| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৯. পরিপাচিতসিক্খাপদং
9. Paripācitasikkhāpadaṃ
১৯২. নৰমে মহানাগেসূতি মহাঅরহন্তেসু তিট্ঠমানেসু সন্তেসু, চেতকে পেস্সভূতে নৰকে ভিক্খূ নিমন্তেতীতি অধিপ্পাযো। ইতরথাতি ৰিভত্তিৰিপল্লাসতো ৰা পাঠসেসতো ৰা অঞ্ঞেন পকারেন। অন্তরং মজ্ঝং পত্তা কথা অন্তরকথাতি দস্সেন্তো আহ ‘‘অৰসান’’ন্তিআদি। পকিরীযিত্থাতি পকতা, ন পকতা ৰিপ্পকতাতি ৰুত্তে করিযমানকথাৰাতি আহ ‘‘করিযমানা হোতী’’তি। অদ্ধচ্ছিকেনাতি উপড্ঢচক্খুনা। তেহীতি থেরেহি।
192. Navame mahānāgesūti mahāarahantesu tiṭṭhamānesu santesu, cetake pessabhūte navake bhikkhū nimantetīti adhippāyo. Itarathāti vibhattivipallāsato vā pāṭhasesato vā aññena pakārena. Antaraṃ majjhaṃ pattā kathā antarakathāti dassento āha ‘‘avasāna’’ntiādi. Pakirīyitthāti pakatā, na pakatā vippakatāti vutte kariyamānakathāvāti āha ‘‘kariyamānā hotī’’ti. Addhacchikenāti upaḍḍhacakkhunā. Tehīti therehi.
১৯৪. লদ্ধব্বন্তি লদ্ধারহং। অস্সাতি ‘‘ভিক্খুনিপরিপাচিত’’ন্তিপদস্স। সম্মা আরভিতব্বোতি সমারম্ভোতি দস্সেন্তো আহ ‘‘সমারদ্ধং ৰুচ্চতী’’তি। পটিযাদিতস্সাতি পরিপাচিতস্স ভত্তস্স। গিহীনং সমারম্ভোতি গিহিসমারম্ভো, কত্ৰত্থে চেতং সামিৰচনং। ততোতি ততো ভত্ততো। অঞ্ঞত্রাতি ৰিনা। তমত্থং ৰিৰরন্তো আহ ‘‘তং পিণ্ডপাতং ঠপেত্ৰা’’তি। পদভাজনে পন ৰুত্তন্তি সম্বন্ধো। ‘‘ঞাতকপৰারিতেহী’’তিপদং ‘‘অসমারদ্ধো’’তিপদে কত্তা। অত্থতোতি ভিক্খুনিঅপরিপাচিতঅত্থতো। তস্মাতি যস্মা অত্থতো সমারদ্ধোৰ হোতি, তস্মা।
194.Laddhabbanti laddhārahaṃ. Assāti ‘‘bhikkhuniparipācita’’ntipadassa. Sammā ārabhitabboti samārambhoti dassento āha ‘‘samāraddhaṃ vuccatī’’ti. Paṭiyāditassāti paripācitassa bhattassa. Gihīnaṃ samārambhoti gihisamārambho, katvatthe cetaṃ sāmivacanaṃ. Tatoti tato bhattato. Aññatrāti vinā. Tamatthaṃ vivaranto āha ‘‘taṃ piṇḍapātaṃ ṭhapetvā’’ti. Padabhājane pana vuttanti sambandho. ‘‘Ñātakapavāritehī’’tipadaṃ ‘‘asamāraddho’’tipade kattā. Atthatoti bhikkhuniaparipācitaatthato. Tasmāti yasmā atthato samāraddhova hoti, tasmā.
১৯৫. পটিযাদিতন্তি পটিযত্তং। পকতিযা পটিযত্তং পকতিপটিযত্তন্তি দস্সেন্তো আহ ‘‘পকতিযা’’তিআদি। মহাপচ্চরিযং পন ৰুত্তন্তি সম্বন্ধো। তস্সাতি তস্সেৰ ভিক্খুনো। অঞ্ঞস্সাতি ততো অঞ্ঞস্স ভিক্খুনো।
195.Paṭiyāditanti paṭiyattaṃ. Pakatiyā paṭiyattaṃ pakatipaṭiyattanti dassento āha ‘‘pakatiyā’’tiādi. Mahāpaccariyaṃ pana vuttanti sambandho. Tassāti tasseva bhikkhuno. Aññassāti tato aññassa bhikkhuno.
১৯৭. ভিক্খুনিপরিপাচিতেপীতি পিসদ্দো ভিক্খুনিঅপরিপাচিতে কা নাম কথাতি দস্সেতীতি। নৰমং।
197.Bhikkhuniparipācitepīti pisaddo bhikkhuniaparipācite kā nāma kathāti dassetīti. Navamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ওৰাদৰগ্গো • 3. Ovādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৯. পরিপাচিতসিক্খাপদৰণ্ণনা • 9. Paripācitasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৯. পরিপাচিতসিক্খাপদৰণ্ণনা • 9. Paripācitasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৯. পরিপাচিতসিক্খাপদৰণ্ণনা • 9. Paripācitasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৯. পরিপাচিতসিক্খাপদৰণ্ণনা • 9. Paripācitasikkhāpadavaṇṇanā
