཀྑཎསམནནྟརནྟི, དྭེ སམནནྟརཱནི། ཙཏུཏྠཛ྄ཛྷཱནཱ ཝུཊྛཱཡ བྷཝངྒཾ ཨོཏིཎྞསྶ ཏཏྠེཝ པརིནིབྦཱནཾ ཛྷཱནསམནནྟརཾ ནཱམ, ཙཏུཏྠཛ྄ཛྷཱནཱ ཝུཊྛཧིཏྭཱ པུན ཛྷཱནངྒཱནི པཙྩཝེཀྑིཏྭཱ བྷཝངྒཾ ཨོཏིཎྞསྶ ཏཏྠེཝ པརིནིབྦཱནཾ པཙྩཝེཀྑཎསམནནྟརཾ ནཱམ། ཨིམཱནི དྭེཔི སམནནྟརཱནེཝ། བྷགཝཱ པན ཛྷཱནཾ སམཱཔཛྫིཏྭཱ ཛྷཱནཱ ཝུཊྛཱཡ ཛྷཱནངྒཱནི པཙྩཝེཀྑིཏྭཱ བྷཝངྒཙིཏྟེན ཨབྱཱཀཏེན དུཀྑསཙྩེན པརིནིབྦཱཡི། ཡེ ཧི ཀེཙི བུདྡྷཱ ཝཱ པཙྩེཀབུདྡྷཱ ཝཱ ཨརིཡསཱཝཀཱ ཝཱ ཨནྟམསོ ཀུནྠཀིཔིལླིཀཾ ཨུཔཱདཱཡ སབྦེ བྷཝངྒཙིཏྟེནེཝ ཨབྱཱཀཏེན དུཀྑསཙྩེན ཀཱལཾ ཀརོནྟི།
Catutthajjhānā vuṭṭhahitvā samanantarā bhagavā parinibbāyīti ettha ca jhānasamanantaraṃ paccavekkhaṇasamanantaranti, dve samanantarāni. Catutthajjhānā vuṭṭhāya bhavaṅgaṃ otiṇṇassa tattheva parinibbānaṃ jhānasamanantaraṃ nāma, catutthajjhānā vuṭṭhahitvā puna jhānaṅgāni paccavekkhitvā bhavaṅgaṃ otiṇṇassa tattheva parinibbānaṃ paccavekkhaṇasamanantaraṃ nāma. Imāni dvepi samanantarāneva. Bhagavā pana jhānaṃ samāpajjitvā jhānā vuṭṭhāya jhānaṅgāni paccavekkhitvā bhavaṅgacittena abyākatena dukkhasaccena parinibbāyi. Ye hi keci buddhā vā paccekabuddhā vā ariyasāvakā vā antamaso kunthakipillikaṃ upādāya sabbe bhavaṅgacitteneva abyākatena dukkhasaccena kālaṃ karonti.
