| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. பரிஞ்ஞெய்யஸுத்தங்
9. Pariññeyyasuttaṃ
1099. ‘‘சத்தாரிமானி , பி⁴க்க²வே, அரியஸச்சானி. கதமானி சத்தாரி? து³க்க²ங் அரியஸச்சங், து³க்க²ஸமுத³யங் அரியஸச்சங், து³க்க²னிரோத⁴ங் அரியஸச்சங், து³க்க²னிரோத⁴கா³மினீ படிபதா³ அரியஸச்சங் – இமானி கோ², பி⁴க்க²வே, சத்தாரி அரியஸச்சானி. இமேஸங் கோ², பி⁴க்க²வே, சதுன்னங் அரியஸச்சானங் அத்தி² அரியஸச்சங் பரிஞ்ஞெய்யங், அத்தி² அரியஸச்சங் பஹாதப்³ப³ங், அத்தி² அரியஸச்சங் ஸச்சி²காதப்³ப³ங், அத்தி² அரியஸச்சங் பா⁴வேதப்³ப³ங்.
1099. ‘‘Cattārimāni , bhikkhave, ariyasaccāni. Katamāni cattāri? Dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ, dukkhanirodhagāminī paṭipadā ariyasaccaṃ – imāni kho, bhikkhave, cattāri ariyasaccāni. Imesaṃ kho, bhikkhave, catunnaṃ ariyasaccānaṃ atthi ariyasaccaṃ pariññeyyaṃ, atthi ariyasaccaṃ pahātabbaṃ, atthi ariyasaccaṃ sacchikātabbaṃ, atthi ariyasaccaṃ bhāvetabbaṃ.
‘‘கதமஞ்ச, பி⁴க்க²வே, அரியஸச்சங் பரிஞ்ஞெய்யங்? து³க்க²ங், பி⁴க்க²வே, அரியஸச்சங் பரிஞ்ஞெய்யங், து³க்க²ஸமுத³யங் அரியஸச்சங் பஹாதப்³ப³ங், து³க்க²னிரோத⁴ங் அரியஸச்சங் ஸச்சி²காதப்³ப³ங், து³க்க²னிரோத⁴கா³மினீ படிபதா³ அரியஸச்சங் பா⁴வேதப்³ப³ங்.
‘‘Katamañca, bhikkhave, ariyasaccaṃ pariññeyyaṃ? Dukkhaṃ, bhikkhave, ariyasaccaṃ pariññeyyaṃ, dukkhasamudayaṃ ariyasaccaṃ pahātabbaṃ, dukkhanirodhaṃ ariyasaccaṃ sacchikātabbaṃ, dukkhanirodhagāminī paṭipadā ariyasaccaṃ bhāvetabbaṃ.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. நவமங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Navamaṃ.
