| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
9. පරිපාචිතසික්‌ඛාපදං
9. Paripācitasikkhāpadaṃ
192. නවමෙ මහානාගෙසූති මහාඅරහන්‌තෙසු තිට්‌ඨමානෙසු සන්‌තෙසු, චෙතකෙ පෙස්‌සභූතෙ නවකෙ භික්‌ඛූ නිමන්‌තෙතීති අධිප්‌පායො. ඉතරථාති විභත්‌තිවිපල්‌ලාසතො වා පාඨසෙසතො වා අඤ්‌ඤෙන පකාරෙන. අන්‌තරං මජ්‌ඣං පත්‌තා කථා අන්‌තරකථාති දස්‌සෙන්‌තො ආහ ‘‘අවසාන’’න්‌තිආදි. පකිරීයිත්‌ථාති පකතා, න පකතා විප්‌පකතාති වුත්‌තෙ කරියමානකථාවාති ආහ ‘‘කරියමානා හොතී’’ති. අද්‌ධච්‌ඡිකෙනාති උපඩ්‌ඪචක්‌ඛුනා. තෙහීති ථෙරෙහි.
192. Navame mahānāgesūti mahāarahantesu tiṭṭhamānesu santesu, cetake pessabhūte navake bhikkhū nimantetīti adhippāyo. Itarathāti vibhattivipallāsato vā pāṭhasesato vā aññena pakārena. Antaraṃ majjhaṃ pattā kathā antarakathāti dassento āha ‘‘avasāna’’ntiādi. Pakirīyitthāti pakatā, na pakatā vippakatāti vutte kariyamānakathāvāti āha ‘‘kariyamānā hotī’’ti. Addhacchikenāti upaḍḍhacakkhunā. Tehīti therehi.
194. ලද්‌ධබ්‌බන්‌ති ලද්‌ධාරහං. අස්‌සාති ‘‘භික්‌ඛුනිපරිපාචිත’’න්‌තිපදස්‌ස. සම්‌මා ආරභිතබ්‌බොති සමාරම්‌භොති දස්‌සෙන්‌තො ආහ ‘‘සමාරද්‌ධං වුච්‌චතී’’ති. පටියාදිතස්‌සාති පරිපාචිතස්‌ස භත්‌තස්‌ස. ගිහීනං සමාරම්‌භොති ගිහිසමාරම්‌භො, කත්‌වත්‌ථෙ චෙතං සාමිවචනං. තතොති තතො භත්‌තතො. අඤ්‌ඤත්‍රාති විනා. තමත්‌ථං විවරන්‌තො ආහ ‘‘තං පිණ්‌ඩපාතං ඨපෙත්‌වා’’ති. පදභාජනෙ පන වුත්‌තන්‌ති සම්‌බන්‌ධො. ‘‘ඤාතකපවාරිතෙහී’’තිපදං ‘‘අසමාරද්‌ධො’’තිපදෙ කත්‌තා. අත්‌ථතොති භික්‌ඛුනිඅපරිපාචිතඅත්‌ථතො. තස්‌මාති යස්‌මා අත්‌ථතො සමාරද්‌ධොව හොති, තස්‌මා.
194.Laddhabbanti laddhārahaṃ. Assāti ‘‘bhikkhuniparipācita’’ntipadassa. Sammā ārabhitabboti samārambhoti dassento āha ‘‘samāraddhaṃ vuccatī’’ti. Paṭiyāditassāti paripācitassa bhattassa. Gihīnaṃ samārambhoti gihisamārambho, katvatthe cetaṃ sāmivacanaṃ. Tatoti tato bhattato. Aññatrāti vinā. Tamatthaṃ vivaranto āha ‘‘taṃ piṇḍapātaṃ ṭhapetvā’’ti. Padabhājane pana vuttanti sambandho. ‘‘Ñātakapavāritehī’’tipadaṃ ‘‘asamāraddho’’tipade kattā. Atthatoti bhikkhuniaparipācitaatthato. Tasmāti yasmā atthato samāraddhova hoti, tasmā.
195. පටියාදිතන්‌ති පටියත්‌තං. පකතියා පටියත්‌තං පකතිපටියත්‌තන්‌ති දස්‌සෙන්‌තො ආහ ‘‘පකතියා’’තිආදි. මහාපච්‌චරියං පන වුත්‌තන්‌ති සම්‌බන්‌ධො. තස්‌සාති තස්‌සෙව භික්‌ඛුනො. අඤ්‌ඤස්‌සාති තතො අඤ්‌ඤස්‌ස භික්‌ඛුනො.
195.Paṭiyāditanti paṭiyattaṃ. Pakatiyā paṭiyattaṃ pakatipaṭiyattanti dassento āha ‘‘pakatiyā’’tiādi. Mahāpaccariyaṃ pana vuttanti sambandho. Tassāti tasseva bhikkhuno. Aññassāti tato aññassa bhikkhuno.
197. භික්‌ඛුනිපරිපාචිතෙපීති පිසද්‌දො භික්‌ඛුනිඅපරිපාචිතෙ කා නාම කථාති දස්‌සෙතීති. නවමං.
197.Bhikkhuniparipācitepīti pisaddo bhikkhuniaparipācite kā nāma kathāti dassetīti. Navamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 3. ඔවාදවග්‌ගො • 3. Ovādavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 9. පරිපාචිතසික්‌ඛාපදවණ්‌ණනා • 9. Paripācitasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 9. පරිපාචිතසික්‌ඛාපදවණ්‌ණනා • 9. Paripācitasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 9. පරිපාචිතසික්‌ඛාපදවණ්‌ණනා • 9. Paripācitasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 9. පරිපාචිතසික්‌ඛාපදවණ්‌ණනා • 9. Paripācitasikkhāpadavaṇṇanā
