| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. পরিঞ্ঞাতসুত্তং
8. Pariññātasuttaṃ
৪০৪. ‘‘চত্তারোমে, ভিক্খৰে, সতিপট্ঠানা। কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। তস্স কাযে কাযানুপস্সিনো ৰিহরতো কাযো পরিঞ্ঞাতো হোতি। কাযস্স পরিঞ্ঞাতত্তা অমতং সচ্ছিকতং হোতি।
404. ‘‘Cattārome, bhikkhave, satipaṭṭhānā. Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ. Tassa kāye kāyānupassino viharato kāyo pariññāto hoti. Kāyassa pariññātattā amataṃ sacchikataṃ hoti.
‘‘ৰেদনাসু ৰেদনানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। তস্স ৰেদনাসু ৰেদনানুপস্সিনো ৰিহরতো ৰেদনা পরিঞ্ঞাতা হোন্তি। ৰেদনানং পরিঞ্ঞাতত্তা অমতং সচ্ছিকতং হোতি।
‘‘Vedanāsu vedanānupassī viharati ātāpī sampajāno satimā, vineyya loke abhijjhādomanassaṃ. Tassa vedanāsu vedanānupassino viharato vedanā pariññātā honti. Vedanānaṃ pariññātattā amataṃ sacchikataṃ hoti.
‘‘চিত্তে চিত্তানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। তস্স চিত্তে চিত্তানুপস্সিনো ৰিহরতো চিত্তং পরিঞ্ঞাতং হোতি। চিত্তস্স পরিঞ্ঞাতত্তা অমতং সচ্ছিকতং হোতি।
‘‘Citte cittānupassī viharati ātāpī sampajāno satimā, vineyya loke abhijjhādomanassaṃ. Tassa citte cittānupassino viharato cittaṃ pariññātaṃ hoti. Cittassa pariññātattā amataṃ sacchikataṃ hoti.
‘‘ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। তস্স ধম্মেসু ধম্মানুপস্সিনো ৰিহরতো ধম্মা পরিঞ্ঞাতা হোন্তি। ধম্মানং পরিঞ্ঞাতত্তা অমতং সচ্ছিকতং হোতী’’তি। অট্ঠমং।
‘‘Dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Tassa dhammesu dhammānupassino viharato dhammā pariññātā honti. Dhammānaṃ pariññātattā amataṃ sacchikataṃ hotī’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. অননুস্সুতৰগ্গৰণ্ণনা • 4. Ananussutavaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. অননুস্সুতৰগ্গৰণ্ণনা • 4. Ananussutavaggavaṇṇanā