བྷཱུཏཱཏི སཏྟཱ། ཨཔྤཊིཔུགྒལོཏི པཊིབྷཱགཔུགྒལཝིརཧིཏོ། བལཔྤཏྟོཏི དསཝིདྷཾ ཉཱཎབལཾ པཏྟོ། ཨུཔྤཱདཝཡདྷམྨིནོཏི ཨུཔྤཱདཝཡསབྷཱཝཱ། ཏེསཾ ཝཱུཔསམོཏི ཏེསཾ སངྑཱརཱནཾ ཝཱུཔསམོ། སུཁོཏི ཨསངྑཏཾ ནིབྦཱནམེཝ སུཁནྟི ཨཏྠོ། ཏདཱསཱིཏི ‘‘སཧ པརིནིབྦཱནཱ མཧཱབྷཱུམིཙཱལོ ཨཧོསཱི’’ཏི ཨེཝཾ མཧཱཔརིནིབྦཱནེ (དཱི॰ ནི॰ ༢.༢༢༠) ཝུཏྟཾ བྷཱུམིཙཱལཾ སནྡྷཱཡཱཧ། སོ ཧི ལོམཧཾསནཀོ ཙ བྷིཾསནཀོ ཙ ཨཱསི། སབྦཱཀཱརཝརཱུཔེཏེཏི སབྦཱཀཱརཝརགུཎཱུཔེཏེ། ནཱཧུ ཨསྶཱསཔསྶཱསོཏི ན ཛཱཏོ ཨསྶཱསཔསྶཱསོ། ཨནེཛོཏི ཏཎྷཱསངྑཱཏཱཡ ཨེཛཱཡ ཨབྷཱཝེན ཨནེཛོ། སནྟིམཱརབྦྷཱཏི ཨནུཔཱདིསེསཾ ནིབྦཱནཾ ཨཱརབྦྷ པཊིཙྩ སནྡྷཱཡ། ཙཀྑུམཱཏི པཉྩཧི ཙཀྑཱུཧི ཙཀྑུམཱ། པརིནིབྦུཏོཏི ཁནྡྷཔརིནིབྦཱནེན པརིནིབྦུཏོ། ཨསལླཱིནེནཱཏི ཨནལླཱིནེན ཨསངྐུཊིཏེན སུཝིཀསིཏེནེཝ ཙིཏྟེན། ཝེདནཾ ཨཛ྄ཛྷཝཱསཡཱིཏི ཝེདནཾ ཨདྷིཝཱསེསི, ན ཝེདནཱནུཝཏྟཱི ཧུཏྭཱ ཨིཏོ ཙིཏོ སམྤརིཝཏྟི། ཝིམོཀྑོཏི ཀེནཙི དྷམྨེན ཨནཱཝརཎཝིམོཀྑོ སབྦསོ ཨཔཉྙཏྟིབྷཱཝཱུཔགམོ པཛྫོཏནིབྦཱནསདིསོ ཛཱཏོཏི། པཉྩམཾ།
Bhūtāti sattā. Appaṭipuggaloti paṭibhāgapuggalavirahito. Balappattoti dasavidhaṃ ñāṇabalaṃ patto. Uppādavayadhamminoti uppādavayasabhāvā. Tesaṃ vūpasamoti tesaṃ saṅkhārānaṃ vūpasamo. Sukhoti asaṅkhataṃ nibbānameva sukhanti attho. Tadāsīti ‘‘saha parinibbānā mahābhūmicālo ahosī’’ti evaṃ mahāparinibbāne (dī. ni. 2.220) vuttaṃ bhūmicālaṃ sandhāyāha. So hi lomahaṃsanako ca bhiṃsanako ca āsi. Sabbākāravarūpeteti sabbākāravaraguṇūpete. Nāhu assāsapassāsoti na jāto assāsapassāso. Anejoti taṇhāsaṅkhātāya ejāya abhāvena anejo. Santimārabbhāti anupādisesaṃ nibbānaṃ ārabbha paṭicca sandhāya. Cakkhumāti pañcahi cakkhūhi cakkhumā. Parinibbutoti khandhaparinibbānena parinibbuto. Asallīnenāti anallīnena asaṅkuṭitena suvikasiteneva cittena. Vedanaṃ ajjhavāsayīti vedanaṃ adhivāsesi, na vedanānuvattī hutvā ito cito samparivatti. Vimokkhoti kenaci dhammena anāvaraṇavimokkho sabbaso apaññattibhāvūpagamo pajjotanibbānasadiso jātoti. Pañcamaṃ.
དུཏིཡོ ཝགྒོ།
Dutiyo vaggo.
ཨིཏི སཱརཏྠཔྤཀཱསིནིཡཱ
Iti sāratthappakāsiniyā
སཾཡུཏྟནིཀཱཡ-ཨཊྛཀཐཱཡ
Saṃyuttanikāya-aṭṭhakathāya
བྲཧྨསཾཡུཏྟཝཎྞནཱ ནིཊྛིཏཱ།
Brahmasaṃyuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༥. པརིནིབྦཱནསུཏྟཾ • 5. Parinibbānasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥. པརིནིབྦཱནསུཏྟཝཎྞནཱ • 5. Parinibbānasuttavaṇṇanā
