| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๙. ปริปาจิตสิกฺขาปทวณฺณนา
9. Paripācitasikkhāpadavaṇṇanā
ปริปาจิตนฺติ ปริปากมาปาทิตํ, ยถา ลภติ, ตถา กตฺวา ฐปิตนฺติ วุตฺตํ โหติฯ เตนาห ‘‘เนว ตสฺสา’’ติอาทิ ตสฺสาติ โย ปริภุเญฺชยฺย, ตสฺส ภิกฺขุโนฯ ภิกฺขุสฺส คุณํ ปกาเสตฺวาติ ‘‘อโยฺย ภาณโก, อโยฺย พหุสฺสุโต’’ติอาทินา (ปาจิ. ๑๙๕) คุณํ ปกาเสตฺวา ฯ ปิณฺฑปาตนฺติ ปญฺจนฺนํ โภชนานํ อญฺญตรํฯ กมฺมสาธโนยํ สมารมฺภสโทฺทติ อาห ‘‘สมารทฺธ’’นฺติฯ ปฎิยาทิตสฺสาติ สมฺปาทิตสฺสฯ ยสฺมา ญาตกปฺปวาริเตหิ ภิกฺขุสฺส อตฺถาย อสมารโทฺธปิ ปิณฺฑปาโต อตฺถโต สมารโทฺธว โหติ ยถาสุขํ หราเปตพฺพโต, ตสฺมา ‘‘ญาตกปฺปวาริตานํ วา สนฺตก’’นฺติ วุตฺตํฯ
Paripācitanti paripākamāpāditaṃ, yathā labhati, tathā katvā ṭhapitanti vuttaṃ hoti. Tenāha ‘‘neva tassā’’tiādi tassāti yo paribhuñjeyya, tassa bhikkhuno. Bhikkhussa guṇaṃ pakāsetvāti ‘‘ayyo bhāṇako, ayyo bahussuto’’tiādinā (pāci. 195) guṇaṃ pakāsetvā . Piṇḍapātanti pañcannaṃ bhojanānaṃ aññataraṃ. Kammasādhanoyaṃ samārambhasaddoti āha ‘‘samāraddha’’nti. Paṭiyāditassāti sampāditassa. Yasmā ñātakappavāritehi bhikkhussa atthāya asamāraddhopi piṇḍapāto atthato samāraddhova hoti yathāsukhaṃ harāpetabbato, tasmā ‘‘ñātakappavāritānaṃ vā santaka’’nti vuttaṃ.
อุภยตฺถาติ ปริปาจิตาปริปาจิเตสุฯ อวเสเสติ ภิกฺขุนิปริปาจิเตปิ ยาคุขชฺชกผลาผลาทิเก สพฺพตฺถฯ นิมิโตฺตภาสปริกถาวิญฺญตฺติวเสน ปน อวเสเสปิ ทุกฺกฎโต น มุจฺจติฯ
Ubhayatthāti paripācitāparipācitesu. Avaseseti bhikkhuniparipācitepi yāgukhajjakaphalāphalādike sabbattha. Nimittobhāsaparikathāviññattivasena pana avasesepi dukkaṭato na muccati.
ปริปาจิตสิกฺขาปทวณฺณนา นิฎฺฐิตาฯ
Paripācitasikkhāpadavaṇṇanā niṭṭhitā.
