| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၉. ပရိပာစိတသိက္ခာပဒဝဏ္ဏနာ
9. Paripācitasikkhāpadavaṇṇanā
ပရိပာစိတန္တိ ပရိပာကမာပာဒိတံ, ယထာ လဘတိ, တထာ ကတ္ဝာ ဌပိတန္တိ ဝုတ္တံ ဟောတိ။ တေနာဟ ‘‘နေဝ တသ္သာ’’တိအာဒိ တသ္သာတိ ယော ပရိဘုဉ္ဇေယ္ယ, တသ္သ ဘိက္ခုနော။ ဘိက္ခုသ္သ ဂုဏံ ပကာသေတ္ဝာတိ ‘‘အယ္ယော ဘာဏကော, အယ္ယော ဗဟုသ္သုတော’’တိအာဒိနာ (ပာစိ. ၁၉၅) ဂုဏံ ပကာသေတ္ဝာ ။ ပိဏ္ဍပာတန္တိ ပဉ္စန္နံ ဘောဇနာနံ အညတရံ။ ကမ္မသာဓနောယံ သမာရမ္ဘသဒ္ဒောတိ အာဟ ‘‘သမာရဒ္ဓ’’န္တိ။ ပဋိယာဒိတသ္သာတိ သမ္ပာဒိတသ္သ။ ယသ္မာ ဉာတကပ္ပဝာရိတေဟိ ဘိက္ခုသ္သ အတ္ထာယ အသမာရဒ္ဓောပိ ပိဏ္ဍပာတော အတ္ထတော သမာရဒ္ဓောဝ ဟောတိ ယထာသုခံ ဟရာပေတဗ္ဗတော, တသ္မာ ‘‘ဉာတကပ္ပဝာရိတာနံ ဝာ သန္တက’’န္တိ ဝုတ္တံ။
Paripācitanti paripākamāpāditaṃ, yathā labhati, tathā katvā ṭhapitanti vuttaṃ hoti. Tenāha ‘‘neva tassā’’tiādi tassāti yo paribhuñjeyya, tassa bhikkhuno. Bhikkhussa guṇaṃ pakāsetvāti ‘‘ayyo bhāṇako, ayyo bahussuto’’tiādinā (pāci. 195) guṇaṃ pakāsetvā . Piṇḍapātanti pañcannaṃ bhojanānaṃ aññataraṃ. Kammasādhanoyaṃ samārambhasaddoti āha ‘‘samāraddha’’nti. Paṭiyāditassāti sampāditassa. Yasmā ñātakappavāritehi bhikkhussa atthāya asamāraddhopi piṇḍapāto atthato samāraddhova hoti yathāsukhaṃ harāpetabbato, tasmā ‘‘ñātakappavāritānaṃ vā santaka’’nti vuttaṃ.
ဥဘယတ္ထာတိ ပရိပာစိတာပရိပာစိတေသု။ အဝသေသေတိ ဘိက္ခုနိပရိပာစိတေပိ ယာဂုခဇ္ဇကဖလာဖလာဒိကေ သဗ္ဗတ္ထ။ နိမိတ္တောဘာသပရိကထာဝိညတ္တိဝသေန ပန အဝသေသေပိ ဒုက္ကဋတော န မုစ္စတိ။
Ubhayatthāti paripācitāparipācitesu. Avaseseti bhikkhuniparipācitepi yāgukhajjakaphalāphalādike sabbattha. Nimittobhāsaparikathāviññattivasena pana avasesepi dukkaṭato na muccati.
ပရိပာစိတသိက္ခာပဒဝဏ္ဏနာ နိဋ္ဌိတာ။
Paripācitasikkhāpadavaṇṇanā niṭṭhitā.
