| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. පරිඤ්‌ඤෙය්‍යසුත්‌තං
4. Pariññeyyasuttaṃ
106. සාවත්‌ථිනිදානං. ‘‘පරිඤ්‌ඤෙය්‍යෙ ච, භික්‌ඛවෙ, ධම්‌මෙ දෙසෙස්‌සාමි පරිඤ්‌ඤඤ්‌ච පරිඤ්‌ඤාතාවිඤ්‌ච පුග්‌ගලං. තං සුණාථ. කතමෙ ච, භික්‌ඛවෙ, පරිඤ්‌ඤෙය්‍යා ධම්‌මා? රූපං, භික්‌ඛවෙ, පරිඤ්‌ඤෙය්‍යො ධම්‌මො. වෙදනා…පෙ.… සඤ්‌ඤා… සඞ්‌ඛාරා… විඤ්‌ඤාණං පරිඤ්‌ඤෙය්‍යො ධම්‌මො. ඉමෙ වුච්‌චන්‌ති, භික්‌ඛවෙ, පරිඤ්‌ඤෙය්‍යා ධම්‌මා. කතමා ච, භික්‌ඛවෙ, පරිඤ්‌ඤා? රාගක්‌ඛයො, දොසක්‌ඛයො, මොහක්‌ඛයො – අයං වුච්‌චති, භික්‌ඛවෙ, පරිඤ්‌ඤා. කතමො ච, භික්‌ඛවෙ, පරිඤ්‌ඤාතාවී පුග්‌ගලො? අරහාතිස්‌ස වචනීයං. ය්‌වායං ආයස්‌මා එවංනාමො එවංගොත්‌තො – අයං වුච්‌චති, භික්‌ඛවෙ, පරිඤ්‌ඤාතාවී පුග්‌ගලො’’ති. චතුත්‌ථං.
106. Sāvatthinidānaṃ. ‘‘Pariññeyye ca, bhikkhave, dhamme desessāmi pariññañca pariññātāviñca puggalaṃ. Taṃ suṇātha. Katame ca, bhikkhave, pariññeyyā dhammā? Rūpaṃ, bhikkhave, pariññeyyo dhammo. Vedanā…pe… saññā… saṅkhārā… viññāṇaṃ pariññeyyo dhammo. Ime vuccanti, bhikkhave, pariññeyyā dhammā. Katamā ca, bhikkhave, pariññā? Rāgakkhayo, dosakkhayo, mohakkhayo – ayaṃ vuccati, bhikkhave, pariññā. Katamo ca, bhikkhave, pariññātāvī puggalo? Arahātissa vacanīyaṃ. Yvāyaṃ āyasmā evaṃnāmo evaṃgotto – ayaṃ vuccati, bhikkhave, pariññātāvī puggalo’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. පරිඤ්‌ඤෙය්‍යසුත්‌තවණ්‌ණනා • 4. Pariññeyyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. පරිඤ්‌ඤෙය්‍යසුත්‌තවණ්‌ණනා • 4. Pariññeyyasuttavaṇṇanā
