| Library / Tipiṭaka / ತಿಪಿಟಕ • Tipiṭaka / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā |
೯. ಪರಿಪಾಚಿತಸಿಕ್ಖಾಪದವಣ್ಣನಾ
9. Paripācitasikkhāpadavaṇṇanā
೧೯೨. ನವಮಸಿಕ್ಖಾಪದೇ – ಮಹಾನಾಗೇ ತಿಟ್ಠಮಾನೇತಿ ಭುಮ್ಮತ್ಥೇ ಉಪಯೋಗವಚನಂ, ಮಹಾನಾಗೇಸು ತಿಟ್ಠಮಾನೇಸೂತಿ ಅತ್ಥೋ। ಅಥ ವಾ ಮಹಾನಾಗೇ ತಿಟ್ಠಮಾನೇ ‘‘ಅದಿಸ್ವಾ’’ತಿ ಅಯಮೇತ್ಥ ಪಾಠಸೇಸೋ ದಟ್ಠಬ್ಬೋ। ಇತರಥಾ ಹಿ ಅತ್ಥೋ ನ ಯುಜ್ಜತಿ। ಅನ್ತರಾಕಥಾತಿ ಅವಸಾನಂ ಅಪ್ಪತ್ವಾ ಆರಮ್ಭಸ್ಸ ಚ ಅವಸಾನಸ್ಸ ಚ ವೇಮಜ್ಝಟ್ಠಾನಂ ಪತ್ತಕಥಾ। ವಿಪ್ಪಕತಾತಿ ಕಯಿರಮಾನಾ ಹೋತಿ। ಸಚ್ಚಂ ಮಹಾನಾಗಾ ಖೋ ತಯಾ ಗಹಪತೀತಿ ಅದ್ಧಚ್ಛಿಕೇನ ಓಲೋಕಯಮಾನಾ ಥೇರೇ ಪವಿಸನ್ತೇ ದಿಸ್ವಾ ತೇಹಿ ಸುತಭಾವಂ ಞತ್ವಾ ಏವಮಾಹ।
192. Navamasikkhāpade – mahānāge tiṭṭhamāneti bhummatthe upayogavacanaṃ, mahānāgesu tiṭṭhamānesūti attho. Atha vā mahānāge tiṭṭhamāne ‘‘adisvā’’ti ayamettha pāṭhaseso daṭṭhabbo. Itarathā hi attho na yujjati. Antarākathāti avasānaṃ appatvā ārambhassa ca avasānassa ca vemajjhaṭṭhānaṃ pattakathā. Vippakatāti kayiramānā hoti. Saccaṃ mahānāgā kho tayā gahapatīti addhacchikena olokayamānā there pavisante disvā tehi sutabhāvaṃ ñatvā evamāha.
೧೯೪. ಭಿಕ್ಖುನಿಪರಿಪಾಚಿತನ್ತಿ ಭಿಕ್ಖುನಿಯಾ ಪರಿಪಾಚಿತಂ, ಗುಣಪ್ಪಕಾಸನೇನ ನಿಪ್ಫಾದಿತಂ; ಲದ್ಧಬ್ಬಂ ಕತನ್ತಿ ಅತ್ಥೋ। ಪದಭಾಜನೇ ಪನಸ್ಸ ಭಿಕ್ಖುನಿಞ್ಚ ತಸ್ಸಾ ಪರಿಪಾಚನಾಕಾರಞ್ಚ ದಸ್ಸೇತುಂ ‘‘ಭಿಕ್ಖುನೀ ನಾಮ ಉಭತೋಸಙ್ಘೇ ಉಪಸಮ್ಪನ್ನಾ, ಪರಿಪಾಚೇತಿ ನಾಮ ಪುಬ್ಬೇ ಅದಾತುಕಾಮಾನ’’ನ್ತಿಆದಿ ವುತ್ತಂ। ಪುಬ್ಬೇ ಗಿಹಿಸಮಾರಮ್ಭಾತಿ ಏತ್ಥ ಪುಬ್ಬೇತಿ ಪಠಮಂ। ಸಮಾರಮ್ಭೋತಿ ಸಮಾರದ್ಧಂ ವುಚ್ಚತಿ, ಪಟಿಯಾದಿತಸ್ಸೇತಂ ಅಧಿವಚನಂ। ಗಿಹೀನಂ ಸಮಾರಮ್ಭೋ ಗಿಹಿಸಮಾರಮ್ಭೋ। ಭಿಕ್ಖುನಿಯಾ ಪರಿಪಾಚನತೋ ಪಠಮಮೇವ ಯಂ ಗಿಹೀನಂ ಪಟಿಯಾದಿತಂ ಭತ್ತಂ, ತತೋ ಅಞ್ಞತ್ರ ತಂ ಪಿಣ್ಡಪಾತಂ ಠಪೇತ್ವಾ ಅಞ್ಞಂ ಭುಞ್ಜನ್ತಸ್ಸ ಆಪತ್ತಿ, ತಂ ಪನ ಭುಞ್ಜನ್ತಸ್ಸ ಅನಾಪತ್ತೀತಿ ವುತ್ತಂ ಹೋತಿ। ಪದಭಾಜನೇ ಪನ ಯಸ್ಮಾ ಞಾತಕಪವಾರಿತೇಹಿ ಭಿಕ್ಖುಸ್ಸತ್ಥಾಯ ಅಸಮಾರದ್ಧೋಪಿ ಪಿಣ್ಡಪಾತೋ ಅತ್ಥತೋ ಸಮಾರದ್ಧೋವ ಹೋತಿ, ಯಥಾಸುಖಂ ಆಹರಾಪೇತಬ್ಬತೋ, ತಸ್ಮಾ ಬ್ಯಞ್ಜನಂ ಅನಾದಿಯಿತ್ವಾ ಅತ್ಥಮೇವ ದಸ್ಸೇತುಂ ‘‘ಗಿಹಿಸಮಾರಮ್ಭೋ ನಾಮ ಞಾತಕಾ ವಾ ಹೋನ್ತಿ ಪವಾರಿತಾ ವಾ’’ತಿ ವುತ್ತಂ।
