| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. පරිඤ්‌ඤෙය්‍යසුත්‌තං
4. Pariññeyyasuttaṃ
163. සාවත්‌ථිනිදානං. ආයස්‌මා රාධො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො ආයස්‌මන්‌තං රාධං භගවා එතදවොච –
163. Sāvatthinidānaṃ. Āyasmā rādho yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ rādhaṃ bhagavā etadavoca –
‘‘පරිඤ්‌ඤෙය්‍යෙ ච, රාධ, ධම්‌මෙ දෙසෙස්‌සාමි පරිඤ්‌ඤඤ්‌ච පරිඤ්‌ඤාතාවිං පුග්‌ගලඤ්‌ච. තං සුණාහි, සාධුකං මනසි කරොහි; භාසිස්‌සාමී’’ති. ‘‘එවං, භන්‌තෙ’’ති ඛො ආයස්‌මා රාධො භගවතො පච්‌චස්‌සොසි. භගවා එතදවොච – ‘‘කතමෙ ච, රාධ, පරිඤ්‌ඤෙය්‍යා ධම්‌මා? රූපං ඛො, රාධ, පරිඤ්‌ඤෙය්‍යො ධම්‌මො, වෙදනා පරිඤ්‌ඤෙය්‍යො ධම්‌මො, සඤ්‌ඤා පරිඤ්‌ඤෙය්‍යො ධම්‌මො, සඞ්‌ඛාරා පරිඤ්‌ඤෙය්‍යො ධම්‌මො, විඤ්‌ඤාණං පරිඤ්‌ඤෙය්‍යො ධම්‌මො. ඉමෙ වුච්‌චන්‌ති, රාධ, පරිඤ්‌ඤෙය්‍යා ධම්‌මා. කතමා ච, රාධ, පරිඤ්‌ඤා? යො ඛො, රාධ, රාගක්‌ඛයො දොසක්‌ඛයො මොහක්‌ඛයො – අයං වුච්‌චති, රාධ, පරිඤ්‌ඤා. කතමො ච, රාධ, පරිඤ්‌ඤාතාවී පුග්‌ගලො? ‘අරහා’තිස්‌ස වචනීයං. ය්‌වායං ආයස්‌මා එවංනාමො එවංගොත්‌තො – අයං වුච්‌චති, රාධ, පරිඤ්‌ඤාතාවී පුග්‌ගලො’’ති. චතුත්‌ථං.
‘‘Pariññeyye ca, rādha, dhamme desessāmi pariññañca pariññātāviṃ puggalañca. Taṃ suṇāhi, sādhukaṃ manasi karohi; bhāsissāmī’’ti. ‘‘Evaṃ, bhante’’ti kho āyasmā rādho bhagavato paccassosi. Bhagavā etadavoca – ‘‘katame ca, rādha, pariññeyyā dhammā? Rūpaṃ kho, rādha, pariññeyyo dhammo, vedanā pariññeyyo dhammo, saññā pariññeyyo dhammo, saṅkhārā pariññeyyo dhammo, viññāṇaṃ pariññeyyo dhammo. Ime vuccanti, rādha, pariññeyyā dhammā. Katamā ca, rādha, pariññā? Yo kho, rādha, rāgakkhayo dosakkhayo mohakkhayo – ayaṃ vuccati, rādha, pariññā. Katamo ca, rādha, pariññātāvī puggalo? ‘Arahā’tissa vacanīyaṃ. Yvāyaṃ āyasmā evaṃnāmo evaṃgotto – ayaṃ vuccati, rādha, pariññātāvī puggalo’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-10. සත්‌තසුත්‌තාදිවණ්‌ණනා • 2-10. Sattasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-10. සත්‌තසුත්‌තාදිවණ්‌ණනා • 2-10. Sattasuttādivaṇṇanā
