| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
9. பரிபாசிதஸிக்கா²பத³வண்ணனா
9. Paripācitasikkhāpadavaṇṇanā
பரிபாசிதந்தி பரிபாகமாபாதி³தங், யதா² லப⁴தி, ததா² கத்வா ட²பிதந்தி வுத்தங் ஹோதி. தேனாஹ ‘‘நேவ தஸ்ஸா’’திஆதி³ தஸ்ஸாதி யோ பரிபு⁴ஞ்ஜெய்ய, தஸ்ஸ பி⁴க்கு²னோ. பி⁴க்கு²ஸ்ஸ கு³ணங் பகாஸெத்வாதி ‘‘அய்யோ பா⁴ணகோ, அய்யோ ப³ஹுஸ்ஸுதோ’’திஆதி³னா (பாசி॰ 195) கு³ணங் பகாஸெத்வா . பிண்ட³பாதந்தி பஞ்சன்னங் போ⁴ஜனானங் அஞ்ஞதரங். கம்மஸாத⁴னோயங் ஸமாரம்ப⁴ஸத்³தோ³தி ஆஹ ‘‘ஸமாரத்³த⁴’’ந்தி. படியாதி³தஸ்ஸாதி ஸம்பாதி³தஸ்ஸ. யஸ்மா ஞாதகப்பவாரிதேஹி பி⁴க்கு²ஸ்ஸ அத்தா²ய அஸமாரத்³தோ⁴பி பிண்ட³பாதோ அத்த²தோ ஸமாரத்³தோ⁴வ ஹோதி யதா²ஸுக²ங் ஹராபேதப்³ப³தோ, தஸ்மா ‘‘ஞாதகப்பவாரிதானங் வா ஸந்தக’’ந்தி வுத்தங்.
Paripācitanti paripākamāpāditaṃ, yathā labhati, tathā katvā ṭhapitanti vuttaṃ hoti. Tenāha ‘‘neva tassā’’tiādi tassāti yo paribhuñjeyya, tassa bhikkhuno. Bhikkhussa guṇaṃ pakāsetvāti ‘‘ayyo bhāṇako, ayyo bahussuto’’tiādinā (pāci. 195) guṇaṃ pakāsetvā . Piṇḍapātanti pañcannaṃ bhojanānaṃ aññataraṃ. Kammasādhanoyaṃ samārambhasaddoti āha ‘‘samāraddha’’nti. Paṭiyāditassāti sampāditassa. Yasmā ñātakappavāritehi bhikkhussa atthāya asamāraddhopi piṇḍapāto atthato samāraddhova hoti yathāsukhaṃ harāpetabbato, tasmā ‘‘ñātakappavāritānaṃ vā santaka’’nti vuttaṃ.
உப⁴யத்தா²தி பரிபாசிதாபரிபாசிதேஸு. அவஸேஸேதி பி⁴க்கு²னிபரிபாசிதேபி யாகு³க²ஜ்ஜகப²லாப²லாதி³கே ஸப்³ப³த்த². நிமித்தோபா⁴ஸபரிகதா²விஞ்ஞத்திவஸேன பன அவஸேஸேபி து³க்கடதோ ந முச்சதி.
Ubhayatthāti paripācitāparipācitesu. Avaseseti bhikkhuniparipācitepi yāgukhajjakaphalāphalādike sabbattha. Nimittobhāsaparikathāviññattivasena pana avasesepi dukkaṭato na muccati.
பரிபாசிதஸிக்கா²பத³வண்ணனா நிட்டி²தா.
Paripācitasikkhāpadavaṇṇanā niṭṭhitā.