194.Bhikkhuniparipācitanti bhikkhuniyā paripācitaṃ, guṇappakāsanena nipphāditaṃ; laddhabbaṃ katanti attho. Padabhājane panassa bhikkhuniñca tassā paripācanākārañca dassetuṃ ‘‘bhikkhunī nāma ubhatosaṅghe upasampannā, paripāceti nāma pubbe adātukāmāna’’ntiādi vuttaṃ. Pubbe gihisamārambhāti ettha pubbeti paṭhamaṃ. Samārambhoti samāraddhaṃ vuccati, paṭiyāditassetaṃ adhivacanaṃ. Gihīnaṃ samārambho gihisamārambho. Bhikkhuniyā paripācanato paṭhamameva yaṃ gihīnaṃ paṭiyāditaṃ bhattaṃ, tato aññatra taṃ piṇḍapātaṃ ṭhapetvā aññaṃ bhuñjantassa āpatti, taṃ pana bhuñjantassa anāpattīti vuttaṃ hoti. Padabhājane pana yasmā ñātakapavāritehi bhikkhussatthāya asamāraddhopi piṇḍapāto atthato samāraddhova hoti, yathāsukhaṃ āharāpetabbato, tasmā byañjanaṃ anādiyitvā atthameva dassetuṃ ‘‘gihisamārambho nāma ñātakā vā honti pavāritā vā’’ti vuttaṃ.
೧೯೫. ಪಕತಿಪಟಿಯತ್ತನ್ತಿ ಪಕತಿಯಾ ತಸ್ಸೇವ ಭಿಕ್ಖುನೋ ಅತ್ಥಾಯ ಪಟಿಯಾದಿತಂ ಹೋತಿ ‘‘ಥೇರಸ್ಸ ದಸ್ಸಾಮಾ’’ತಿ। ಮಹಾಪಚ್ಚರಿಯಂ ಪನ ‘‘ತಸ್ಸ ಅಞ್ಞಸ್ಸಾ’’ತಿ ಅವತ್ವಾ ‘‘ಭಿಕ್ಖೂನಂ ದಸ್ಸಾಮಾತಿ ಪಟಿಯತ್ತಂ ಹೋತೀ’’ತಿ ಅವಿಸೇಸೇನ ವುತ್ತಂ।
195.Pakatipaṭiyattanti pakatiyā tasseva bhikkhuno atthāya paṭiyāditaṃ hoti ‘‘therassa dassāmā’’ti. Mahāpaccariyaṃ pana ‘‘tassa aññassā’’ti avatvā ‘‘bhikkhūnaṃ dassāmāti paṭiyattaṃ hotī’’ti avisesena vuttaṃ.
೧೯೭. ಪಞ್ಚ ಭೋಜನಾನಿ ಠಪೇತ್ವಾ ಸಬ್ಬತ್ಥ ಅನಾಪತ್ತೀತಿ ಯಾಗುಖಜ್ಜಕಫಲಾಫಲೇ ಸಬ್ಬತ್ಥ ಭಿಕ್ಖುನಿಪರಿಪಾಚಿತೇಪಿ ಅನಾಪತ್ತಿ। ಸೇಸಂ ಉತ್ತಾನಮೇವ। ಪಠಮಪಾರಾಜಿಕಸಮುಟ್ಠಾನಂ – ಕಾಯಚಿತ್ತತೋ ಸಮುಟ್ಠಾತಿ, ಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ತಿಚಿತ್ತಂ, ತಿವೇದನನ್ತಿ।
197.Pañca bhojanāni ṭhapetvā sabbattha anāpattīti yāgukhajjakaphalāphale sabbattha bhikkhuniparipācitepi anāpatti. Sesaṃ uttānameva. Paṭhamapārājikasamuṭṭhānaṃ – kāyacittato samuṭṭhāti, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, ticittaṃ, tivedananti.
ಪರಿಪಾಚಿತಸಿಕ್ಖಾಪದಂ ನವಮಂ।
Paripācitasikkhāpadaṃ navamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೩. ಓವಾದವಗ್ಗೋ • 3. Ovādavaggo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೯. ಪರಿಪಾಚಿತಸಿಕ್ಖಾಪದವಣ್ಣನಾ • 9. Paripācitasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೯. ಪರಿಪಾಚಿತಸಿಕ್ಖಾಪದವಣ್ಣನಾ • 9. Paripācitasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೯. ಪರಿಪಾಚಿತಸಿಕ್ಖಾಪದವಣ್ಣನಾ • 9. Paripācitasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೯. ಪರಿಪಾಚಿತಸಿಕ್ಖಾಪದಂ • 9. Paripācitasikkhāpadaṃ
