| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. পরিঞ্ঞেয্যসুত্তং
4. Pariññeyyasuttaṃ
১০৬. সাৰত্থিনিদানং। ‘‘পরিঞ্ঞেয্যে চ, ভিক্খৰে, ধম্মে দেসেস্সামি পরিঞ্ঞঞ্চ পরিঞ্ঞাতাৰিঞ্চ পুগ্গলং। তং সুণাথ। কতমে চ, ভিক্খৰে, পরিঞ্ঞেয্যা ধম্মা? রূপং, ভিক্খৰে, পরিঞ্ঞেয্যো ধম্মো। ৰেদনা…পে॰… সঞ্ঞা… সঙ্খারা… ৰিঞ্ঞাণং পরিঞ্ঞেয্যো ধম্মো। ইমে ৰুচ্চন্তি, ভিক্খৰে, পরিঞ্ঞেয্যা ধম্মা। কতমা চ, ভিক্খৰে, পরিঞ্ঞা? রাগক্খযো, দোসক্খযো, মোহক্খযো – অযং ৰুচ্চতি, ভিক্খৰে, পরিঞ্ঞা। কতমো চ, ভিক্খৰে, পরিঞ্ঞাতাৰী পুগ্গলো? অরহাতিস্স ৰচনীযং। য্ৰাযং আযস্মা এৰংনামো এৰংগোত্তো – অযং ৰুচ্চতি, ভিক্খৰে, পরিঞ্ঞাতাৰী পুগ্গলো’’তি। চতুত্থং।
106. Sāvatthinidānaṃ. ‘‘Pariññeyye ca, bhikkhave, dhamme desessāmi pariññañca pariññātāviñca puggalaṃ. Taṃ suṇātha. Katame ca, bhikkhave, pariññeyyā dhammā? Rūpaṃ, bhikkhave, pariññeyyo dhammo. Vedanā…pe… saññā… saṅkhārā… viññāṇaṃ pariññeyyo dhammo. Ime vuccanti, bhikkhave, pariññeyyā dhammā. Katamā ca, bhikkhave, pariññā? Rāgakkhayo, dosakkhayo, mohakkhayo – ayaṃ vuccati, bhikkhave, pariññā. Katamo ca, bhikkhave, pariññātāvī puggalo? Arahātissa vacanīyaṃ. Yvāyaṃ āyasmā evaṃnāmo evaṃgotto – ayaṃ vuccati, bhikkhave, pariññātāvī puggalo’’ti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পরিঞ্ঞেয্যসুত্তৰণ্ণনা • 4. Pariññeyyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পরিঞ্ঞেয্যসুত্তৰণ্ণনা • 4. Pariññeyyasuttavaṇṇanā
